1

A Lu Ai Tara

Yesu a bum ntsa na tara hkaw ga ni gaw Yesu a tsaw ra myit shingni hpe bu
hpun dargaw let asak hkrung lu na matu sharin matsun ai mungga ni re. A lu ai ngu
ai gaw Karai Kasang sharawng awng ai ngu ai lachyum re.

1. Wenyi hta matsan mayan rai nga ai ni gaw a lu ma ai; kaning rai n me law,
sumsing lamu a mungdan shanhte a mungdan rai nga ma lu ai. (Blessed are the
poor in spirit: for theirs is the kingdom of heaven). Mahte 5:3.

A. Wenyi hta matsan mayan rai nga na matu gaw, tinang hta wenyi lam
gawng kya nga ai hpe dum ra ai. Tara Agyi 16:20-21 hta Samsun, Delila a hkalem
ai majaw kara zen kau ai hkam ra.Karai Kasang a wenyi shi hte rau n rai mat ai.
Dai majaw n gun n rawng mat ai. Matsan mayan rai mat ai. Hparishe ni, tara
shadik nna, wenyi lam hta sut su dum ma ai. Rai tim, Yesu shanhte hpe lup hte
bung ai ni ngu daru kau ai (Mahte 23:23-28). Luka 18:10-14 hta Yesu ga shadawn
tsun ai hta mung Hparishe wa Wenyi lam hta hkum tsup dum ai.Kang hta ai wa
chyawm gaw shi hta gawng kya dum ai n hkum tsup dum ai hte Karai Kasang kaw
hpyi sit shang ai. Dai majaw Kang hta ai wa dinghpring ai lam hparishe wa hta
grau lu la ai. Dai re ai majaw Wenyi hta sut su ra ai hpe dum chye ai ni, dai hpe
hkan tam na ra ai. Shaloi Karai Kasang hpe shagroi gara ai myit masin hte hkan
tam na mara ai rai nna, Karai Kasang a mungdan hte seng ai masha ni tai wa na re.

B. Wenyi hta gawng kya nga ai wa gaw, Karai Kasang sha jaw ya, shabyin
ya lu ai hpe mu chye wa na rai nna, Yesu a si hkam ai hte hkrung rawt ai chyeju
hta sut su ai wa tai wa na re. Wenyi hta sut su ai ngu ai hpe chye na wa na ra ai.
Luka 12:16-21 hta sut gan law htam wa ai hta, masha a asak rawng ai n rai nga
tsun da nga ai. Dai ga shadawn hta Sahti wa shi a yi hkau na hta nsi naisi grai ngai
ai majaw, dum kaba galaw la nna sut rai ni hpe shinggyin da nhtawm “nye myit
masin e law law ning a matu arai kaja law law nang shinggyin da ni ai, myit masin
e asan apan rai nga nu,lu nu sha nu, pyaw pyaw rai nga nu, ngu na we ai. Shaloi
Karai Kasang gaw dai wa hpe, masha angawk e, dai na jang na a myit masin hpe
dawm la kau ya na ra ai: dai rai nna, nang mahakwng shachyip da ai arai ni gaw,
gade a matu rai na ra ta? Tinang a matu sut gan mahkawng nna, Karai Kasang hta
n lu n su ai wa gaw shing re ai wa rai nga ai, nga nna Yesu sharin da nga ai. Wenyi
hta matsan mayan rai nga ai ni gaw, tinang hkrai hpa mung ndang di lu ai majaw,
Karai Kasang hpe tam ai hte manoi manat wa ai majaw Karai Kasang a kashu
kasha ni tai wa na re.
 2

C. Wenyi hta matsan mayan hkrum nga ai wa gaw, Karai Kasang hpe tsep
kawp kam hpa manoi manat ra ai hpe chye wa ai re.Yawhan 15:4f ‘Ngai hta noi
nga mu, ngai mung nanhte hta noi nga na, shaloi nanhte asi law law si na’. Yesu
tsun ai ‘nanhte ngai hta noi nga nna,nye ga mung nanhte hta noi nga ai rai yang
nanhte hpa hpyi mayu yang hpyi mu, hpyi ai hte maren nanhte hpe madat ya na’
nga ai re. (Karai Kasang hpe n hkrit, n hkungga ai majaw tsa, kan-ni lu ai ni; nse
nsa ai hku asak hkrung ai ni;dinghku hten ai ni; mawp sha ai ni;lagut damya ni;
masha sat ai lam ni byin nga ai).Karai Kasang hpe tsep kawp kam hpa manoi
manta ai nig aw, Karai Kasang a mungdan a Sali wunli hkam la lu na re.

D. Wenyi hta matsan mayan rai nga ai wa gaw, Karai Kasang a chyeju hte
sha hkrung nga lu ai hpe dum chye nna, shagrit shanem ai myit lu la ma ai.
Tingyeng marin myit ni shagyawm kau nna, Karai Kasang sharawng awng ai hku
asak hkrung na myit shajin lu ai. Karai Kasang a matu asak hkrung gwi wa ai. Dai
majaw dai ni gaw, sumsing mungdan a kashu kasha ni hkam la lu na lam ma hkra
hkam la lu na re. Mahte. 16:24 hta Yesu gaw “Ngai hpang de sa wa mayu ai wa
kadai rai tim mung, tinang a hkum hpe nyet kau lu na rai nna, shi a wu dang hpai
let ngai kaw hkan nang ru ga” ngu nna tsun sharin da nga ai.
Kam hpa manoi manat ai hte Karai Kasang kaw ap da let asak hkrung ai wa
sha Karai Kasang a ga madat nna, Karai Kasang sharawng awng ai hku hkawm sa
na re majaw, sumsing mungdan gaw shanhte a mungdan rai na ra ai.

2. Yawn hkyen hkrum ai ni gaw a lu ma ai, kaning rai n me law shanhte shalan
shabran ai hkrum na mara ai. (Blesses are they that mourn: for they shall be
comforted).

A. Yawn hkyen hkrum ai shaloi she, tinang hta makam masham nga n nga;
nga yang mung ngang kang ai makam masham rai nga ai kun? jep joi yu lu wa ai.
Masha gaw yawn hkyen hkrum ai shaloi Karai Kasang hpe hpyi jahtau chye nga ai.
Shaloi, dai wa Karai Kasang a shalan shabran ai tsaw ra myit hpe hkam la lu na re.

B. Masha wa a yawn hkyen, tsin yam tsin dam hkrum sha ra ai hpe mu mada
nna, yawn hkyen hkrum ai ni gaw a lu ma ai. Masha wa hte rau yawn hkyen ai,
hkam sha lawm ai tsaw ra myit gaw, Karai Kasang a tsaw ra myit ningja re.

C. Tinang a yubak mara hpe mu nna, myit malai ai hte yawn hkyen ai wa a
lu ai. Yubak a shabrai si ai hpe chye nna myit malai lu nna, Karai Kasang hpang de
nhtang wa mai ai. Dai wa hpe Yesu mara raw ya nna, Shi hta masha ningnan tai wa
shangun ai re. II Kor 7:10 hta tsun ai gaw, Karai Kasang ra ai yawn hkyen ai gaw,
 3

hkye hkrang la ai hkrum hkra, n tsang ra ai myit malai ai hpe shachyen nga ai,
mungkan ga a yawn hkyen ai chyawm gaw, si mat ai hpe shachyen nga ai.
Yawn hkyen hkrum ai aetn hta Karai Kasang a shalan shabran ai lam hkam
la lu ai wa gaw, teng sha Karai Kasang a chyeju hkam la lu ai wa rai nga ai.

3. Myit sumnung ai ni gaw a lu ma ai, kaning rai n me law, shanhte mungkan

ga hpe madu lu na mara ai.(Blessed are the meek: for they shall inherit the
earth).
Myit sum nung ai ngu ai gaw, hkrit ai, dang sha mayu ai wa hpe galoi mung
asum jaw ai, jaw tim n jaw tim baw gum hkap la ai myit masa n re. English ga
hkum meek ngu ai a chyum masa lachyum gaw 1) Karai Kasang a ga madat mara
na matu jin jin rai nga ai myit masin 2) Karai Kasng a hkang da ai tara ni hpe kabu
gara hkap la hkan san a matu jin jin rai nga ai myit masin hpe ngu ai re.

A. Karai Kasang hpe myit masin hkum hkrang ma hkra hte kam hpa let
tinang hkum hpe Karai Kasang kaw tsep kawp ap da ai wa re. Luka 1:38 hta Mari
tsun ai, na a ga hte maren ngai hta rai wa u ga. Mahte 26:39-42 hta Yesu , nye a
myit n rai, na a myit she rai u ga kyu hpyi ai re. Karai Kasang kaw ap ai asak
hkrung lam hpe Karai Kasang lit la ya nga ai. Dai majaw mungkan gaw shanhte
hpe n dang kau lu ai. Shanhte she mungkan hpe dang kau ai ni rai na re.

B. Jaw ang ai aten hta masin pawt nna, n jaw ai aten hta masin n pawt ai wa
re. Tinang hte, tinang a akyu hkra wa yang masin pawt ai gaw yu maya shinggyim
masha a sat lawat re. Rai tim, masha wa a matu (sh) wuhpawng a matu n tara, dang
sha roi rip, zing ri, baw daw sha, mawp sha, ai ni a matu tsaw ra matsan dum ai
myit hte masin pawt let shalawt na matu ap nawng shakut ai gaw, Karai Kasang a
mungdan gaw de ai lam hta shang lawm ai lam re. Karai Kasang a mungdan a
maka kum la gaw tsaw ra ai, ngwi pyaw simsa ai hte tara rap ra ai lam ni re. Dai
majaw, tinang a tingyeng a matu n rai, jahten sharun na matu n rai, hkye la na,
garum shingtau na, masha wa a tsin yam kaw na shalawt na matu pru ai sin pawt
lam gaw jaw nga ai. Ga shadawn, Bu Hkawm Laika 12:3 hta “Moshe gaw, ga
ningtsa ting na masha nlang hta myit grau sumnung ai wa rai nga ai”ngu tsun
shagrau da nga ai. Moshe gaw n tara ai hpe makawp ai shaloi lata lai mat nna,
Egutu masha hpe sat ga ai. Egutu hkaw hkam Hpara U hpe, ‘nye masha ni hpe dat
u’ ngu gwi gwi tsun ai wa re. Pawt sindawng let Israela ni hpe daru sharin ai. Rai
tim dai lam ni gaw, tinang a myit ra ai lam a matu n rai, Karai Kasang a sharawng
awng ai lam hpe madung dat nna tsun shaga, galaw gun hpai ai majaw, Moshe hpe
sumnung ai myit masin lu la ai wa re ngu tsun ai re. Yesu mung Karai Ksang a
sharawng awng ai lam hpe masha myi man n tau ai sha gwi gwi tsun sharin ai re
.Dai majw hparishe ni a asak hkrung lam shut nga ai ngu gwi gwi tsun ai (Mahte
 4

23:23-28) . Nawku htingnu kaw n tara ai hku amyat htuk, tinang a tinggyeng a
matu sut tam la ai hpe pawt sindawng nna, pum hkum saboi ni hpe galau kau ya ai
re (Mahte 21:12-13). Mahte laika 11:29 hta “nye a lam sharin la mu” ngu tsun
sharin let Karai Kasang a mungdan a matu, Karai Kasang sharawng awng ai lam
hpe masha myi man n tau ai sha Karai Kasang a myi man tau let gwi gwi tsun
sharin mu, galaw gun hpai mu ngu kasi madun ai lam re.
Mungkan hpe madu lu na ngu ai gaw, Karai Kasang moi kaw nna ga sadi
jaw da ai hpe madu la lu na ngu ai re. Ga shadawn, Abraham hpe Ningpawt
Ninghpang 15:7 hta “Ndai mung hpe na a sali wunli shatai na matu jaw na nga nna,
Hkaladea masha ni nga ai Ura mare kaw nna nang hpe shaga woi wa ai Yehowa
gaw ngai rai nga nngai” ngu Yehowa tsun ai. Tara Jahprang. 4:38 hta “Nang hta
grau kaba nna, grau law ai amyu ni hpe na a man na shi shaden kau ya nna, dai ni
rai nga ai hte maren shanhte a lamu ga hta nang hpe woi shawn nna, sali wunli
madu shangun na nga, shi a nsam kaba hte Egutu mung kaw nna shi a man de shaw
wa nit dai” nga tsun da nga ai. Karai Kasang a ga madat let kam sham ai hte shi a
ga sadi ni hpe madu la lu ai lam ni re. Tinang ra ai lam hpe lata nna, tinang ra ai
hku asak hkrung yang Hkanan mung hpe n madu la lu na ma ai. Kam sham ai hte,
shagrit shanem let Karai Kasang sharawng awng ai hku asak hkrung jang ‘na
mungdan du wa rit ga ngu ai’ yesu sharin ya ai kyu hpyi ga hte maren anhte kaw
du wa na re.Yesu du sa ai shaloi ga sadi jaw ai gaw 1) simsa ai lam( shalom) ,ndai
mungkan n jahten lu ai simsa ai lam lu la na.Kaning re ai lam mung anhte hpe
Karai a tsaw ra myit hte n jahka kau ya lu sai, ngu ai re. 2) N’ gun atsam, marin
myit, tingyeng myit, sin pawt myit hpe up hkang lu ai atsam ningja lu la shangun
na.
Dai majaw myit sumnung ai ni gaw Yesu Hkristu a up hkang ai hpe tsep
kawp hkam la nna, madu Yesu sharin da ai kasi hku asak hkrung ai ni re ai majaw,
Karai Kasang a kasha majing ni rai nna, Karai Kasang hpan da ai mungkan hpe
madu lu ai ni rai na. Mungkan a mayam tai ai kaw nna lawt ai ni rai na re.

4. Dinghpring ai hpe kawsi hpang gara nga ai ni gaw a lu ma ai: kanng rai n me
law, shanhte hkru kat wa lu na mara ai. (Blessed are they which do hunger and
thirst after righteousness: for they shall be filled) Mahte 5:6.

Kawsi hpang gara ai gaw hkrung nga ai ngu ai a kumla re.Si ai ni kaw si
hpang gara ai lam n nga ma ai. Karai Kasang sha jaw ya lu ai dinghpring ai hpe
kawsi hpang gara ai gaw, Karai Kasang hte shi a sharawng awng ai lam hpe chye
mayu, hkan nang mayu, madu la lu mayu ai lam re. Chyum laika hti lagawn,
nawku n kam sa wa, kyu hpyi lagawn wa, chyum laika hpe n kam hkan nang wa rai
jang, wenyi hta si ai de du wa ai kum la re. Luka 15:11-24 hta dam mat ai kasha:
24 “ndai ngai sha gaw si mat sai, ya bai hkrung sali ai, mat mat sai, ya bai mu la
 5

sali ai” ngu nna Karai Kasang hte tsan mat ai, n seng mat ai kum la hpe shaleng
dan nga ai re. Mahte 19:16-22;Marku.10:17-22; Luka 18:18-23 ni hta aya lu ai
masha n htum n wai asak hpe lu la mayu ai. Yesu shi hpe lu malu hpe kau da gwi
ai daram, n htum n wai asak hpe marin marin nni? Ngu dai wa hpe san ai re. Mahte
8:20; Luka 9:57-58 hta masha langai Yesu kaw hkan nang na tsun ai shaloi, Yesu
gaw,chyahkyawn ni nhkun lu ma ai, ntsa malen pyen ai u ni mung, u yup lu ma ai;
dai masha kasha chyawm gaw baw tawn na shara pyi n lu nga ai, ngu nna tsun ai
hta nang gaw prat a tsin yam ma hkra hpe hkam jan lu ai hku nna nye a hpang hkan
nang gwi nni? ngu san ai lam rai nga ai.Mahte 10:37; Luka 14:26 hta “ngai hpe
tsaw ra ai hta Kanu/wa, kashu kasha hpe grau tsaw ra ai rai yang, ngai hte n ging
ai” ngu Yesu tsun sharin ai re.
Hkristan asak hkrung lam gaw Karai Kasang hte shi a tara ni hpe chye ai sha
n rai, dinghpring ai lam gaw si hkrung si htan lam daram ahkyak ai hku marin
marit ai lam re. Hkan sharau, shakut shadik shatup ai lam re.
Dinghpring ai ngu ai gaw, 1) Tara rap ra ai hpe marin marit ai (Amo5:24). )
2) Karai Kasang hte masha hpe tsaw ra let ap nawng daw jau ai lam re. 3) Karai
Kasang hte jaw ang ai hku htinglu/lai ai lam re.

5. Matsan chye dum ai ni gaw a lu ma ai: kaning rai n me law shanhte matsan
dum la ai hkrum na mara ai. (Blessed are the merciful:for they shall obtain
mercy). Mahte. 5:7.

Matsan chye dum ai ngu ai gaw, masha wa hpe tinang a akyu matu hpa
mung nlawm ai sha, lama ma kaw na hkyam sa shangun mayu ai, shalawt la mayu
ai tsaw ra myit hpe ngu ai re. Dai gaw Karai Kasang a tsaw ra myit ningja re. Karai
Kasang hpe kade tsaw ra ai gaw masha hpe kade tsaw ra ai ngu ai shadawn
shadang hte she daw dan la mai nga ai. Ga shadawn, Kaja ai Samari mau mwi hpe
yu ai shaloi, Hkristan asak hkrung lam gaw, tingyeng a matu sha hkrung nga na
matu n rai, masha wa a matu asak hkrung na matu re.Mahte 7:2 hta ‘nanhte jeyang
ai hku hkan nna,nanhte jeyang ai hkrum na marin dai’.Mahte 6:14-15 hta tsun ai
gaw ‘masha ni a shut hpyit ai hpe nanhte raw kaw ya myit yang gaw, nanhte a shut
hpyit ai hpe mung raw kau ya na’. Mahte 25 hta hpang jahtum n htoi e sagu the bai
nam hpe garan ginhka ai zawn, Yesu gaw yawng hpe pai hkra gin hka nna, nkau
mi hpe sumsing mungdan de, nkau mi hpe ngarai de gin hka na hta mung, masha
wa ru yak jam jau ai shaloi kade tsaw ra myit hte garum shingtau ai ngu ai ntsa hta
daw dan ai lam lawm na nga tsun sharin da nga ai.Matsan dum chye ai ni gaw
Yesu hte myit ningja langai sha rai nna, Yesu mung shanhte hpe matsan dum lanu
lahku la na re.
 6

6. Myit san seng ai ni gaw a lu ma ai:kaning rai n me law, shanhte gaw Karai
Kasang hpe mu lu na maru ai. (Blessed are the pure in heart: for they shall see
God).Mahte 5:8.

Htung hkying hkringhtawng hku shinggan shingni hpraw san shakut ai hta,
myit masin kata san seng ai hpe tsun ai re. Shinggan hku yu yang makam masham
nga ai zawn rai tim, myit masin awu asin rai yang gaw myit san seng ai wa n rai
nga ai. Mahte.23:27 hta Hparishe ni shinggan shingni hku makam masham hte
seng ai tara shadik dum tim, myit masin hta tinggyeng myit machyu ai, Karai a
sharawng awng ai lam hpe n tam ai majaw Yesu shanhte hpe lup hte bung ai ngu
tsun shadum ai re. Karai Kasang hpe mu lu na matu, nhten ai myit n rawng ai sha;
n ju n dawng, awu asin re ai myit hpe yeng seng kau na ahkyak ai. Karai Kasang
hpe kadai mung myi hte nmu lu ai. Yehowa Moshe hpe ‘nang nye myi man nmu lu
na re, nye myiman mu lu ai ni teng sha si na ngu tsun sharin wu ai. Yawhan 1:18
hta Karai Kasang hpe kadai mung nmu yu ai. Dai majaw Karai Kasang hpe mu lu
na ngu ai gaw, 1) Karai Kasang a lam hpe hkum tsup kup hkra chye na lu, shi a
myit ningja, lata amu ni hpe chye na wa lu na ngu ai re. 2) myit san seng yang sha
Karai Kasang hte htinglu/lai kanawn mazum lu na mara ai. Karai Kasang mung
chyoi pra ai wenyi hku shi hta shanu nga na rai nna, myit masin kaw na asan apra
mu lu na, chye na hkam la lu na, ngu ai re.

7. Shangwi shapyaw chye ai ni gaw a lu ma ai: kaning rai n me law,shanhte hpe

Karai Kasang a kasha ni ngu shamying na maru ai.(Blessed are the
peacemakers:for they shall be called the children of God).Mahte 5:9.

Gali/law lam, gasat gala lam hpe shazim ya ai, simsa lam nga wa hkra galaw
shakut ai ni hpe tsun ai re. Masha nju na tsang, jahpwoi asawng na tsang, dukhka
hkrum na tsang ai majaw, koi ai hku lapran nga ai ni hpe tsun mayu ai n rai. Shawa
a gahkin gumdin lam hpe n yu, ngwi pyaw simsa lam hpe n yu ai sha tinang a
akyu, tinang hte tinang a dinghku, jinghku jingyu nga mu nga mai lam a matu sha
asak hkrung ai ni hpe tsun ai n rai. Shalom ngu ai ngwi pyaw simsa lam gaw kalu
kaba, bawngring wa na matu, matsan nga ai lam ni mat mat hkra shakut ai hpe tsun
ai re. Dai hpe hkan galaw ai wa a lu ai ngu ai re. Ahkayk lam madung gaw 1)
Tinang a myit masin shawng Karai Kasang hta ngwi pyaw simsa ai lam lu la ra ai.
Hpa majaw nga yang Yesu Hkrsitu gaw ngwi pyaw simsa lam a madu re .2) Ga
law ga la, gasat, n ju n dawng lam ni sim na matu hte, Karai Kasang hte masha
lapran teng man ai ganawn mazum lam nga hkra galaw ai lam re.
Karai Kasang hte shinggyim masha, masha shada ngwi pyaw simsa hkra
shakut ai, galaw ai ni gaw, Yesu Hkrsitu galaw ai amu bungli hpe hkan galaw nga
 7

ai ni re ai majaw Karai Kasang a kasha ni ngu tsun ai re ( Roma 15:32;16:20;

Hpilipi 4:9; 2; Korinhtu 13:11; Hebre 13:20-21; I Timohti 5:23).

8.Dingman lam majaw zingri zingrat hkrum ai ni gaw a lu ma ai, kaning rai n
me law, sumsing lamu a mungdan, shanhte a mungdan rai nga malu ai. Nye a
lam majaw, masha ni gaw nanhte hpe asawng asang di nna zingri zingrat nga
ma ai hte, masu ai hku hkan let mara amyu myu shagun da myit dai shaloi e,
nanhte a lu myit dai. Kabu nna pyaw pyaw rai nga mu, kaning rai n me law,
sumsing lamu hta e nanhte a shabrai kaba nga mali dai, nanhte a shawng a
myihtoi ni hpe mung shanhte dai hte maren zingri zingrat di kau manu ai. (
Blessed are they which are persecuted for righteousness’ sake: for theirs is the
kingdom of heaven.Happy are you when people insult you and persecute you and
tell all kinds of evil lies against you because you are my followers. Be happy and
glad, for a great reward is kept for you in heaven.This is how the prophets who
lived before you were persecuted). Mahte 5:9-12.

Hkristan ni a asak hkrung lam hta Hkristu a tengman ai matsun maroi hku
tsun shaga, asak hkrung ai shaloi, asawng asang, shatan n hkan, zingri zingrat lam
ai hkrum hkra ra nga ga ai. Asawng asang ringri ringzat ai lapran hta Hkrsitan
langai hku ding ding man man hkrung nga ai gaw jet Hkrsitan ni a ningja re. Yesu
Hkristu madun lai wa sai ningja nan rai nga ai. Dai zawn re ai Hkrsitan ni a asak
hkrung lam hta shinggyim masha ni n jaw ya lu ai ngwi pyaw sim sa ai lam lu la na
ngu Yesu ga sadi jaw da nga ai (Yawhan 16:33). Shanhte hte rau Yesu Hkrsitu rau
nga nga ai ( Mahte 28: 20).
Sisa hkawhkam hpe n naw ku ai majaw zingri zingrat hkrum ai ni; tinang
kam sham ai Yesu Hkrsitu a lam hpe hkan hkaw tsun ai majaw zingri zingrat
hkrum ai ni hpung labau hta adan aleng anhte mu lu ga ai. Jet ai Hkristan langai
hku ding ding man man Yesu hpe kam sham let, asak hkrung ai a majaw zingri
hkrum ai rai yang gaw, dai gaw Yesu a lagaw hkang hkan ai lam re majaw a lu ai.
Yesu mung Kawa Karai Kasang a mungdan a matu ding ding man man hkaw tsun
ask hkrung ai majaw, n ju n dawng ai ni nga wa nna, wudang ntsa hta zingri zingrat
hkrum sha lai wa sai re. Raitim Karai Kasang a hpung shingkang hta bai hkrung
rawt ai hte sumsing tingnyang hta ningngai nga sai re. Yesu Hkrsitu hte rau
zingri/rat hkrum jang Yesu Hkrsitu hte rau Mungdan shang lu na
(Roma.8:17).Hkristu hte rau si jang Hkristu hte rau hkrung rawt na ra ai. Yesu
Hkristu a marang e hkam sharang yang, Yesu Hkrsitu hte rau sumsing mungdan
hta ningngai nga lu na re(2 Tim 1:11-12).
Yesu gaw shi a tsaw ra myit hpe tengman ai, tara rap ra ai, dinghpring ai hku
madun ai shaloi nsin kata de n htoi htoi shang wa nna asan sha, nsin kata na n hkru
n kaja ai lam ni mu lu ai zawn, n ding man ai hku asak hkrung nga ai ni ti nang a
 8

yubak mara ni dan dawng wa nna, dai n htoi hpe n ju ai ni mung nga lai wa sai ai.
Zingri zingrat hte asak du hkra gyam sat ai ni nga lai wa sai. Rai tim dai Yesu a
tsaw ra myit hpe, myit malai ai hte kabu gara hkam la ai ni, Yesu a tsaw ra myit hta
myit ngwi myit pyaw lam lu la nna, htani htana asak hpe lu la ma ai.

Madi shadaw ai laika ni:

1. Billy Graham, The Secret of Happiness (Great Britain: Richard Clay and
Company Ltd., 1959).
2. Henlee H. Barnette, Introduction Christian Ethics (Nashville, Tennessee:
Broadman Press, 1961).
3. William Barclay, The Daily Study Bible: The Gospel Of Metthew (Bangalore:
Theological Publications in India, 1994).
4. John MacArthur, The MacArthur Study Bible ( Nashville, Tennessee: Thomas
Neslon Inc, 2004).
5. D.A Carson, eds., New Bible Commentary (Leicester: Intervarsity Press,
2002).

Ginlen Shalai ai,

Rev. Dr. Lahpai Awng Li