Kahandaan sa Pagbasa

Ang kahandaan sa pagbasa ay isang mahalagang katangian na dapat

taglay na ng isang bata sa kindergarten o sa unang baitang ng paaralang
elementarya. Sa yugtong ito ng pag-aaral ng pagbasa, maaaring magpakita
ang isang bata ng kahinaan sa gawaing pagbasa dahil ang pagiging handa ay
nababatay sa kalikasan ng mag-aaral. Ito ay itinatadhana nang ayon sa
maraming salik at ang mga ito ay dapat pahalagahan bawat gurong may
pananagutan sa mga unang araw pa lamang ng mga bata sa paaralan.
Maraming salik ang maaaring makaimpluwensya sa kahandaan ng bata sa
pagbasa at kailangang maisaalang-alang ang mga ito para sa isang
matagumpay na pagkatuto.

1. Kagulangang Pisikal (Physical Maturity)

-ang kahustuhan ng isip at ang pangkalahatang kalusugan ng bata ay
mahalaga. Malinaw niyang nakikita ang anyo ng hugis, naririnig nang wasto at
maliwanag ang bigkas ng mga salita at nauulit ang naririnig na salita kung
wala siyang depekto sa paningin, pandinig at pagsasalita.
2. Kagulangang Mental (Mental Maturity)
-ang salik sa pangkaisipan o mental ay mahalaga sa pagkilala ng salita at
mga simbolo at pagpapakahulugan sa mga simbolo, at sa kakayahang makita
ang pagkakatulad at pagkakaiba ng mga simbolo at salita. Kailangan din ang
talas ng pananda o memori.
3. Kagulangang Sosyal at emosyonal (Social and Emotional Maturity)
-magkaiba-iba ang lawak at saklaw ng panlipunang pinagmulan ng mga
bata. Iyong mga likas na matatalino ay malamang na galing sa masayang
tahanan at maaaring makadama ng katiwasayan at kasiyahang lumahok sa
mga gawain. Sa isang kapaligirang ang mag-aaral ay hindi nagkakaroon ng
mga suliranin(gaya ng pagkatakot, pagkapahiya, pangamba atbp.) ay higit na
magiging mabilis ang pagkakalinang ng kahandaan sa pagbasa.
4. Personalidad at Karanasan (Personality and Experience Factor)
-ang mga unang karanasan sa tahanan at sa kapaligiran ay nakaapekto sa
personalidad ng mag-aaral at nakaapekto rin naman sa kakayahan sa
pagbasa at maging sa iba pang gawain sa pagkatuto. May mga batang lumaki
sa tahanan o kapaligirang marahas, malupit at may lumaki sa isang
kaigaigayang kapaligiran. May mga batang pagkapanganak pa lamang ay
nakalantad na sa iba’t ibang aklat at mga babasahin. Ito’y mga salik na may
malaking kaugnayan sa maagang pagkakaroon ng kahandaan sa pagbasa.
5. Wika ( Language Factor)
 - pagtuntong ng isang bata sa paaralan,tinatayang mayroon na siyang
ganap na pagkontrol sa palatunugan., morpolohiya at sintaks ng wikang una
niyang natutuhan, mayroon na rin siyang sapat na talasalitaan na magagamit
niya sa pakikipag-ugnayan sa bago niyang kapaligiran. Ang ganitong mga
kakayahan ay nakatutulong nang malaki sa mabilis na pagkalinang ng
kahandaan sa pagbasa.