O PAGKATAHOM!

Ni Glory Gwendolyn N. Vosotros

Kasingkasing nga puno sa paglaom,

Wala nay lain pang gihandom.
Taliwala sa kinabuhing naglagitom,
Sa mga pagsulay nga si bisan kinsa wala’y nagdahom.

Dili malikayan nga kita mahadlok sa itom nga mga panganod,

Apan kung atong hinumduman kung kinsa ang nagbarog niini sa likod
Wala’y rason aron kita sa kinabuhi mangluod,
Hinuon kita musimba, mudayeg ug muampo samtang mga tuhod giluhod.

Kahayag sa kaugmaon,
Kini sigurado atong maangkon.
Busa imbis nga magmahinadlukon,
Kita sa Diyos magkamasinugtanon.

Kita gisugo sa pagsabwag sa maayong balita,

Kini mao’y angayan natong imantala.
Tapuka ang mga tigulang, batan-on ug mga bata,
Ug isugid nga ang Diyos kanila nahigugma!

O pagkatahom!
Kung kitang tanan magatigom,
Sa paghimaya sa ngalan ni Hesus nga mao’y atong paglaom.
Mga tingog atong usahon sa pag-awit alang Kaniya aron Siya kanato mupahiyom!

Busa mga higala,

Isalikway na ang imong mga kabalaka.
Kinabuhing walay katapusan nga puno sa pagmaya mao’y paabuta,
Kay kini mao’y gisaad sa manluluwas ta!
 GINAMOS NGA NAPAN-OS
Ni Glory Gwendolyn N. Vosotros

Ang Diyos dili bakakon,

Iya gayud nga buhaton,
Kung unsa man ang Iyang giingon,
Tungod kay Siya matinumanon.

Dili Siya sama kanato,

Nga ang kasingkasing walay klaro.
Muingon tuod ug Oo,
Apan sa buhat nag-ingon dili ko.

Pulong sa Diyos maoy huptan ta,

Tinuod ang masaligan Siya ra.
Kay ang tawo maayo ra moistorya,
Apan mulimod kung paninglan na.

Apan kung ikaw mag-ampo sa Diyos,

Pangayua kini nga may kasingkasing nga tim-os.
Kay ang dili kabalo magpaubos,
Ang iyang mga pag-ampo mahisama sa ginamos nga napan-os.

Busa kung ikaw gustong dunggon Niya,

Mga sala iwadwad na.
Ayaw na kini ug tipiga,
Aron ang imong mga pag-ampo sa langit mangalimyon na.

Walay sala nga dili mapasaylo,

Kung ikaw sa gugma ni Hesus motoo.
Andam ang Diyos kanimo musapopo,
Kung ikaw nahinluan sa dugo ni Kristo.