KAIBIGAN, MAGPASALAMAT KA…
Ang tulang ito ay sinadyang binuo
para lamang sa napakaespesyal na okasyon sa
araw na ito.
Nawa'y ang tulang ito
ay maging instrumento
upang ipaalala sa akin at sa iyo
kung paano pinuno ang lahat ng kagustuhan at
pangangailangan mo
ng isang Dakilang Nilalang
na kahit kailanma'y hindi nagkulang.
Ang tulang ito ay pinamagatang Kaibigan,
magpasalamat Ka.
Ipikit ang inyong mga mata
at ating babalikan ang nalimot ng mga alaala
Ating babalikan, mundo ng nakaraan,
At ang tanging makikita mo lamang ay puro
kagandahan
Kagandahan...
ng mga punong nagtataas-taasan
Mga alon na tila naghahabulan sa dalampasigan
Kagandahan ng malalawak na bundok at kapatagan
Ngunit saglit lamang at tila ako'y may
nakalimutan...
Tumingin sa inyong kaliwa at kanan
Ibaling ang mga mata sa harap at likuran
At makikita mo... nakikita mo na kaibigan ang
pinakamagandang nilikha ng Maykapal... ang
sanlibutan.
Ang mundo ay puno ng kagandahan
Kagandahan mapakaliwa man o kanan
Ngunit nang dahil sa ang tao ay hindi marunong
makuntento
kaya naghari ang kaguluhan dito sa ating mundo
Nagkaroon ng digmaan at terorismo
Nag-aaway-away kahit magkakapamilya't
magkakadugo
Ang sanlibutan ay binigyan ng kakayahang
magsalita, mag-isip at mag-imbento... hindi para
puro reklamo.
Oo, iyon ay totoo
tayo'y palaging nagrereklamo
Nasasaktan sa oras na tayo'y nadadapa
Umiiyak sa oras na tayo'y napapahiya
Nawawasak sa oras na tayo'y iniiwan
Na tila bang pakiramdam mo ang lahat ay kanila ka
nang tinalikuran
Kaibigan, naalala mo pa ba ang huling sandaling
nagpasalamat ka sa Kanya?
Sa mga oras na binigay Niya ang "dream girl o
dream boy" mo,
Sa mga oras na binigay Niya ang pinapangarap
mong trabaho?
Eh, nang makabili ka na ng magarang "auto"?
At nang nakamit mo na ang mga "travel goals" mo?
Kaibigan, alam kong punong-puno ng pasasalamat
ang iyong mga bibig sa mga oras na ito.
Eh paano nong naghiwalay na kayo ng inaakala
mong "the one"
Paano nong natanggal ka sa trabaho at agad kang
pinalitan
Paano nong binawi na ang auto mo dahil na
remata
Paano kung hindi ka na makagala dahil naubusan
ka na ng pera?
Kaibigan, magpapasalamat ka pa rin ba?
O, Baka nagpapasalamat lang tayo kapag may
natatanggap na biyaya?
Ang tao ay mabuti kung may kailangan
Pagkatapos nito’y agad namang nakakalimutan.
Damit, pagkain, kotse, at alahas
Pero paano kung wala ka ng mga ito?
Masasabi mo bang ikaw ay malas?
Tubig, hangin, at buhay
Mula sa Kanya, sa'yo ay libreng ibinigay
Kaibigan...
Magpasalamat ka, hindi dahil ikaw ay may bahay at
lupa
Kaibigan...
Magpasalamat ka, hindi dahil ikaw ay may kotseng
magara
Kaibigan...
Magpasalamat ka, hindi dahil ikaw ay tinitingala
Kaibigan...
Magpasalamat ka, kahit sa gitna ng iyong mga
problema
Kaibigan…
Magpasalamat ka... Magpasalamat tayo sa Kanya
sa buhay na siyang tunay na biyaya.