Humayo kang mahinahon sa gitna ng ingay at pagdudumali,
at tandaang may kapayapaan sa katahimikan. Hangga’t maaari, bagama’t hindi sumusuko Magkaroon ng mabuting pakikitungo sa lahat ng mga tao Sabihin ang katotohanan nang tahimik at malinaw; at pakinggan ang kapwa tao, kahit na yaong mahina ang isip at mangmang sila’y mayroon din naming maisasalaysay. Iwasan ang mga taong maingay at mapanlaban. Sila ay nakakasira ng kasiglahan ng diwa Kapag ihahambing mo ang iyong sarili sa iba ikaw ay magiging palalo at makararamdam ng kagipitan, sapagka’t walang salang may mga nilalang na higit na mapalad kaysa sa iyo at mayroon ding lalong kulang- palad. Matuwa ka sa iyong mga tagumpay at sa iyong mga binabalak. Laging magkaroon ngg malasakit sa iyong tungkulin, maging ito man ay hamak, ito’y isang tunay na ari-arian na nagbabagong kapalarang dulot ng panahon. Maging maingat sa pakikipagkalakaran, sapagka’t ang mundo’y tigib ng panlilinlang. Ngunit huwag maging bulag sa mga kabutihan; maraming taong may marangal na mithiin at saan man ang buhay ay puno ng kabayanihan. Maging matapat sa sarili. Higit pa rito, huwag magbalatkayo sa pagmamahal. Huwag ding maging mapagalinlangan sa pag-ibig sapagka’t sa kabila ng mga kawalang-sigla at kabiguan, mananatili pa rin ito tulad ng damo. Pakinggan ang payo ng nakatatanda, maluwag sa puso na isuko ang siakbo ng kabataa Luminang ng lakas ng loob na magiging pananggalang mo sa mga di- inaasahang hilahil. Ngunit huwag magkimkim ng ligalig sa iyong guni-guni. Maraming pangamba ang bunga lamang ng kapaguran at pamamanglaw. Sa ibabaw ng sapat na pagtitimpi, maging mabait. Ikaw ay supling ng sansinukob, gaya rin ng mga punong kahoy at mga bituin; may karapatan ka sa daigdig. Maging malinaw man o hindi sa iyo, tiyak na ang daigdig ay namumukadkad sa iyo tulad ng inaasahan. Kaya mabuhay ng payapa ayon sa kalooban ng Diyos ano man ang pagkikilala mo sa Kanya, ano man ang iyong mga mithiin, sa nakalilitong kaguluhan sa buhay, PAIRALIN ANG KAPAYAPAAN SA IYONG KALULUWA. sa kabila ng mga pagkukunwari, kabagutan, at mga bigong pangarap, maganda pa rin ang daigdig. Magpakaingat. Sikaping maging maligaya.