Palis, Maria Camille D.

WIKA 1 W
2015-10022 CAS / BS Biology

K*pal

Sa loob ng isang unibersidad, iba’t iba ang pwedeng makita na uri o itsura ng tao: maitim,
kayumanggi, o maputi ang balat; matingkad o natural ang kulay ng buhok; tila ‘Maria Clara’ sa
unti at hina ng imik o parang sirena kung humiyaw; limang beses sa isang araw kumain o
pinagkakasya ang baong tinapay sa buong araw; halos dumikit na ang puwet sa silya sa silid-
aklatan o sa restobar; at ang mga umuuwi hawak ang kani-kaniyang bag o di kaya naman ay
kamay ng katabi maglakad. Marami pang ibang uri ng tao ang bumubuo sa populasyon ng isang
unibersidad, at ang pagkakaibang mga ito ay dulot ng samu't saring pinagmulan na lugar at
estado sa buhay ng mga tao na bumubuo ng populasyon na ito. Nakatali sa pagkakaiba ng lugar
na kinalakhan at estado sa buhay ay ang pagkakaiba ng kultura at wika ng mga indibidwal.

Kung ipababasa ko ang katagang “k*pal” sa isang tao na hindi kabilang sa populasyon ng
Elbi—University of the Philippines Los Baños o UPLB—maaaring iba ang magawa nilang
baybay rito. Wari ko ay ‘kapal’ ang unang papasok sa isip nila dahil hindi pamilyar ang ibang
maaaring termino sakanila. Dulot ng pagkakaiba ng kultura, pamumuhay, o kaugalian sa iba’t
ibang lugar, ang isang salita ay maaaring mag-iba ng kahulugan batay sa lugar kung saan ito
sinasalita.

Upang talakayin ang sosyolek sa Elbi, susuriin sa papel na ito ang isang salita na nahubog
ng kultura at lipunan sa Elbi. Isang pagsisiyasat ang ginawa kung saan walong (8) katugon, lahat
ay mag-aaral ng UPLB mula sa iba’t ibang kolehiyo, ang sumagot upang suriin ang napiling
salita. Ang salitang Elbi na tatalakayin ay ‘kupal’.

Kupal bilang Salitang Elbi

Para maging epektibo ang pagsusuri, sinigurado muna na ang ‘kupal’ ay pasok sa
kategoryang ‘salitang Elbi’ sa pamamagitan ng pagtukoy kung ang salita ba ay alam at/o
ginagamit ng mga mag-aaral at guro sa UPLB. Ayon sa nakalap na impormasyon, lahat nang
tumugon sa siyasat ay alam ang salitang ‘kupal’. Lahat din ng tumugon ay nagsabing ang
salitang ito raw ay ginagamit ng mga tao sa paligid nila, at kung sinu-sino ang mga nagamit nito
ay inpinapakita sa Figure 1.
 Fig. 1. Bilang ng mga nakahahalubilo ng tumugon na gumagamit ng salitang kupal.

Base sa mga datos na ito, masasabi na ang salitang ‘kupal’ ay alam at/o ginagamit talaga ng
karamihan, mula mag-aaral hanggang guro, sa UPLB.

Kahulugan: K*pal bilang Kupal

Kung pagbabasehan ang tradisyunal na kahulugan ng salitang ‘kupal’, ito ay tumutukoy sa

manilaw-nilaw at malagkit na dumi na naiipon sa ari ng isang mammal at ang medikal na
termino nito sa wikang Ingles ay smegma.[1][2] Ngunit, kung susuriin ang nakalap na
impormasyon, hindi ito kaparehas ng kahulugan na ito ang ibig sabihin ng terminong ‘kupal' sa
Elbi. Dito ay susuriin naman kung anu-ano ang kahulugan ng salitang ‘kupal’. Ayon sa mga
nakapanayam, noong hindi pa sila estudyante sa UPLB, ang mga alam nilang kahulugan ng
‘kupal' ay: smegma o dumi sa ari ng lalaki; at isang tao na masama ang ugali o nakasusuya
(mean, jerk, prick, obnoxious, annoying). Ang pangalawang nasaad na kahulugan ay tila
nahubog lamang sa loob ng unibersidad. Ngunit, mayroong iilan na hindi alam ang ibig sabihin
ng ‘kupal’ noong hindi pa sila nagaaral sa UPLB. Ang pagkakahati ng sagot ng mga tumugon ay
ang sumusunod:

Fig. 2. Kahulugan ng ‘kupal’ bago maging estudyante ng UPLB.

Ayon sa mga tumugon, ang mga kahulugan na ito ay natutunan nila sa pamamagitan ng iba’t
ibang pamamaraan: nalaman mula sa kapatid, sa pagaaral ng home economics, at mula sa mga
kapatid at kaklase.

Noong makapasok na sa UPLB ang mga tumugon, ang kanilang alam na kahulugan ng
salitang ‘kupal' ay napatunayang nag-iba. Mas dumami na ang nagsabi na ang kahulugan ng
‘kupal’ ay ‘isang tao na masama ang ugali o nakasusuya (mean, jerk, prick, obnoxious,
annoying)’ kaysa sa tradisyonal na kahulugan nito (smegma). Tag-isa lamang ang sumagot na
hindi parin alam ang ibig sabihin ng ‘kupal’ at ang alam parin niya na ibig sabihin ay ito ay
smegma.

Gamit at Anyo: Kupal bilang Pangngalan, Pang-uri, Pandiwa, at Ekspresyon

Lahat ng mga tumugon sa pagsusuri ay ginagamit ang salitang ‘kupal’. Ang ‘kupal’ ay
maaring gamitin bilang pangngalan, pang-uri, pandiwa, at ekspresyon. Bilang pangngalan, ang
‘kupal’ ay nangangahulugang dumi sa ari ng lalaki o babae (semgma). Bilang isang pang-uri, ito
ay nangangahulugang isang tao na masama ang ugali o nakasusuya (mean, jerk, prick,
obnoxious, annoying). Pwede ring maging pangngalan ang katatala pa lamang na kahulugan,
depende sa anyo nito. Bilang pandiwa, ito ay ang paggawa ng masama o nakasusuyang mga
bagay. Ang tugon ng mga sumagot sa pagsusuri ay ang makikita sa Figure 3. Ang anyo ng
‘kupal’ ay pwedeng magbago depende sa gamit nito: bilang pangngalan, ito ay ‘kupal’ pa rin
(smegma), o di kaya ‘kakupalan' (masama o nakasusuyang gawi); bilang pang-uri, ito ay ‘kupal’
pa rin; bilang pandiwa, ito ay maaring maging ‘kinupal’, ‘nakupal’, ‘kinukupal', ‘mangungupal’,
o ‘kukupalin'; at bilang ekspresyon, ito ay ‘kupal’ pa rin.

Figure 3. Gamit at Anyo ng ‘kupal’.

Paghubog at Isyu: Kupal bilang Normal at Mapanira

Kung sasabihan ng ‘kupal’ ang isang tao na hindi alam ang iba nitong kahulugan ay
maaring ma-misinterpret nila ang gustong maiparating. Ang paghubog ng bagong kahulugan ng
‘kupal’ ay sinuri; kung saan nagmula o nagumpisa ang bagong depenisyon. Ayon sa mga
tumugon sa pagsusuri, ang pinagmulan umano ng bagong kahulugan na ‘kupal' na tao o ugali na
masama o nakasusuya (mean, jerk, prick, obnoxious, annoying) ay ang organization process o
pagsali sa isang organisasyon. Ang nasabing pagsali ay detrimental daw para sa mga sasali na
miyembro dahil sa mga paghihirap na dinadanas nila upang makapasok sa isang organisasyon.
Maaari silang kutyain, pahirapan, at maliitin kapag sila ay nagp-process. Dahil dito, nagbunga
ang bagong depenisyon ng ‘kupal' upang ikategorisa ang mga kaganapan na di maganda sa
process ng mga organisasyon. Ang paggamit ng termino na ito sa pagtukoy ng kahit na anong di
kanais-nais na paguugali ng isang tao, ay nagdulot ng pag-normalisa sa salita. Hindi na naka-
kulong sa process ang terminong ito, kundi pati na rin sa iba pang kaugalian na di kaaya-aya na
nakikita o ipinapakita ng mga tao sa paligid ng isang indibidwal. Ang pag-normalisa sa
terminong ito ay nagdulot sa pagiging ekspresyon nito o ang paggamit ng salitang ‘kupal’ kapag
may naranasan na di maganda o di kanais-nais na kaganapan sa buhay ng indibidwal.

Ang mga isyu na nakatali sa paggamit ng ‘kupal’, ayon sa mga tumugon sa pagsusuri ay ang mga
sumusunod:

1. “I think the term can be derogatory, lalo na kung yung nagsabi nun about you ay hindi
mo kaclose or not through a "joke". It can also create a misunderstanding between
people, especially if yung other party ay not familiar with its meaning in UPLB.” -Benice
Angelique Battreal (BS DevComm, Batch 2015)
2. “Yung “Kupal Culture”. Nabigyan ng meaning yung sobrang pagpapahirap sa ibang
organizations like frat or soro na kung saan maraming nasusugatan and at some cases
may namamatay.” -Chainne Angelie Quintans (BS Biology, Batch 2015)
3. “Dumami ang mga tao na naging "aware" sa mga "kupal" na mga proseso, tao, at
pangyayari.” -Jonalyn Mangaban (BS Biology, Batch 2015)
4. “That some organizations value a stupid tradition than the welfare of a person. This poses
a problem since it becomes cyclical with no one willing to call for change. I find it
hypocritical for some mental health activists who fight for a cause at the same time,
 remain trad. This cycle must break in order to free students from "kupal" culture.” -
Daniel Genosa (BA Sociology, Batch 2015)

Ang iba pang isyu na napagbigyang pansin ay ang maling konotasyon na maidudulot ng ‘kupal'
kung ang kausap ay hindi alam ang iba pang depenisyon nito maliban sa tradisyunal na
kahulugan. Maaari rin na ang bagong depenisyon ang makapagbigay ng maling konotasyon kung
ang tinutukoy ay ang tradisyonal na kahulugan.

Kupal bilang Maruming Ugali o Gawi

Matapos ang pagsusuri, maaari nang sabihin na ang salitang ‘kupal’ ay isang salitang
Elbi, kung saan ito ay nahubog at nabigyang ibang kahulugan dahil sa kultura, ugali, at
karanasan ng mga tao sa populasyon ng unibersidad. Nalihis na ang kahulugan mula tradisyonal,
na nagbigay daan upang magkaroon ng ibang anyo at gamit ang ‘kupal’. Subalit, ang
pagkakaroon ng iba’t ibang kahulugan ng iisang salita ay maaaring magdulot ng maling
konotasyon at misinterpretasyon kapag ang kausap ay hindi alam ang iba pang kahulugan ng
‘kupal’.

Para mas mapagtibay pa ang pagsusuri, maaaring lakihan ang populasyon ng tutugon sa
pagsusuri at kapanayamin din ang iba pang indibidwal tulad ng propesor o staff upang palawakin
ang sakop ng pagsusuri.

Mga Tala:

1. Newsgraph. (2013). Putragis! atbp: Origin and Meaning of 10 Filipino Curse Words.
Retrieved from: https://www.newsgra.ph/2247/putragis-atbp-origin-meaning-10-filipino-
curse-words/
2. Merriam Webster. (n.d.). Smegma. Retrieved from: https://www.merriam-
webster.com/dictionary/smegma