ANG PANANALIKSIK

Ano ang Pananaliksik?

Ito ay sistematikong pag-iimbestiga at pag-aaral upang makapagpaliwanag at
makapaglatag ng katotohanan gamit ang iba’t ibang batis ng kaalaman. Isinasagawa ang
pananaliksik bilang isang lohikal at organisadong batayan ng mga karagdagang kaalaman tungkol
sa tao, kultura, at lipunan. Ginagamit ito bunsod ng pangangailangang palawakin o palalimin ang
kaalaman sa isang larangan lalo na sa mga institusyong pang-akademiko.
Nagsisimula ang pananaliksik sa pamamagitan ng mga tanong pananaliksik(research
question) . Sinasaklaw ng mga tanong na ito ang pinakubog o sentro ng pananaliksik. Tumutukoy
ito sa isang paksa, usapin, o pangyayari na nais siyasatin, at kailangang alamin; mga kondisyong
dapat baguhin; o mga hamon na dapat bigyan ng solusyon ng isang mananaliksik.
Paano bumuo ng maayos na tanong sa pananaliksik?
1. Pumili ng paksang kinawiwilihan at magbasa ng mga kaugnay na pag-aaral na naisagawa
tungkol dito. Makatutulong ito na makabuo ng mga pangunahing tanong mula sa paksa.
2. Isaalang-alang ang iyong mambabasa. Para kanino ang iyong isasagawang
pananaliksik?Subukang bumuo ng mga tanong na sino, ano, paano, saan, bakit at kalian
ukol sa paksang kinawiwilihan.
Mga Katangian ng Magandang Tanong sa Pananaliksik.
1. Tiyak, espesipiko, at maliwanag ang paggamit ng mga termino.Halimbawa: Alin sa
dalawang halimbawa ang magandang tanong sa pananaliksik?
Nakakabuti baa ng 4Ps ng gobyerno? Paano napapabuti ng 4 P’s ang kalagayang
pang-ekonomiya ng mga nakatanggap
nito?
Mapapansin sa tanong sa unang kolum na hindi tiyak ang saklaw ng salitang “nakabubuti”.
Samantala, ang tanong sa ikalawang kolum ay gumagamit ng mga tiyak na termino o salita
upang gawing mas epektibo ang tanong. Tinukoy agad sa tanong sa kanang kahon ang
ekonomikong kalagayan ng mga nakakatanggap nito.

2. Tumatalakay sa mahalaga at makabuluhang isyu. Dahil ang layunin ng pananaliksik ay

makapag-ambag ng kaalaman, solusyon, at impormasyon, kailangang magsimula sa mga
tanong na may mga implikasyong kapaki-pakinabang para sa lahat.

3. Hindi pa naisasagawa ngunit posibleng maisakatuparan. May mga katanungang

inilalatag upang saliksikin na hindi matasa ng anumang metodolohiya dahil abstrakto ang
pagkakatanong. Ang anumang tanong sa pananaliksik na kailangang hanapan ng sagot ay
kailangang nalalakipan ng angkop na metodolohiya upang masagot.

4. Nagtataglay ng malinaw na layunin at kahalagahan. Ibig sabihin, hindi lamang basta-

bastang tanong ang mga tanong sa pananaliksik. Sa pagbubuo ng mga tanong, kailangang
malinaw na nakaangkla ito sa layunin at kahalagahan ng bubuuing pananaliksik.
Madalas gamitin sa pananaliksik ang pamamaraang pasaklaw at pabuod

Pasaklaw- sinusuri ang mga detalye at obserbasyon upang matukoy at mapatunayan ang
pangkalahatang kaisipan at prinsipyo. Ibig sabihin, nagsimula sa maliliit na detalye bago
bumuo ng paglalahat.
Pabuod- unang inilalahad ang pangkalahatang kaisipan na pinatutunayan sa
pamamagitan ng mga detalye at obserbasyon. Sa prosesong ito, ang isang umiiral na
teorya o kaalaman ay sususugan ng mga detalye upang mapatunayan ang katotohanan at
bisa nito.