PANANAW NG MGA MAG-AARAL NG GRADE 11 UKOL SA KANILANG UNANG

TAON SA SENIOR HIGH SCHOOL NG PILAR COLLEGE PARA SA

AKADEMIKONG TAONG 2016-2017

_______________________________________

Nina:

Said, Aisha

Barraca, Miladanica

Del Castillo, Sean Vincent

Mukaram, Shaira

Domingo, Bianca Faye

De Castro, Deon Joven

Askalim, Benawar

Isnang, Czarianne

Karanain, Shamie Joy

Javier, Erhildianne

Glodove, Mary Loreine

Alih, Fernieza

Dal, Mark
 KABANATA I

PANIMULA

Sa kabanatang ito makikita ang mga dahilan kung bakit napiling pag-aralan ng
mga mananaliksik ang ganitong uri ng paksa, mga kaligiran ng paksa, layunin ng mga
mananaliksik, ang sakop at delimitasyon ng buong pag-aaral, at ang kahalagahan ng
pagsasagawa ng naturang pag-aaral. Ito ang mga tanong na hangad mabigyang
kasagutan ng mga mananaliksik.

1.1 Sanligan ng Pag-aaral

Ang edukasyon ay ang susi tungo sa magandang kinabukasan—ito ang isa sa

mga kasabihang pinanghahawakan ng karamihan sa ating lipunan kung kaya labis ang
pagpapahalaga dito. Dahil sa pagnanais na maitaas ang pamantayan at kalidad ng
edukasyon sa Pilipinas, ipinatupad ng Kagawaran ng Edukasyon ang isang panibagong
kurikulum, ang K-12.

Ang K-12 ay isang programang nagnanais na mapalawig ang kalidad ng

edukasyon sa bansa sa pamamagitan ng pagdaragdag ng dalawa pang taon sa
kurikulum ng mga mag-aaral. Layunin nitong hasain ang iba’t ibang abilidad ng mga
mag-aaral base sa kanilang pipiliing strand upang maging ganap na handa kung tutuloy
man sa kolehiyo o agad na magtatrabaho ang magtatapos sa kurikulum na ito. Bagkus,
ito rin ang pandaigdigang antas ng edukasyon na hinahanap ng mga employer sa
anumang bahagi ng mundo sa mga mamamasukan. Ibigsabihin, mas magiging
kwalipikado at madaling makakahanap ng trabaho sa hinahanarap. Ang dalawang
karagdagang taong ito ay ang Senior High School.

Kasalukuyang iniimplimento ang unang taon sa Senior High School sa mga mag-
aaral ng Grade 11 para sa taong 2016-2017. Ang pangkat ng mga mag-aaral na
kasama rito ay ang una ring sumailalim bilang Grade 7 noong taong 2013-2014.
 Kabilang sa mga paaralang nagbukas ng Senior High School nitong taon ay ang
Pilar College kung saan ay mayroong apat na strand na maaaring tahakin— ang
Science, Technology, Engineering and Mathematics (STEM), Accounting, Business and
Management (ABM), Humanities and Social Sciences (HUMSS) at General Academic
Strand (GAS). Maoobserbahang pinaghandaan ng paaralan ang pagbubukas na ito sa
paglaan ng gusali, pagdagdag ng mga kagamitan, pasilidad at karagdagang mga guro
para sa panibagong departamento.

Bunsod nito, ay nangangailangan ng masusing pananaliksik kung sapat at

mabisa na ba ang kasalukuyang estado at kalidad ng Senior High School ng Pilar
College ayon sa mga pananaw ng mga mag-aaral ng Grade 11 na siyang kasalukuyang
sumasailalim dito. Ito ay upang matukoy ang mga kakulangan at magawan ng paraan
ang mga ito nang sa gayon ay maituwid at masiguradong makamit nang maayos ang
layunin ng K-12 kurikulum na dekalidad na karanasang pang-edukasyon para sa mga
mag-aaral nito.

Hangad ng mga mananaliksik na magsilbing daan ang panag-aaral na ito upang

matulungan ang nasabing institusyon sa pagpapatupad at pag-iimplimento ng mas
mabisa at maayos na edukasyong K-12, partikular na sa Senior High School sa
pamamagitan ng pagkalap ng iba’t ibang impormasyon at datos mula sa mga mag-aaral
sa ilalim ng departamentong ito. Bagkus, gawin itong pamantayan sa ibibigay na mga
solusyon at rekomendasyon na inaasahang maaaring maging sagot sa mga suliranin ng
Senior High School.

Ang mga mananaliksik ay sang-ayong nagsisimula pa lamang ang ipinatutupad

na Senior High School ng Pilar College kung kaya ay mas malaki ang pangangailangang
mabigyan ng ebalwasyon ang kabuuang departmaneto sa unang taon nito. Sa
pamamagitan ng pag-aaral na ito, ang mga mananaliksik ay handang gumawa ng daan
upang mapabuti pa ang kalidad ng edukasyon sa pagbigay ng interpretasyon sa
pananaw ng mga mag-aaral ng Grade 11 batay sa kanilang sari-sariling karanasan.
1.2 Layunin ng Pag-aaral
Sa pamamagitan ng pag-aaral na ito, layunin ng mga mananaliksik na:

Pangkalahatang Layunin
Malaman ang pananaw ng mga mag-aaral ng Grade 11ukol sa kanilang
unang taon sa Senior High School ng Pilar College at mabigyan ng ebalwasyon
at solusyon ito.

Tiyak na Layunin
1. Malaman ang pananaw ng mga mag-aaral ng Grade 11 ukol sa
kanilang karanasan sa unang taon ng Senior High School sa aspeto ng
kasapatan ng mga pasilidad, aklat, akitibidad, guro at angkop na mga
paksang naaayon sa napiling strand.
2. Matukoy kung aling mga larangan sa Senior High School ng institusyon
ang mayroong suliranin na nangangailangan ng pagpapabuti at
pagbabago.
3. Mabigyan ng masusing ebalwasyon at angkop na solusyon ang mga
naturang suliranin sa Senior High School.

1.3 Kahalagahan ng Pag-aaral

Sa kahalagahang hatid, ang pananaliksik na ito ay naghahangad na iukol ang

hangarin at intensyon sa mga sumusunod:

Para sa mga mag-aaral, ang pananaliksik na ito ay makatutulong upang ang

kanilang mga opinyon at pagpuna base sa kanilang taunanang karanasan sa Senior
High School ay maipaabot sa administrasyon nang sa gayon ay magawan ng aksyon
ang mga aseptong mayroon pang pagkukulang. Bagkus, mahalaga ito upang ang
susunod pang mga taon sa departamento ay mapabuti upang maipamalas sa mga mag-
aaral ang isang dekalidad na edukasyong K-12. Ibigsabihin, mas lalaki ang posibilidad
na mapabuti pa ang paghubog ng mga produktibo at huwarang mag-aaral sa
hinaharap.

Mahalaga rin ang pag-aaral na ito para sa Administrasyon ng paaralan sapagkat

partikular na matutukoy ang mga aspeto ng kanilang sistema na nangangailangan ng
iilang pagbabago o pagpapabuti nang sa gayon ay maging mas mabisa at dekalidad ang
edukasyong pang-Senior High School na kanilang alok sa mga mag-aaral. Mahalaga ang
puna ng mga mag-aaral sa ilalim nito sapagkat masasapul ang pangunahing mga
suliranin nang magawan ang mga ito ng agarang solusyon. Bunsod nito, ang institusyon
ay magiging mas kaaya-ayang paaralan para sa mga mag-aaral ng Senior High School
dahil tataas ang kawilihan ng mga mag-aaral dulot ng mas mabisang sistema ng
edukasyon.

Mismong para sa antas ng edukasyon sa ating bansa—ang isang pagbabago at

pagpapabuti ng edukasyon sa loob ng isang paaralan ay ang simula ng mas marami
pang paaralan na susunod dito at mas mataas na hangarin ng ating bansa upang
patuloy na mabigyan ng dekalidad na pagkatuto ang kabataan nang sa gayon ay
lumawak pa ang sari-sariling kakayahan at kahusayan ng mga mag-aaral na siya ring
maisasabuhay sa ating lipunan nitong hinaharap. Dahil sa pag-aaral na ito ay mas
mabilis at epektibong matatamo ang mga pangunahing layunin ng K-12 na humubog ng
mga produktibong indibidwal sa ating bansa. Magsisimula lamang iyon sa bawat
paaralang magiging bukas sa pagbabago at pagpapabuti dahil sa huli ay ang buong
bansa din ang isa sa manginginabang.

1.4 Saklaw at Delimitasyon ng Pag-aaral

Sa pag-aaral na ito, ang mga mananaliksik ay magbibigay diin at pagtutuunan
lamang ng pansin ang mga makakalap na pananaw ng mga mag-aaral ng Grade 11 sa
Senior High School ng Pilar College para sa akademikong taong 2016-2017. Ang
nabanggit na departamento at baitang lamang ang magiging saklaw ng pag-aaral kung
saan ay doon rin manggagaling ang mga kalahok.
 Nililimitahan ng mga mananaliksik ang pag-aaral ng paksang ito sa tuwiran at
pangunahing pananaw lamang ng mga mag-aaral ng Grade 11 batay sa ilalaang sarbey.
Bagkus ay nililimitahan ang pag-aaral na ito mula sa makakalap lamang na resulta
batay sa isasagawa at ipasasagot na sarbey-kwestyoneyr sa mga mapipiling kalahok sa
bawat seksyon ng Grade 11 hanggang sa ibibigay na ebalwasyon at rekomendasyon sa
matutukoy na suliranin.
 KABANATA II

MGA KAUGNAY NA PAG-AARAL AT LITERATURA

Sa kabanatang ito makikita ang mga dahilan kung bakit napiling pag-aralan ng
mga mananaliksik ang ganitong uri ng paksa, mga kaligiran ng paksa, layunin ng mga
mananaliksik, ang sakop at delimitasyon ng buong pag-aaral, at ang kahalagahan ng
pagsasagawa ng naturang pag-aaral. Ito ang mga tanong na hangad mabigyang
kasagutan ng mga mananaliksik.

2.1 Lokal na Pag-aaral

2.2 Banyagang Pag-aaral

Isa sa mga kaugnay na pag-aaral na ginawa sa Western Michigan University sa
Estados Unidos ukol sa pananaw ng mga mag-aaral sa unang karanasan sa isang
bagong kurikulum ay ang disertasyon ni VanderJagt, Douglas D. na may pamagat na
"Student Thoughts and Perceptions on Curriculum Reform" noong taong 2013.
Ayon kay VanderJagt, ang layunin ng pag-aaral na ito ay ang pagsusuri kung
paano tumugon at ano ang mga karanasan ng mga mag-aaral nang ipatupad ng
Michigan ang karagdagang pamantayan at kakailanganin bago makapagtapos. Ang pag-
aaral ay isinagawa sa isang malaking suburban high school na nagpatupad ng
pagbabago sa sistemang trimester bilang tugon sa mandate ng estado. Isang criterion-
based sample na binubuo ng 80 na mag-aaral, may plano mang tumungo sa kolehiyo o
hindi ang naging mga kalahok sa pakikipanayam ukol sa kanilang kaalaman, pang-
unawa, at karanasan sa panibagong Michigan Merit Curriculum at paano nito
naapektuhan ang mga desisyon ng mga mag-aaral sa kanilang tatahakin matapos ang
sekundaryang edukasyon. Dagdag pa dito ay isinama rin ni VanderJagt sa isang grupo
ang iilang mga magulang ng mga kalahok at ilang kinatawan ng institusyon para sa
pag-aaral.
 Isang masusing pagsusuri ang isinigawa at ang mga resulta nito ay ginawan ng
cross-analysis sa nabanggit na isa pang grupo, Apat na tema ang lumitaw mula sa pag-
aaral: (1) Ang mga mag-aaral ay nakaranas ng limitado hanggang sa walang
pakikilahok sa panibagong pamantayan ng kurikulum bago makapagtapos; (2) Ang mga
magulang, mag-aaral at mga tauhan ng paaralan ay nagpahayag ng kanilang
pagkabahala at pag-aalala na maaaring ang mga panibagong pamantayang ito ay hindi
matamo ng lahat ng mga mag-aaral na magdudulot ng hindi pagtatapos ng lahat; (3)
Ang paaralan na nagsilbing lokal ng pag-aaral ay gumamit ng isang maikhaing
pakikitungo o pamamaraan upang magbigay ng flexibility upang makamit ang
panibagong pamantayan bago magtapos; at, sa kabuuan, (4) Sinusubukang pang
masanay ng mga mag-aaral sa mga pagbabagong ito, bagkus maayos ang ipinapakita
sa grado.
Ang mga karanasan ng mga mag-aaral, base sa paglalarawan ng kanilang mga
magulang at mga kinatawan ng paaralan mismo, ay nagdulot ng panibagong pananaw
kung paanong maaaring magpatuloy ang paghubog at ebolusyon ng lebel ng kurikulum
na iyon at ano ang ganap ng mga mag-aaral sa ebolusyong iyon

Bilang kabuuan, ang pag-aaral ni VanderJagt ay sumusuporta sa mga nagdaang

literatura ukol sa ng mga pagsisikap para sa pagbabago ng mga paaralang kasisimula
lamang sa pagpapatupad ng isang panibagong kurikulum. Ang mga mag-aaral,
magulang at administrasyon ay humantong sa isang kasunduan na ang mga mag-aaral
ay nararapat na magkaroon ng isang pangunahing ganap sa mga pagbabago sa
paaralan. – VanderJagt, Douglas D., "Student Thoughts and Perceptions on Curriculum
Reform" (2013). Dissertations. Paper 154.
2.3 Konseptwal na Balangkas

IV DV

Mga mag-aaral ng Pananaw at

Grade 11 karanasan ng mga
mag-aaral

MV
• Mga Pasilidad
• Uri at dami ng aklat
• Bilang ng mga guro
• Mga aktibidad
• Angkop na paksa ayon sa
strand

Talahanayan 1

Ipinakikita sa Talahanyan 1 ang baryabol na makapag-iisa, baryabol na di

makapag-iisa at ang modereyt na baryabol. Ang pananaw at karanasan ng mga mag-
aaral ang dependent na baryabol dahil ang opinyon o ang resulta ng pag-aaral na ito ay
nakadipende o nakabase sa mga kalahok na nabibilang sa indipendent na baryabol. Ang
mga aspeto sa Senior High School gaya ng mga pasilidad, uri at dami ng aklat, bilag ng
mga guro, mga aktibidad at angkop na paksa ayon sa strand ang mga modereyting
baryabol sapagkat ito ang mga bagay na nakaaapekto sa kalalabasan ng magiging
pananaw at karanasan ng mga mag-aaral sa pag-aaral na ito.

2.4 Pagbibigay Kahulugan sa mga Salita

 Pananaw – Ito ang mga opinyon, puna, paninindigan ng mga kalahok hinggil sa
paksa
 Strand – Ito ang hanay ng mga magkakaugnay na kurso na nais tahakin ng mag-
aaral sa Senior High School
 Sarbey – Isang paraan ng pagkalap ng mga datos kung saan ay mayroong
pagtugon sa mga katanungan o instruksyong nilalaman ng papel
 Grade 11 ng Senior High School – Ito ang unang taon ng Senior High School
matapos magtapos sa Grade 10 ng Junior High School
 Pasilidad – Ito ang mga kagamitan, instrumento at mga eksklusibong silid para
sa Senior High School
 Uri at dami ng aklat – Ito ang iba’t ibang barayti at angkop na aklat para sa
Senior High School
 Bilang ng mga guro – Ito ang dami o kasapatan ng mga guro sa departamento
 Aktibidad – Ito ang sari-saring mga gawain para sa mga mag-aaral
 Paksa ayon sa strand – Ito ang mga angkop na leksiyon sa napiling strand para
sa Senior High School
 Ebalwasyon – Ito ang kabuuang pagsusuri.
 KABANATA III

METODOLOHIYA

Inilalahad sa kabanatang ito ang mga pamamaraang ginamit sa pagaaral

at paglalarawan sa mga hakbang na isakatuparan sa pagsusuri at pagpapakahulugan,
ipapakita dito ang mga kalahok sa pananaliksik, mga instrumentong ginamit at
pamamaraan sa pangangalap ng datos.

3.1 Lokal ng Pag-aaral

Ang pag-aaral na ito ay isasagawa sa Departamento ng sekundarya ng Pilar

College, partikular na sa Senior High School.

3.2 Disenyo ng Pag-aaral

Ang pag-aaral na ito ay isinasagawa ayon sa disenyo ng paraang deskriptiv-

analitik na pananaliksik. Nagtatangkang itala at bigyang halaga ng pag-aaral na ito ang
mga pananaw, opinion at karanasan ng mga mag-aaral ng Grade 11 sa pamamagitan
ng talatanungan o sarbey kwestyoneyr upang makalikom ng mga gagamiting datos.
Naniniwala ang mga mananaliksik na angkop ang disenyong ito para sa paksa sapagkat
mas mapadadali nito ang pangangalap ng datos mula sa dami ng magiging kalahok.

3.3 Pagpili ng kalahok

Ang mga kalahok sa pag-aaral na ito ay manggagaling mula sa Grade 11 ng

Senior High School ng Pilar College at pipili sa pamamagitan ng pormyulang: 𝑛 = 𝑁 ∗
20% kung saan ang N ay tumutukoy sa kabuuang populasyon ng Grade 11; ang 20%
ay ang bahagdan na kailangang kunin mula sa populasyon upang makuha ang n, ang
sample size. Mayroong kabuuang 319 na mag-aaral sa Grade 11 at gamit ang unang
pormulya, ang lumabas na bilang ng kalahok ay 64. Matapos nito ay hahatiin ang bilang
ng kalahok sa 7 na seksyon ng Grade 11. Ang kalabasan ay 9.14, ibigsabihin, ang
bilang ng mga kalahok para sa bawat seksyon ng nasabing baitang ay 9 na mag-aaral
upang buuin ang 64 na kabuuang kalahok sa buong departamento.

3.4 Instrumento ng Pananaliksik

Ang mananaliksik ay gagamit ng talatanungan o sarbey kwestyoneyr bilang

pangunahing instrumento sa pagkalap ng mga datos para sa pag-aaral. Ang
talatanungan ay nahahati sa dalawang hanay: Paglapat ng tsek sa kahon ng mga sapat
o mabisang aspeto sa departamento at ang sarbey kwestyoneyr na naglalaman ng
dalawang katanungan ukol sa kanilang mga naging ekspektasyon noong unang
markahan pa lamang na hindi gaanong napunan hanggang pagtatapos at ang kanilang
kabuuang pananaw sa kanilang taunang karanasan sa Senior High School ng Pilar
College.
3.5 Daloy ng Pag-aaral

Alaming maigi ang pag-aaral at

magtalaga ng mga layunin

Lumikha ng sarbey na naglalaman ng

mahahalagang tanong ukol pag-aaral

Tukuyin ang bilang ng mga

kalahok para sa pag-aaral

Isagawa ang pamamahagi ng

sarbey sa mga mag-aaral

Simulan ang pagkalap ng mga

datos at impormasyon

Isaayos, suriin at bigyan ng

interpretasyon ang mga datos

Magbigay ng solusyon at rekomendasyong

naaayon sa resulta ng pag-aaral