Distansya

Maayong buntag kanatong tanan. Ania ako sa inyong atubangan

karon para ipaambit ang estorya sa duha ka managhigugmaay nga
gipanganlan nga Paula ug Jesus. Ang kaning estorya gipangulohan ug
"Distansya".

Sigun sa mga silingan, mga amigo ug amiga, si Paula nga ikaduha sa

walo ka managsuon usa ka maanyag ug gamay nga babaye nga nagdako sa
Lanao, Moalboal, Cebu. Sa iyang pangidaron nga diesesais, bayntedos
lamang ang iyang hawak. Ang uban nga sukod, sikreto nalang. Niadtong
edara, aduna na kini mga trato. Adunay usa, usahay magdungan ang duha,
usahay pud tulo. Kasagaran pa gayud kanila nanghagad na ug kaminyoon.
Apan para ni Paula, lingaw-lingaw lamang ang gugma ug aduna pa siyay
kahadlok nga muhawa sa puder sa iyang mga ginikanan ug gusto pa pud
niyang kab-uton ang iyang mga pangandoy.

Si Jesus sa pikas bahin, nagpuyo sa Tomonoy, Moalboal, Cebu. Siya

ang ikatulo sa upat ka managsuon. Sa edad nga dose, bisan nigradwar siya
ug Salutatorian, napugos siya ug pag-undang sa iyang pageskwela tungod sa
kalisud sa kinabuhi ug siya nilarga ug nanarbaho sa syudad. Aduna pud siyay
mga nahimong trato apan tungod kay pirme siya anaa sa syudad, ang mga
babayeng iyang nabiyaan, pagbalik, aduna nay laing kauban.

Si Paula usab nilarga sa syudad ug nahimong working student para

usab makasuporta sa iyang pageskwela. Aduna gyapun siyay mga trato.
Aduna pud toy uban nga foreigner nga naila niya sa pen pal apan sa
panahon nga bisitahon na siya niini, siya mutalaw kay siya mahadlok sa
gitas-on sa ilang height. Ug tungod usab kay nakat-on na siyag buhi sa iyang
kaugalingon, wala na siya mangandoy pa nga mangita ug kapikas sa
kinabuhi.

Nanglabay ang mga panahon ug nagkadako ang edad ni Paula ug

Jesus apan wala gayud mag kurus ang ilang mga dalan. Nakagradwar si
Paula ug kolehiyo sa kursong Bachelor of Elementary Education sa Cebu
Eastern College. Siya usab nakapasar sa Licensure Examination for Teachers.
Apan human niini, wala siya nagpadayun sa iyang pagkamagtutudlo kay
tungod siya gitagaan ug trabaho sa iyang amo nga mamahimong Utility
Worker sa korte sa Moalboal Circuit. Si Jesus, wala siya nagpadayun sa iyang
pagskwela ug siya nanarbaho isip katabang sa Gador Residence.
 Sa panahon nga adunay makigtrato ni Paula, iya lamang kining
ingnon nga "Gadako lamang nang imong mata". Wala na gayud siyay
planong maminyo. Kini mao ang iyang pangutok hangtod sa usa ka adlaw
niana, aduna napoy buot unta makigtrato kaniya. Apan iya usab kining
giingnan nga, "Iasa man nang maminyo. Galabad-labad lamang nag ulo. Iasa
ragud nang laki" ug siya gitubag nga "Agoy dae, magmahay ra gyud ka ug di
ka magminyo. Kinsa may muatiman nimo ug matiguwang na ka? Imong mga
pag-umangkon? Lahi ra baya jud ning pursosong anak. Imong mga pag-
umangkon, sayunon ra kag ingnon nga hawa dira La!". Ug didto, nakahuna-
huna si Paula nga aduna gayuy unod ang gisulti sa maong lalaki. Ug diha
nausab ang iyang pangutok.

Si Jesus usab, nangandoy na gayud maminyo apan sa pirme lang, inig

uli niya sa probinsya sa iyang hinigugma, aduna na kiniy laing bana.

Nagpadayun ang mga adlaw ug nagpadayun ra usab ang kinabuhi nila

Paula ug Jesus. Tuod, gamay ra gayud ang kalibutan. Ngano? Tungod kay
ang amo ni Jesus ug ang kanhi amo ni Paula, usa ra ug trabahuan. Nahibawo
silang duha nga si Jesus, ulitawo ug si Paula, dalaga. Ug mao, ilang gipa ila-
ila silang duha.

Ug wa gayud masipyat, nahimong trato si Paula ug Jesus. Unom ka

buwan lamang ang nilabay ug giingnan si Jesus sa iyang amo nga mas
maayo ug magminyo na sila ni Paula. Ug sa way duha-duha, iya kining
gihagad ug kaminyoon ug sa wala pud gayuy pagduha-duha, gisugot siya
niini. Ang nakapait lang, sa pagpangutana na sa amo ni Jesus kang Paula
kung gihagad na ba siya niini, siya naulaw ug iya kining gilimod. Apan bisan
paman niini, nagpadayun sila ug gikasal niadtong agosto traynta e uno mil
nuweve sientos nuweventa e otso.

Ug kini mga igsuon ang dakong rason ug nganong adunay nag-inusara

nga Jessalie sa inyong atubangan. Ang Jessa gikan sa pangalan ni Jesus, ug
ang Lie gikan sa angga ni Paula nga Lilay. Ako ang bugtong nagsagol nga
unod nga height ni Paula ug dagway ni Jesus. Aduna pa unta akoy duha ka
manghod apan wala sila katunob niining kalibutan sanglit nakwaan ang
akong inahan tungod kay naigo "kuno" sa eclipse ug nahulog sa hagdan.

Sa pagkakaron, si Paula ug si Jesus nagpadayon sa pagpuyo nga

malipayon ug malinawon. Adunay mga kakulian sa kinabuhi apan ila rapud
kining nasulbad. Si Jesus, usa na karon nga Gate-in-Charge sa Our Lady of
Mount Carmel Learning Center, Inc., usa ka eskwelahan nga gipanag-iya sa
mao gihapon nga amo ug diin pud ako nigradwar sa primarya, elementary,
junior ug senior high school. Si Paula anaa gihapon sa korte isip Clerk 2 ug
hapit na kini muretiro.

Basin kamo makapangutana ug nganong kining estorya gipanguluhan

nga distansya. Dili kini tungod sa estado sa ilang kinabuhi. Dili pud tungod sa
lugar. Ug mas dili pud tungod sa ilang height. Ngano kini? Kini mahitungod
kay sa panahon sa ilang kaminyoon, si Paula nagpangidaron ug kwarenta e
uno ug si Jesus bayntedos anyos lamang. Diesenuweve ka tuig ang distansya
sa ilang mga edad. Apan dili kini babag sa ilang panaghigugmaay. Inubanan
lamang sa pagpaningkamot, gugma, ug respeto sa usag-usa, namahimong
malambuon ang ilang kaminyoon.

Maong kamong mga edaran na nga wala nay uyab ug wala pa gayud
kasuway ug uyab-uyab, ayaw kabalaka. Nagkat-on pa siguro inyong pares ug
suwat sa abcd karun. "Pagkolor-kolor lang usa diha dong, magkita ra nya ta
puhon sa saktong panahon". Hinumdumi ha, sa saktong panahon.

Ug mao to mga igsuon ang estorya ni Jesus ug Paula kansang mga

pangidaron dagkog distansya apan wala kini mahimong babag sa ilang
gugma. Daghang salamat ug maayong buntag pag-usab.