Talambuhay ni Sta.

Cecilia

Si Sta. Cecilia ay mula sa isang

marangal na pamilya sa Roma at isang
matapat na tagasunod ni Kristo.
Ipinagkasundo siya ng kanyang mga
magulang na ipakasal sa isang marangal na
lalaking nagngangalang Valerio. Sa gabi ng
kanyang kasal, sa saliw ng musika ng mga
manunugtog, si Cecilia ay nagmuni-muni sa
kanyang sumpa na ang kanyang kalinisan sa
pagkabirhen ay iaalay nang busilak sa
Panginoon. Sa magandang pangungusap,
naakay niya ang asawa sa pananampalataya
kay Kristo at tumulong sa pagkakawang-
gawa sa mahihirap na siyang naging dahilan
ng pagiging martir nito sa pananampalataya.
Noon ay mahigpit na inuusig ng Emperador
Romano ang relihiyong Kristiyano. Dinakip si
Cecilia at ikinulong sa silid na mainit at puno
ng usok nang tumangging sumamba sa diyos-
diyosan ngunit walang masamang nangyari
sapagkat ipinagsanggalang siya ng Diyos.
Iniutos ng hukom na pugutan siya ng ulo.
Tatlong beses siyang tinaga ngunit hindi naputol ang kanyang ulo. Bumagsak siyang
sugatan at sa loob ng tatlong araw ay nanatiling buhay. Ipinagkaloob niya ang kanyang
ari-arian sa banal na Obispo Urbano upang gamitin sa simbahan. Siya ay tumanggap ng
komunyon bago namatay noong taon isang daan at labing-pito (117). Taon walong daan
at labing-pito (817) nang matagpuan ang katakumbang pinaglibingan kay Cecilia at ang
kanyang katawan ay inilagak sa simbahan ng Sta. Cecilia sa Roma.
Noong taon isang libo, limang daan at siyamnapu’t siyam (1599), binuksan ang
katakumbang pinaglagakan kay Sta. Cecilia at natagpuang hindi pa rin naagnas ang
kanyang katawan.
Si Sta. Cecilia ay kinikilalang Patrona ng Musika.
 NOBENA PARA SA KARANGALAN NI STA. CECILIA NG ROMA

(Sisimulan ang nobena sa pagdarasal ng Santo Rosaryo na susundan ng Panalangin

sa Bawat Araw at magtatapos sa Pangkalahatang Panalangin kay Sta. Cecila.)

Unang Araw
(Ika-13 ng Nobyembre)
Si Sta. Cecilia ay may Maalab na Pag-ibig sa Panginoon

Intensiyon: Para sa mga Pari at Layko na magkaroon ng masidhing pagnanais na

makapaglingkod sa Panginoon sa pamamagitan ng Simabahan.

Panalangin: Matapat na Birheng Sta. Cecilia, masunuring anak ng Simbahan, kaibigan at

lingkod ni Kristo, patnubayan mo ang mga naglilingkod at namumuno sa aming Simbahan
– ang Santo Papa, mga obispo, mga pari, mga madre, mga relihiyoso at mga layko. Bigyan
mo kami ng lakas upang maipagpatuloy ang pagpapalaganap ng kaharian ng Diyos sa lupa.
Tulungan mo kaming makibahagi sa iyong dakilang pagsinta sa Diyos sa pamumuhay nang
banal at kalugod-lugod sa Diyos. Amen.

(Ama Namin... Aba, Ginoong Maria... Luwalhati sa Ama...)

Ikalawang Araw
(Ika-14 ng Nobyembre)
Si Sta. Cecilia ay Nagtataglay ng Kababaang-loob

Intensiyon: Para sa mga Namumuno sa Pamahalaan na maging tapat sila sa kanilang

panunungkulan.

Panalangin: O Sta. Cecilia, anak ng mayaman at makapangyarihang pamilya sa Roma,

tinalikuran mo ang kaginhawahang dulot ng kayamanan at layaw ng daigdig, isinasamo
namin sa iyo ang mga namumuno sa aming pamahalaan. Tulungan mong manatiling buhay
ang kanilang pagtupad sa kanilang mga pangako at huwag padaig sa makalupang puwersa
upang kanilang mapag-ingatan ang yaman ng aming bayan at intindihin ang
pangangailangan ng mga mamamayan. Amen.

(Ama Namin... Aba, Ginoong Maria... Luwalhati sa Ama...)

 Ikatlong Araw
(Ika-15 ng Nobyembre)
Si Sta. Cecilia ay Mapagmahal sa Mahihirap at Maawain sa mga Maysakit

Intensiyon: Para sa mga mahihirap at mga maysakit nang maunawaan nila na sila ay
kabilang din sa mga anak ng Diyos.

Panalangin: O Masintahing Sta. Cecilia, mapagkalinga sa mga nangangailangan, ikaw na

pinarusahan at hinatulang patayin ng gobernador ng Roma dahil sa pagtatanggol kay
Kristo; ikaw na nakadama ng tunay na pagkalinga ng Diyos. Idinadalangin namin ngayon
ang mga naaapi, naghihirap at ang mga may karamdaman na nawa’y madama rin nila ang
pagmamahal ng Diyos tulad ng ipinadama Niya sa iyo at magkaroon ng panibagong pag-asa
sa kabila ng kanilang mga hirap na dinaranas. Amen.

(Ama Namin... Aba, Ginoong Maria... Luwalhati sa Ama...)

Ikaapat na Araw
(Ika-16 ng Nobyembre)
Si Sta. Cecilia ay Nagpamalas ng Katapangan sa Pakikipaglaban ng Kanyang
Pananampalataya sa Diyos

Intensiyon: Para sa mga tumutuligsa sa pananampalataya at naliligaw ng landas nang

magbalik-loob sila sa pananampalataya.

Panalangin: Pinagpalang Sta. Cecilia, tunay na alagad ni Kristo na handang ipaglaban ang
pananampalatayang Kristiyano laban sa mga pagano; ikaw na nagpalapit sa Diyos sa iyong
kabiyak na si Valerio at iyong kapatid na si Tiburcio, idinadalangin namin sa iyo ngayon
ang mga ‘di namin kapanalig sa pananampalataya. Tulungan mo kaming magkaisa ng puso
at damdaming tumatalima lagi sa kalooban ng Diyos at ipakilala si Kristo sa mga ‘di pa
nakakakilala sa Kanya. Amen.

(Ama Namin... Aba, Ginoong Maria... Luwalhati sa Ama...)

Ikalimang Araw
(Ika-17 ng Nobyembre)
Si Sta. Cecilia ay Isang Mabuting Anak at Isang Mabuting Asawa

Intensiyon: Para sa pamilya nang ang bawat tahanan ay magkaroon ng pagkakaisa at

pagkakasundo at mamuhay nang naaayon sa kalooban ng Panginoon.

Panalangin: O Sta. Cecilia, kapara’y anghel sa kabanalan, sapat ang iyong kalinisan upang
ibigin ng sandaigdigan. Ipanalangin mo ang aming pamilya. Nawa’y iyong pangalagaan ang
katahimikan sa aming tahanan at pagkakaisa ng aming pamilya. Sa iyong banal na
kawalang malay, akayin mo ang mga kabataan upang mahalin nila ang kanilang mga
magulang at ang mga magulang naman ay magampanan ang kanilang mga pananagutan.
Amen.

(Ama Namin... Aba, Ginoong Maria... Luwalhati sa Ama...)

 Ikaanim na Araw
(Ika-18 ng Nobyembre)
Si Sta. Cecilia ay Isang Ulirang Guro sa Musika

Intensiyon: Para sa mga naghahanap-buhay sa loob at labas ng bansa nang malayo sila sa
anumang kapahamakan.

Panalangin: O Sta. Cecilia, Patrona ng Musika, ikaw ay nag-alay ng buhay para sa Diyos
at sumunod sa Kanyang kalooban, idinadalangin namin ngayon ang mga kapatid naming
naghahanap-buhay sa loob at labas ng bansa. Sila na nagpapakahirap para sa kani-kanilang
pamilya, nawa’y kalingain mo sila at aliwin sa kanilang paghihirap at kalungkutan kahit na
sila ay malayo sa kani-kanilang mahal sa buhay. Amen.

(Ama Namin... Aba, Ginoong Maria... Luwalhati sa Ama...)

Ikapitong Araw
(Ika-19 ng Nobyembre)
Si Sta. Cecilia ay Nagtataglay ng Katangiang Kahali-halina

Intensiyon: Para sa mga mananampalataya nang maging mabuting huwaran sa anumang

aspeto ng kanilang buhay

Panalangin: O Sta. Cecilia, ikaw na nagtataglay ng mga katangian na nakakahikayat sa

lahat ng iyong nakakasama, isinasamo namin sa iyo na pagkalooban mo kami ng tatag at
tibay ng loob upang masundan ang iyong mga halimbawa. Nawa’y maging mabuti kaming
huwaran ng kabanalan, kababaang-loob at pagkamasunurin sa lahat ng ipinag-uutos ng
Santa Iglesiya upang balang araw ay makaisa mo kami sa kaluwalhatian at kaharian ng
Diyos. Amen.

(Ama Namin... Aba, Ginoong Maria... Luwalhati sa Ama...)

Ikawalong Araw
(Ika-20 ng Nobyembre)
Si Sta. Cecilia ay Naging Martir Para sa Pananampalataya

Intensiyon: Para sa mga krisis na kinakaharap ng ating bansa nang mabigyang-pansin at

solusyon ng ating pamahalaan

Panalangin: O Sta. Cecilia, ikaw na nag-alay ng kalinis-linisang puri sa Diyos at ‘di

tinulutang mabulok ang iyong katawang lupa, isinasamo namin sa iyo ang mga krisis na
kinakaharap ng aming bansa. Tulungan mong maging malinis at tapat ang mga
nanunungkulan at huwag mong tulutang masira ang pamamalakad sa aming bansa.
Tanglawan mo kami sa kadilimang aming dinaranas at akayin patungo sa maningning na
kalangitan. Amen.

(Ama Namin... Aba, Ginoong Maria... Luwalhati sa Ama...)

 Ikasiyam na Araw
(Ika-21 ng Nobyembre)
Si Sta. Cecilia ay Sumakabilang Buhay na Niluluwalhati ng Panginoon

Intensiyon: Para sa ikauunlad ng mga mang-aawit ng parokya.

Panalangin: Pinagpalang Sta. Cecilia, Patrona ng mga mang-aawit ng parokya at gabay ng

mga mananampalataya, ikaw na nag-alay ng buhay para sa Diyos, idinadalangin namin
ngayon na kami’y maging tunay na naglilingkod na handang ialay ang sarili sa Diyos at sa
kapwa. Isinasamo namin na patuloy kaming makiisa sa mga gawain ng Simbahan at
makipagtulungan upang ipalaganap ang ebanghelyo ni Kristo sa aming kapwa. Amen.

(Ama Namin... Aba, Ginoong Maria... Luwalhati sa Ama...)

PANGKALAHATANG PANALANGIN SA KARANGALAN NI STA. CECILIA

O kabanal-banalang Santisima Trinidad – Diyos Ama, Diyos Anak at Diyos Espiritu Santo;
purihin ang iyong banal na pangalan. Pinupuri at pinasasalamatan Ka namin dahil sa
kabutihan Mong walang hanggan sa pagkakaloob Mo sa amin ng aming gabay at patrona na
si Sta. Cecilia. Sa kanyang pag-aalay ng kalinis-linisang puri sa Diyos at pagpapakita ng
tunay na pananampalataya sa Santisima Trinidad, nawa’y pagkalooban mo kami ng
biyayang matulad sa kanya dahil sa pag-ibig namin sa Iyo. ‘Di man kami karapat-dapat
sapagkat kami’y makasalanan, maawa Ka sa amin.

O Sta. Cecilia, aming patrona, anghel sa kabanalan, kami nawa ay iyong gabayan sa aming
pang-araw-araw na pamumuhay. Ikaw na nagkakaloob ng tulong sa mga nangangailangan
at ligaya sa mga nalulumbay, kami nawa ay iyong alalayan sa mga suliranin namin sa
buhay. Alam naming ‘di mo kami pababayaan. Ikaw na isang ganap na Kristiyano, tunay na
alagad ni Kristo, tulungan mo kami na sumunod sa iyong mga halimbawa. Sa kabila ng mga
balakid sa buhay na aming kinakaharap – pagsubok na ‘di namin malampasan, mga sakit
na ‘di malunasan at krisis sa aming bayan, tulungan mo kaming kamtin sa Diyos ang
Kanyang awa sa tulong ng pananalangin ng mapagmahal nating Ina na si Maria, para sa
mga kahilingan at panalanging iniluluhog namin sa iyo lalo na ang mga ito: _____
(tahimik na idalangin ang mga pansiriling intensiyon).

Nawa’y dinggin mo kaming sumasamo sa iyo at ipagkaloob ang aming ipinapakiusap kung
ito man ay makabubuti sa aming kaluluwa at naaayon sa kalooban ng Diyos. Amen.

Luwalhati sa Ama, sa Anak at sa Espiritu Santo, kapara noong unang-una, ngayon at

magpakailanman at magpasawalang-hanggan. Amen

Sta. Cecilia, ipanalangin mo kami.

Pagpalain nawa tayo at basbasan ng Diyos – (+) Ama, Anak at Espiritu Santo. Amen.