Araw#02
Teknikal-Bokasyunal na Sulatin
Ito ay komunikasyong pasulat sa larangang may
espesyalisadong bokabularyo tulad ng agham,
inhenyera, teknolohiya, at agham
pangkalusugan. Karamihan sa mga teknikal na
pasulat ay tiyak at tumpak lalo na sa pagbibigay
ng panuto. Ang teknikal na pagsulat ay
naglalayong magbahagi ng impormasyon at
manghikayat sa mambabasa.
Karagdagang babasahin
Teknikal-Bokasyunal na Pagsulat
Kahulugan
Ang sulating Teknikal-Bokasyunal ay mga
akdang isinusulat kaugnay ng trabaho o Gawain
sa isang partikyular na larangan na nagmumula
sa karanasang personal, natamong edukasyonal
teknikal at mga pagsasanay.
Layunin
1. Malinang ang mga kaalaman ng
mga mag-aaral .
2. Masunod ang partikular
na kumbensyon.
3. Maipakita ang resulta ng
pagsisiyasat o pananaliksik.
4.Maitaas ang antas ng mga Kasanayan
Mga Salik
1. Ang manunulat at ang kanyang layunin
2. Ang mambabasa at ang paksa
Iba’t Ibang Uri ng sulating Teknikal-Bokasyunal
Manwal
Liham-pangnegosyo
Flyers/Leaflets
Promo Materials
Deskripsyon ng produkto
Feasibility Study
Dokumentasyon sa paggawa ng isang
bagay/produkto
Naratibong ulat
Paunawa/babala/anunsyo
Menu ng pagkain
Araw#03
Hakbang sa Teknikal na Pagsulat
1. Pag-asinta (Triggering)
2. Pagtitipon (Gathering)
3. Paghugis (Shaping)
4. Pag-rebisa (Revising)
Karagdagang babasahin
Pag-asinta - Kailangang may isang bagay
na magsisilbing daan upang tayo’y sumulat.
Kung tayo’y may paniniwala sa ating sarili,
matutuklasan natin ang mga paraan upang
magtagumpay sa pagsulat. Makalilikha ng
mabuting sulatin ang sinuman kung nailalagay
niya ang kanyang sarili sa paksa.
Pagtipon - Anumang paksang napili,
kailangan pa ring magdaan sa masusing
pagsasaliksik at pagtuklas. Kailangang
makapangalap ng sapat na materyales at
ebidensyang magpapatunay. Bukod sa ating
karanasan, maaari tayong magsaliksik sa
dyornal, magazin, ensayklopidya, pahayagan,
interbyu at maging sa panonood ng sine at
telebisyon.
Paghugis - Habang nangangalap tayo ng
materyales, binibigyan natin ng hugis ang ating
paksang susulatin. Maaari nating sulatin ang
burador na maaari ring maging batayan sa
pangangalap ng mga kagamitan. Kailangang
makita natin ang pokus ng ating paksa sa
pamamagitan ng pagtatanong sa sarili kung ano
ang tunay na paksa.
Pagrebisa - Ang isang sulatin ay hindi
makukuha sa isang upuan lamang. Ang isang
mabuting papel ay nagdadaan ng ilang yugto ng
pag-unlad mula sa mga di-formal na tala tungo
sa unang burador, hanggang sa paynal na
papel. Karamihan sa nalathalang sulatin ay
dumaan ng mga pagbabago at muling pagsulat
hanggang sa maabot nito ang pinakawasto at
tumpak na pamaraan ng pagsulat.
Araw#04
URI NG HULWARAN
• PORMAL/IMPORMAL
• PAGBIBIGAY-KAHULUGAN
• PAGHAHALIMBAWA
• PAGKILALA SA PINAGMULANG SANHI AT
BUNGA
• PAGLILISTA
Karagdagang Babasahin
Pormal/Impormal - Ang sulating pormal
ay galing o bunga ng leksyon na pinag-aralan at
tinalakay sa klase, forum o seminar. Maaaring
magkaroon o magsagawa ng pagsasanay sa
pagbuo ng kathang pasalita. Pagkatapos ay
iwawasto upang pasulatin ang mga mag-aaral
ng isang kathang di-pormal. Ang mga
pagsasanay sa pagsulat o paglikha ng kathang
di-pormal ay siyang gagawing paghahanda at
basehan para sa pagsulat ng kathang pormal.
Pagbibigay-kahulugan - Ito ay paraang
eksposisyon na tumatalakay o nagbibigay-
kahulugan sa isang salita. Ito rin ay paglilinaw
sa kahulugan ng isang salita upang tiyak na
maunawaan. Bawat disiplina o larangan ay may
tiyak na mga salitang ginagamit kaya’t
kailangang ipaliwanag ito sa pamamagitan ng
depinisyon.
Paghahalimbawa - Ito ay isang uri ng
sulatin na binibigyang halimbawa ang mga
konsepto upang lubos na mapalawak ang
kaalaman at maunawaan ng mga mambabasa
ang teksto.
Pagkilala sa Pinagmulan ng Sanhi at
Bunga - Ang sanhi ay isang ideya o
pangyayaring humahantong sa isang bunga.
Kalimitan, ang dahilan o sanhi ay nagdudulot ng
higit sa isang bunga o kinalabasan.
Paglilista - Ang paglilista o enumerasyon
ay tumutukoy sa talaan o listahan ng mga
ideya, katotohanan o detalye tungkol sa
pangunahing ideya. Ang mga impormasyon ay
isa-isang itatala at tatalakayin. Madalas na
nakaayos ito nang ayon sa tamang
pagkakasunod-sunod.
Araw#05
Manwal
- Ito ay isang libro ng impormasyon o mga
tuntunin. Karaniwang naglalaman ang isang
manwal ng iba’t ibang impormasyon hinggil sa
isang produkto, kalakaran sa isang organisasyon
o samahan o kaya’y mga detalyeng naglilinaw
sa proseso, estruktura, at iba pang mga
detalyeng nagsisilbing gabay sa mga magbabasa
nito.
Karagdagang Babasahin
Layunin
-magpaliwanag at maglahad ng impormasyon
hinggil sa isang paksa
Gamit
-nagsisilbing gabay upang magkaroon ng linaw
ang isang proseso
Katangian
-nakaayos ng pabalangkas ang nilalaman at
nagtataglay ng mga larawan o tsart
MGA BAHAGI NG MANWAL
Pamagat- nagbibigay ng pangunahing
ideya sa kung ano ang nilalaman ng manwal
 Talaan ng Nilalaman- nakasaad dito ang
pagkakahati-hati ng mga paksa sa loob ng
manwal at ang pahina kung saan ito tinatalakay
Pambungad- naglalaman ng paunang
salita tungkol sa manwal gayundin ng mensahe
o pagpapaliwanag tungkol sa nilalaman nito
mula sa may-akda o sa isang taong may
kaugnayan sa kompanyang nagmamay-ari ng
manwal
Nilalaman- tumatalakay sa katawan ng
manwal, sa mismong pagpapaliwanag ng mga
gabay, pamamaraan at/o alituntunin
Apendiks- matatagpuan dito ang mga
kalakip na impormasyon hinggil sa manwal
katulad ng mga impormasyon sa pagkontak,
mga tala, at iba pa.
Araw#07
Liham-pangnegosyo
-Uri ng liham na ginagamit sa mga tanggapan o
bahay-kalakal. Ito ay higit na pormal, tiyak at di
maligoy ang pananalita. Hindi katulad ng liham
pangkaibigan.
Karagdagang Babasahin
Layunin
Magsilbing tulay ng pakikipagtalastasan
Gamit
Korespondensya at kalakalan
Katangian
Maikli, simple at medaling maunawaan
Mga Dapat Tandaan sa Pagsulat ng Liham-
Pangnegosyo
1. Mahalagang tiyakin kung ano ang layunin ng
liham. Maaari itong maging isang liham
kahilingan, liham pag-uulat, liham pagkambas,
subskripsyon, pag-aaplay, pagtatanong, atbp.
2. Kalimitang binubuo ang liham-pangnegosyo
ng: ulong-sulat, petsa, patunguhan, bating
pambungad, katawan ng liham, bating
pangwakas, at lagda.
3. Pormal ang paggamit ng wika sa pagsusulat
ng liham-pangnegosyo at maaaring kakitaan ng
mga salitang teknikal na kinakailangan sa isang
partikular na trabaho.
Bahagi ng Liham-pangnegosyo
1. Ulong-sulat
2. Pamuhatan
3. Patunguhan
4. Bating Pambungad
5. Katawan ng Liham
6. Bating Pangwakas
7. Lagda