Ngayong 2019, nakatakdang ganapin ang SEA Games o ang South East Asian Games sa ating bansa. Sinasabing mas magiging espesyal ang edisyong ito dahil 56 na sports ang gaganapin na siyang pinakamataas na bilang sa lahat ng edisyon. Ito rin ang kaunaunahang edisyon na mayroong E-sports at Obstacle course. Habang papalapit ang petsa ng pagsisimula, ay humaharap sa malaking problema ang Philippine Southeast Asian Games Organizing Committee o (PHISGOC) na pinangungunahan ni Chairman Alan Peter Cayatano. Kaakibat nito ang isang malaking karangalan subalit mayroon itong kaakibat na responsibilidad upang maidaos ng matagumpay ang nasabing programa na ngayon namang pinoproblema ng Pilipinas. Isang napakalaking oportunidad ito para sa bansa sapagkat ito ang ika-apat na beses na ang Pilipinas ang napiling pagdarausan ng SEA Games mula noong 2005, dagdag pa dito ang pag-host ng bansa noong 1981 at 1991. Itinuturing din na ang ngayong SEA Games ang pinaka ambisosyo sa lahat ng mga nagdaang edisyon dahil ang 30th South East Asian Games ngayon ay mayroong nakatakdang 530 events sa 56 na sports. Gayunpaman, hinaharap ng Pilipinas ang malaking problema sa pagkaantala ng paggawa at paghanda ng mga pasilidad na pagdarausan ng mga samu’t saring palaro ng SEA Games. Isang magandang halimbawa nito ay ang kinakaharap ni Bettina Pou. Ayon kay Pou, wala nang oras para maisaayos ang mga pasilidad na gagamitin para sa Gymnastics. Hindi kaaya-aya ang mga palikuran, walang air conditioner at mahinang telecommunication netwok ng bansa. Alinsunod sa Chairman ng Philippine Sports Commision (PSC) na si William “Butch” Ramirez, ang mga problemang ito ay ang kakulangan sa kooperasyon sa pagitan ng POC at PHISGOC o Philippine Olympic Committee at Philippine SEA Games Organizing Committee at ang mabagal na distribusyon ng National Budget o kakulangan ng financial support ng pamahalaan sa mga National Sports Association. Batay sa tagapangasiwa ng South East Asian Games Information System (SEAGIS) na si Labadan, marami pang venue ang hindi tapos, maraming kagamitan ang ‘di pa dumadating at ni wala pang nabibigyan ng kontrata para sa network infrastructure at connectivity. Kasalukuyan namang sinosolusyonan ang mga naitalang problema sa kasunduan ng PSC, POC at PHISGOC para sa network providers nitong Agosto 2019. Sa lagay naman ng National Budget ay may nailabas na na parte nitong Mayo 2019, isang buwan matapos pirmahan ni pangulong Duterte ang 2019 National Budget. Masusing paghahanda at pag oorganisa ang kinakailangan upang mairaos ang SEA Games sa Pilipinas, ngunit lingid sa kaalaman ng lahat ay ang kinakaharap na problema ukol di lamang sa mga pasilidad at network communications kundi pati na rin ang pagplano ng daloy ng naturing paligsahan na kinakailangan ng malaking pondo. Malaking responsibildad ang naiatas sa ating bansa, marapat lang na bigyan ito ng naaayon na aksyon. Ang tanging hamon lamang sa bawat atletang Pilipino na sasabak sa darating na edisyon ay ‘wag bigyan ang Pilipinas ng kahihiyan at matiyak ang tagumpay ng SEA Games.