Diyos Ama sa langit, sinasamba at pinupuri ka namin. Ikaw
na aming Diyos at manlilikha. Kami ay nagpapasalamat sa di mabilang na pagpapala, pangangailangang ispiritwal at material na naipagkaloob mo na sa aming buhay. Ngayon, muling bumabaling kami syo, dahil kanino pa kami maaaring tumakbo? Ikaw ang tanging Diyos, tagapagkaloob ng lahat ng mga mabubuting handog. Naninikluhod kami na naway maipagkaloob mo sa amin, di karapatdapat na lingkod, ang buo at ganap na pagpapagaling ng aming ispiritu at kaluluwa, ng aming pag iisip, puso at kalooban; ng aming damdamin, alaala at imahinasyon; ng aming mga ugat, buto at katawan- ang buong pagkatao, mula sa tuktok ng ulo hanggang sa dulo ng aming mga paa. Hipuin mo ang bahagi ng aming katawan na nakakaramdam ng sakit at alalahanin. Ninanais namin ito upang umayon kami sa buhay na ninanais mo para sa amin. Ngunit kailangan namin ang aming kalusugan, lakas at enerhiya upang magampanan naming ganap ang pagtupad sa mga tungkulin ng estado ng buhay na nilaan mo sa habang panahon. Hinihiling namin ang pagpapagaling na ito sa ngalan ng iyong anak, si Hesus Nazareno, ANG MANGGAGAMOT. Nakamit na namin ang di matatawarang halaga ng biyaya at kapangyarihan ng pagpapagaling sa kanyang mahigpit na paghihirap at kamatayan sa krus. “Sa pamamagitan niya, natubos na tayo upang maging ganap. Sa pamamagitan ng kanyang sugat, tayo ay napagaling.” Salamat sa pagtugon mo sa panalanging ito ngayon na aming hinihiling, dahil kami ay tunay na nananalig sa salita ng iyong anak, Hesus Nazareno: “ Hingin mo at ikaw ay makatatanggap. Hanapin mo at ikaw ay makasusumpong. Kumatok at ikay pagbubuksan.” Bagaman, nalalaman na namin ang sagot mo “ Oo, gagawin ko. “ Maaari kaming maghintay upang maging ganap ang pagpapagaling. Kaya buong tiwala naming inilalagay ang aming sarili sa iyong mga kamay. Nalalaman naming ang kabutihang dulot ng karamdamang ito. Tanging hiling namin ay magdulot ang pagpapagaling na ito ng iyong karangalan at kaluwalhatian, na magpapabanal sa aming sarili at sa iba at makapagpapatatag ng pananampalataya at pag-asa sa iyong sambayanan. Amen.