ALIN ANG MAS MAINAM GAMITIN, WIKANG KATUTUBO O
WIKANG FILIPINO? Sa araw-araw na pakikipag-usap, kung iyong mapapansin
LAKANDIWA:
Magandang Araw o! mga panauhin
Nandito tayo upang ating alamin
Pakinggan natin ang mga saloobin
Ng mga makata sa ating usapin
Alin ang mas mainam gamitin –
Wikang Katutubo o Wikang Filipino?
Ako po muna ay magpapakilala
Tatayong lakandiwa ng ating paksa
Sa pagtatanggol ng kani-kanilang katwiran
Sa wikang pinili para sa gagamiting kawikaan
Una kong ilalantad si Wikang Katutubo
Na handang ipaglaban ipagtanggol kaniyang ngalan
Pagkat ito ang nais na kanyang ipagsigawan
Kaya’t halina’t salubungin siya ng
masigabong palakpakan.
WIKANG KATUTUBO:
Naimbag nga aldaw yo amin kakabsat
Ako po ay isang Ilokanong pumapanig sa wikang katutubo;
Pagbati palang, kaytamis nang pakinggan
Sapagkat ito’y galing sa puso at kaydaling maunawaan
Ako, ikaw, tayo na labis pong nagmamahal
Sa sariling kultura at bayang kinagisnan
Di nga ba’t mas mainam na gamitin sa talakayan
Ang wikang katutubo na ating kinalakihan?
LAKANDIWA:
Tila mainit na itong si Wikang Katutubo
Sa unang tindig panig kanyang ipinarinig
At ipinaliwanag kanyang kaalaman
Upang tagapakinig siya’y maunawaan.
Wikang Filipino ay ating bigyang-daan
Siya’y palakpakan at pagpugayan
Upang kanyang panig ay siya naming ipaglaban
Upang mawala ang kaba at siya naman ay ganahan
WIKANG FILIPINO:
Magandang araw po, pagbati mula sa aking puso,
Ako ay Pilipino, Filipino ang wika ko
Ako ay naririto para sa isang pagtatalo
Nitong katoto kong Wikang Filipino di niya gusto.
Wikang Filipino, idineklara ni Pangulong Quezon
Upang bigkisin wata-watak na mamamayan
Bakit Filipino ay mahalaga sa atin?
Sapagkat tayo ay Pilipino mula Batanes hanggang Sulu
LAKANDIWA:
Sadyang mainit ang paglalaban ng mga makata
Hinihiling natin sa kanila na magdahan-dahan
Sapagkat ito’y digmaan ng kaalaman at talas ng isipan
Na siyang sandata upang manalo sa laban
WIKANG KATUTUBO:
Sa tahanan, tindahan, simbahan at sa mga kaibigan
Mother tongue na Iloko ang gamit sa paaralan
Sapagkat ang Wikang katutubo madaling pag-aralan
Kay sarap bigkasin at kaydaling unawain
Kung wikang katutubo sa pagtitipon ang gagamitin
Kakaibang ligaya ang ating nakakamit
Kapag Iloko ating ginagamit
WIKANG FILIPINO:
Kaytamis bigkasin wikang Filipino
Kaydaling maunawaan ng bawat Pilipino
Pagkat ito’y hinango sa wikang katutubo
Na minana natin sa ating mga ninuno
Filipino ang wika sa halos lahat ng asignatura
Gamit ng mga guro sa kanilang pagtuturo
Mother tongue na Iloko ngayon lang naisama
Kaya’t nararapat lamang na Filipino ang manguna
WIKANG KATUTUBO:
Sa bibig mo na nanggaling, mahal na katoto
Mother tongue na Iloko gamit ngayon sa pagtuturo
Ibig sabihin mainam gamitin ang wikang katutubo
Upang mga bata ay matuto pa lalo
Pasalamat ka nga kay kalihim na Luistro
Ipinatupad niya paggamit sa paaralan ng Iloko
Ibig sabihin dapat ding pagyamanin
Pagka’t mga bata ito’y pauunlarin
WIKANG FILIPINO:
Filipino ang gamit pa rin sa mga paaralan
Sa elementarya, haiskul at kolehiyo
Hindi lang panturo, kundi bilang isang kurso
Kagaya ng aking guro na napakadalubhasa sa asignaturang ito
Kaya, mahal kong katunggali, iyo nang aminin
Wikang Filipino mas mainam gamitin
Maliban sa pagtuturo, ay isa pang asignatura
Na pinag-aaralan ng lahat sa eskwela
LAKANDIWA:
Matapos marinig ang magkabilang panig
Bilang Lakandiwa nitong balagtasan ay akin nang titimbangin
Sa paksang inilahad na mas mainam gamitin
Kapwa sila magagaling at maalam sa kanilang wikain
Ang wikang katutubo at wikang Filipino
Ay parehong mahalaga at may magagawa
Kaya’t aking napagtanto na parehas lamang kayo
Wala akong itulak kabigin sinuman sa inyo
Wikang katutubo dapat pagyamanin
Lalo na’t mother tongue na Iloko ay atin ring wikain
Ang wikang Filipino ay patuloy paring paunlarin
Upang lahi nating Pilipino sa buong mundo’y kilalanin