Pari: Ama walang kapantay ang pag-ibig na ibinigay Mo sa amin na dapat
ibahagi namin sa aming kapwa subalit, kung minsan kami pa ang nagiging dahilan ng kanilang kabiguan o kapahamakan. Kaya kami ngayon ay sama- samang dumadalangin sa Iyo. LWEC: Para sa mga namumuno ng ating inang simbahan sa pamumuno ng ating Sto. Papa Francisco I, Warlito ating Obispo, sa lahat ng mga pari at sa lahat ng mga lingkod layco, nawa’y maging matatag sila sa lahat ng pagsubok at bigyan ng kalakasang pisikal at espiritwal, upang ang itinanim nilang pananampalataya na nililinang ng mga layco at pinatutubo naman ng Panginoon sa puso ng bawat mananampalataya ay lalong yumabong. Manalangin tayo at wikain natin ; Panginoon tulungan Mo kaming mahalin ang aming kapwa. LWEC: Para sa namumuno ng ating pamahalaan, nawa’y huwag nilang hangarin ang labis na kapangyarihan kung ito’y ikapapahamak ng ating kapwa, manapay hangarin natin ang katapatan sa paglilingkod, dahil ang tunay na kapangyarihan ay nasa Panginoon. Manalangin tayo. LWEC: Para sa ating mga kapatid na dumaranas ng matitinding suliranin sa buhay, lalo na ang karamdaman, huwag nawa tayong magkait ng tulong sa kanila, ibukas natin ang ating palad at puso, dahil ang tunay na pag-ibig sa kapwa ang kabuuan ng pagsunod sa utos ng Diyos. Manalangin tayo. LWEC: Para sa kabataan nawa’y paakay sila sa mga ginintuang aral na nagmula sa ating mga magulang, na natutunan sa Salita ng Diyos upang sila’y maging matatag sa mga tukso at makaiwas sa tawag ng makamundong teknolohiya. Manalangin tayo. LWEC: Para sa mga seminaristang naririto ngayon sa ating bayan, nawa’y maging inspirasyon sila ng mga kabataan upang sila man ay magkaroon ng interes sa bokasyong ipinagkaloob sa kanila ng Diyos, at matapos nawa nila ito upang maragdagan pa ang mga paring naglilingkod sa ating bayan. Manalangin tayo. LWEC: Para sa mga mahal natin sa buhay na yumao na lalong higit ay sa mga walang nakaka-alaala nawa’y makamit na nila ang buhay na walang hanggan sa piling ng Ama. Manalangin tayo. Pari: Panginoon tunay nga pong walang taong nabubuhay para sa sarili lamang,kaya kami ngayon ay nagsusumikap na mahalin ang aming kapwa tulad ng pagmamahal Mo sa amin. Ang lahat ng ito ay hinihiling naming sa Pangalan ni Hesus kasama ng Espiritu Santo. Amen.