Sagisag o Simbolo ng Bapor Tabo

1. Ang pabilog at hugis tabo ng Bapor Tabo ay naihahalintulad sa pamahalaan na walang

malinaw na kaanyuan, walang plano ng pagiging unahan, tagiliran, o hulihan tulad ng
pamumuno noon na yaring walang plano ng pagpapalakad at walang direksyon.

2. Ang mabagal ngunit mapagmalaking pagpapalakad ng Bapor Tabo ay kapilas ng pamahalaan

na halos hindi nakausad sa tatlong daang taong pamamahala sa Pilipinas.

3. Ang pagkakaroon ng dalawang lugar ng tao: sa kubyerta at sa ilalim ng kubyerta ay

nagpapakita ng hirarkiya ng uri ng mga tao at kapangyarihang umiiral sa sistema ng lipunan.
Ang mga “mataas” na uri ay tulad ng mga Kastila, mayayaman, at mga prayle habang ang mga
“abang” mamamayan ay tulad ng mga mestiso at indio.

4. Ang pagbubuga nito ng maitim na usok ay sumisimbolo sa pagkakalat ng mga masasamang

gawain at ang maingay na makina ay sagisag ng puro salita ngunit wala namang ginagawa.

5. Sa pagkakulapol ng pinturang puti ay kaparis ng pagpapanggap na malinis at marangal ngunit,

mababanaag pa rin ang mga dumi sa likod ng pintura tulad ng mga hindi makatarungang
pagbibilanggo at pagpatay, mga pang-aabuso, at katiwalian ng pamahalaan at simbahan.

6. Ang makina ang siyang tuwirang nagpapatakbo sa bilog na bapor (pamahalaan) na hindi alam
kung saan patungo at pabalik, ay siyang pamahalaang sibil, samantalang ang mga tikin ay siyang
mga kura na nagsasabi kung saan dapat patungo ang bapor (pamahalaan).

7. Ang Bapor Tabo na ibig durugin ang mga salambaw ay simbolo ng makasariling hangarin ng
pamahalaan at korporasyon ng mga prayle.