1

CELEBRATION : 2019 NUTRITION MONTH

THEME : “KUMAIN NANG WASTO AT MAGING AKTIBO…
PUSH NATIN ‘TO!”
(EAT HEALTHY AND DO PHYSICAL ACTIVITY…
LET’S PUSH THIS!)
CONTESTANT : CHEV GABRIEL N. POYOGAO
SCHOOL : BINICUIL ELEMENTARY SCHOOL
EVENT : POEM INTERPRETATIVE READING (GRADES 4 - 6)
CATEGORY : HILIGAYNON

AY ABAW! MAS MAPAGSIK PA KUNO ANG TURAGSOY!

Nagadabadaba na si Haring Adlaw

Si abyan ko Busoy wala pa nakabugtaw.

Nagapilit sa banig, nagabarikuktot.

Naga-ilig ang laway, makahalam-ot!

II

Pero ang kondisyon ni Busoy indi kahalam-utan,

Kag amo ini ang ginakulbaan sang iya ginikanan.

Sa masami nagapaluya, tamad mag-inat sang iya tul-an.

Puros wala nutrina ang nadasok sa iya kasudlan.

III

“Hoy, Busoy ano ina ang ginatangla mo sa langit?

Indi mahulog halin dira ang pagkaon nga manamit!”

Amo ina ang masami nga atungal sang iya Nanay

Kag si Busoy dayon kusamod sa utan nga Balunggay.

IV

Siling sang mga kaingod taga-makita si Busoy –

“Ay abaw! Mas mapagsik pa ang Turagsoy!”

 2

Daw beybi nga elepante ang akon abyan

Nga dayon pangyam-id kun siya laygayan.

Ang akon abyan pwerte ang paghabok,

Daw ako ang ginakulbaan nga siya maglupok!

Ang iya lawas madamo nga maprodukto

Nga mga masakit, madali tapikan mikrobyo!

VI

Isa ka gab-i si abyan Busoy nagdamgo,

May isa kuno ka makahaladlok nga demonyo.

“Waaahhh!!! Tabang!” si Busoy nagsiyagit,

Pero wala sang nagsabat, bisan mahinay nga ragitnit!

VII

Nagbuka ang baba nga daw kweba nadako,

Ginsuyop si Busoy sang daw baho tabako.

Wala mga untu, puros tanan mga bangkil.

Kag nagmandu sa pulong nga Iningles – “Kill!”

VIII

“Utdon ang mga tiil! Mga kamot lihapon!”

Ang siyagit sang halimaw sa mga masakiton.

“Kag ikaw tamaran nga Busoy pakamangon

Kay ikaw wala gugma sa imo kaugalingon!”

IX

Nagahapuhapo si Busoy sa iya pagbugtaw

“Ano ayhan ang boot singganon sang halimaw?”

Kag akon ginsugiran ang akon abyan

 3

Sang matuodtuod nga kahulugan –

“Palanggaon mo ang imo kaugalingon, abyan.

Ang imo panglawason indi mo pagpabay-an.

Dapat balanse ang imo ginakaon adlaw-adlaw

Para ang Malnutrisyon indi sa imo magkadlaw.”

XI

Kag ang akon laygay akon gindugangan –

“Mag-ehersisyo ka. Indi perme ligid sa hiligdaan.

Para magbaskog imo muskulo kag mga tul-an.

Kag indi ka madali tapikan mga balati-an.”

XII

Kag ako ginguyod sang akon abyan,

Ako nagyuhom kag siya gin-akbayan.

Sa plasa kami nag-“jogging” kag nag-“push-up.”

Manami ang amon pamatyag pagkatapos “sit-up.”

XIII

Maayo na ang kondisyon ni abyan ko Busoy

Daw mas nagpagsik pa siya sa Turagsoy.

Sa suba maglangoylangoy nga nagakalipay,

Padulong sa dagat sang kadalag-an nga may kasulhay!