ADAT BATAK (MONDING) BAGIAN I

PARTORDING NI ULAON ADAT BATAK DI NAMONDING

Bagian I
Ir. Roland Dotor Hutajulu
Di hita halak Batak, partording ni ulaon adat paborhathon na monding tergantung doi tu
umur, hagabeon (parianakhonon) dohot paradongon ni namonding i, songon i nang
paradongon ni pinompar na. Partording ni ulaon adat paborhathon na monding on, di
masing-masing luatpe nunga sai adong perbedaan Umpamana di parmonding ni natua -tua
naung marpahompu adong do luat naso mambahen sijagaron.

Adong do kecenderungan binereng, tuhita nasian Toba khusus pinompar ni SIPAETTUA,

molo diparserahan (Perantauan) nunga sai mangihuthon adat namasa di luat i. Ala sai
sering jumolo marhuta di luat i nasian Silindung dohot Humbang, gabe sai mangihut tu
adat Silindung dohot Humbang nama Pomparan ni SIPAETTUA molo marulaon adat di
parserahan (sesuai domisili nasida).

Songon i nang na pasahat ulos saput tu na monding naung marhasohotan, adong do luat na pasahat: ulos
saput sian tulang, ulos tujung sian hula-hulana. Alai ianggo di hita SIPAETTUA termasuk PANGULU
PONGGOK NAIBORNGIN (Htahaean, Aruan, Hutajulu) ulos saput dohot ulos tujung duansa sian hula -
hula do i. Masiboan alasannabe do sude, contoh hita Pomparan ni PANGULU PONGGOK
NAIBORNGIN, ia ulos saput boasa sian hula-hula, alana hula-hula nama napaling berperan di pardalanan
ni keluarga ni namondingi, jala ditingki manjalo adat namondingi, nunga dipasahat hula -hulana tin-tin
marangkup tu tulang ni pangoli, disi nunga adong kesepakatan pemberian hak sian tulang tu hula-hula ni
pangoli. Dung marhasohotan baoa (mangalap boru muli) ia saput napinasahat ni tulang nunga marganti
gabe ulos, jala pasahathon uloson nunga diserahkan kewenangan sian tulang tu hula -hula ni pangoli
marhite ulos hela. Jadi dung monding pangolion gabe kewenangan ni hula-hula nama pasahat ulos saput.
Alai molo di adat na asing sai TULANG do na gabe pemeran utama sian kelompok Hula -hula/Tulang
molo di ulaon na monding alana tulang do naparjolo mangalehon saput (lampin) tu Bere/Ibebere nai
setelah lahir, sahat tu namarujung ngolu ingkon tulang do pasahat ulos saput. Jala sai cenderung mengalah
nama Pomparan ni SIPAETTUA/PANGULU PONGGOK NAI BORNGIN, molo adong tutur sian pihak
Silindung, Humbang Manang Samosir.

Songon i do nang ditingki haroro ni horo ng hula-hula dohot Tulang, sai mamboan ulos do nasida, laho
uloshonon na tu pinompar ni namonding i (ulaon sarimatua dohot saur matua). Anggo di Laguboti huta ni
SIPAETTUA nang dipamasa mangulosi hula-hula/tulang tu pinompar ni namonding, jadi holan ulos s aput,
tujung dohot ulos tutup batang (sian Bona nia ri) do adong ulos. Adong dope di luarni martamba -
tamba ulos molo adong horong ni hula-hula sian Samosir, sude na niontang (di hara) ni Hula -hula
tangkas dohotdoi mangulosi, digoari nasida mai ulos holong.

Berengon sai songon naburju ma hula-hula i, hape namangigil (mengharap) piso-piso (uang) do sian pihak
na monding, dengan nilai harus lebih tinggi sian harga ulos yang diberikan.

Mansai borat do beban ni pihak hasuhuton (keluarga na monding), molo son gon i diulahon adat, alai ala
so boi menolak, dengan terpaksa pihak keluarga na monding harus menyanggupi hal sisongoni.

1. RAGAM - RAGAM NI NA MATE / MONDING

 Mamereng tu sibahenon dohot paradaton ragam ni na mate boi do di bagi 3 ( tolu ) ima :
1. Mate poso-poso sahat tu na magodang (ndang marhasahotan)
2. Mate natunggane (naung marhasohotan)
3. Mate/monding natua-tua naung marpahompu.

1.1 MATE POSO-POSO SAHAT TU NAMAGODANG

Dibagi opat ma on berdasarkan umur ima :

a. Mate di bortian, Ima poso-poso na mate di bortian? (di dalam kandungan)
b. Mate poso–poso, Ima poso-poso na marumur sian na baru sorang sahat tu na marumur hira-
hira 2 taon
c. Mate dakdanak, Ima dakdanak na marumur 2 taon sahat tu hira-hira 16 taon
d. Mate naposobulung (na magodang), Ima naposo (doli-doli manang namarbaju ) na marumur
hira-hira diginjang ni 16 taon sahat tu na namagodang (dewasa) alai ndang hot ripe dope

1.2 MATE NATUNGGANE

Dibagi doi gabe 3 bagian :

a. Mate pupur
Mate so martinading di anak dohot di boru (ndang marindang) Molo ama do na mate i
didokma matipul ulu, alai molo ina didokma matompas tataring

b. Mate punu
Mate so martinading di anak alai nunga martinading boru. Mate punu didok ala ndang adong
anakna (baoa) na manguduti goarna/generasina (tarombona). Adong do nian boru na, alai
molo dung muli boruna i gabe mangihuthon marga ni hamulianna (suami) nama i. Mate punu
sipata do digoar i mate marurat di bulung na

c. Mate mangkar
Mate naung adong anak dohot boru na, alai ndang adong dope na simpan (hot ripe) .

Molo met-met dope anak dohot boru nai didok ma sapsap mardum, ala ndang diboto dope
mandiori hangoluanna manang mangula ulaonna.

1.3 MONDING NATUA-TUA NAUNG MARPAHOMPU

Parmonding ni natua-tua naung marpahompu adong 3 (tolu) tingkat, ima :

a. Sarimatua
Nunga marpahompu alai adong dope tubuna na so simpan (hot ripe), lapatanna adong dope
sisarihonon na, terlepas naung karejo manang naso karejo.

b. Saurmatua
Nunga marpahompu sian anak dohot sian boru jala nunga simpan sude anakhon na (ndang
adong be sisarihononna ). Nunga bulus rohana manadingkon portibi on.
 c. Saurmatua maulibulung
Nunga marpahompu sian anak dohot sian boru jala nunga marnini – marnono, jala ndang
adongbe anakna manang boruna naso sohot, dungi ndang adong anakna manang boruna
manjoloi ibana (jumolo monding).
Marnini lapatanna anakna nunga marpahompu.
Marnono lapatanna boruna nunga marpahompu.
Marindik-indik /marondok-ondok lapatanna pahompu na nunga marpahompu.
Monding maulibulung onma status na tumimbo parmonding ni jolma di hita halak Batak,
tarlobi muse molo pomparanna i gabe jala mamora. Ianggo nuaeng on, nunga jarang dapot na
songon on, alana jolma nuaeng, nunga sai jolo godang umurna asa hot ripe alani
parsikkolaon dohot ala so karejo dope.

Di Bona Pasogit parmondingon ni natua-tua na songon on, olo do 5 - 7 borngin asa ditaruhon
tu udean.

2. RUHUT-RUHUT PARADATON SIPATUPAON TU NA MONDING

2.1 MATE/MONDING DI BORTIAN

Molo mate poso-poso di bortian (keguguran) ndang hea pola dipaboa i tu unsur
dalihan natolu. Holan tu haha anggi na do i dipaboa dohot tu dongan sahuta marpiga -
piga halak, asa adong dongan ni na matean i laho mananom na mate i

Nang pe dipaboa namatean i noni tu haha-anggi, tutur na solhot dohot tu hula-hula

tangkas ndang adong acara adat dipatupa disi.

2.2 MATE POSO - POSO

Di Bona Pasogit laos lampin manang parompana i do dibahen natorasna

saputna/bungkusna. Di parmate ni poso-poso ndang pola marborngin i. Molo sanga
laos di sadari nai doi di taruhon tu udean.

Panungkir pe ndang apala torop i holan dongan tubu, boru nasolhot manang na jonok
inganan, dongan sahuta dohot hulahula/tulang tangkas. Baliksa tahe molo poso-poso i
mate di rumah sakit laos sian i namai di boan tu udean.

Acara di partutanona i pe jempek do i dibahen (sederhana).

2.3 MATE DAKDANAK SAHAT TU NAMAGODANG

Mate dakdanak, naposo bulung sahat tu namagodang, hira dos do sibahenon.Ulos

saput tuson sian natoras na doi, ima ulos sibolang na birong (na lomlom).

Di hita PANGULU PONGGOK NAIBORNGIN (Hutahaean, Aruan, Hutajulu) ndang hea

masa ulos saput sian hula-hula manang tulang tuson. Alai ianggo di na deba luat manurut
 adat hasomalan di nasida adong do na mambahen ulos saput on sian tulang ni na mate.
Ndang pola marborngin i dibahen, laos dinasadari i do i ditaruhon tu udean (molo manogot
ari mate jala ndang adong sipaimaon ni keluarga).

Ndang pola adong sipatupaon manang mamotong pinahan disi. Molo tung pe dipatupa
hasuhuton sipanganon tu angka panungkir terutama tu keluarga najonok, ndang termasuk
adat i, dipatupape i, ala sian nasogot (tibu) do nasida ro, jala ala dao -dao ni inganan di
PEKANBARU on ndang sanga be nasida mulak mangan tu jabu nasida be.

Ndang pola namarmiak-miak dipatupa disi alai cukup ma jagal rambingan. Molo adong na
patupahon na marmiak-miak (pinahan lobu) ndang adong pakke na margoar, boi do sude di
sangsang.

Unsur Dalihan Natolu ro do manungkir tarlumobi na solhot (dongan tubu, boru, hula -hula /
tulang tangkas).

Di parmate ni dakdanak sahat tu namagodang (dewasa) ndang masa dibahen maralaman

alai langsung doi sian jabu di boan tu udean. Acara na mandok hata pe tarjempek do i
dibahen.

Tarsongon on ma acara namandok hata di si :

- Sahalak sian hasuhuton mandok hata huhuasi dohot patoranghon riwayat hidup ni namate.
- Sahalak sian dongan tubu (Paidua ni suhut)
- Sahalak sian boru
- Sahalak sian Pengurus marga
- Sahalak sian dongan sahuta
- Sahalak sian tulang
- Sahalak sian hula-hula
- Mangampu ma suhut bolon

Dung sidung sian udean holan keluarga na solhot na ma mulak tu jabu ni na tilahaon
laho mangalehon hata togar-togar.

Molo di hita PANGULU PONGGOK NAIBORNGIN na di Parserahanon, sesuai tu

anggaran dasar dohot anggaran rumatangga, nipunguan ma dilaksanahon.

2.4 MATE NATUNGGANE

Songon na pinatorang di ginjang i, parmate ni natunggane di bagi tolu (3), ima : mate
pupur, punu dohot mangkar. Ndang adong maneat pinahan disi, ianggo menurut adat.
Najolo di Bona Pasogit, ndang hea masa mangan panungkir di parmonding ni
natunggane. Parjolo mai ala borat ni sitaonon, paduahon ala jonok be inganan/huta
jadi sanga do panungkir mangan tu bagasna be. Ianggo di Parserahan on alani dao -dao
ni inganan jala leleng di pardalanan ianggo panungkir tarlumobi nasolhot tibu do ro
nasida manogoti, suang songoni nang hula-hula laho pasahat ulos saput dohot tujung.
Alani i dipatupa hasuhuton i do sipanganon, songon ganti ni makan siang, alai ndang
pola mamotong namarmiak-miak, cukup ma jagal rambingan.

Alai adongdo niida di Parserahan on na palobihu. Ala ni si haadongon dohot mungkin

ala ummura pesanon tu par catering, nunga adong na mamotong pinahan lobu lengkap
dohot na margoar nai, baliksa sipata tahe pinahan na manggagat duhut. Alai nang pe
dipatupa disi pinahan lobu manang sigagat duhut ndang boi dohonon termasuk adat i
jala ndang mardalan jambar disi, tudu-tudu ni sipanganon ipe ndang pola di patuduhon
i tu natorop. Didok nasida ma goar ni i ulaon i mangido tangiang alai sebagian
mandok partangiangan.

Partording ni ulaon di parmate ni Natunggane tarsongon on ma urut - urutan na :

2.4.1. MARRIA / MARTONGGO RAJA

Ndang godang dope sihataan taringot tu paradaton di son. Naporlu sihataan ima taringot tu : persiapan
penguburan: andigan tu tano, patangkashon manang naung sahat boa -boa tu dongan tubu, boru
tarlumobi tu hula-hula, tulang, ise petugas mangurus tenda, kursi, batang, ambulans, inganan
(kuburanna), ise na menghubungi pangula ni huria, manghobasi sipanganon gantini makan siang,
manontuhon tingki sadihari parro ni hula -hula laho pasahathon ulos saput dohot ulos tujung. Di
PEKANBARU ala situasi dohot kondisi nunga somal dipatupa suhut marsipanganon (jagal rambingan)
di ulaon martonggo Raja sekalianma didok mandungo -dungoi.

Di Bona Pasogit na mandohoti na martonggo Raja holan dongan tubu dohot dongan
sahuta (dongan saulaon) do i. Ndang pola dohot hula-hula, tulang disi. Digoari ma
ulaon i rapot adat. Ndang pola marsipanganon disi cukup ma makanan ringan dohot
kopi/teh.
Di Parserahan on, ia ulaon marria on, nunga di dohoti hula -hula dohot tulang, ala nunga
marpungu angka marga-marga sian desa na ualu na marasing-asing adat na be.
Mardomu tusi ingkon jolo di hatai do tarsongon dia adat sipatupaon tu na mamondingi
tarlumobi isedo si lehon ulos saput dohot tujung. Ianggo di hita PANGULU PONGGOK
NAIBORNGIN ulos saput dohot ulos tujung duansa doi sian hula-hula, songon naung
pinatorang dihalaman sebelumnya. Alai sipata do masa nang pe di hita PANGULU
PONGGOK NAIBORNGIN ulaon pasahat saput sian tulang, molo tulangi sian sabola
Humbang manang luat na asing, naso sarupa adat na dohot hita. Alana ai tung
manggogo do asa sian nasida ulos saput. Dihilala roha molo ndang keberatan horong
nasian hula-hula, boi doi sipata oloanta, asa denggan ulaon i (mamereng situasi dohot
kondisi ma hita), alai tutu ingkon jolo paboaonta do adat namasa di hita jala andorang
so acara marria dimulai ta elekma hulahula/tulang ta asa si dapot solup nasida,
lapatanna asa adat na masa di PANGULU PONGGOK NAIBORNGIN ulahonon ni hula -
hula/tulang i. Alai nangpe songoni, manrningot ma hit a di hata ni natua-tua na mandok :
- Aek godang tu aek laut, Dos ni roha sibahen na saut
- Balintang ma pagabe, Tumundalhon sitadoan
- Arinta ma gabe, Molo dung masipaolo-oloan
 Di tingki na martonggo/marria raja pada umumnya sai jolo di paboa do parjolo riwayat
hidup ni namonding i, asa boi diantusi namandohoti rapot i, songon dia do keberadaan ni
namonding i, gabe boi ma mardalan denggan pangkataion, Ipe asa di hatai angka na asing.

2.4.2. PAMASUK HON TU BATANG

Di parmate ni natunggane, ndang pola adong acara khusus laho pamasukhon bangke i tu
batang na. Boi do holan dongan tubu pamasukhon. Ndang pola sai ingkon diadopi hula -
hula/tulang.

Ditingki sadihari pe boi do pamasuhon tu batang na, molo dung rade. Ndang pola bodarina
alai boi do dibotarina asa suman idaon ni panungkir, jala unang pola sai dipodoman
manang di rusbank be bangke i dibahen. Pamasukhon bangke ni na tunggane tu batang
ndang hea digoari noni mompo tu jabu-jabuna alai molo dung marpahompu na monding i
ipe asa didok mompo.

2.4.3. PASAHAT ULOS SAPUT DOHOT TUJUNG

Songon naung dipatorang diginjang, di pomparan ni PANGULU PONGGOK

NAIBORNGIN ulos saput dohot ulos tujung duansa doi sian hula-hula, ala hula-hula do na
mangalehon ulos hela di tingki na manjalo pasu-pasu nasida. Lapatanna tulang dohot hula-
hula, nunga si sada roha nasida di las ni roha nang di arsak ni roha, dirahutni ulos
naganjang, na hapal jala sitorop rambu. Molo marujung ngolu ni sahalak dianggap
"maribak" ma ulos i, alani i, porlu saputon ma namatei jala tujungan ma na mabalui.

Na jolo di Bona Pasogit, molo dung sahat barita tu hula-hula, naung marujung ngolu ni boru /
helana, pintor humalaput do parboru i dohot haha-anggina ro tu huta ni boru/hela na i, jala
pintor di pasahat nasida do ulos tujung. Ndang pola marpaima di dongan tubuna. Suang-
songoni nang keluarga ni boru/hela na i ndang pola dipainte dongan tubuna, boi do holan
keluarga na solhot manang na sarurut manjalo haroro ni hula-hula i. (jadi hira urusan ni
hasuhuton ni na monding i doi dohot hula-hulana tangkas).

Laos songonon ma nian nang di pomparan ni PANGULU PONGGOK NAIBORNGIN,

tarlumobi namaringanan di Parserahan on, ditingki napasahat ulos saput dohot tujung
dengganma molo songon i taulahon. Molo dung rade hula-hula tangkas ditingki sadihari pe
boi do nasida pasahat ulos saput dohot ulos tujung i. Molo binereng tu partingkian, boi doi
dipillit dung sidung bangkei dipamasuk tu batangna manang ditingki (ari) martonggo Raja
alai dumenggan ma andorang so dimulai manghatai (Rapot), alai songon nanidok nangkin
molo tulang sian horong ni luar Laguboti misalna sian Humbang porlu do painteonta hasil ni
pangktaion di acara martonggo raja.

Ditingki napasahat ulos saput dohot tujung, asa songon na sanggam idaon, denggando molo
diboan hula-hula i parbue sipir ni tondi satandok manang dua tandok disi.

Taringot tu parbue sipir ni tondi sian haha-anggi dohot sian dongan tubu ni hula- hula/tulang,
boi doi di boan di manogotna di ari partutanona i.
Parjolo do dipasahat ulos saput, dung ipe asa ulos tujung. Alana jolo adong do namate asa
adong na mabalu si tujungan. Somalna ulos saput dohot ulos tujung ima ulos sibolang. Boi
do tong ulos sirara molo i nama na tupa, alai ndang boi ianggo ulos pinunsaan. Di
PANGULU PONGGOK NAIBORNGIN ndang hea pola masa lehonon ni suhut na matean
piso-piso tu hula-hula tangkas napasahat ulos saput dohot ulos tujung. Hira songon
kewajiban ni hula-hula i do i. Mardomu tusi molo sai manggogo tulang sian nasida ulos saput
tong ma ndang pola pasahaton ni suhut piso-piso tu nasida. Alai ianggo di parserahan on
ndang sai adong hula-hula/tulang
tangkas, dungi muse ndang sai paradongan. Mardomu tusi, taringot tu piso - piso,
hasuhuton mamereng tu situasi dohot kondisima.

Di tingki napasahathon ulos saput dohot ulos tujung i di usahahon ma asa ringka s.
Sahalak ma nian na mandok hata ima hulahula tangkas. Molo ingkon mardalan do piso-
piso laos di tingki napasahat ulos saput/tujung ima di pasahat (lapatanna unang pola
dung mulak sian udean). Songon i ma nang na mangampu dung sidung pasahat ulos
tujung tong ma holan sahalak. Ondolanna ima mandok mauliate. Alana adong dope
acara mandok hata tu na mabalu /keluarga i di ari namangihut.

Di Bona Pasogit ndang hea masa hula-hula pasahat ulos holong tu ianakhon ni
namonding, tarlumobi namonding i ndang marpahornpu dope (natunggane).

Di parserahan on, nunga jotjot binereng hula-hula manang tulang pasahat ulos tu
ianakhon ni na monding i.
Dung sidung dipasahat ulos i, di lehon pomparan ni na monding ima muse piso -piso
(hepeng) songon balos na, sipata do sude anakhon ni na monding i diulosi jadi molo
torop ianakhon ni na monding i, lam godang ma ulos, ba lam godang ma nang piso -piso.
Hira songon jual-beli nama berengon ulos i. Sudenai lam manambai biaya tu ianakhon
ni na monding i dohot manamba i tu tingki.

Molo hita pomparan ni PANGULU PONGGOK NAIBORNGIN unang pola taulahon na

pasahat ulos, tarlumobi tu namonding natunggane.

2.4.4. PARTUTANONA

Molo monding natunggane suang songoni nang natua-tua naung marpahompu, somalna sai marborngin doi dibahen.
Molo di Parserahan on binereng ditingki acara, horong na mandok hata apulapul diborngin nai tung i nama
godangna. Umpamana sian horong Gereja, punguan koor, dongan sahuta, dongan sakarejo, ale-ale, hula-hula,
tulang, dongan tubu dohot angka na asing. Alani godangna olo ma sahat tu tonga borngin, gabe mangganggu tu
masyarakat/tetangga jala palojahu hasuhuton.

Mardomu tusi naeng ma nian adong protokol laho mangatur angka na mangalehon hata apul-apul. Molo adong piga-
piga kelompok/horong na mandok hata, boi doi di gabung gabe sada acara, jala cukup ma sahalak mandok hata sian
ganup-ganup horong ( kelompok ).

Molo boi nian acara na mandok hata apul-apul di borngin nai partimbo olat ni pukul 22.00 WIB
ma.
 Diparmonding ni natunggane, sada sitaonon na dokdok do on di keluarga natininggalhon
na. Manurut adat ndang boi dope mangkuling ogung dison.

Molo adong roha ni keluarga ni na monding i naeng mamalu musik laho mangiringi ende
huria cukup ma nian holan orgeI (key board ). Sumuman doi, lebih harmonis begeon jala
menggambarkan suasana berduka dohot keagamaan, jala ndang pola mangganggu tu
tetangga.

Songon na pinatorang di ginjang, di parmonding ni natunggane manurut ruhut -ruhut

paradaton, ndang masa di bahen maralaman alai langsung doi sian jabu di boan tu
udean.

Acara partutanona, ima acara umum didok istilahna, mandok hata apul -apul ma angka
tutur/tondong saguru tu horongna. Tarsongonma acara di partutanona.
a. Marende
b. Manjaha riwayat hidup ni namonding sian paidua ni suhut
c. Mandok hata sian dongan tubu alai parjolo ma sian boru/bere/ibebere
d. Mandok hata sian dongan sahuta
e. Mandok hata sian ale-ale dohot angka punguan-punguan
f. Mandok hata sian pamarenta setempat
g. Mandok hata sian horong ni tulang
h. Mandok hata sian horong ni hula-hula,
i. Hula-hula tangkas paampuhon tu hasuhuton
j. Mangampu ma hasuhuton, parjolo ma paidua ni suhut
k. Dipasahat ma tu huria (Parhalado)

Cacatan :
1. Posisi manang parpeak ni bangke i andorang dijabu ndang hea masa patna mengarah tu baba ni pintu utama ni jabu.
2. Di tingki mamboan bangkei sian jabu, parjolo do pat na tuduru.

2.4.5. MAMBUKA/UNGKAP TUJUNG

Dung mulak sian udean, adong dope acara, ima mambuka tujung molo adong
namanghabaluhon namondingi.

Parjolo ma di parade angka na porlu tu acara i, ima :

- Mual di baskom (sisuhaphonon ni hula-hula i tu boru/helana na mabalu i).
- Handuk na gelleng laho mangalap bohi ni na mabalui dung disuhapi.
- Parburian (pangkeon ni hula-hula i andorang so disulangi na mabalu i).
- Indahan di piring
- Dengke sitio-tio (nabinoan ni hula-hulai)
- Boras sipir ni tondi
- Lap tangan manang handuk na geleng (pangkeon ni hulahula i dung sidung marburi)

Parjojor ni na mambuka tujung :

a. Dibuka ma tujung i huhut didok songon on: "nuaeng hubungka ma tujungmon, asa
anggiat buka panggabean-parhorasan tu borukku/ helakku (tergantung ise na mabalu i)
tumpahon ni Amanta Debata.
b. Marsuhap (pencucian muka) huhut didok : "husuhapi maho ito/hela. Ias ma parnidaan ni simalolongmu, angka
silas ni roha ma dipasahat Tuhanta di borungku/helangku dohot tu hitaon saluhut na tujoloan ni ari on (huhut
disuhapi 3 hali). Dungi dilap ma dohot handuk na gelleng.
c. Disulangi dohot indahan na las dohot dengke huhut didok : "pangan ma indahan dohot
dengke on, asa margogo ho mangula ulaon mu, asa boi parmudu-mudu on mu anakhon
mi (huhut disulangi 3 hali)
d. Dipainum ma dohot aek sitio-tio huhut didok ; " inum ma mual sitio-tio on asa anggiat
tio parnidaanmu nang pansamotanmu tumpahon ni Amanta Debata sai saut ma songon
hatani natua-tua, tio ma songon baba ni mual, tiur songon mataniari, rondang songon
bulan, jala rintarma songon bonang parngoluon ni borungku/helangku nang dihitaon
saluhutna. (huhut di painumhon 3 hali)
e. Di jomput ma boras sipir ni tondi tu simanjujung ni boru/hela nai huhut didok: ”pir ma
tondim, pir nang sahalam mangiringiring sude anakhon mi, dongan mu saur matua"
(dibahen songoni 3 hali). Dungi disaburhon ma muse boras i 3 hali tu ginjang ni sude
na hundul i huhut di dok ; asa liat ma panggabean, liat nang parhorasan di hitaon
saluhut na tumpahon ni Amanta Debata Pardenggan basa i. dungi didok ma muse
HORAS 3 hali.

Dung sidung mambuka tujung marsipanganon ma, lompan disi jagal rambingan. Lapatanna ndang pola maneat
pinahan. Molo tung pe hasuhuton maneat pinahan na marmiak-miak lompan do goar ni i. Tudu-tudu ni sipanganon
ndang pola dipatuduhon jala ndang adong marbagi jambar disi. Alai ianggo hula-hula mamboan dengke sitio-tio do,
ima nanaeng si sulanghononna tu boru manang helana na mabalu i.

Dung sidung marsipanganon, pasahat hon hata apul -apul ma muse tu na mabalu i dohot
keluarga. Alai ala nunga loja be, tarlumobi hasuhuton, dos ma roha ditutup ma ulaon i
dibagasan tangiang sian hula-hula.

(BERSAMBUNG) MONDING NATUA-TUA NAUNG MARPAHOMPU