1.

Ang Parokya ni Santiago Apostol, sa awa at biyaya ng Diyos, ay patuloy na tumutugon sa pangkasalukuyang
kalalagayan ng makabagong panahon sa pamamagitan ng mga gawaing- Liturhikal at paghubog. Ilan sa mga gawaing ito
na tumugon sa 9 na taong paghahanda ng Inang Simbahan dito sa Pilipinas bilang pagdiriwang ng ika-5 Sentenaryo ng
ating pagiging Kristiyano ay mga sumusunod:

BASIC ECCLESIAL COMMUNITY, PARISH RENEWAL EXPERIENCE, WEEKLY BIBLE STUDIES at

BASIC BIBLE SEMINARS- Ang mga gawain na ito ang naging behikulo ng parokya upang maipalaganap ang
pananampalataya at himukin ang lahat ng parokyano na higit pang kilalanin ang Katolisismo na batay sa Banal na
Kasulatan. Ito rin ang pamamaraan ng parokya upang mapasigla pa ang buhay-espiritwal ng mga parokyano, aktibo man o
hindi sa gawaing simbahan.

MARRIAGE ENCOUNTER WEEKEND SEMINAR, PRE-CANA SEMINAR, AT TIPANAN 1 DAY SEMINAR-

Isa sa mga prayoridad ng parokya ay ang Apostolado sa Pamilya, kung kaya nga’t muling inilunsad, sa pamamagitan ng
Komisyon sa Pamilya at Buhay, ang pagsasagawa ng mga panayam ukol sa unawaang pang mag-asawa nuong taong
2014. Nilalayon nito na patatagin ang sektor ng pamilya at patibayin pa ang pagbubuklod ng Katolikong Mag-anak sa
pamamagitan ng Sakramento ng Kasal.

CAMINO DE SANTIAGO DE QUINGUA- Taong 2016 nang ito ay ating pasimulan na ayon na rin sa suhestyon ng
ating Kura Paroko, Fr. Elmer Ignacio, sapagkat aniya hindi naman lahat ng mananampalataya ay makararating sa
Compostela sa bansang Espanya upang isagawa ang Camino, kaya nga minarapat nating magkaroon nito sa ating parokya.
Layon nito ay hindi lang upang mapalakas pa ang debosyon sa ating minamahal na patron, kundi upang iparanas sa lahat
ng sumasama o Peregrinos kung tawagin, na ang Diyos ay matatagpuan rin natin sa mga nakapaligid sa atin, sa kalikasan
at sa mga taong nakakasalamuha o nakakasabay natin sa ating mga pang araw-araw na gawain.

ANNUAL FEEDING PROGRAM, MEDICAL & DENTAL MISSION, LIVELIHOOD PROGRAMS- Mula nuong
taong 2014 ay naging abala ang parokya hindi lamang sa gawaing pangkabanalan, ngunit lalo’t higit sa mga gawaing
makatutulong upang maiangat ang buhay ng mga kapus-palad na parokyano. Sa pamamagitan ng mga programang ito ay
naipaaabot natin sa kanila ang pagmamahal at pagkalinga ng Simbahan sa kanilang kalagayan.

YOUTH ENCOUNTER SEMINAR, DALAW-KABATAAN AT YOUTH LEADERSHIP SEMINAR- Ang ating

parokya ay hindi lang naniniwala na ang kabataan ang pag-asa ng bayan, ngunit higit sa lahat, ang kabataan rin ang pag-
asa ng Inang Simbahan; para sa ating parokya, ang kabataan ay hindi lang ang bukas ng simbahan, sa halip, sila ang
NGAYON ng simbahan, kaya’t patuloy ang mga programa upang sila’y mahubog. Sa pamamagitan ng mga gawaing ito,
ang parokya ang nagiging daluyan upang kanilang maranasan at maunawaan na sila’y tinatawag sa isang misyon. Sa
pamamagitan ng mga gawain ng ating parokya para sa sektor ng kabataan ay nararanasan nilang mahalin, pagpalain at
mapalakas sa kanilang apostolado.

2. Tulad ng nabanggit, ang ating parokya ay patuloy na tumutugon sa pamamagitan ng mga programa nito. Bagamat hindi
natin masasabi na palaging tagumpay ang mga gawain, ngunit ang mahalaga ay nararanasan ng parokya ang pag-ibig,
biyaya at awa ng Diyos sa pamamagitan ng mga programang nabanggit. Ayon narin sa aming mga karanasan, ilang tao na
ang lumapit sa amin upang isalaysay ang kanilang pagbabagong-loob sa pamamagitan ng PREX, o ng YE o ME. Ilang tao
na ang nagpatotoo na malaki ang nabago sa kanila mula nang sila’y dumalo sa mga pag-aaral ukol sa Banal na Kasulatan.
Ngunit ang ng lahat ng ito’y hindi namin maaaring ariing sariling tagumpay, dahil ang lahat ng ito ay sa pamamagitan
lamang ng biyaya ng Diyos. Sa madali’t sabi, naging matagumpay ang lahat ng programa at gawain ng parokya sa hamon
ng 9 na taong paghahanda ng Simbahan para sa taong 2021 sapagkat sa bawat kakulangan namin ay laging naruroon ang
Diyos upang punan ang lahat ng ito.

Inihanda ni

Bro. LEOBIN A. GERUNDIO

Chairman,
Komisyon sa Liturhiya