Para sa mga letrang C-P-A

ni Siti Wasiya Barapangcat

Nagsimula ang lahat sa pangarap niyang nawaglit

Oo pangarap niya at hindi akin

Kasi ang totoo ang pangarap ko ay iba

Kaya wag kang mainis at magalit

kung sa patimpalak na ito ako ay paulit-ulit nalang na talunan

Kasi sa totoo lang...Hindi ko alam kung may ilalaban pa ba ako.

Isa akong mandirigma

Matapang at magaling

Ngunit naging mangmang ng sumubak sa digmaang inakala kong kaya ko

Malalalim na mga sugat ang kusa kong tinanggap

Matutulis na mga pana ang sinalo ko

Para lang sa pangarap ng iba

Para sa mga letrang C-P-A

Na hindi niya nakamtan

Paulit ulit na nadadapa

At paulit ulit na ring bumangon

Paulit ulit na nasusugatan

Paulit ulit na umiiyak

Paulit ulit na natatanga

Paulit ulit nalang

Pwede ba?

Pagod na pagod na pagod na ako

 Ang turo sa atin ay pag may debit may credit

Kailangan balance ang lahat

Ngunit bakit kahit ilang baso pa ng kape ang naubos ko

Ilang oras dilat ang mga mata ko

At kahit anong pagpupursigi ko

Bagsak parin ako

Kinulang daw ako sa effort

Kinulang daw ako sa study

Pero ang totoo kinulang ako ng tiwala sa sarili na kaya ko pa

Baka ubos na nga eh!

Diyos ko!

Nanliit ako

Akala ko kaya ko

Akala ko magaling ako

Akala ko matatag ako

Pero puro akala lang pala ang lahat

Hindi ko maiwasang itanong sa sarili ko

Bakit ako?

Kaya ko pa ba?

Durog na durog na ako! Hindi pa ba sapat yun?

Darating pa kaya ang panahon na maidurugtong ko din mga letrang CPA sa pangalan ko?

Pero napaisip din ako

Ngayon pa ba ako susuko?

Ngayon bang halos abot kamay ko na ang lahat?

Isa akong tangang talunan

 Isang duwag na walang kayang patunayan

Kung ngayon pa ako tatakbo para talikuran ang lahat

Kaya sa kabila ng lahat ng ito

Patuloy akong lumalaban kahit alam ko sa sarili ko na talo na ako

Patuloy akong bumabangon kahit alam ko na madadapa ulit ako

Patuloy kong pupunasin ang mga luha ko kahit alam ko na iiyak ulit ako

Patuloy kong bubu-in ang wasak na wasak na ako

Hanggang makamtan ko ang pangarap niya

Ang mga letrang C-P-A