DIGITAL SANSKRIT BUDDHIST CANON

Source:

Mahāyānaviṁśikā

na jñānācchūnyatā nāma kācidanyā hi vidyate|

viviktāvyatirekitvaṁ vivekasya yato matam|| 1

dvayaśūnyam hi vijñānam anyathā na prasajyate|

dvayāsattvān nivṛttasya dvayātmatvaprasangataḥ||2

tacchurutatathatārūpo bhagavān eva bhaṇyate|

vedyavedakasadbhāvavikalpādyasamāśrayaḥ||3

cittamātraṁ nirābhāsaṁ vihāro buddhabhūstathā|

etaddhi bhāṣitaṁ buddhairbhāsante bhāṣayanti ca||4

cittaṁ hi bhūmayaḥ sapta nirābhāsā tvihāṣṭamī|

dve bhūmayo vihāro 'tra 'śeṣā bhūmirmamātmikā||5

deśyante bhūmayaḥ sapta buddhaiścittavaśaṁ gatāḥ|

kāyavākcittadauṣṭhulyaṁ saptamyāṁ na pravartate||6

aṣṭamyāṁ āśrayastasya svapno 'pyasukhasaṁbhavaḥ|

- - - - - - - - - - - - - - - - - - - ------------------ ||7

1. avācyo vācakairdharmaḥ kṛpayā yena deśitaḥ|

namo 'cintyaprabhavāya buddhāyāsaṅgabuddhaye||8

2. svabhāvena na cotpannā nirvṛtāśca na tattvataḥ|

yathākāśaṁ tathā buddhāḥ sattvāścaivaikalakṣaṇāḥ||9

3. pārāvāraṁ na cotpannāḥ svabhāvena pratityajāḥ|

te 'pi śūnyā hi saṁskārāḥ sarvajñajñānagocarāḥ||10

4. sarvabhāvāḥ svabhāvena pratibimbasamā matāḥ|

śuddhāḥ śivasvabhāvāśca advayāstathatāsamāḥ||11

5. asatyātmani cātmatvaṁ kalpayitvā pṛthagjanāḥ|

sukhaduḥkham abhijñāśca sarvam eṣāṁ ca tattvataḥ||12

6. ṣaḍgatiryaśca saṁsāraḥ svargaśca paramaṁ sukham|

narake ca mahadduḥkhaṁ jarāvyādhirapī yatām||13

7. abhūtāṁ kalpanāṁ kṛtvā pacyante narakādiṣu|

svadoṣenaiva dahyante veṇavo vahninā yathā||14

8. yathā māyā tathā sattvā viṣayān paribhuñjate||

māyāmayīṁ gatiṁ yānti pratītyotpādarūpiṇīm||15

9. yathā citrakaro rūpaṁ yakṣasyātibhayaṅkaraṁ|

bibheti svayam ālikhya saṁsāre 'py abudhastathā||16

10. yathā paṅkaṁ svayaṁ kṛtvā kaścit patati bāliśaḥ|

tathāsatkalpanāpaṅke magnāḥ sattvā duruttare||17

11. abhāvaṁ bhavato dṛṣṭvā duḥkhāṁ vindati vedanām|

śaṅkāviṣeṇa bādhante viṣayā vitathāstathā||18

12. tāṁscaivāśaraṇān dṛṣṭvā karuṇādhīramānasāḥ|

niyojayanti saṁbodhau sattvān buddhā hitaṁkarāḥ||19

13. te 'pi saṁbhṛtasaṁbhārāḥ prāpya jñānam anuttaram|

kalpanājālanirmuktā buddhā syurlokabandhavaḥ||20

14. yato 'jātam anutpannaṁ samyak sattvārthadarśinaḥ|

tataḥ śūnyaṁ jagad dṛṣṭvā ādimadhyāntavarjitam||21

15. tena paśyanti saṁsāraṁ nirvāṇaṁ ca na cātmanaḥ|

nirlepaṁ nirvikāraṁ ca ādimadhyāntabhāsvaram||22

16. svapnānubhūtaviṣayaṁ pratibuddho na paśyati|

mohanidrāvibuddhaśca saṁsāraṁ naiva paśyati||23

17. māyāṁ vidhāya māyavī upasaṁharate yadā|

tadā na vidyate kiṁcid dharmāṇāṁ sā hi dharmatā||24

18. cittamātram idaṁ sarvaṁ māyākāravad utthitam|

tataḥ śubhāśubhaṁ karma tato janma śubhāśubham||25

19. kalpayanti yathā lokaṁ notpannāśca svayaṁ janāḥ|

utpādo hi vikalpo 'yaṁ artho bāhyo na vidyate||26

20. asvabhāveṣu bhāveṣu nityātmasukhasaṁjñinaḥ|

bhavārṇave bhramantyasmin bālā mohatamovṛtāḥ||27

kalpanājalapūrṇasya saṁsārasumahodadheḥ|
anākramya mahāyānaṁ ko vā pāraṁ tariṣyati||28

mahāyānaviṁśikā kṛtirāryanāgārjunapādānāṁ|

CONTENT HOME