Korapsyon kahit saan

2.4KSHARES142
K KA LANG? - Korina Sanchez () - August 15, 2010 - 12:00am
KAPAG nababanggit na ang salitang korapsyon, gobyerno kaagad ang nasa
isip. Hindi matatanggal sa pag-iisip ng lahat, na kapag korapsyon na ang
pinag-uusapan, siguradong gobyerno kaagad ang salarin. At hindi masisisi
ang tao na mag-isip nang ganun, dahil masyadong malalalim na ang mga
ugat nito sa burokrasya ng gobyerno. Kahit anong linis pang gawin ng
administrasyon ni President Aquino, hindi mawawala lahat. Pero naniniwala
ako na malaki ang mababawas sa larangan ng korapsyon sa ilalim ng
administrasyong Aquino.

Pero may korapsyon din sa pribadong sektor, na halos mapapantayan pa

kung hindi lalampasan ang korapsyon sa gobyerno. Dahil sa pribadong
sektor, wala kang matatakbuhang ahensiya para isumbong ang katiwaliang
nagaganap. Halimbawa, may ilang korporasyon diyan, na kumakabig pa ng
sampung porsyento sa binabayad nila sa mga supplier. Bukod pa ito sa
napakatagal magbayad para sa mga serbisyong naibigay na. Pero kapag
nangailangan muli ng serbisyo, dapat mabilisan. Hindi pa parang gobyerno na
rin ito? Nagmamadaling matapos ang mga proyekto o serbisyo, pero
napakatagal magbayad, kakabig pa ang ilang opisyal na SOP. Kung hindi ko
sinabing pribadong korporasyon ito, gobyerno kaagad ang nasa isip ninyo.

Masyado na bang malalalim ang mga ugat ng korapsyon sa ating kultura, na

pati sa pribadong sektor umiiral ang ganitong kaugalian? Kailan magiging
tunay na propesyonal ang Pilipino, na gabay ng maayos at tapat na
paghahanap-buhay? Hindi malalagay ang Pilipinas sa ulo ng listahan ng mga
pinaka-corrupt na bansa kung magiging propesyonal lang ang kilos at trabaho
ng lahat, maging gobyerno o pribado.

Sa mga maunlad na bansa, hindi makikita ang ganitong klaseng kaugalian.

Pag nabigay na ang serbisyo o produkto, bayad kaagad, at wala nang kabig-
kabig. Ni hindi magagawa ang pag-undervalue ng isang produkto sa
deklarasyon ng customs. Kaya mapipilitang magbayad ng tamang buwis.
Isipin na lang ang matitipid ng lahat, na magagamit muli sa negosyo o sa
propesyon, o magagamit ng gobyerno sa serbisyo para sa mahihirap. Walang
lugar ang korapsyon kahit saan, sa isang bansang gustong umunlad

Read more at https://www.philstar.com/opinyon/2010/08/15/602444/korapsyon-kahit-

saan#UvxBg78FQo7z7uhs.99