Nanay, tatay gusto kong tinapay,

Ate, kuya gusto kong kape.

Lahat ng gusto ko ay susundin nyo.

Ang magkamali ay pipingutin ko.

Isa, dalawa, tatlo.

Larong pambata na sa atin ay tinuro

Nagbigay aliw sa ating mga puso.

Tara ulitin natin, halika't maglaro.

Nanay, tatay gusto kong tinapay.

Ate kuya gusto kong kape.

Lahat ng gusto ko ay susundin niyo.

Ang magkamali ay pipingutin ko.

Isa, dalawa, tatlo.

Teka, teka, parang mali kaibigan ko,

Pansin ko lang habang inaawit natin to.

Diba ganyan naman talaga tayo.

Dapat ibinigay lahat ng gusto,

Diba ganyan naman talaga tayo,

Dapat sinusunod lahat ng luho.

Di man masunod, ayon,

Magdadabog,

Magwawala,

Mambubugbog

Magngangawa.

Di man lang natin naisip lahat ng hirap,

Pait,

Dalamhati,

Sakit,

Kirot

At pighati

na dinaranas nila

maibigay lamang ang ating nginangawa.

Nanay, tatay, mga taong nagmamahal satin ng tunay.

Binabalewala lahat ng hirap,

Pangangailangan lamang ay maibigay.

Tinitiis lahat ng pagod,

Sa kanilang pagkakayod,

Maghapon mang magpa ikot-ikot,

Para lamang makasahod,

Mapakain ka lamang at ika'y mabusog.

Ngunit ikaw?

Oo ikaw!

Nasan ka buong araw?

Maghapon-kang lutang at sabaw,

Ano bang laman ng iyong balintataw?

Yung crush mo ba na pag asang maging kayo'y walang linaw?

Kaibigan, ito talaga ang malinaw,

Malinaw pa sa sikat ng araw.

Na sa magulang mo, walang ibang mahalaga kundi ikaw,

Kaya sana lang pagmamahal nila'y matanaw.

Bago pa mahuli ang lahat at itoy matunaw.

Pag-aaral ay pag-igihan,

Upang pag nakatapos ay masuklian,

Lahat ng pagpapagal nila'y mabigyan

Ng sapat na kabayaran.

Kaya kaibigan, laro ulit tayo.

Sabayan niyo ako.

Nanay, tatay, salamat sa binigay niyong buhay.

Ate, kuya tinuruan niyong mabuti.

Lahat ng gusto niyo ay susundin ko.

Pati ang pagod niyo ay papawiin ko.

Isa, dalawa, tatlo.