Sa simula ng 600 BCE, ang Athens ay isa lamang maliit na bayan
sa gitnang tangway ng Greece na tinatawag na Attica. Ang
buong rehiyon ay hindi angkop sa pagsasaka kaya karamihan sa mga mamamayan nito ay nagtrabaho sa mga minahan, gumawa ng mga ceramics, o naging mangangalakal o mandaragat.
Sa sinaunang kasaysayan, ang Athens ay pinamunuan ng mga
tyrant na noon ay nangangahulugang mga pinunong nagsusulong ng karapatan ng karaniwang tao at maayos na pamahalaan.
Sa simula, ang Athens ay pinamunuan ng hari na inihalal ng
asembleya ng mamamayan at pinapayuhan ng mga konseho ng maharlika. Ang mga pinuno nito ay tinawag na Archon na pinaburan naman ang mga may kaya sa lipunan.
Hindi nagtagal, nagnais ng pagbabago ang mga artisan at mga
mangangalakal. Upang mapigil ang lumalalang sitwasyon ng mga nasisiyahang karaniwang tao, nagpagawa ang mayayamang tao o aristokratang nakasulat na batas kay Draco, isang tagapagbatas. Ang sumunod na pagbabago ay naganap noong 594 BCE sa pangunguna ni Solon na mula sa mga pangkat ng aristokrata na yumaman sa pamamagitan ng pakikipagkalakalan. Kilala din siya sa pagiging matalino at patas. Inalis niya ang mga pagkakautang ng mahihirap at ginawang ilegal ang pagkaalipin nang dahil sa utang. Nagsagawa rin siya ng mga repormang pangkabuhayan upang maisulong ang dayuhang kalakalan at mapabuti ang pamumuhay ng mga mahihirap. Sa kasalukuyan, ginagamit ang salitang solon bilang tawag sa mga kinatawan ng pambansang pamahalaan na umuugit sa batas.
Noong mga 546 BCE, isang politikong nag-ngangalang
Pisistratus, ang namuno sa pamahalaan ng Athens. Bagamat mayaman siya, nakuha niya ang suporta at pagtitiwala ng karaniwang tao.
Noong 510 BCE, naganap muli ang pagbabago sa sistemang
politikal ng Athens sa pamumuno ni Cleisthenes. Dahil sa ang pangalan ay isinulat sa pira-pirasong palayok na tinatawag na Ostrakon, ang sistema ng pagpapatapon o pagtatakwil sa isang tao ay tinawag na ostracism. Sa pagsapit ng 500 BCE, dahil sa lahat ng mga repormang naipatupad sa Athens, ang pinakamahalagang naganap ay ang pagsilang ng demokrasya sa Athens, kung saan nagkaroon ng malaking bahagi ang mga mamamayan sa pamamalakad ng kanilang pamahalaan.