Maxine Aubrey A.

Zalsos XI – Block C

Ang Siyensiya sa likod ng mga Panaginip

Karamihan sa mga tao ay maaaring makaalala ng isang magandang panaginip at isang

masamang panaginip na naranasan nila sa kanilang buhay ngunit kung bakit nila ito naranasan at kung
ano ang kahulugan ng mga ito ay isa paring paksa na patuloy na pinagaawayan nga iba’t ibang
siyentipikong komunidad.

Ang panaginip ay mga halong sunod-sunod na imahe, ideya at emosyon na nangyayari sa utak
habang tulog. Ang mga nilalaman at layunin ng mga panaginip ay hindi pa naiintindihan ng buo kahit na
napapagusapan na ito sa iba’t ibang aspeto gaya ng siyensiya, pilosopiya at maging sa aspeto ng
relihiyon. Ang mga panaginip ay kadalasan na nangyayari sa tinatawag na Rapid Eye Movement (REM)
Sleep o isang kalagayan ng malalim na pagtulog kung saan ikaw ay malabong maistorbo. Ang “dream
interpretation” ay ang pagbibigay kahulugan sa mga panaginip at ang paghahanap ng mga maaaring
maging mensahe nito.

Ang mga pinakamahalagang napag-alaman tungkol sa mga panaginip ay maaaring mailahad sa

apat na pangunahing puntos.

Ang una ay ang REM ay maaaring makapagsimula ng pagpapanaginip. Ang mga panaginip ay
kadalasan na nangyayari sa REM sleep kung saan ang utak ay nasa mataas na lebel ng pagiging aktibo na
kasingtaas kapag gising.

Pangalawa ay ang neuroanatomical profile sa REM sleep ay tumutulong sa pagpaparanas ng

iba’t ibang imahe sa panaginip. Ang mga bahagi sa prefrontal cortex na responsable sa atensyon at
pagiisip ay hindi gaanong aktibo habang ang mga bahagi sa limbic system na responsable sa emosyonal
na pagproseso, memorya at sa inisyatibo at ang occipital lobe na responsable sa biswal na imahinasyon
ay nagiging mas aktibo. Ito ang dahilan kung bakit nakakabuo ng iba’t ibang mga imahe ang ating mga
utak.

Pangatlo, ang mga pangyayari sa mga panaginip ay madalas na may koneksyon sa totoong
buhay ng tao. Ito ay ang tinatawag na “continuity hypothesis”. Ang mga panaginip ng tao ay madalas na
sumasalamin sa mga tao o bagay na mahalaga sa kanya sa totoong buhay. Ang ating imahinasyon ay
may abilidad na magpakita ng mga makatotohanang mga sitwasyon.
 Ang panghuli ay nakakatulong ito sa pag proseso ng impormasyon mula sa totoong buhay lalo na
ang mga karanasang maaaring nakapagdulot ng malakas na bugso ng emosyon. Mula sa sikolohikal na
pananaw, ang pagpapanaginip ay nakakatulong sa ating utak para umangkop sa kapaligiran sa
pamamagitan ng pagsusuri, pagpapakalma ng emosyon at pageensayo ng mga ugali. Ang
pagpapanaginip ay isang paraan ng paghahanda sa mga banta o oportunidad sa totoong buhay.

Sa pangkalahatan, nakakatulong ang mga panaginip sa pag proseso ng emosyon sa

pamamagitan ng paggawa ng mga alaala. Kahit na di totoo ang mga nangyayari sa ating mga panaginip,
totoo naman ang emosyon na kasabay ng mga karanasan. Mahalaga ito dahil kung di natin napoproseso
ang ating mga emosyon, lalo na ang mga negatibong emosyon, ay maaari itong magdulot ng pagaalala.
Ang mga panaginip ay ang nagsisilbing tulay sa ating mga emosyon at sa ating mga alaala.