Teorya ng Pinagmulan ng Wika

ANG PINAGMULAN NG WIKA

Walang makapagsasabi kung kailan nagsimulang magsalita ang tao. Bagaman maraming paniniwala
hinggil sa pinagmulan ng wika ay wala sa mga ito ang makapagbibigay ng tiyak na paliwanag na maaaring
mapanaligan upang makapagdulot na ng malawakang katanggapan.

May 3000 taon na ang nakalilipas nang magkaroon ng interes ang tao na pag-aralan ang pinagmulan
ng wika.

ANG EKSPERIMENTO NI HARING PSAMTIK I NG EHIPTO Mula sa tala ni Herodotus na tinaguriang Ama ng
Kasaysayan (17th Century B.C)

Ipinagkatiwala ni Haring Psamtik ang dalawang silang na kambal na sanggol sa isang pastol ng tupa at
ipinag-utos na ilagay ang dalawang sanggol sa isang tahimik na lugar kung saan wala silang maaaring
marinig na anumang salita. Maging ang nasabing pastol ay pinagbawalang bumigkas ng anumang salita
at sa halip ay ginawa lamang siyang tagapaghatid ng lahat ng mga pangangailangan ng dalawang sanggol
tulad ng gatas at iba pa.

May paniwala ang hari na ang unang salita na namumutawi sa labi ng mga sanggol ang siyang una o
pinakamatandang wika sa daigdig.

Minsan, isang umaga, makalipas ang dalawang taon at habang naghahatid ng pagkain ang nasabing
pastol sa dalawang sanggol ay narinig niya mula sa mga ito ang salitang "beco". Dahil sa matinding
kagalakan ay agad niyang dinala ang dalawang bata sa hari upang ibahagi ang kanyang natuklasan.
Matapos itong mabatid ng hari ay kagyat niyang ipinahanap kung aling bansa ang nagtataglay ng salitang
beco sa kanilang wika. Nabatid niya na ang mga Phyrgians mula sa kanlurang bahagi ng bansang Turkey
ay may salitang Becos na ang ibig sabihin ay tinapay.

Bunga nito ay nakumbinsi siya na ang Phyrgians ang may pinakamatandang wika sa daigdig.

Subalit ayon sa pag-aaral ay mali ang naging konklusyon ng hari dahil ang salitang becos na narinig
niya ay pawang mga tunog lamang na inuusal ng dalawang (Bubbling) o posible naman na ginagaya
lamang nila ang tunog o huni ng mga kambing sampu ng huni ng mga hayop sa paligid. Bukod pa sa
katotohanan na ang wikang Phygian ay isa lamang sa mga wika na nagsisimula pa lamang madebelop
noong mga panahong iyon ayon sa pilolohikal na pag-aaral (Philological Studies).

ANG EKSPERIMENTO NI HARING FREDERICK II NG ROMA Mula sa tala ng isang Paring Pransiskano (1194-
1220 B.C)

Sa eksperimentong ito, inutusan ni Haring Federick ang isang babae na magpanggap bilang ina ng
isang sanggol na gawin lahat ng uri ng pag-aalaga magmula sa pagpapasuso, pagpapaligo at pagbibigay
ng iba pang pangangailangan ng nasabing sanggol.
 Kinakausap din niya sa tuwi-tuwina ang sanggol upang mabatid kung ang wikang una nitong
babanggiting ay Griyego, Latin o Arabe o di kaya ay ang wika ng totoo niyang mga magulang.

Subalit bigo ang eksperimentong ito dahil sa halip na magsalita ay pawang pagpalakpak at pagtawa at
pag-iyak lamang ang kayang gawin ng naturang sanggol.

ANG EKSPERIMENTO NI JAMES IV NG SCOTLAND (1473-1513)

Ayon sa eksperimentong ito ay ipinahuli ni Hating James IV ang isang babae at dinala ito sa isang isla
kasama ang dalawang bata. Dito ay ibinigay sa kanila ang lahat ng kanilang mga pangangailangan tulad
ng pagkain, tubig, damit at halos lahat-lahat na. Layunin ng eksperimento na matuklasan kung anong
wika ang unang sasalitain ng mga bata sa kanilang paglaki. At ayon sa mga kwento ay naging mahusay
raw ang dalawang bata sa wikang Hebreo.

Maaaring mababaw o sadyang hubad sa katotohanan ang naging resulta ng naturang mga
eksperimento at sadya ngang hindi ito naging matagumpay. Subalit gindi natin maikakaila na nagsilbi
itong tuntungan ng mga sumunod pang mga pag-aaral sa wika bunga ng mga isipan na walang kapaguran
sa pagtatanong at paghingi ng kaukulang kasagutan.

MGA TEORYA HINGGIL SA PINAGMULAN NG WIKA

Sa kalagitnaang bahagi na lamang ng ika-19 na daang taon masasabi na naging maagham ang mga
isinagawang pag-aaral hinggil sa wika, nang pormal nang kilalanin ang linggwistika bilang isang ganap na
larangan.

Sa unti-unting pamumukadkad ng larangan ng linggwistika ay muling nabuhay ang interes ng tao sa

wika partikular na sa Europa. Muling umaalingawngaw ang mga dating naisantabi nang mga katanungan
tulad ng ano ang pinakamatandang wika sa daigdig? Ano ang wikang sinasalita ni Adan at Eba? Saan at
paano kaya nagsimula ang wika? Mga katanungan na muling pumukaw sa kamalayan ng tao at nagluwal
ng samu't saring panibagong eksperimento at diskusyon na may makaagham na oryentasyon.

Subalit hindi naging madali ang pagsusulong ng linggwistika lalo na't bagong konsepto pa lamang ito
sa isipan at pandinig ng mga tao noong panahon iyon. Sa katunayan ang mga hindi naging matagumpay
na pag-aaral ang siyang nagbunsod sa Linguistic Society of Paris noong 1866 na huwag nang talakayin pa
ang usaping ito sa kanilang pagpupulong. Subalit hindi rin naman ganap na naisantabi ang usapin.

Ang pagiging masigasig sa paghahangad na payapain ang isipang patuloy na nagtatanong ang siyang
naghawan ng landas tungo sa pagkakabuo ng iba't ibang mga teorya hinggil sa pinagmulan ng wika na
hindi lamang nakasalig sa agham kundi sinusuportahan din ng mga tuklas sa larangan ng arkeolohiya at
mga talang pangkasaysayan. Nahahati ang mga ito sa dalawang pangkat: (1) Ang Teoryang Biblikal; (2)
Teoryang Siyentipiko.
A. TEORYANG BIBLIKAL

May dalawang tala sa bibliya na bumabanggit hinggil sa naging pasimula ng paglaganap ng wika sa
buong daigdig. Ito ay ang Tore ng Babel na mula sa Lumang Tipan at ang Pentecostes na nasa Bagong
Tipan. Ang mga kwentong ito ay madalas na nagtutunggalian sa isa't isa kung ating mababasa ang mga
aklat. Subalit hindi ito dapat tingnan sa puntong literal. Sa bahaging ito ay patutunayan ng mga
manunulat na hindi kailanman naging magkasalungat ang dalawang ito bagkus ay tuwirang magkaugnay
sa isa't isa.

1. TORE NG BABEL

Ang kwento hinggil sa "Tore ng Babel" na kilala rin sa taguring "Teorya ng Kalituhan" ay matatagpuan
sa aklat ng Genesis, bersikulo 1-8.

Nakasaad dito na dati-rati ay iisa lamang ang wikang sinasalita ng mga tao sa buong daigdig kung kaya
madaling nagkakaunawaan ang mga tao. Naipasya ng mga taong naninitahan sa silangan sa isang
kapatagan ng Sinai (senai) na magtayo ng isang lungsod na may "Tore" na aabot sa langit upang sila'y
mapatanyag at huwag ng magwatak-watak.

Hindi naibigan ng Panginoon ang ganitong gawain dahil di-umano'y pasimula pa lamang ito ng
kanilang mga binabalangkas at di maglalao't gagawa pa sila ng anumang kanilang maibigan. Dahil dito ay
naipasya ng Panginoon na guluhin ang kanilang wika upang hindi na sila magkaintindihan nang sa gayon
ay kagyat na matigil ang pagtatayo ng nasabing tore.

2. ANG PENTECOSTES

Ang tala hinggil sa Pentecostes ay matatagpuan sa ika-2 aklat ng Mga Gawa bersikulo 1-12. Ang
Pentecostes ay nangangahulugan ng pagdating o pagsapit ng Banal na Espiritu Santo. Ito ang kaganapan
ng pangako ni Hesukristo sa Kanyang mga Apostol na di-umano'y bibigyan sila ng Diyos Ama sa langit ng
Banal na Espiritu upang mapalaganap nila sa buong mundo ang mabuting balita ng kaligtasan bilang mga
saksi ni Hesukristo. (Mga Gawa 1:6-10).

Nakasaad dito na habang nagkakatipon sa isang lugar ang mga apostol ay bigla silang may narinig na
ugong mula sa langit at may nakita silang mala-dilang apoy na lumapag sa bawat isa sa kanila at silang
lahat ay napuspos ng Espiritu Santo at nagsalita ng iba't ibang wika. Dito nagsimula ang pamamalakaya
at pagpapakalat ng ebanghelyo ng mga apostol sa bawat sulok ng mundo na siyang naging pormal na
pasimula ng paglaganap ng Kristiyanismo.

Sa kasalukuyan ay pamilyar ang mga tao na kabilang sa mga Charismatic Movement sa terminong Gift
of Tongue na basta na lamang namumutawi sa kanilang mga labi ang mga salitang hindi naman nila
naintindihan. Ito ay nagaganap sa mga oras ng kanilang pagsamba o pagpupuri sa Diyos.
B. MGA TEORYANG SIYENTIPIKO

Ang iba't ibang teorya ukol sa posibleng pinagsimulan ng wika:

1. TEORYANG BOW-WOW

Ang teoreyang ito ay nagmula kay Max Muller na isang Aleman. Ayon sa kanya, ang wika ay nagsimula
buhat sa paggaya ng tao sa mga tunog ng kalikasan tulad ng langitngit ng kawayan, lagaslas ng tubig at
ihip ng hangin. Tinatawag din itong paghihimig o Onametopiya.

Hindi naging malawak ang katanggapan ng teoryang ito sa kadahilanang wala itong konsistensi at
dumedepende lamang sa pandinig na maaaring magkakaibang interpretasyon ng bawat lahi sa tilaok ng
manok.

Halimbawa:

Wikang Filipino - Tiktilaok o kaya ay kok-korokokok Wikang Ingles - Cock-a-doodle-doo

Wikang Pranses at Espanyol - cocorico Wikang Intsik (Chinese) - go-go-gooo

2. TEORYANG DING-DONG

Nakasaad sa teoryang ito na bawat bagay ay may sariling tunog na kumakatawan dito. Halos katulad
ito ng Bow-wow subalit may bahagyang kaibahan sapagkat hindi lamang tunog mula sa kalikasan ang
sinasaklaw ng Ding-dong kundi maging ang tunog ng mga bagay na likha ng tao tulad ng "tiktak" ng
orasan, huni ng tuko, uwak, palaka, ibon at tunog ng kampana.

3. TEORYANG TA-TA

Ayon dito ang wika ay nagsimula sa paggaya sa mga galaw ng katawan na humahantong sa
koordinasyon ng bibig at dila. Halimbawa ay ang pagkumpas ng kamay nang pataas at pababa tuwing
magpapaalam at ang pag-iling upang magpahayag ng hindi pagsang-ayon. Ang Ta-ta ay nagmula sa
salitang Pranses na nangangahulugang paala,. Tinatawag din itong muestra.

4. TEORYANG YO-HE-YO

Nagsimulang makabuo ng mga salita ang tao sanhi ng mga tunog na kaniyang nauusal tuwing siya ay
gagamit ng matinding puwersa sa pagbuhat ng mabibigat na bagay.

5. TEORYANG POOH-POOH

Ang tunog na naibubulaslas ng tao dala ng matinding takot, galak, sakit at iba pang emosyon ang siyang
pinaniniwalaang pinagmulan ng wika. Kung minsan ay sadyang hindi natin maiwasang umusal ng mga
tunog tuwing tayo ay nasa ilalim ng matinding emosyon.
 Bawat wika ay nagtataglay ng sariling damdamin na kumakatawan sa mga tagapagsalita nito. Kaya
kung minsan ay hindi kayang itago ng isang Pilipino ang kanyang tunay na pagkakakilanlan. Gaano man
siya kahusay sa wikang banyaga dahil sa sandaling masaktan ay salitang "aray" pa rin ang lalabas sa
kanyang bibig.

6. TEORYANG LA-LA

Ito ay mula sa isang Linggwistiang taga-Denmark na si Otto Jespersen (1860-1943) kung saan sinabi
niya na ang salik na nagtutulak sa tao upang magsalita ay ang mga pwersang may kinalaman sa romansa
tulad ng pag-ibig na makikita sa lenggwahe ng mga tula at awitin.

Bagamat hindi maipagkakaila na nagsisilbiong inspirasyon ng tao ang pag-ibig upang makalikha ng
mga dakilang komposisyon o obra ay hindi naman palaging nasa ganitong estado ng emosyon at pag-iisip
ang mga tao sa lahat ng pagkakataon.

7. TEORYANG YUM-YUM

Nilikha ang tao na sadyang may mga bayolohikal na pangangailangan tulad ng hangin, tubig at
pagkain. Dito'y nagiging pangunahing layunin ng kanyang pagkilos ang matugunan ang mga ito. Ang
teoryang ito ay iniluwal ng pagkalam ng sikmura ng tao dala ng nararamdamang gutom.

Nakabatay din ito sa stimulus-response theory kung saan madaling maakit sa pagkain ang isang taong
gutom. Madalas ding kumakatas ang ating mga bagang sa tuwing makakikita o makaaamoy tayo ng
masarap na pagkain sabay ang pag-usal ng salitang yum-yum o yummy.

Tumnutukoy ito sa koordinasyon ng kilos ng tao gaya ng pagtango kasabay ng pagsasabing oo, pag-
inom kapag nauuhaw at pagkain kapag nagugutom.

8. TEORYANG TARARA-BOOM-DE-AY

Tungkol ito sa mga seremonya o ritwal na isinasagawa ng mga tao tulad ng pagsasayaw, pagsigaw at
pag-ungol bilang isang porma ng pagpapahayag. Ang mga salitang kanilang naibubulalas mula sa
ganitong mga gawain ay nagiging bahagi ng kanilang pang-araw-araw na pamumuhay at kultura.

Bagaman naghahain ng iba't ibang paliwanag hinggil sa pinagmulan ng wika ang mga teoryang
nabanggit ay hindi pa rin ito sapat upang maging batayan ng ating paniniwala dahil marami parin itong
mga kakulangan.

KAKULANGAN NG MGA SINAUNANG PAG-AARAL HINGGIL SA PINAGMULAN NG WIKA AYON KINA DAVID
AT HEALY (1962)

Hindi ibinigay ang tiyak na petsa ng pinagmulan ng Inang Wika (Mother Language).

Masyadong limitado ang bokabularyong ginamit upang makapagbigay ng mapananaligang resulta.

Nakatuon lamang sa talasalitaan ang pag-aaral at hindi sa morpolohiya at sintaksis.

Hindi isinaalang-alang ang maaaring ang maaring maganap na paghihiram mula sa iba't ibang wika.

Walang sanligang matematikal ang teknik o pamamaraang ginamit.

DAGDAG-BATIS:

Kilala ang mga sumusunod na linggwista na nagpasimula sa pag-aaral ng mga wika sa Pilipinas:

Chirino (1604), Colin (1663) at Lorenzo Hueves Y. Panduro (1784) - Sila ay mga misyonaryong Kastila na
nagklasipika ng mga wika sa Pilipinas sa Angkang Indonesyo Polenesyo kung saan ibinigay ni Chirino ang
sumunod na komento hinggil sa Wikang Tagalog;

"Natagpuan ko rito ang apat na katangian ng apat

na dakilang wika sa daigdig; Ang Hebreo, Griyego,

Latin at Kastila. Nag-aangkin ito ng lalim at hirap

ng Wikang Hebreo, ang malinaw na katawagan ng

Wikang Griyego hindi lamang sa mga pangngalang

pambalana kundi higit sa mga pangngalang pantangi,

mga kaganapan at kariktan ng Wikang Latin at ang

pitagan at pagkamagalang ng Wikang Kastila".

Wilhelm Schmedt (1989) - Siya ang nagklasipika ng mga wika sa Pilipinas sa angkang Malayo -
Polynesian sakop ang mga wikang sinasalita sa Formosa hanggang New Zealand sa Timog at Eastern
Island sa Silangan hanggang Madagascar.

Dr. Ernesto Constantino - Sa kanyang mga pag-aaral sa mga dayalekto sa Pilipinas ay niyang 60% ng
Wikang Tagalog ay kogneyt ng Pampango na 48% ay kogneyt ng Cebuano na 47% kogneyt ng Hiligaynon
na 40% ay kogneyt ng Cebuano na 47% ay kogneyt ng Hiligaynon na 40% ay kogneyt naman ng Ilokano.

Jose Villa Panganiban (1967) - Dating Tagapangulo ng Surian ng Wikang Pambasnsa na naglathala ng
resulta ng kanyang pag-aaral hinggil sa mga salitang hiram kung saan sinabi niyang ang wikang Filipino ay
nanghiram ng 5,000 salita mula sa Kastila, 3,200 mula sa Malay, 1,500 mula sa Ingles at daan-daan mula
sa Sanskrito, Arabe, Persiano, Latin, Griyego, Nipongo, Aleman, Ruso at iba pa.