Professional Documents
Culture Documents
Babae
Babae
Inang Laya
Babae ka
hinahangad, sinasamba
ipinagtatanggol
ikaw nama'y walang laya
ang daigdig mo'y
lagi lang isang tahanan
ganda lang ang pakinabang
sa buhay walang alam
ang pinto ng pagunlad
sa iyo'y laging nakasara
harapin mo
buksan mo
ibangon ang iyong pagkatao
babae ka
kalahati ka ng buhay
kung ikaw kaya'y wala
saan ang buhay ipupunla
pinatunayan mo
kaya mong magpaalila
ngunit kaya mo ring
magpalakad ng bansa
ang pinto ng pagunlad
ngayon sa iyo'y nakabungad
harapin mo
buksan mo
ibangon ang iyong pagkatao
babae ka
dahil sa akala ay mahina ka
halaga mo ay di nakikita
bisig mo nga sa lakas ay kulang
ngunit sa isip ka biniyayaan
upang ang tinig mo'y
maging mapagpasya
upang ikaw ay lumaya
lumaya ka
babae'y pinagpala
ang ganda ng daigdig
sa iyo nagmumula
babae ka...
Pagka’t Lalaki Ka
Ni Michael Coroza
I.
Pagkat lalaki ka, Anak,
Matuto kang umiyak.
Mapait langgasin ng luha ang gunita
O ang bagong sugat ng huling pagkadapa
Subalit malinis at subok ang bisa
Ng luha sa pagtanggal ng mga mikrobyo
Sa isip, puso at buong pagkatao.
II.
Minana mo, Anak,
Ang laksang pribilehiyo
Na pinagpasasaan
Ng mga nagtindig ng torre ng Babel,
Piramide, Koliseo,
Ziggurat, Templo,
Ang mga imperyo.
III
Ang babaeng kakambal
At altar ng lupang
Nagluwal, kumandili’t
Nagpalaki sa lahat
At siya ring hantungan,
Aangkin sa labi
Ng lahat sa wakas
Ay bina-bahagi,
Inari, inararo,
Ginawang pundasyon
Ng lahat ng edipisyo
Subalit nasadlak
Sa mantsa ng dugo
Sa kumot ng halaga,
Ang silbi sa kasaysaya’y
Winalang-saysay at binura.
IV
Pagkat ikaw ay lalaki,
Matuto kang pumatay.
Kitlin mo sa iyong sugat
Ang huwad na malay.
Sa akademya mo na lang
Ipatistis ang laman
At dugo ng huwad
Na malay mong pinaslang.