Sandali, kwentuhan lang kita nang kaunting update sa masalimoot kong
buhay dito sa marahas na mundong aking kinasadlakan. Naglalakad ako palabas ng campus ng LNAIS galing sa TM class.(Las Navas) Half day ako ngayon. Bakit? NCAE bukas, ibig sabihin busy sa review ang mga pulutong ng kabataan ngayon,hindi kasi sila nakapag-review kahapon. Bakit? Ninamnam kasi nila ang biyayang hatid ng kamatayan ng mga bayani kahapon,gumala lang sila at nag-fisbok maghapon. Mejo malalaking hakbang ang lakad ko palabas.Tatlong agenda ang kailangan kong matapos bago dumilim. Una, ang kumain ng lugaw sa may kanto,(dalawang liko papunta sa sakayan ng tricycle mula sa campus),pangalawa kumuha ng certificate of academic completion sa UEP. At ikatlo,umupo bilang hurado sa LNHS.(high school sa Laoang). Inabot ako ng dalawang oras sa xerox center dali sa pila.(brown out kasi mula umaga at 'yun nasa harap ng simbahan ng Las Navas ang natatanging xerox center ang may generator).Tapos lakad ulit ng isang kilometro patungo sa sakayan ng tricycle/motor para matupad ang unang agenda,ang lugaw. Ang bilis ng hakbang ko nang may tumawag sa akin.(akala ko hindi ako ang tinawag,una hindi ko pinansin)pero dahil katunog ng buo kong pangalan ang binanggit niya,,pati apelyido,lumingon na ako. Isang security guard ang tumawag sa akin. Kinabahan ako siyempre. May nilabag ba akong batas ng dinaanan kong gusali? Jaywalking ba ako kahit walang traffic o road sign? Kremin na ba ang pagiging pangit? Lumapit ang sekyu.Sinamantala ang aking paghinto. Mukha na ba akong shoplifters?Gangster? Pusher? Snatcher?
“Hoy kumusta?”sabi nito.
“Uy,ok lang naman. Ikaw sino ka?" Ito sana ang sagot ko sa hindi maalalang pangalan ng kaharap pero nginitian ko na lang at sinabing:
“Ayos lang.”
Lumapit siya sa akin at ikinagulat ko ang sinabi. “May bf ka na yata ngayon
no?” Ang weird na tanong niya. Parang hindi na nga yata tanong,parang declarative statement na. Parang gusto kong talikuran ang kaharap. Ang lakas naman kasing makaintriga. Out of nowhere may magtatanong sa'yo nang ganito sa kasagsagan ng iyong pagmamadali. Ano pa bang magiging reaksyon ko lalo't hindi ko kilala ang nilalang na parang showbiz reporter na nag-anyong sekyu. Sumagot ako. Sabi ko wala akong balak. Nagtaka lang talaga ako sa itinanong niya.May kung anong tunog malisya. Pero mas nagtaka ako sa sarili ko dahil sumagot ako kahit hindi ko kilala o hindi lang maalala. Weird siya. Weirder ako. Naging klasmet ko ba'to dati? Naging biktima ko ba ng kapangitan ng ugali ko dati? Bakit kilala niya ako at hindi ko siya kilala.100% sure ako na kilala ko pa hanggang ngayon ang mga naging klasmet ko mula grade one to college. Mula sa TESDA hanggang sa workshops natatandaan ko pa lahat. Kaso hindi na nasagot ang lahat ng tanong ko dahil nabangga na ako ng traysikel na puno ng studyante. Dahil nakalingon ako kay sekyu kaya nasapol ang kanang bente ko ng gulong. Nadumihan ang suot kong slacks. Nagalit si sekyu sa matanda,mga 150 years old na sigurong nagmamaneho ng traysikel. Bakit daw hindi nagpreno tanong ni sekyu. Bakit daw kami nagkukuwentuhan sa gilid ng daan,depensa ni lolo driver. Nagalit si sekyu,natural. Kesyo nagkukwentuhan(na hindi naman talaga) sasagasaan na ako?*ubo* Nag-sorry na lang ako. Pero humingi ng pasensya si lolo gamit ang dalawampung wika,including Aramaic,Swahili,Bengali, Russian, Jeje at Beki. Pero seryoso ang sekyu. Magpa-X-ray daw ako. At tsaka magreklamo. Sabi ko 'wag na. Marami akong lakad. Besides, nadumihan lang naman ang pangbaba kong suot.At saka,mukhang ilang rebolusyong Pilipino na ang pinagdaanan ni Tatang.Na-survive niya ang ilang Makapili noong panahon ng Hapon,hindi isang munting galos ko ang magpapakulong sa kaniya at sa kaniyang traysikel na ginamit pa yata ni Mc Arthur. Sabi ko okey na.At gusto kong idugtong ang salitang “sino ka?" Kaso huwag na. Mapapahaba lang ang usapan. Tinanong niya ako kung nasaktan ako. Gusto kong isagot: “Mas iritado ako sa iyo ,pwede bang makaalis na?” Pero naalala kong nagbago na pala ako *ubo* kaya naisagot ko na lang ay “Iʻm fineʼʼ Nabigla ako sa sagot ko. English eh, Im fine! Nabigla si sikyu.Nabigla si Tatang. Kaya sa susunod na may magtatanong ulit sa akin tungkol sa letseng love life na 'yan,kung may bf ako o wala, ang isasagot ko na lang ay "I'm fine." Para iwas disgrasya.
Ngayon papunta na ako ng UEP, tapos na akong maglugaw.
Now, I'm in a semi-siksik na habal-habal going back to my regular programmed task.