Masaganang Ani ng Mais

ni Rodolfo C. Cruz

Mga Tauhan:

Mag-asawang Maria at Jose, kasama ang sanggol na si Jesus

Pulido - isang magsasaka

Kasinta - maybahay ni Pulido

Ministro

Haring Herodes

Unang Tagpo

Naglalakbay ang mag-asawang Jose at Maria. Yakap-yakap ni Maria ang kanyang sanggol.

Maria: Jose, huminto muna tayo. Pagod na pagod na ako. Napakalayo na nang ating nalalakbay.
Mamahinga muna tayo sa ilalim ng punongkahoy na iyon.

Jose: O hayan, Maria... nakahinto na nag buriko. Akin na si Hesus... dahan-dahan. Mag-ingat ka sa
pagbaba, Maria. Aalalayan kita.

Maria: (Bababa mula sa buriko) Jose, may dumaratinh na tao! Sini kaya siya?

Jose: Magandang araw po. Makikisilong po kami dine sa ilalim ng inyong punongkahoy.

Pulido: Sige po. Hindi po ako ang may-ari niyan. Iyan po ay para sa ating lahat. Ako po ay nakikisilong din.
Pagod na pagod na po kasi ako sa pagtatanim.

Jose: Ano po naman ang inyong itinatanim?

Pulido: Mais po. Katatapos ko po lamang tamnan 'yung isang malaking pitak na iyon. Bukas po'y iyon
namang katabing pitak ang aking tatamnan. Huminto muna po ako upang kumain. Saluhan po ninyo ako.
(Kukunin ang basket ng pagkain na nakasabit sa sanga ng puno.)

Jose: Huwag na po. Nakakahiya naman po.

Pulido: Tayo pong lahat ay pagod at gutom. Pagsaluhan po natin ang pagkaing pabaon ng maybahay ko.
Ito pong sariwang gatas ng kalabaw ang ibigay natin sa inyong anak. (Ibibigay ang bote ng gatas kay Jose.)
Huwag na po sana kayong mahiya, kain na po tayo.

Maria: Pagpalain po kayo ng diyos sa inyong kabutihan.

Pulido: Tila po pagod na pagod angvinyong buriko. Paiinumin ko po siya at pakakainin para makatagal sa
paglalakbay.

Jose: Maraming salamat po, Ginoo.

Pulido: Sige po, kumain po kayo. Aasikasuhin ko lang po si buriko. (Aalis. At sa pagbalik niya...)

Jose: Salamat po, Ginoo sa inyong magandang kalooban. Kami po ay magpapatuloy na sa aming
paglalakbay.

Pulido: Bakit po naman para kayong lubhang nagmamadali?

Jose: Kami ho'y pinaghahanap ni Haring Herodes, at ng kanyang mga kawal. Papatayin nila ang aming
anak. Ang utos daw po ni Haring Herodes ay pugutan ng ulo ang lahat ng sanggol na lalaki, na ang edad
ay hanggang dalawang taon. Sa lugar pong ito'y hindi ligtas ang buhay ng aming anak. Kailangan pong
makarating kami sa isang tagong pook.

Pulido: Kung gayon po'y halikayo. Ituturo ko sa inyo ang isang lihim na landas patungo sa isang
kuwebang lagusan. (Inakay ni Pulido ang buriko.) Dito, dito po kayo magdaan. Mararating ninyo ang isang
lihim na kuweba. Doon po'y ligtas ang buhay ng inyong anak.

Jose: Salamat po, Ginoo. Kami po'y aalis na.

Pulido: Salamat din po sa ating pagkikita. Adiyos po.

Aalis na ang mag-anak, sakay ng buriko. Habang papalayo ay ihahatid sila ng tanaw ni Pulido.

Pulido: Sino kaya ang mag-anak na iyon? Tagasaan, kaya sila?

Ikalawang Tagpo

Makikitang dumarating ang maybahay ni Pulido, si Kasinta. May bitbit itong basket na nag laman ay
meryenda. Magtataka si Kasinta sa makikita.

Kasinta: Pulido! Hindi ba kanina mo lang tinamnan ang pitak na iyon?

Pulido: Aba! Kaylaking himala! Ang butil ng mais na itinanim ko kanina ay tumubo na! Malalaki na! At
may mga bunga na! (Nilapitan niya ang mga tanim na mais) Ang lalaki ng bunga!

Kasinta: Pagmasdab mo, Pulido! Matataba at malilintog ang butil! Pwede nang anihin!

Pulido: Napakalaking biyaya ng Diyos sa atin!

Kasinta: Ngayon lamang nangyari ito sa ating buong buhay!

Pulido: Salamat sa diyos!

 (Maririnig nila ang mga yabag ng kabayo. Kasunod noon ay isang malakas tinig.)

Ministro: Hoy, magsasaka!

Pulido: Bakit po...?

Ministro: May itatanong sa iyo ang ating kamahalan, si Haring Herodes. Huwag kang magsisinungaling!

Pulido: Ano po iyon?

Herodes: Magsasaka, may nagdaan ba ritong mag-asawa na may anak na isang sanggol na lalaki? Na
nakasakay sa isang buriko?

Pulido: Opo!

Herodes: Ha-ha-ha-ha! Magaling, Kailan sila nagdaan dito?

Pulido: Nagdaan po sila rito noong ako'y nagtanim ng mga butil ng mais. Ngayon po'y aanihin ko na ang
mga itinanim kong iyon. Hayan po, Mahal na Haring Herodes. Pagkalakilaki na po ng mga bunga ng mais.

Ministro: Mahal na Haring Herodes, hindi po iyon ang mag-anak na hinahanap ninyo. Mga buwan na po
ang lumipas nang magdaan sa lugar na ito ang mag-anak na ating hinahanap. Isipin na lang po natin,
Kamahalan... nang magdaan po rito ang mag-anak ay kasalukuyang nagtatanim ng mais ang
magsasakang iyan. Hayan po't aanihin na ang mais na kanyang itinanim!

Pulido: Sino po ba ang mag-anak na hinahanap ninyo?

Ministro: Ang sanggol na lalaki ay kailangan namin! Iyon daw ang Mesiyas! Iyon daw ang magiging hari
ng buong daigdig!

Herodes: Ako lamang ang dapat maging hari ng buong daigdig! Ako! Si Haring Herodes! Pupugutan ko ng
ulo ang sino mang magtatangkang umagaw sa aking trono! Ministro, bumalik na tayo sa palasyo!

Aalis na si Haring Herodes at mga kasama.

Pulido: Salamat po, Panginoong Diyos! Salamat po at binigyan Ninyo ako ng pagkakataong makilala kayo.
Salamat po sa himalang ginawa Ninyo sa tanim kong mais!