Gerry Mae Perocho

BSBA FM 2-PETITION

Significance of Literature in the 21st Century

Ang panahon ay mabilis na lumilipas at marami ang pagbabago sa mundong ating ginagalawan. Ang
panibagong siglo na mas kilalang 21st century ay masasabing panahon kung saan higit na umusbong
ang teknolohiya o whole new digital world. Ang bawat tao ay namulat sa iba't-ibang kasangkapang
makabago at mabilis o tinatawag ding convenient na paraan ng pamumuhay. Malaki ang hamon sa
panitikan kung paano ito makasasabay sa pagbabagong hatid ng mundong bihasa na sa paggamit ng
mga makabagong teknolohiya. Ngunit bago ang pagtalakay sa kahalagahan ng panitikan sa modernong
panahon ay malimit na itanong kung ano nga ba ang panitikan. Ang panitikan ay mula sa salitang "pang-
titik-an" kung saan ang unlaping "pang" at hulaping "an" ay ikinabit sa salitang-ugat na "titik" na
nangangahulugang literatura. Ang literatura o literature sa ingles ay nanggaling naman sa Latin na
"litterana" na ang ibig sabihin ay titik. Mula sa sulatin ni Estefanio (2013), binigyang kahulugan ang
panitikan bilang nagsasalaysay ng mga kaisipan, damdamin, karanasan, hangarin at diwa ng mga tao.
Ang panitikan rin ang nagbibigay ng pinakapayak na paglalarawan sa paraang tuwiran o tuluyan at
patula. Malawak ang sakop ng panitikan sapagkat hindi ito nalilimitahan sa paksang maaaring talakayin.
Ang panitikan bilang nagsasalaysay ay maaaring magpahayag tungkol sa pamumuhay, sa pamahalaan,
lipunan, paniniwala o pananampalataya, karanasan at mga damdamin tulad ng pag-ibig, kalungkutan,
pagkapoot, kaligayahan at samu't-saring emosyon ng tao. May ibat-ibang teoryang pampanitikan na
sumasaklaw sa mga sulating mayroong iba't-ibang anyo. Ang mga ito ay ang Arkitayp, Feminismo,
Formalism, Sosyolohikal, Eksistensiyalismo, Dekonstraksyon, Romantisismo, Marksismo, Historikal,
Bayograpikal, Kultural, Realismo, Imahismo, Humanismo at Klasismo. Ang mga ito ang teoryang
pampanitikan na nagpapahayag ng kaisipan, karanasan, damdamin, pamumuhay at makulay na
imahinasyon ng tao.

Sa kabilang dako, ang kahalagahan ng panitikan ay tulad ng ating pagkakakilanlan. Mahalaga na

malaman ng isang tao kung sino at saan siya nagmula at kung ano ang mga kaisipang humubog sa
kanya upang maging isang tunay na tao. Ito ay mga sulating nagpapakita ng makulay at malawak na
kaisipan ng mga taong hindi lamang nabuhay sa kasalukuyan kundi maging sa lumipas na panahon bago
ang kasalukuyan. Mayroong mga akdang pampanitikan na naging malaki ang kontribusyon sa paghubog
ng kaisipan at kakayahan ng taong makalikha ng akdang malaki ang ambag sa lipunan. Isa na marahil
dito ang nobela ng ating pambansang bayani na si Dr. Jose Rizal na pinamagatang Noli Me Tangere at El
Filibusterismo. Ang mga nobelang ito ng pambansang bayani ang nagmulat sa kaisipan ng mga Pilipino
mula sa 300 taon ng pang aalipin ng Espanyol sa ating bansa. Makikita ang makulay na paglalarawan at
ang sari-saring kaisipan at damdamin na ipinapahayag ng nobela. Isa itong sulating nasa anyo ng prosa
na malaya at ito rin ang nakaimpluwensiya sa mga kapwa natin Pilipino na ipagtanggol ang ating bansa
mula sa pang aalipusta ng dayuhang Espanyol. Bukod pa sa mga sulating pangkasaysayan, ang Bibliya
ang mayroong pinakamalaking impluwensiya hindi lamang sa Pilipinas kundi maging sa ibang bahagi ng
mundo. Ito ang pinagmulan ng paniniwalang Kristiyano mula sa Palestine at Greece na nagsasalaysay
kung paano namuhay at saan nagmula ang mga tao. Ang bibliya ay maituturing na panitikan sapagkat ito
ay naglalaman ng mga salitang bumubuo ng konsepto, kaisipan at nagpapakita ng diwa ng may akda.
Ang mga sulating ito ay nagpapakita na ang panitikan ay bahagi ng kasaysayan at patuloy na umiiral
hanggang sa kasalukuyan. Maging ang mga sulating pampanitikan ay sumasabay sa daloy ng
pagbabago. Ang nakagisnang mga libro at sulating papel ay nailalagay na din sa Microsoft word. Ang
teknolohiya ay nakatulong rin upang mapalaganap, maibahagi at mas maunawaan ang panitikan. Lahat
halos ng nasusulat na nagpapakita , naglalahad at nagsasalaysay ng kaisipan ng tao ay maituturing na
panitikan. Ngunit may limitasyon din naman ito, hindi lahat ng bagay na nasusulat ay matatawag na
panitikan. Gayunpaman, ang panitikan ay mayroong malaking ambag sa pagbabago. Isa ito sa bumuo ng
kasalukuyan at patuloy na tumutulong sa pagbuo ng hinaharap.

Sa ating kasalukuyan mahalaga na malaman ang kahalagahan ng panitikan. Ito ang siyang patuloy na
magtataguyod sa kalikasan ng panitikan at magbibigay ng kaalaman sa susunod pang henerasyon. Kahit
laganap na ang teknolohiya ay hindi maiaalis ang panitikan bilang malaking taga-impluwensiya sa kung
ano ang katangian at paniniwala ng mga tao sa kasalukuyan. Sa pag-aaral ng panitikan ay nagkakaroon
ng malalim na pagkilala at pagka-unawa ang tao sa kung ano ang kanyang katangian, paniniwala at
nararamdaman. Sa makulay na pagpapahayag ng damdamin sa pamamagitan ng tula sa social media ay
nagagamit ang panitikan bilang tagapaghatid ng nararamdaman at iniisip ng isang tao. Ang paggawa ng
mga sanaysay at pagbuo ng mga journal at editoryal sa iba't-ibang ibang aplikasyon sa internet ay
nagpapakita lamang na maging ang panitikan ay sumasabay sa pagbabago. Maging ang mga bugtong na
dati ay nasusulat lamang sa mga maliliit na libro ay ginagawa ng mga larong makabuluhan. Laganap din
ang tulang pagbigkas sa social media na kinagigiliwan ng mga kabataaan.