PAGLALARAWAN

ANG AKING INA

Jessica Laura C. Sy

“Hindi kumpleto ang isang tahanan kung wala itong ilaw”, banggit ng isa sa aking

mga guro noong ako’y bata. Hanggang ngayon naiisip ko pa rin ito sa tuwing nakikita ko

ang aking ina.

Matatag, mapagmahal. maasikaso, at maalagain; ilan lamang ito sa mga salitang

makapaglalarawan sa aking nag-iisa at walang katulad na ina. Josephine C. Sy ang

kanyang pangalan, isang magandang pangalan para sa isang ina na gagawin at hahamakin

ang lahat para sa kanyang anak. Nakikita ko siya bilang isang masinag na araw sa aking

pinakamadidilim na mga gabi; iyong tipo na wala akong malalapitan, lagi siyang naka-

agapay sa akin. Tila isang kumot ang aking ina, na yumayakap sa tuwing nalulungkot

ako. Walang oras na nawala siya sa aking tabi. Siya ang lahat ng magagandang bagay sa

mundo kahit na hindi siya perpekto katulad ng iba.

Sa kabilang dako, kahit ang pinakamagagandang ilaw, napupundi rin at nauubusan

rin ng buhay. Kaya naman aking pinahahalagahan ang bawat araw, oras, minuto, at

segundo na lumilipas na kasama ko ang aking ina, sapagkat siya ang kumukumpleto sa

aming tahanan at nagpapaliwanag sa bawat sulok nito.