panagbagat sa udtong tutok

ni michael c. andrade

ako mao ako...

ang usa ug bugtong ga-inusara,
ang kinatibuk-an niining tanan,
ang kalayo ug ang sampinit
nga wala ma-ugdaw didto sa sinai;
ang tanghaga sa katapusang sinsilyo
nga nahanaw ug nakaplagan pag-usab,
ang misteryo sa labing bililhong perlas,
ang ulipon ug ang gawasnon,
ang balaan ug ang mapasipad-on,
ang manulunda ug ang panulay,
ang pagkabalhug ug ang kagawasan,
ang sinugdan ug ang katapusan,
ang kinabuhi ug ang kamatayon,
ang kahayag ug ang kangitngit…
langkob ug gawas sa takna
ug kahangturan---

guniti ang akong kamot

ug pagadad-on ko ikaw
sa lugar nga wala-bisan-diin;
subaya ang akong mga tunob
ug ihatud ko ikaw sa kahaw-ang
diin atua ang hingpit nga kabuhong;
pamati-a ang akong mga pulong
taliwala sa lingla ug sa kamatuoran
ug ihubit ko ang tagohala sa kahilom...

usa ka awit sa kaluwasan

mao ang akong gihuni;
usa ka martsa sa kada-ugan
mao ang akong panaw;
hubo ako nga gasayaw
pa-ingon sa kawalaan…
umari ka ug sunod kanako---
4-25-2019