I kambing takutin Macan

Om Swastyastu
Kacerita ane malu di alas rangrang, ada pakulewargan I Kambing luh madan Ni
Rabi. Ngelah pianak aukud madan I Ubuh. Risedek sasih kapat, alase lumlum gadang, bet
ulian kekayuan ane mentik luwung. Tur tusing kuangan padang mentik di alase ento. Di alas
ento masih liu buron ane idup ditu sekadi, I Kedis, I Macan, I Sampi, I Bojog tur ane lenan.

Kacarita lantas jani I Kambing luh lakar ngulurin indria kema ke tengah alase ngajak
pianakne. I Kambing makedadua melila cita, ngulurin manahe liang.Risedek meseneng-
seneng, I Kambing saget tepukine teken I Macan Gading. I Macan bengong,sawireh tumben
nepukin buron buka keto, ngalih amah ke sawengkon kekuasaan I Macan. Ditu lantas I
Macan maekin tur metakon kene, “ ih iba buron soleh,nyen iba?. Dadi bani mai ngelincak ke
gumin awake.Awake madan I Macan Gading,ane nitahin sawengkon alase din. Sing ja ada
ane bani tekening awake”.

Ningehan munyin I Macan buka keto,masaut lantas I Kambing, “uduh cai macan,
mirib cai tusing nawang, kai suba madan I Kambing. Kai nyidang ngamatiang Macan lelima
acepokan tur amah kai. Yan I Kambing nenenan Krodha, jeg ruug alase nenenan, puun uli api
ane pesu uli awak kaine. Apang cai tatas nawang,di tanduk kaine nenenan melinggih Ida
Sang Hyang Tiga Wisesa.Yen cai makeneh mapas anake buke kai, sinah cai mati puun, tur
atman caine tan rahayu di kedituanne.”

Keto pasautne I Kambing masemu banggras. Ningeh munyin I Kambing Buka keto, I
Macan jeg Makesiab, muane seming, ngejer, takut, tur makecos malaib. Dugas I Macan
malaib Ngawag,ditu lantas kepanggih teken I Bojog kampunganne I Macan. I Bojog
matakon, “ ngudiang cai malaib runtag ngangsur ? ”, mesaut I Macan , “mara busan icang
kacunduk ngajak Buron aeng,awakne poleng,majenggot tur metanduk lanying.Ia ngorahang
ibane I Kambing,kone buron sakti tanpa tanding,cang nagih sarape teken boron sakti
totonan.Ento makrana cang melaib runtag”.

Di subane keto, ngakak pakruet I Bojog Kedek. Lantas nutur I Bojog, “ kene Macan,
jani icang ngorahin anake buka cai. I Kambing totonan tuising je buron ane sakti, sujatine I
Kambing anak belog. cang pidan taen masawitra teken ia, kewala jani cang mamusuh ngajak
ia,sawireh pidan ade wicara, nak mula I kambing tetedahan I Macan uli malu”. Ngelantur I
Bojog, “ jani kene, cai mejalan alih I Kambing,jeg tadah ia.Ia tusing nyidang nglawan, krana
ia sing saja sakti”. Mesaut I Macan, yening keto, cang misadiya ngalih I Kambing, sakewala
cai milu masih kema, buine ikuh caine apang mategul ajak awake. Saget sengkala apang ajak
dadua nemuang sengkala.
 Kacerita suba pada mategul ikuhne I Macan teken I Bojog, lantas kema ke tongos I
Kambing. Disubane matemu ajak I Kambing , I Bojog ngorahin I Macan apang nyarap I
Kambing. Mara lakar nyarap,Mesaut I Kambing. “Uduh Bojog makelo cang tusing nepukin
cai. Cai mejanji lakar ngemaang macan patpat ukud, ne jani mara aukud cai nyidayang
ngemang, sakewale kanggoang wireh basang icange sube layah. Ditu Imacan mapineh-pineh,
beh rage anggone mayah utang teken I Bojog.”

Rikala ento, ulian jejehne I Macan malaib tan matolihan. I Bojog milu masih
kakedeng, dapetange makadadua ulung di pangkunganne, Tendasne belah, polone makecrot,
batisne elung makadadua, laut mati. Ulian jejeh I Macan Teken I Kambing.

Nah keto suba buka tutur anake wikan, de ampah makta raga.pineh-pinehan malu
setonden melaksane. Apang tusing katiben sengkala, buka Macan ane takut teken I Kambing.
Jemetang mlajahan dewek, apang tusing kene uluk-uluk teken anak len. Klungkung
semarapura, kirang langkung sinampura...

Om santih santih santih Om