Sutan…. Sutan….. sutan….. (pihak nan pangka) Sungguah surang baduo batigo nan kami imbau sarapek nyo lah sagalo sapuhun pokok sapangkalan Sungguah di ambo tabik nyo pakabaran lah ateh kato samufakaik di sagalo dunsanak nan datang, iyo ambo nan maanta sampai… Manuruik pasa nan biaso biaso kato di banaan biaso kaba di puhunan di puhunan kaba ka bake sutan… Nan manjadi kaba di kami sagalo dunsanak nan datang, garak dari pado Allah warih dari pado nabi.. Nan garak dari pado allah nan warih dari pado nabi, kok pucuak biaso layua, batang biaso lapuak nan ba nyawo biaso ba pulang, untuang ndak dapek di raiah malang ndak dapek di tulak, lah ber pulang si (……….) ka RAHMATULLAH, baa sa handak nyo, sari lahia sari ba namo, sari patah sari ba datiak, sari baliau maningga tu di siko lah kito basamo samo maantaan baliau tu ka pakuburan, tapi dek bumi ko batampuak, alam ko batangkai, nan jauah ndak kunjuang tau nan ampia ndak kunjuang sampai, baru kini ko lah kami kamari mampaliekan hati nan suci muko nan janiah jo muluik nan manih ka bake sagalo dunsanak sapuhun pokok sapangkalan, manjanguak ka bake ahli waris nan tingga, nak ba sidakah doa ka bake baliau nan ba pulang tu, sungguah baliau nan takamuko, sadapek nyo lah sagalo kaum muslimin di mano sajo barado, kandak di bari pintak di palakuan , sakian kato di banaan kaba di puhunan sutan…
PIHAK NAN PANGKA…
Sampai sutan.. Artinyo kato lah tibo pakabaran di sagalo sapuhun sapokok sapangkalan ka bake kami sagalo dunsanak nan datang.. Sungguah di sutan tabiknyo pakabaran lah ateh kato samufakaik di sagalo dunsanak nan datang, iyo sutan nan manta sampai.. Manuruik pasa nan biaso biaso kato di banaan biaso kaba di puhunan di puhunan kaba ka bake ambo.. kan baitu bana.. Manuruik nan biaso kato di jawek kaba dikumbalian.., dek kami lai duduak surang baduo batigo pulo, kok duduak lai ba nan tau, bakato lai ba nan pandai, ambo tariak kato jo mufakaik mananti kato panitahan sutan sabanta.. PIHAK NAN DATANG Insyaallah…
(Pihak nan pangka mancari kato mufakaik)
PIHAK NAN PANGKA
Sutan… kumbali kaba.. Talambek ambo manjawek kato mangumbalikan pakabaran sutan, ateh mancari kato jo mufakaik manggiliang kato jo paramuan, lah dapek kato nan sakato, kato samufakaik di kami sagalo dunsanak nan datang, kato di jawek kaba di kumbalian, kumbali ka pakabaran sutan.. Kato di ulang sunaik, jalan di ulang pasa, pasa jalan dek batampuah sunaik kato dek ba ulang, di ulang dalam pakabaran sutan, sado nan takana nan tidak rida jo maaf ambo pintak.. Nan manjadi kaba di sagalo dunsanak nan datang, garak dari pado Allah warih dari pado nabi.. Nan garak dari pado allah nan warih dari pado nabi kok pucuak biaso layua, batang biaso lapuak nan ba nyawo biaso ba pulang, untuang ndak dapek di raiah malang ndak dapek di tulak, lah ber pulang si alm/h (……….) ka RAHMATULLAH, baa sa handak nyo, sari lahia sari ba namo, sari patah sari ba datiak, sari baliau maningga tu di siko lah kito basamo samo maantaan baliau tu ka pakuburan, tapi dek bumi ko batampuak, alam ko batangkai, nan jauah ndak kunjuang tau nan ampia ndak kunjuang sampai, baru kini ko lah dunsanak kamari mampaliekan hati nan suci muko nan janiah jo muluik nan manih ka bake sagalo dunsanak sapuhun pokok sapangkalan, manjanguak ka bake ahli waris nan tingga, nak ba sidakah doa ka bake baliau nan ba pulang tu, sungguah baliau nan takamuko, sadapek nyo lah sagalo kaum muslimin di mano sajo barado, kandak di bari pintak di palakuan, kan baitu bana.. Kok itu di kami sagalo sapuhun pokok sapangkalan, sabalun kandak di bari, pintak di palakuan kok ado nan takana di hati takilan di mato, lai lah ka buliah kato di sabuik bana di katangahan sutan?..
PIHAK NAN DATANG..
Sampai sutan… Di bilang dalam pakabaran sutan. sabalun kandak di bari, pintak di palakuan kok ado nan takana di hati takilan di mato, lai lah ka buliah kato di sabuik bana di katangahan kan baitu bana?.. Insyaallah.. asa lah lai talingkuang di adaik talingka di pusako.. katangahan lah sutan.. PIHAK NAN PANGKA.. Nan takana di hati takilan di mato iyo lah nan garak dari pado ALLAH warih dari pado nabi, nan garak dari pado ALLAH warih dari pado nabi, maklum lah baliau ko dek lah lamo iduik, banyak nan di raso banyak pulo nan di rasai, kok ado ereang jo gendeang, cicia jo panjuik, nan tasingguang ka naiak, talantuang ka turun, kok sapo indak tasauik, kok imbau indak taturuik, kami sagalo sapuhun pokok sapangkalan mintak ridha jo maaf ka bake dunsanak nan datang, nan ka duo nyo kok ado baliau ko ba utang piutang, pitih nan ba bilang, ameh nan ba taia, bareh nan basukek, kami ahli warih nan tingga ba sadio untuak mambaia nyo.. sakian kato di sabuik bana nan di katangahan sutan..
PIHAK NAN DATANG..
Sampai sutan.. sabalun kato di jawek kaba di kumbalian, dek lain pulo padang, lain pulo bilalang nyo.. ambo tariak kato jo mufakaik mananti sutan sabanta…
PIHAK NAN PANGKA..
Insyaallah…
(pihak nan datang mancari kato mufakaik)
PIHAK NAN DATANG..
Sutan.. kumbali kaba… Di bilang dalam pakabaran sutan.. Nan takana di hati takilan di mato iyo lah nan garak dari pado ALLAH warih dari pado Nabi, nan garak dari pado ALLAH warih dari pado Nabi, maklum lah baliau nan ba pulang ko dek lah lamo iduik, banyak nan di raso banyak pulo nan di rasai, kok ado ereang jo gendeang, cicia jo panjuik, nan tasingguang ka naiak, talantuang ka turun, kok sapo indak tasauik, kok imbau indak taturuik, sagalo sapuhun pokok sapangkalan mintak ridha jo maaf ka bake dunsanak nan datang, kan baitu bana, kok itu raso2 nyo indak ado doh, kok lai bana kami lah talabiah dahulu mamaafan almarhum/h, nan kami pun baitu pulo, kok ado ereang jo gendeang, cicia jo panjuik, nan tasingguang ka naiak, talantuang ka turun, kok sapo indak tasauik, kok imbau indak taturuik, mamintak maaf pulo ka bake ahli warih nan tingga, arati nyo samo2 ma maafan kito,.. nan ka duo nyo kok ado baliau ko ba utang piutang, pitih nan ba bilang, ameh nan ba taia, bareh nan basukek, ahli warih nan tingga ba sadio untuak mambaia nyo.. kan baitu bana… Kok itu sutan.. lah kami pa iyoan pulo di siko, raso2 nyo indak ado doh.. tapi sunguah pun baitu, kok ado di balakang sajo kito salasain… Sakian kaba sutan..
PIHAK NAN PANGKA..
Sampai sutan.. Di bilang dalam pakabaran sutan tadi, raso2 nyo indak ado doh, kok lai bana sagalo dunsanak nan datang lah talabiah dahulu mamaafan almarhum/h, baitu pulo di sagalo dunsanak nan datang, kok ado ereang jo gendeang, cicia jo panjuik, nan tasingguang ka naiak, talantuang ka turun, kok sapo indak tasauik, kok imbau indak taturuik, mamintak maaf pulo ka bake ahli warih nan tingga, arati nyo samo2 ma maafan kito,.. kan baitu bana.. Kok itu iyo lah sanang pulo hati kami.. Nan ka duo nyo kok ado baliau ko ba utang piutang, pitih nan ba bilang, ameh nan ba taia, bareh nan basukek, ahli warih nan tingga ba sadio untuak mambaia nyo.. Lah sutan pa iyoan pulo, raso2 nyo indak ado doh.. tapi sunguah pun baitu, kok ado di balakang sajo kito salasain… kan baitu bana.. Kok itu iyo lah sanang bana hati kami…
PIHAK NAN DATANG..
Baa nan tantang kandak?..
PIHAK NAN PANGKA..
Insyaallah, kandak di bari pintak di palakuan, kami tarimo jo hati nan suci, muko nan janiah jo muluik nan manih sutan..
PIHAK NAN PANGKA..
Bakarantian kito..
PIHAK NAN PANGKA..
kato kito sudahi.. (di lanjutkan dengan doa bersama)
