itsorp

Isa ka hapon matapos ang Biyernes

Ako nagpanglakatun gikan sa riles
Naggutos samtang ang gal-um nagatangis
Lamig nagsulod sa’kun panit, manipis

Malibud kuntani biskan makadali

Ako nasubuan, dughan ko mahapdi
Binayaan, sa rasun ‘di ko kapati
Kagapon lang nga adlaw, ako naghibi

Ang ulan nagbunok, dalugdug kag kilat

Ako nanilong tupad sang igpat-igpat
Tumalandok sa’kun kilid nagakalat
Nakurog, nagutom, samtang nagahulat

Sobra na isa ka-oras ang nagligad

Ako yara man gihapon sa may higad
Tawo sa kilid isa-isa naglakat
Kag ang mga suga gulpi lang naglapad

Bunok nga ulan nag-untat, kag naglayas

Ako nakibot sang dayon nga nagbukas
Ang pwertahan nga sa akun nagpaatras
Gumuha ang babayi nga daw mahublas

Pagkakapot ko sa poste ‘di mahukas

Ako nakibot, mata sa iya lawas
Nakasuksok sandal nga sobra kataas
May pinta ang nawong, gatulo ang balhas

Ang bibig daw dugo sa sobra kapula

Ako nagtulon sa’kun laway kaisa
Kay ang iya dughan daw sa malupok na
Guha ang pusod, gapanigarilyo pa

Akun ginhimutaran iya itsura

Ako nagkalisud kay pamilyar guid s’ya
May kasubo sa dalum sang mga pinta
Kag sa pihak sang kawayan nga lawas n’ya

S’ya nagbalikid sa akun kag nagngisi

Ako wala ka hulag kay s’ya guid ini!
Ang akun nga classmate nga indi pa baynte
Naghala ang iya mata, “Ganu ka di?”

Tinaga wala kaguha sa’kun baba

Ako nagtikang palayo sa iya
Ginhaboy ang upos sang sigarilyo n’ya
Kag siya nagpadulong didto sa may punta

“Pila ang imu presyo?” Nabatian ko

Sabat n’ya, “’’Di, ‘ko mahal, ‘di man barato.
Isa lang kalibu, panggasto sa project ko.”
Sakit kaayu, daw ginabuno ako!

“Di ka magdemand kung indi ka man mayad,

Pakitai ko danay bag-o ang bayad.
Sakay na sa motor, didto ‘ta sa may lodge.”
Dayon sila naglarga nga daw naglupad

Atung classmate ko nga sa’kun may utang pa

Tungod sa balaydan sa amun pagskwela
Wala pa kabayad kay imul guid sanda
Muni na siguro ang pamaagi n’ya
Paano ko siya atubangon sa Lunes?
Ako nagalakat, pabalik sa riles
“Tanan himuon ko katapos lang skwela,”
Hambal niya sadto sang kami gaupod pa

Bug-at ang akun dughan sa‘kun nakita

Dayon nalang nag-agay ang mga luha
Muto guid siya ang classmate ko nga dalaga
Ang nagbaya sa’kun tungod si’ya ubra.

Fixed Poetry
Monorhyme
12-syllabic
Societal issue: Student Prostitution