TOPIK: SEMANTIK

1.0 SINOPSIS

Topik tu alai mantaika tirai kenang enggau sekeda definisyen semantik kelimpah ari
ke bejurai sereta meretika struktur reti dalam aspek-aspek reti denotasyen enggau
konotasyen, reti dalam konteks, kaul reti enggau daya idup, ubah reti enggau tukuh-
tukuh reti ari kaul semantik. Nangkanka nya, bisi diterangka enggau ngelansa
senentang aspek pengerembai reti, pengerupit reti enggau pemindah reti.
Nambahka nya, dikena meretika ubah reti ti lenak sereta menuku agi, bisi
dibantaika gaya iya nyadi dalam bungai jaku ti mungkur Sempama Rama enggau
Sempama Jaku Dalam.

Ba pengujung pelajar tu, bisi diagihka sekeda aktiviti baka bejuraika penemu sereta
enggau kereja latih ti mungkur batang pelajar dikena nyeridika penau enggau
pengelandik ti ditemu belalauka topik ti udah dipelajar.

2.0 ASIL PELAJAR

Udah tembu pelajar tu, bala ke ngulu kus tu dikarapka ulih:

2.1 Nemu penerang ngelansa enggau definisyen semantik,
2.2 Meretika struktur reti dalam aspek-aspek tu:
i. reti denotasyen enggau konotasyen,
ii. reti dalam konteks,
iii. kaul reti enggau daya idup,
iv. ubah reti, enggau
v. tukuh-tukuh reti ari kaul semantik.
2.3 Meretika senentang aspek pengerembai reti, penyempit reti enggau pemindah
reti,

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

1
 2.4 Ngelala bagi bungai jaku:
i. Sempama Rama
ii. Sempama Jaku Dalam

3.0 BATANG PELAJAR

3.1 Tirai kenang

Semantik nya siti bidang ti mansik sereta ngaga analisis reti leka jaku enggau
ayat. Leka jaku nya siti unit sebut ti bebas sereta ngembuan reti. Dalam jaku
kitai ulih ngenataika buah pikir, penemu, pengasai, emosyen, ulah enggau
perangai mensia. Pengaya leka jaku chukup beguna dikena mantaika kaul
komunikasyen ti menuku. Semakin mayuh leka jaku ditemu orang siku-siku,
semakin mayuh mega penemu tauka genteran jaku ti ulih dikenataika. Nyadi
dalam jaku Iban, leka jaku SEMANTIK setipak enggau leka jaku GENTILANG
RETI.

Semua jaku bepanggai bendar ba penemban reti dalam leka jaku enggau ayat.
Setiap jaku nya endang siti sistem ti dikena ngenataika reti nengah munyi ti
disebut maya bekomunikasyen. Reti nya ketebal agi tauka semua iya endang
bekait enggau kaul entara jaku enggau dunya jaku. Dunya jaku tu reti iya
konteks ti nyerungkai siti-siti aspek lingusitik ti disebut tauka dibantaika.

Nyadi lebuh mansik tauka nyidi senentang aspek jaku, nyagam reti nya siti
batang pelajar ti chukup ngerinduka ati taja pan iya berupai komplikated sereta
mar lebuh ti nyerungkai struktur jaku enggau kaul iya dalam komunikasyen.
Mansik gentilang reti indah enda baka kitai ke nyelam di lubuk dalam semilan
taja ditemu mar disagam tang tau ngasuh ati rindu terunda rindang bayam
pemanah bungai jaku enggau penalam reti jaku ti dikena dalam pengidup kitai
Iban besehari-hari.

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

2
 3.2 Definisyen

Leka jaku ‘semantik’ nya ti bendar asal iya leka jaku adjektif ari jaku bansa
Greek tauka Yunani ‘semantickos’ ti mai reti ‘beguna’ tauka ‘bisi reti’. Belabuh
ari nya leka jaku semantik nyadika tanda, simbol tauka lambang ti nyadi leka
jaku ti engkeman ngagai siti bidang linguistik ti mansik senentang reti. Leka
jaku semantik belabuh dikena Michel Breal dalam bup iya ti dikumbai
Semantic: Studies in the Science of Meaning, siku kaban Filologi bansa
Peranchis dalam taun 1883.

Di Malaysia, Kamus Dewan Edisyen Keempat nerangka semantik tu pansik

senentang reti leka jaku enggau kerembai reti seseleka leka jaku. Nyadi kenu
ku Radiah Yussoff dalam bup Linguistik Pengenalan, semantik nya pansik
senentang reti linguistik ke morfem, leka jaku, frasa enggau ayat dalam jaku
mensia.

Nyadi leka jaku ‘gentilang reti’ tu siti leka jaku baru ti belabuh dikena Dr.
Chemaline Anak Osup enggau Mr. Padang Anak Luna (2010) dalam bup
seduai ti dikumbai Morfologi madahka gentilang reti iya nya raban leka jaku ti
ngembuan reti ti bekaul enggau pangan diri ketegal ti ayan ba konteks ke
sama.

Nitihka John Lyons (1993), bidang semantik ujung iya nyadi malin ti engkeman
sereta praktikal ti ulih dipeda kelebih agi dalam bidang ‘perkamusan’ ti
mungkur tipologi, leksikologi enggau leksikografi sereta enggau ‘peristilahan’
sepemanjai jeman ukai semina di menua barat tang mega di serata dunya.
Taja pan pia, pansik dalam bidang semantik bisi buya diteraju lalu enda
dikenatika dalam pansik linguistik ketegal sekeda orang ke bisi ngembuan
penangi sekali ke reti tu tau dipansik sechara objektif tauka enda.

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

3
 Nyadi kenu ku Richards et al. (1989), semantik nya pansik senentang reti, iya
nya nama utai ti diayanka (diekspresyenka) ulih siti-siti jaku senentang dunya
alai kitai idup ke bendar tauka sebarang dunya jangka, dunya imaginasyen, ti
numpu ngagai analisis senentang leka jaku, frasa enggau ayat.

3.3 Struktur Reti

Dalam gentilang reti, agih struktur reti ulih dibagi ngagai aspek-aspek reti
denotasyen enggau konotasyen, reti dalam konteks, kaul reti enggau daya
idup, ubah reti enggau tukuh-tukuh reti ari kaul semantik.

3.3.1 Reti denotasyen enggau konotasyen

a. Reti denotasyen nya reti leka jaku tauka rambai jaku nya ti nyata,
segenda sereta bendar tauka reti ti bebatang baka ti diterangka ba
diksionari.

Chunto: gerah mata undang

Reti ti nyata nya mata undang ti meinggil-inggil, gerah sereta mudah
ditingkilka.

b. Reti konotasyen nya reti leka jaku tauka rambai jaku ti enda nyata
tauka enda segenda tang berupai belalai, besilup, bekelaung, belapik
sereta ngelipak ari reti leka jaku nya ti bendar.

Chunto: gerah mata undang

Reti rambai jaku gerah mata undang dalam konteks tu madahka
gaya sesebengkah utai tauka pengawa ti dipeda mudah diulih tauka
dikereja tang ke bendar iya jauh mar ti ngujungka niat tauka juluk ati
tau enda ulih japai tauka puntan.

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

4
 Dalam sesebengkah situasyen, reti konotasyen mega dikumbai reti
emotif tauka reti evaluatif. Sekeda leka jaku sinonim (sama reti) ti
ngembuan reti denotasyen ti sama tang ngembuan reti konotasyen ti
bebida.

Chunto: parai, lesi, laya, midang, mati, udah ninggal, udah nadai

Semua leka jaku tu mai reti denotasyen ti sama iya nya siti proses
dalam pengidup mensia lebuh bangkai beserara enggau semengat
tauka roh.

Taja pia, pengengkah tauka empas leka jaku tu bebida ba menua siti-
siti ketegal jaku Iban ti ngembuan mayuh varian jaku. Leka jaku
parai, lesi, laya, midang enggau mati nya endang mai reti denotasyen
ti nyata tang leka jaku udah ninggal enggau udah nadai nya
ngembuan reti konotasyen ti belapik sereta besilup.

3.3.2 Reti dalam konteks

Reti dalam konteks tu ngayanka reti seseleka jaku ti disebut dalam
komunikasyen ti ulih ditemu reti lebuh ti beratika gaya konteks iya
dikena dalam ayat.

Chunto:
1. Tapa kasut nya udah aus.
Reti iya tapa kasut ti nyau nadai agi gigi, nadai geru, lamus sereta
nipis laban suah dikena.

2. Aku aus laban hari kelalu panas.

Reti iya rangkai batang rekung laban kurang ngirup ai ti ngujungka
orang nya ikak.

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

5
 3.3.3 Kaul reti enggau daya idup
Chara milih enggau ngena leka jaku ti bekaul enggau daya idup ti
bepanggai ba tingkat enggau guna leka jaku nya dalam sesebuah
komuniti tauka sesebengkah raban bansa.

Chunto:
1. aka
Leka jaku siru dikena ngangauka menyadi enggau petunggal ke tuai
agi ari kitai

2. aya
Leka jaku siru dikena ngangauka bala menyadi enggau petunggal
lelaki ari sepiak apai tauka indai kitai, enggau orang lelaki bukai ke
lebih tuai ari kitai ke dikiraka tapak aya.

3.3.4 Ubah reti

Dalam aspek ubah reti, reti sekeda leka jaku berubah seraris enggau
ubah maya, ubah taun, ubah jeman sereta seranyut berubah nitihka
segang pemansang dunya sains, informasyen, teknologi enggau
komunikasyen ti bisi bekaul sosial dalam raban bansa. Ubah reti ti nyadi
ba sekeda reti leka jaku tau nyadi lebih ngerembai besai empas tauka
empa lalu tau mega ngerupit nyadi lebih sempit, lebih mimit.

1. Ngerembai reti
Keba nitihka Abdul Chaer (2003) dalam bup iya ti dikumbai Linguistik
Umum, dia iya madahka tambah tauka kerembai ubah reti nya
penyadi (gejala) ti nyadi ngagai seleka leka jaku tauka leksem ti
keterubah iya semina ngembuan siti reti tang udah nya berubah
mayuh reti bukai ketegal mayuh faktor bukai.

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

6
 Chunto sekeda reti leka jaku ti ngerembai besai
a. ngubat
Reti ti nyata nya madahka pengawa ti ngubat orang ke sakit
Reti ti baru leka jaku ngubat nyau ukai semina ngubat orang ke
sakit tang mega ngubat semua utai ti ukai mensia baka utai tupi
enggau utai tanam baka ke ngubat getah lebuh ke mutung, kereja
tauka nangkal getah.

b. pegi tauka bejalai

Menya reti leka jaku pegi tauka bejalai semina dikena madahka
pengawa sekeda orang lelaki ke suah mindah ngejangka menua
diri menaun ngagai menua bukai begigaka penemu, pemandai
sereta reta tengkira ngambi ke bisi nyadi reta pesaka tauka
pengeraja dikena ngidupka diri di menua diri lebuh udah pulai.
Nyadi diatu reti leka jaku pegi tauka bejalai udah berubah
ngerembai ti alai iya nyau mungkur pengawa sekeda mensia ke
udah pegi tauka bejalai nerengkahka diri ba planet bukai baka ba
bulan enggau planet Mars.

c. jematan
Reti leka jaku jematan ti selama nya titi tauka geretak ti digaga
nyadi sengkar meraka parit, sungai tauka entara sesebengkah
ruang ngambi ke bisi ditengah ari sepiak ngagai sepiak.
Nyadi diatu leka jaku jematan nyau udah ngerembai lalu mungkur
tanggung pengawa bala tuai raban bansa ke dikarapka nyadi
jematan entara perintah enggau bala nembiak redak di menua ke
dipegai sida.

2. Ngerupit reti
Ngerupit reti nya ubah ba sekeda leka jaku ti ngembuan reti ti

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

7
 semakin sempit, majak mimit ari iya ti keterubah. Penyadi (gejala) tu
tau nyadi ba sekeda leka jaku ti mudah kena seging penemban reti
leka jaku bukai masai dikena besehari-hari.

Chunto sekeda reti leka jaku ti ngerupit

a. Iban
Reti leka jaku Iban ti asal nya dikena madah orang selama ke ukai
manang tauka lemambang, dikena madahka seraban bansa
mensia enggau dikena madahka mensia mayuh.

Ari ketiga-tiga reti nya tadi, diatu reti leka jaku Iban ti masai dikena
kemaya hari tu nya dikena madahka seraban bansa asal ke diau di
Pulau Borneo. Nyadi kedua-dua reti ti bukai nya nyau majak nadai
dikena agi.

3. Pindah reti
Pindah reti nya ubah ke nganti reti leka jaku ari reti ti asal ngagai reti
baru ti. Ubah ti bansa tu suah nyadi ba sekeda leka jaku ti diinjau ari
leka jaku bansa bukai.

Chunto sekeda reti leka jaku ti pindah reti

a. laut
Reti leka jaku laut enti kelia menya endang dikena ngangau tauka
madahka nama seraban bansa ke dikumbai Melayu ke diatu.
Nyadi diatu jarang amat kitai madah bansa Melayu nya laut. Leka
jaku laut ti dikena diatu suah dikena nukar leka jaku tasik kelebih
agi ba nembiak rebak baru ke balat berasuk jaku enggau bansa
bukai.

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

8
 b. kampung
Reti leka jaku kampung ti selama jeman tu semina dikena
madahka rimba kayu tuai di kampung jerung tang diatu udah
berubah mai reti dikena madahka genturung tauka tumpuk
pendiau. Siti ari faktor kebuah ubah ti bansa tu tau nyadi laban
kena seging jaku bansa Melayu ti balat udah neresap lalu dikena
bala nembiak rebak baru.

Pindah reti mega suah nyadi dalam Bungai Jaku. Nyadi bungai jaku
tau dibagi ngagai dua bagi iya nya Sempama Rama enggau Jaku
Sempama Jaku Dalam.

i. Sempama Rama
Jaku Silup
- Silup Rama
- Silup Adat Basa & Siru
- Silup Peransang
- Silup Tangkan
- Silup Sindir
- Silup Kelangkung
- Silup Kemale tauka Kelese

Jaku Kelaung
- Kelaung Rama
- Kelaung Nyemetak

Sempama Sema Banding

- Sema Banding Ari Gaya Mensia
- Sema Banding Ari Gaya Utai Idup Bukai
- Sema Banding Ari Gaya Utai Ukai Idup

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

9
 Sempama Rambai Jaku Kelulu
- Kelulu Rama
- Rambai tauka Sulu Jaku

ii. Sempama Jaku Dalam

Jaku Tapis (Puisi)
- Timang Semain
- Timang Petara (Invokasyen)

Jaku Karung
- Melah Pinang (Nikah)
- Gawai Antu

3.3.5 Tukuh-tukuh reti ari kaul semantik

Sekeda tukuh-tukuh reti ti nubu ari kaul semantik
1. Sinonim
Leka jaku ti ngembuan reti ti sama tauka ampir sama.
Chunto: parai, mati, midang, lesi, laya, udah nadai, udah ninggal

2. Antonim
Leka jaku ti ngembuan reti ti belaban
Chunto: mati - idup
burak - chelum

3. Hiponim
Leka jaku ti ngembuan struktur reti dalam bungkur ti sama
Chunto: kereban berikan
senapang ikan, ginti, taut, bubu(buba), ensenga, pukat,
gansai, tiruk, etb

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

10
 4. Meronim
Leka jaku ti ngayanka bungkur ti semina sebagi aja
Chunto: stiring, injin, karburator, kusyen, cheremin, brek
- Semua sida tu meronim ngagai leka jaku kerita

5. Polisem
Seleka leka jaku ti ngembuan reti ti mayuh
Chunto: mata
i. Bedau mansau tauka puda (buah)
ii. Bedau mansau panduk tauka sumai (pemakai)
iii. Bedau mansau penemu tauka akal (mensia)
iv. Bedau mansau diproses (pengeraja asal baka minyak, gas, etb)

6. Homonim
Dua leka jaku tauka lebih ti ngembuan tukuh ti sama sekali ke ari
urup tauka sepil enggau sebut tang ngembuan reti ti bebida.
Chunto:
i. pasang 1 – ai sungai ti mudik ke ulu
ii. pasang 2 – penyampau duit ti nyadi entaruh maya nyabung tauka
bejudi
iii. pasang 3 – pengenap tesa ngagai selipar, kasut, baju etb

Homonim ulih dibagi ngagai tiga raban tauka bansa baka tu:
a. Homofon – leka jaku ti ngembuan sebut ti sama tang bebida ari
segi urup tauka sepil
i. massa – media massa
ii. masa – maya
 Jaku Iban ti tulin nadai ngembuan leka jaku ti bansa tu kelimpah
ari leka jaku injau ari jaku bansa bukai

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

11
 b. Homograf – leka jaku ti ngembuan segi urup tauka sepil ti sama
tang ngembuan sebut ti bebida
i. mati – anak sungai mit ti nyimpang ari batang sungai
iii. mati – parai, midang, laya, udah nadai, udah ninggal

c. Homonim – leka jaku ti ngembuan sebut, urup tauka sepil ti sama

tang enda sebaka reti
i. mulung 1 – sebansa utai tanam ti ngundan tepung sagu
ii. mulung 2 – ngumpul buah ti labuh

4.0 SIMPUL PELAJAR

Semantik tauka gentilang jaku tu siti bidang ti bedau tubah disidi tauka dipansik
kelebih agi dalam jaku Iban. Berindik ari nya, sapa-sapa ke bisi ngaga sidi tauka
pansik sigi balat begunaka pemuh, pengeliat ati sereta pengeransing ngambi ke ulih
dalam agi sagam, silik agi pansik ti ngujungka pansik senentang reti dalam leka jaku
tauka rambai jaku dalam siti-siti ayat nyamai ditemu sereta mudah diperetika.

Pelajar ti dibantai dalam topik tu chukup dikena mungkal menalan alai ngeruga
penemu enggau runding senentang gentilang reti. Taja pan pia, semua dikarapka
lebih angkun sereta ransing begigaka penemu ngambi ke bisi ditambah lalu dikena
ngentapka sistem jaku Iban ke jemah ila.

5.0 AKTIVITI & KEREJA LATIH

1. Giga lalu pejuraika senentang aspek-aspek reti denotatif enggau konotatif. Beri
chunto ngagai kedua-dua aspek tu.
2. Pejuraika sechara ngelansa senentang struktur reti dalam aspek ubah reti.
3. Giga chunto leka jaku tauka rambai jaku ti diserangkung dalam aspek
pengerembai reti, pengerupit reti enggau pemindah reti.

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

12
 Kereban sanding:

1. Abdullah Hassan (2002). Tatabahasa Bahasa Melayu: Morfologi dan Sintaksis

untuk Guru dan Pelajar. Pahang Darul Makmur: PTS Publications & Distributors
Sdn. Bhd.

2. Asraf (Ed) (1990). Bahasa Melayu Baku. Kuala Lumpur: Dewan Bahasa dan
Pustaka

3. Chemaline Osup enggau Padang Luna.(2010). Morfologi. Pegari Iban

Production

4. Nik Safiah Karim, Farid M. Onn, Hashim Hj. Musa, Abdul Hamid Mahmood
(2004). Tatabahasa Dewan, Edisi Baharu. Kuala Lumpur: Dewan Bahasa dan
Pustaka.

5. Raminah Hj. Sabran & Rahim Syam (1985). Kajian Bahasa untuk Pelatih
Maktab Perguruan, Petaling Jaya: Penerbit Fajar Bakti

6. Richards, J., Platt J. & Weber H. (1989). Longman Dictionary of Applied

Linguistics.

7. Majalah.
S. Nathesan.(2001). “Semantik dalam Bahasa Melayu: Satu Pandangan
Komprehensif.” Ddlam Dewab Bahasa, 1(9), 21-28

8. Internet
“Semantik”, http://www.tutor.com.my

SEMANTIK
KUS DALAM SERVIS 6 MINGGU JAKU IBAN DI IPG KAMPUS SARAWAK
HAROLD UNSIE LIBAN

13