MISA DE AGUINALDO

ENOT NA ALDAW
(Dec 15pm/16am)

INTRODUKSYON
Dios marhay na _____ saindo gabos, mga tugang.
Ngonian, kasabay kan pagromdom niato kan espesyal na
aldaw na ini para sa satuyang kabataan sa pagcelebrar niato
kan National Youth Day, pinupoonan ta an enot na Misa de
Aguinaldo sa taon na ini.
An Misa de Aguinaldo ipinagcecelebrar sa mga simbahan
kan Pilipinas sa laog nin siyam na aldaw bag-o kan Pasko. Ini
ginigibo sana sa Pilipinas nin huli ta ini sarong regalo na itinao
kan Santo Papa, Beato Inocentes XI, para sa mga Pilipino na
boot magtalubo sa pagtubod ki Cristo, an namundag na
Paratubos. Sa paagi nin sarong decreto kan mil seis siyentos
otsenta y dos, naaprobaran an Misa de Aguinaldo sa Pilipinas.
Sa laog kan siyam na aldaw, sa paagi kan Misa de
Aguinaldo, makapag-andam kita sa sarong makahulugan asin
solemneng celebracion kan pagkanitawo kan Tataramon nin
Dios na may balaog nin pagbagong-buhay. Ngonian na taon,
an satuyang mga Misa de Aguinaldo nakatutok sa temang:
“Filipino Youth in Mission: Beloved, Gifted, Empowered.” Sa
ngonian na enot na Misa de Aguinaldo an satuyang tema na
nakatutok sa “Pangapodan sa Pagbabag-o,” iyo po ini: An
kabataan ngonian: Kasimbagan sa Maabot na Panahon.”
 Mga tugang, an liturhiya ngonian para sa ikatolong
Domingo nin Adviento, iyo an pig-aapod na Gaudete Sunday o
Domingo nin pag-ogma nin huli ta harani na an satuyang
kaligtasan na dara kan Kagurangnan.
An mga sponsor sa misa ngonyan iyo po an mga
minasunod: ________________________________________
An misang ini pangengenotan ni ______________.

ENOT NA BABASAHON
Sa Enot na Babasahon na ginono sa Libro ni Profeta
Sofonias, capitulo 3, versikulo 14 sagkod 18, ipinapahayag na
pinatawad na kan Kagurangnan an mga kasal-an kan mga tawo
asin babag-ohon niya an saindang buhay. Himateon niato an
babasahon.

SALMO RESPONSORIO
Mag-awit na maogma, huli ta yaon saimo
An Dios na Banal nin Israel.

IKADUWANG BABASAHON
An Ikaduwang Babasahon na ginono sa Surat ni San
Pablo sa mga taga-Filipos, capitulo 4, versikulo 4 sagkod 7
nagpapahayag na an pagigin harani kan Kagurangnan sa mga
tawo bako sanang nagpapaogma sainda kundi minadolot man
nin katoninongan. Himateon niato an babasahon.
Enot na Misa de Aduinaldo/Ika-3 Domingo nin Adviento – C

EVANGELIO
Matirindog kita gabos sa pagrokyaw asin paghinanyog kan
Evangelio na sinurat ni San Lucas, capitulo 3, versikulo 10
sagkod 18.

PAGROKYAW
An Espiritu nin Kagurangnan uya sako:
sa pagdara kan Marhay na Bareta sa mga dukha.
Enot na Misa de Aduinaldo

PAMIBI NIN BANWAAN

December 15 pm / 16 am

PADI: Mamibi kita sa satong Kagurangnan, asin hagadon ta

an Saiyang tabang orog na ngonian na enot na aldaw
kan satong Misa de Aguinaldo tanganing mantang
kita naghahalat kan pagdatong ni Cristo, mahiling kan
gabos an orog ka importanteng papel kan kabataan
sa satuyang sosyedad asin nasyon ta sinda an
kasimbagan kan gabos sa maabot na panahon. Sa
lambang kahagadan, kita gabos magsirimbag:
KAGURANGNAN, MADYA SA PAGLIGTAS SAMO.

1. Na an Santo Papa, mga Obispo asin kapadian, padagos

na ipamibi kita gabos orog na an satuyang kabataan na
pinag-aandam niato an futuro tanganing sararong
maipamidbid ninda sa bilog na kinaban si Cristo na
madatong. Mamibi kita.

2. Na an mga namamayo kan satong nasyon,

magkasararong maghiringuha na padanayon an
katanosan, katoninongan asin pagkasararo kan
katawohan orog na an satuyang kabataan. Mamibi kita.
 3. Na kita gabos na uya digdi ngonian magkaigwa nin isog
nin boot na paontokon an mga maraot na gawe asin magin
simple sana an stilo nin pagbuhay. Mamibi kita.

4. Na an gabos na mga kabataan digdi sa satuyang nasyon,

makamate nin pagkamoot asin matanos na pag-antabay
kan saindang mga magurang asin mga paratokdo
tanganing manuodan ninda an pagigin matanos asin
responsable, magkaigwa nin dignidad sa sadiri asin
pagkatakot sa Dios. Mamibi kita.

PADI: Kagurangnan, Ika an samuyang paglaom sa tahaw

nin manlaen-laen na mga kasakitan asin kahorasaan.
Bendisyoni asin papagdanaya an katanosan asin
pagkaminorootan sa samuyang banwaan Pasariga
an samong mga kaakian na manudan ninda an
pagigin responsable asin maihanda sinda sa pag-
atubang sa buhay sa maabot na panahon. Ini
hinahagad mi huli ki Cristo, samong Kagurangnan.
AMEN.
Enot na Misa de Aduinaldo/Ika-3 Domingo nin Adviento – C

ENOT NA BABASAHON (Sofonias 3: 14-18)

Pagbasa hale sa Libro ni Profeta Sofonias

Magkurahaw ka sa kaogmahan, / O ciudad nin Sion! /

Mag-awit ka, O Israel. / Ipag-ogma mo sa bilog mong puso, O
Jerusalem!/ Hinale nin Kagurangnan an hatol laban saimo; /
pinadulag niya an saimong mga kaiwal. / An Hade nin Israel, /
an Kagurangnan, / yaon sa tahaw mo. / Dai ka matakot sa
anoman na kasakitan. / Sa aldaw na iyan / sasabihon sa
Jerusalem: / Dai ka matakot, O Sion;/ dai magluya an saimong
boot! / An Kagurangnan na saimong Dios yaon saimo; / Siya
mapangyaring paratubos. / Siya naoogma sa saimo, / babag-
ohon ka niya sa saiyang pagkamoot. / Maawit siya nin maogma
dahil saimo, / awit siring sa aldaw nin pintakasi. /

TATARAMON KAN KAGURANGNAN.

Enot na Misa de Aduinaldo/Ika-3 Domingo nin Adviento – C

SALMO RESPONSORIO
Mag-awit na maogma,
huli ta yaon saimo an Dios na Banal nin Israel.

1. An Dios iyo an sakuyang paraligtas;

Ako nananarig asin dai natatakot.
An sakong kusog iyo an Kagurangnan;
Siya an sakuyang Paraligtas
Maogma kamong magharok nin tubig
sa mga burabod nin kaligtasan.

2. Magpasalamat kamo sa Kagurangnan;

Mag-omaw kamo sa saiyang ngaran.
Ipamidbid an mga gibo niyang ngangalasan;
Pag-omawon an saiyang ngaran.

3. Mag-awit nin Salmo sa Kagurangnan,

Huli ta dakulang mga bagay an saiyang ginibo.
Ipamidbid nindo sa bilog na kinaban
Banwaan nin Dios, mag-awit asin mag-ogma,
Huli ta yaon saimo an Dios na banal nin Israel.
Enot na Misa de Aduinaldo/Ika-3 Domingo nin Adviento – C

IKADUWANG BABASAHON (Filipos 4: 4-7)

Pagbasa hale sa Surat ni San Pablo sa mga taga-Filipos

Danay kamong mag-ogma sa Kagurangnan; / giraray

sinasabi ko:/ mag-ogma kamo; / an saindong kaogmahan
mahiling kan gabos na tawo. / Harani na an Kagurangnan. / Dai
kamo mahandal. / An saindong mga kaipuhan / ipahayag nindo
sa Dios; / ipamibi asin ipakimaherak / pano nin pagpasalamat. /
Asin an katoninongan nin Dios, / na dai matugkad kan isip nin
tawo, / magdanay sa saindong mga puso asin isip, / ki Cristo
Jesus. /

TATARAMON KAN KAGURANGNAN.

Enot na Misa de Aduinaldo/Ika-3 Domingo nin Adviento – C

EVANGELIO (Lucas 3: 10-18)

+Pagbasa kan Evangelio na Sinurat ni San Lucas
An mga tawo naghapot ki Juan, “Ano an dapat ming
gibohon?” Si Juan nagsimbag, “An may duwang bado magtao
sa daing bado, an may kakanon, siring man an gibohon.” An
mga parasingil nin buwis boot na magpabonyag asin naghapot,
“Maestro, ano man an dapat ming gibohon?” Si Juan
nagsimbag, “Dai kamo maghagad nin labi sa itinalaan na
buwis.” An mga soldados siring man naghapot, “Ano an
samong dapat gibohon?” An simbag, “Dai kamo mangkulog sa
kiisay man. Dai kamo magkua kan kwarta sa fuersa. Mag-oyon
kamo sa bayad saindo.” An mga tawo, sa saindang paglaom,
nagpoon pag-isip kun baga si Juan iyo na an Mesias; kaya si
Juan nagpahayag sa atubang nin gabos, “Ako nagbobonyag sa
tubig, alagad yaon sa tahaw nindo an saro na orog sa sako, Dai
ako maninigo na maghubad kan saiyang mga sapin. Siya
magbobonyag saindo sa Espiritu Santo asin kalayo; an nigo
nasa saiyang kamot sa paglinig kan ginikan asin sa pagtipon
kan trigo sa saiyang tambubong, mantang an uhot susuloon sa
kalayong dai mapaparong.” Sa siring na mga tataramon
ipinagrokyaw niya sa banwaan an Marhay na Bareta.
AN MARHAY NA BARETA KAN SATONG KAGURANGNAN.