PETISYON NG MGA CSU-CAT NON-PASSERS PARA SA PAG-AMYENDA NG
RESTRICTIVE ADMISSION POLICY NG CAGAYAN STATE UNIVERSITY
Kinikilala at ipinagtitibay ng Konstitusyon ng Pilipinas ang kahalagahan ng
edukasyon para sa mamamayang Pilipino bilang makabuluhang instrumento para sa pambansang kaunlaran. Alinsunod sa Artikulo XIV Edukasyon, Agham at Teknolohiya, Mga Sining, Kultura, at Sports:
SEKSYON 1. Dapat pangalagaan at itaguyod ng Estado ang karapatan ng
lahat ng mga mamamayan sa mahusay na edukasyon sa lahat ng antas at dapat magsagawa ng angkop na mga hakbang upang matamo ng lahat ng gayong edukasyon.
Dagdag pa, mula naman sa Seksyon 5:
(1) Dapat isaalang-alang ng Estado ang mga pangangailangan at
kalagayang panrehiyon at pansektor at dapat pasiglahin ang lokal na pagplano sa pagbubuo ng mga patakaran at mga programang pang- edukasyon. (2) Dapat tamasahin ang kalagayang akademiko sa lahat ng mga institusyon ng lalong mataas na karunungan. (3) Ang bawat mamamayan ay may karapatang pumili ng propesyon o kurso ng pagaaral, salig sa karampatan, makatwiran at pantay na mga kinakailangan sa pagpasok at mga pangangailangang akademiko.
Ang edukasyon ay isang karapatan at serbisyong panlipunan na dapat ay
natatamasa ng lahat. Nilalayon dapat nitong linangin ang bawat kabataang Pilipino, anuman ang kanyang katayuan sa buhay o kung gaano man sya katalino. Tungkulin ng pamahalaang bigyan ng patas at pantay na oportunidad ang lahat sa de-kalidad na edukasyon.
Kinikilala ng petisyong ito ang pagbubukas ng CSU ng diploma at certificate courses
at sa apela, ngunit ang mga ito ay hindi sasapat. Magkakaroon lamang ito ng paghahati sa mga non-passers na magkukumahog para lamang makapag-enroll sa CSU. Muli, naninindigan kami na ang edukasyon ay isang karapatan na dapat ipagkaloob ng pamahalaan, sa pamamagitan ng mga state universities and colleges. Dapat ito ay inclusive at walang kondisyon, kumabaga’y nagbubukas sa pinakamaraming kabataang gustong makapag-aral.
Batid ng petisyong ito ang kalagayan ng institusyon sa usapin sa pasilidad at
imprastraktura ngunit naniniwala kaming hindi dapat ipasa ang ganitong problema sa mga mamamayan. Likas na lumalaki ang populasyon sa bansa, kung kaya’t dapat lamang na paghandaan ng mga SUCs ang paparaming bilang ng kabataang naghahangad na makapasok dito. Ito ay isang pagkakataong igiit ang pagtataas ng budget o state subsidy para sa mga SUCs sa pamahalaan at mga ahensya nito. Mula sa Seksyon 5, Artikulo XIV:
(5) Dapat mag-ukol ang Estado ng pinakamataas na priority sa pagtatabi ng
budget para sa edukasyon at seguruhin na magaganyak at mapamamalagi ng pagtuturo ang nararapat na kaparte ntio sa pinakamahusay na mga talino sa pamamagitan ng sapat na gantimpala at iba pang paaralan ng kasihayan at katuparan sa gawain.
Ang de-kalidad na edukasyon ay nakasalalay sa institusyon, ibig sabihin, ito ay
pangunahing nasusukat sa kaunlaran ng pasilidad at instruksyon. Ang pag-abot sa de-kalidad na edukasyon ay hindi dapat mangahulugan sa paglilimita sa iilan lamang na maaaring makatamasa nito. Ang kalidad ay nakabatay sa kung paano tugunan ang pangangailangan at interes ng estudyante, at sa pagpapaunlad mismo ng institusyon sa mga mag-aaral nito.
Mga kahilingan at mungkahing resolusyon:
1. Amyendahan ang pagiging “restrictive” ng admission policy, at
bigyang-daan ang pagpasok ng lahat ng mga CSU-CAT examinees ng walang kondisyon. 2. Manawagan para sa mas mataas na subsidyo para sa pamantasan. PETISYON NG MGA CSU-CAT NON-PASSERS PARA SA PAG-AMYENDA NG RESTRICTIVE ADMISSION POLICY NG CAGAYAN STATE UNIVERSITY