Senakulo

Senakulo
ANG PAGPAPAKASAKIT, PAGTUBOS, AT MULING PAGKABUHAY NI HESUKRISTO

Written by: ARMAN ERNEST REMOLACIO Play Dates: APRIL 10, 2020 (Good Friday)
APRIL 12, 2020 (Easter Sunday)
This script (SENAKULO PROPER) is revised as of March 11, 2020.

GOOD FRIDAY SCENES

I. ANG HULING HAPUNAN………………………………………2

II. SA HARDIN NG GETSEMANI……………………………3

III. ANG PAGKAKANULO KAY HESUS……………………3

IV. SA HARAP NI ANAS……………………………………………4

V. SA HARAP NI KAYPAS………………………………………4

VI. SA HARAP PILATO………………………………………………6

VII. SA HARAP NI HERODES……………………………………7

VIII. ANG HATOL NG GOBERNADOR……………………8

IX. VIA CRUSIS……………………………………………………………9

X. ANG PAGPAPAKO KAY HESUS SA KRUS……10

XI. ANG PAGKAMATAY NI HESUS…………………………11

EASTER SUNDAY SCENE

XII. ANG PASKO NG MULING PAGKABUHAY………12

1
 Senakulo

GOOD FRIDAY SCENES (12:00 – 14:30)

VOICE OVER
MAHIGIT DALAWANG LIBONG TAON NA ANG NAKARARAAN, MAY ISANG
LALAKI NA NAGNGANGALANG HESUS ANG NAGLAKBAY KASAMA ANG KANIYANG MGA
ALAGAD. SA BARYO NG CAPERNAUM SA GALILEA SA BAYAN NG ISRAEL UNANG
NAGPAKILALA ANG TAGAPAGLIGTAS NA SI HESUS, AT DOON NIYA RIN SINIMULAN
ANG KANIYANG MISYON SA PAGTUTURO TUNGKOL SA KALIGTASAN AT KAHARIAN NG
DIYOS. SIYA AY NAGBAHAGI SA MGA TAO NG KABUTIHAN AT PANGARAL, AT
NAGLAHAD DIN NG MGA HIMALANG HINANGAAN NG KARAMIHAN. NAGING MASAYA ANG
MGA TAO SA KANIYANG PAGDATING DAHIL SA BALITANG SIYA ANG MESIYAS NA
TINUTUKOY SA MGA PROPESIYA KATULAD NG NABANGGIT NI PROPETA ISAIAS
PITONG DAANG TAON BAGO PUMARITO SI HESUS; SUBALIT DAHIL SA PATULOY NA
KASAKIMAN AT PAGIGING MAKASALANAN NG TAO, NANGYARI ANG KALUNUS-LUNOS
NA PAGPAPASAKIT AT PAGTUBOS NI HESUS SA SANGKATAUHAN.

I. ANG HULING HAPUNAN

VOICE OVER
SA BAYAN NG JERUSALEM, NAGKATIPON-TIPON SINA HESUS AT ANG KANIYANG MGA
PINILING ALAGAD UPANG MAGHAPUNAN.

HESUS
INAASAM-ASAM KO NA MAKASALO KO KAYO BAGO AKO MAGHIRAP. TANDAAN NIYO,
[TITIGNAN NI HESUS ANG KANIYANG MGA ALAGAD AT PAKIKINGGAN NILA ITO NANG MABUTI] HINDI AKO
KAKAIN NITO HANGGA’T HINDI ITO MABIBIGYANG KAGANAPAN SA KAHARIAN NG
DIYOS.

[MAGTITINGINAN ANG MGA ALAGAD NA TILA NAGTATAKA SA MGA SINABI NI HESUS AT KASABAY NITO AY ANG PAGKUHA
NI HESUS NG TINAPAY]

HESUS
PURIHIN KA, O AMING DIYOS, HARI NG SANSINUKOB NA NAGBIBIGAY NG
TINAPAY. ITO ANG AKING KATAWAN [HAHATIIN NI HESUS SA DALAWA ANG MALAKING TINAPAY AT
IAABOT ANG MGA ITO SA KANIYANG MGA ALAGAD, KALIWA AT KANAN] NA IBINIBIGAY SA INYO. GAWIN
NINYO ITO BILANG PAG-ALAALA SA AKIN.

[PAGHAHATI-HATIAN NG MGA ALAGAD ANG TINAPAY PARA KAININ ITO AT KASABAY NITO AY ANG PAGKUHA NI HESUS NG
BASONG MAY KATAS NG UBAS]

HESUS
O IKAW, AMING DIYOS, HARI NG SANSINUKOB NA NAGBIBIGAY NG BUNGA.
KU’NIN NIYO [IAABOT NI HESUS SA KANIYANG MGA ALAGAD ANG BASONG MAY KATAS NG UBAS] ITO AT
PAGHATI-HATIAN. HINDI AKO MULING IINOM NG KATAS NG UBAS HANGGA’T HINDI
DUMARATING ANG KAHARIAN NG DIYOS.

[ISA-ISANG HIHIGOP ANG MGA ALAGAD SA BASO]

HESUS
ANG SARONG ITO AY ANG BAGONG TIPAN NG AKING DUGO NA NABUHOS DAHIL SA
INYO, SUBALIT NARIRIITO SA HAPAG ANG MAGKAKANULO SA AKIN AT SADYANG
ANG ANAK NG TAO AY DAPAT MAMATAY NGUNIT KAWAWA ANG MAKAKANULO SA
KANIYA.

MGA ALAGAD
IMPOSIBLE! | SABIHIN NIYO KUNG SINO ANG TAKSIL, PANGINOON. | SABIHIN
NIYO SA AMIN!

[MAGKAKATINGINAN ANG MGA ALAGAD AT MAGTATAKA—NAGTATANONG SA ISA’T ISA KUNG SINO ANG TAKSIL NA
TINUTUKOY NI HESUS]

HESUS
HUWAG KAYONG MANGAMBA, KASAMA KO KAYONG MAMAMAHALA SA LABINDALAWANG
ANGKAN NG ISRAEL

2
 Senakulo
SIMON PEDRO
KUNG GAYON, WALANG TRAYDOR!

HESUS
SIMON… SINIKAP NI SATANAS NA SUBUKIN KAYO, NGUNIT IPINAGDASAL KO SA
AMA NA MAGING MATATAG KA. AT SA IYONG PAGBABALIK-LOOB, PATATAGIN MO
ANG IYONG MGA KAPATID.

SIMON PEDRO
PANGINOON, NAKAHANDA AKONG MABILANGGO AT MAMATAY NA KASAMA MO.

HESUS
SIMON PEDRO, TANDAAN MO… BAGO TUMILAOK ANG MANOK, TATLONG BESES MO
AKONG IPAGKAKA-ILA.

[TATAYO SI SIMON PEDRO SA KANIYANG KINAUUPUAN AT HINDI SIYA MAKAPANIWALA SA KANIYANG NARINIG]

II. SA HARDIN NG GETSEMANI

VOICE OVER
MATAPOS ANG HULING HAPUNAN NINA HESUS AT NG KANIYANG MGA
ALAGAD, NAGTUNGO SILA SA HARDIN NG GETSEMANI SA PAANAN NG BUNDOK NG
OLIBO UPANG MANALANGIN SA KABILA NG KALALIMAN NG GABI.

HESUS
MANANALANGIN MUNA AKO PAROON. NAKARARAMDAM AKO NG HAPIS AT PANGAMBA.
KAYONG MGA ALAGAD KO, MAGSUMIKAP DIN KAYONG MANALANGIN UPANG MAKAIWAs
SA TUKSO.

[PATULOY NA LALAYO SI HESUS MULA SA KINAROROONAN NG MGA ALAGAD; SIYA AY LULUHOD—MANANALANGIN NANG
TAIMTIM AT NAKATINGALA]

HESUS
ILIGTAS MO AKO, AMA! KUPKUPIN MO AKO.
ALISIN MO SA AKIN ANG PAGHIHIRAP!
DIYOS KO, HINDI KALOOBAN KO ANG MASUSUNOD,
KUNG HINDI ANG KALOOBAN MO ANG MAGANAP NAWA SA AKIN.

[MATAPOS MANALANGIN, MULING BABALIKAN NI HESUS ANG MGA ALAGAD SUBALIT SILA AY AABUTAN NIYANG
NATUTULOG IMBIS NA NAGDARASAL]

HESUS
PEDRO, NATUTULOG KA BA?
KAYO, HINDI NIYO [TITIGNAN NI HESUS ANG KANIYANG MGA ALAGAD NA NAKASANDAL SA IBA’T IBANG MGA
PUNO] BA KAYANG MAGPUYAT KAHIT ILANG ORAS?
GISING NA! ANG ANAK NG TAO AY IPAGKAKANULO NA SA KAMAY NG MGA
MAKASALANAN.

III. ANG PAGKAKANULO KAY HESUS

[HINIHINGAL NA DARATING ANG MGA KAWAL KASAMA SI HUDAS HABANG HINAHANAP SI HESUS SA HARDIN]

KAWAL
PAANO NAMIN MAKIKILALA ANG KRISTONG SINASABI MO?
NAPAKADILIM DITO!

HUDAS ISKARIOTE
NARITO LAMANG SIYA.

[PATULOY SILA SA PAGHAHANAP HANGGANG SA MATAGPUAN NILA SI HESUS KASAMA ANG MGA ALAGAD]

HUDAS ISKARIOTE
MA-MA-MAGANDANG GABI PO, GU-GURO. [HAHALIKAN NI HUDAS SI HESUS SA PISNGI]

3
 Senakulo
KAWAL
SI HESUS NAZARENO! [ILALABAS AGAD NG MGA KAWAL ANG DALA NILANG LUBID AT KADENA]

HESUS
HUDAS, IPAGKAKANULO MO BA ANG ANAK NG TAO SA ISANG HALIK?

[WALANG IMIK SI HUDAS AT TULUYAN NANG DADAKIPIN NG MGA KAWAL SI HESUS SA PAMAMAGITAN NG PAGTALI NG
LUBID SA KANIYANG KAMAY AT KADENA SA KANIYANG KATAWAN]

SIMON PEDRO
LAYUAN NIYO SIYA!

[SA PUNTONG ITO AY MABUBULABOG AT MAGIGISING ANG MGA ALAGAD PARA PIGILIN ANG MGA KAWAL]

VOICE OVER
ANG HALIK NI HUDAS ISKARIOTE ANG NAGING PALATANDAAN PARA
DAKIPIN NG MGA SUNDALO SI HESUS. IPINAGKANULO NIYA SI HESUS SA
PAMAMAGITAN NG PAGTANGGAP NG TATLUMPUNG PIRASONG SALAPING PILAK MULA
SA MGA MAKAPANGYARIHANG TUMUTULIGSA.

IV. SA HARAP NI ANAS

VOICE OVER
NABALITAAN NINA MARIA, JUAN, AT MAGDALENA ANG NANGYARING PAGDAKIP KAY
HESUS KAYA SINUNDAN NILA ANG KINAROROONAN NITO PATUNGO KAY ANAS, ISA
SA MGA PUNONG PARI SA SANHERDRIN NA KORTE NG MGA HUDYO. KAAGAD DING
SINUNDAN NI SIMON PEDRO ANG TATLO.

ANAS
ANO’NG SA ATIN?

KAWAL
PARI, NARITO KAMI PARA IHARAP [ILALAPIT NG KAWAL SA HARAP NI ANAS SI HESUS NA NAKATALI NG
LUBID AT KADENA] SA INYO SI HESUS NAZARENO!

ANAS
ANG HARING MAKAPANGYARIHAN DAW SA MGA HEDEO! NASAAN ANG MGA ALAGAD MO?
… ANO ANG ITINUTURO MONG DOKTRINA? … BALITA KO, NAIS MO RAW KAMING
PALITAN? … SIGE, MAGSALITA KA, HESUS!

HESUS
MAHAYAG AKONG NANGANGARAL SA SINAGOGA, AT WALA AKONG IKINUBLI NA KAHIT
NA SINO. ALAM NILA ANG AKING SINASABI SAPAGKAT SILA’Y NAKIKINIG.

KAWAL
GANYAN BA DAPAT SUMAGOT SA PINUNONG PARI?

ANAS
WALA SIYANG SAYSAY KAUSAP! DALHIN SIYA KAY KAYPAS!
TIGNAN NA LAMANG NATIN ANG GALING NIYA.

V. SA HARAP NI KAYPAS

VOICE OVER
SA PAGKAKATAONG ITO, MALAPIT NANG MAG-UMAGA AT DINALA NG MGA KAWAL SI
HESUS KAY KAYPAS, ISA RIN SA MGA PINUNONG PARI SA KORTE NG MGA HUDYO
PARA IHABILIN ANG HATOL. PATULOY NA NAKASUNOD SINA MARIA, JUAN, AT
MAGDALENA, SAMANTALANG SI SIMON PEDRO AY PATULOY NA NAKASUNOD SA
TATLO.

KAWAL
PAGPUPUGAY KAY PARING KAYPAS! HETO [ILALAPIT NG KAWAL SA HARAP NI KAYPAS SI HESUS NA
NAKATALI NG LUBID AT KADENA] SI HESUS NAZARENO, ANG MAPANGGAWA NG GULO.

4
 Senakulo
KAYPAS
IKAW NGA! IKAW ANG SINASABING HARI. NASAAN ANG KAHARIAN MO? … ANO’NG
TRONO ANG MERON KA? … MAGSALITA KA! HINDI BA’T IKAW AY ANAK NG ISANG
HAMAK NA KARPINTERO LAMANG?

[MAGTATAWANAN ANG MGA KAWAL AT TAO]

KAYPAS
SINABI RIN NILA NA IKAW SI ELIAS? … ANO? BA’T HINDI KA MAKAPAGSALITA?
IPAGTANGGOL MO ANG SARILI MO!

HESUS
PALAGI AKONG NASA TEMPLO NG AKING AMA AT DOON AKO NAGHAHAYAG.
IPAGTANONG NIYO PA SA MGA TAONG NAKIKINIG SA AKIN.

KAWAL
SA GANYANG PANANALITA MO BA KINIKILALA ANG PINUNONG PARI? ISA KANG
AROGANTE!

[HAHAMPASIN SI HESUS NG KAWAL AT SIYA AY HALOS MATUMBA]

KAYPAS
ALAM MO BANG IPINADALA KA RITO DAHIL SA KALAPASTANGAN MO? SABIHIN MO
NGA SA’MIN. IKAW BA ANG SINASABING TAGAPAGLIGTAS AT ANAK NG DIYOS?

HESUS
AKO NGA.

KAYPAS
NASAAN ANG MGA SAKSI? ANO’NG SAKDAL NIYO LABAN SA TAONG ITO?

SAKSI
‘YANG KRISTO NA ‘YAN ANG NAGPALAYAS NG MASAMANG ESPIRITU SA NGALAN NG
DIABLO!

SAKSI
MAAARI BA ‘YON? SARILING KAMPON, PINALAYAS NG AMO?

[MAGTATAWANAN ANG MGA KAWAL AT ANG MGA TAO]

KAYPAS
WALA KAYONG KUWENTA! SINO’NG MAY MATINONG TESTIGO?

SAKSI
KAMI, GINOO! SINASABI NG KRISTONG ‘YAN NA GIGIBAIN NIYA ANG TEMPLO AT
ITATAYO ‘TONG MULI MATAPOS ANG TATLONG ARAW.

SAKSI
TAMA SIYA! PINALALABAS NIYA NA SIYA’Y ISANG MAKAPANGYARIHAN. MAITATAYO
BA SA TATLONG ARAW ANG ISANG TEMPLO NA GINAGAWA NG APATNAPUNG TAON?

SAKSI
SINASABI RIN NIYA NA SIYA ANG TINAPAY NG BUHAY! AT KAPAG HINDI RAW
NAMIN KINAIN ANG KANIYANG LAMAN AT ININOM ANG DUGO NIYA, HINDI RAW
KAMI MAGMAMANA NG BUHAY NA WALANG HANGGAN!

[MAGTATAWANAN ANG MGA KAWAL AT ANG MGA TAO]

KAYPAS
MABIGAT NGA ‘YANG MGA ‘YAN… HESUS, WALA KA BANG MAISASAGOT SA MGA
PARATANG SA’YO?

[MANANATILING TAHIMIK SI HESUS]

KAYPAS
TINATANONG KITA, HESUS… IKAW BA ANG MESIYAS NA ANAK NG DIYOS? …
INUUTOS KO, SA NGALAN NG DIYOS NA BUHAY, IKAW BA ANG KRISTO?

5
 Senakulo
HESUS
IKAW NA ANG NAGSABI… MAKIKITA MO ANG ANAK NG TAO NA NAKAUPO SA KANANG
BAHAGI NG KATAAS-TAASANG AMA AT BABABA MULA SA ALAPAAP NG LANGIT.

KAYPAS
KALAPASTANGAN! NILALAIT MO ANG DIYOS! … MGA KABABAYAN, ANO ANG INYONG
PASYA SA KANIYA?

MGA TAO AT SAKSI

KAMATAYAN! DAPAT SIYANG MAMATAY!

[SASAMPALIN NI KAYPAS SI HESUS]

KAYPAS
HUMAYO NA KAYO KAY PILATO, SIYA NA ANG BAHALA KAY HESUS!

[DADAKIPIN MULI NG MGA KAWAL SI HESUS AT DOON AY MAKIKITA NG ILANG MGA SAKSI SI SIMON PEDRO NA
NAKATINGIN KAY HESUS]

SAKSI
IKAW! ALAGAD KA NIYA, ‘DI BA?

SIMON PEDRO
HINDI! HINDI KO SIYA KILALA!

SAKSI
ALAM KO! ISA KA SA MGA ALAGAD NIYA!

SIMON PEDRO
NARINIG NIYO ANG SINABI KO, HINDI KO SIYA KILALA!

SAKSI
HUWAG KA NANG MAGKAILA! ALAGAD KA NI HESUS!

SIMON PEDRO
MAMATAY MAN AKO! [MAGKAKATITIGAN SINA SIMON PEDRO AT HESUS]
HINDI KO SIYA KILALA!

[BIGLANG TITILAOK ANG MANOK AT KAAGAD NA LALAPIT SI SIMON PEDRO KINA MARIA, JUAN, AT MAGDALENA NANG
UMIIYAK]

JUAN
SIMON PEDRO?

SIMON PEDRO
PATAWARIN NIYO AKO! TOTOO ANG SINABI NI HESUS NOONG HULING HAPUNAN
NAMIN, IKINAILA KO NGA SIYA NANG TATLONG BESES BAGO TUMILAOK ANG
MANOK! … HINDI KO SINASADYA, PATAWARIN NIYO AKO!

VI. SA HARAP NI PILATO

VOICE OVER
KINAUMAGAHAN NA NANG DINALA SI HESUS SA TEMPLO NG GOBERNADOR SA
PROBINSYA NG HUDEA SA ROMA PARA IHARAP SIYA KAY PONTIO PILATO. PATULOY
PA RING NAKASUNOD SINA MARIA, JUAN, AT MAGDALENA.

KAWAL
MAGBIGAY PUGAY SA GOBERNADOR NG IMPERYO! ANG KAGALANG-GALANG, PONTIO
PILATO! [ILALAPIT NG KAWAL SA HARAP NI PONTIO PILATO SI HESUS NA NAKATALI NG LUBID AT KADENA]

PONTIO PILATO
ANO’NG SAKDAL NIYO LABAN SA TAONG ITO?

SAKSI
GOBERNADOR, HINDI NAMIN SIYA DADALHIN DITO KUNG HINDI SIYA KRIMINAL
KAYA DAPAT SIYANG MAMATAY.

6
 Senakulo

PONTIO PILATO
HINDI BA’T KASASALUBONG NIYO PA LAMANG SA KANIYA SA BAYAN NG
JERUSALEM? AT GUSTO NIYO NA SIYANG MAMATAY? IPALIWANAG NIYO SA AKIN!

SAKSI
KAGALANG-GALANG, SINASABI NIYA NA SIYA RAW ANG KRISTONG HARI!

PONTIO PILATO
HARI? IKAW NGA BA ANG HARI NG MGA HUDYO?

HESUS
HINDI GALING SA MUNDONG ITO ANG PAGHAHARI KO.

PONTIO PILATO
KUNG GAYON, HARI KA NGA BA?

HESUS
IKAW NA ANG NAGSABI. ISINILANG AKO UPANG MAGPATUNAY SA KATOTOHANAN.

PONTIO PILATO
WALA AKONG MAKITANG KASALANAN SA TAONG ‘TO.

MGA TAO
HINDI BA KASALANAN ANG MANGARAL AT MANGGULO? | GALING PA ‘YAN SA
GALILEA, HINDI BA?

PONTIO PILATO
SAKOP SIYA NI HERODES! ALAMIN NIYO KUNG ANO ANG KANIYANG SASABIHIN.

KAWAL
NGAYON DIN, GOBERNADOR!

VII. SA HARAP NI HERODES

VOICE OVER
DINALA NG MGA KAWAL SI HESUS KAY HERODES, ANG PINUNO NG GALILEA PARA
HINGIN ANG HATOL NITO. NAKASUNOD PA RIN SINA MARIA, JUAN, AT
MAGDALENA SA PINAGDALHAN KAY HESUS.

KAWAL
HARING HERODES, BILIN NG GOBERNADOR [ILALAPIT NG KAWAL SA HARAP NI HERODES SI HESUS NA
NAKATALI NG LUBID AT KADENA] NA KAYO NA ANG HUMATOL SA TAONG ITO.

HERODES
SA WAKAS, HESUS! AKING KABABAYAN… KAY RAMI KONG NABABALITAAN SA’YO!
MAGALING KA RAW MAGHIMALA? SIGE NGA, ALIWIN MO KAMI… MAGHIMALA KA!

KAWAL
‘WAG MONG PAGHINTAYIN ANG HARING HERODES! SIMPLE LAMANG ANG HINIHINGI
NIYA!

HERODES
KUNG AYAW, HUWAG! BAKIT KO PAG-AAKSAYAHAN ANG ISANG NASISIRAAN NG ULO?
… DAMITAN NA SIYA NG KAPA.

[IAABOT NG SUNDALO ANG PULANG KAPA KAY HERODES PARA DAMITAN NITO SI HESUS AT MULING ITATALI NG MGA
KAWAL ANG KANIYANG MGA KAMAY]

HERODES
PARA SA AKIN, WALA SIYANG KASALANAN SUBALIT SIYA’Y NASISIRAAN NG ULO…
IBALIK SIYA KAY PONTIO PILATO!

7
 Senakulo
VIII. ANG HATOL NG GOBERNADOR

VOICE OVER
MULING DINALA NG MGA KAWAL SI HESUS SA TEMPLO NG GOBERNADOR
PARA HINGIN ANG HULING HATOL KUNG SAAN NAROON ANG MGA PINUNONG PARI NA
SINA ANAS AT KAYPAS PARA KUMBINSIHIN SI PONTIO PILATO; NAROON DIN ANG
MGA PARISEO PARA TUMESTIGO. PATULOY PA RING NAKASUNOD SINA MARIA,
JUAN, AT MAGDALENA SA TEMPLO.

[ILALAPIT NG KAWAL SA HARAP NI PILATO SI HESUS NA NAKATALI NG LUBID SA KAMAY AT BUBULUNGAN NG KAWAL SI
PILATO]

PONTIO PILATO
WALANG KASALANAN ANG TAONG ITO, ‘YAN ANG PASYA NG HARING HERODES. NAIS
KO LAMANG NA IPAALALA SA INYO NA NGAYON AY PASKWA… AT SA GANITONG
PAGKAKATAON, MAAARI KONG PALAYAIN ANG KAHIT NA SINONG BILANGGO.

ANAS
KAHIT NA SINO, HUWAG LANG SI HESUS!

PILATO
KAHIT NA SI BARABAS? ISANG MAMAMATAY TAO NA SUMIRA SA KATIWASAYAN NG
BAYAN?

KAYPAS
SI BARABAS! PILIIN NIYO SI BARABAS!

PILATO
SINO’NG PALALAYAIN KO? SI HESUS O SI BARABAS?

MGA SAKSI AT PARISEO

SI BARABAS! | PALAYAIN SI BARABAS! | PATAYIN SI HESUS!

PILATO
WALANG KASALANAN ANG TAONG ITO. PARURUSAHAN KO NA LAMANG BAGO
PALAYAIN.

[KUKUHANIN NG KAWAL ANG KORONANG TINIK AT IPUPUTONG ITO KAY HESUS; AALISIN ANG LUBID SA KANIYANG KAMAY
AT IGAGAPOS SIYA SA ISANG BLOKENG BATO PARA HAMPASIN ANG KANIYANG KATAWAN SA HARAP AT LIKOD]

VOICE OVER
ANG KATAWAN NI HESUS AY UNTI-UNTING NABABALOT NG SUGAT AT DUGO DAHIL
SA GINAWANG PAGPUTONG NG KORONANG TINIK AT PAGHAMPAS SA KANIYA.
KINALAUNAN, SIYA AY MULING HINARAP SA MGA TAO.

PILATO
MASDAN NIYO ANG INYONG SUGATANG HARI!

MGA TAO
TAMA LANG ‘YAN SA KANIYA! | WALA KAMING IBANG HARI MALIBAN KAY CEASAR!
| IPAKO SA KRUS SI HESUS!

PONTIO PILATO
KUNG GAYON, AKO SI PONTIO PILATO, GOBERNADOR AT HUKOM NA SAKOP ANG
IMPERYONG ROMANO. ANG HATOL KO UKOL SA KANIYANG PAGKAKASALA—PAPASANIN
NIYA ANG KRUS NG KAMATAYAN HANGGANG SA MAKARATING NG GOLGOTA. IPAKO
SIYA AT IPARIPA SA GITNA NG DALAWANG MAGNANAKAW! … WALA AKONG
PANANAGUTAN SA KAMATAYAN NG TAONG IYAN.

MGA TAO AT SAKSI

PANANAGUTAN NAMIN ANG KANIYANG KAMATAYAN! | IPAKO SA KRUS! | IPAKO
SIYA SA KRUS!

8
 Senakulo
IX. VIA CRUSIS

VOICE OVER
TULUYAN NANG HINATULAN SI HESUS NG PARUSANG PAGPAPAHIRAP AT KAMATAYAN
AT SA PUNTONG ITO, BUBUHATIN NIYA ANG KRUS NA NAGSISILBING
PINAKAMATAAS NA URI NG PARUSA SA MGA KRIMINAL SA PANAHON NOON. LALONG
DUMAMI ANG MGA TAO KABILANG ANG MGA PARISEO AT SAKSI PARA TUNGHAYAN
ANG MGA PANGYAYARI, KASABAY NITO ANG PAGSUNOD NINA MARIA, JUAN, AT
MAGDALENA NA LUBHANG NAHAHABAG SA KANILANG NAKIKITA, AT MAGING SINA
SIMON SIRENEO AT VERONICA AY SUSUBAYBAY SA MGA YAPAK NI HESUS.

[IAABOT NG MGA KAWAL ANG KRUS KAY HESUS PARA BUHATIN ITO]

HESUS
AKO AY ALAGAD MO, AMA. SALAMAT SA KRUS NA ‘TO NA GAMIT KO SA PAGTUBOS.

[LALAPIT SA ISANG PARISEO ANG TATLONG BATANG NAPAG-UTUSAN PARA IABOT ANG KARATULANG ILALAPAT SA ITAAS
NG KRUS NI HESUS PAGKAPAKO]

PARISEO
HESUS NG NAZARETH? HARI NG MGA HUDYO?

BATA
OPO, KAGALANG-GALANG.

PARISEO
MALI ANG KARATULANG ‘YAN!

BATA
BILIN PO ITO NG GOBERNADOR.

BATA
HINDI NA RAW PO ITO MAAARING PALITAN, PAUMANHIN PO.

VOICE OVER
KINALAUNAN AY MAKAKASABAY [MATATANAW SINA HESTAS AT DIMAS SA LIKOD NI HESUS NA NAGBUBUHAT
DIN NG KANILANG KRUS] NI HESUS SINA HESTAS AT DIMAS SA PAGPASAN NG KRUS NG
KAMATAYAN AT SA ILANG HAKBANG AY MADARAPA SI HESUS SA UNANG
PAGKAKATAON.

[MADARAPA SI HESUS SA LAKAS NG HAMPAS NG LATIGO SA KANIYANG LIKOD]

KAWAL
LAMPA! BUMAGSAK KA NA KAAGAD! BUMANGON KA!

[MAPIPIGHATI SINA MARIA, JUAN, MAGDALENA, JUAN, AT SIMON PEDRO KAY HESUS HABANG NAKIKITA ITONG
NAHIHIRAPAN]

MARIA
MANANATILI BA AKO RITO O LILISAN? HINDI KO ALAM KUNG MAY LAKAS PA AKO
NG LOOB NA MAKITA SIYANG NAHIHIRAPAN!

VOICE OVER
PATULOY SA PAGLALAKBAY SI HESUS PATUNGONG GOLGOTA KASAMA SINA HESTAS
AT DIMAS NA DALAWANG MAGNANAKAW HABANG HINAHAMPAS SILA NG LATIGO.
ILANG SANDALI PA AY DUMATING SI SIMON SIRENEO AT PINILIT NA MAKALAPIT
KAY HESUS. SIYA AY MADARAPA MULI SA IKALAWANG PAGKAKATAON.

[MADARAPA MULI SI HESUS NA MAS HIRAP NA HIRAP AT BIGLANG MAKIKITA NG ISANG KAWAL ANG PAGLAPIT NI SIMON
SIRENEO]

KAWAL
BAKIT PINIPILIT MONG MAKALAPIT DITO? SINO KA BA?

SIMON SIRENEO
SIMON. SIMON SIRENEO. GUSTO KO LAMANG SIYANG TULUNGAN NGUNIT WALA
AKONG PAGKAKASALA.

9
 Senakulo
VOICE OVER
TUTULUNGAN NI SIMON SIRENEO SI HESUS SA PAGBUBUHAT NG KRUS. ILANG
SANDALI PA AY DUMATING SI VERONICA NA MAY DALANG PUTING TELA PARA
PUNASAN ANG MUKHA NI HESUS NA PUNO NG DUGO MULA SA MGA SUGAT.

[HABANG BINUBUHAT NI SIMON SIRENEO ANG KRUS AY LALAPIT SI VERONICA KAY HESUS PARA PUNASAN ANG MUKHA
NITO]

VERONICA
PANGINOON, PAHINTULUTAN NIYONG IPAHID KO ‘TO SA INYONG MUKHANG
KAHAPIS-HAPIS. [ILALAPAT NI VERONICA ANG PUTING TELA SA MUKHA NI HESUS] LILISAN AKO NA
MAY PUSONG MASAYA! [LILISAN SI VERONICA NA UMIIYAK HABANG HINAHAGKAN ANG TELANG HAWAK]

[SUSUWAYIN NA NG MGA KAWAL SI SIMON SIRENEO AT HAHAYAANG BUHATIN NA NI HESUS ANG KRUS NGUNIT PATULOY
SIYANG NAKATABI SA KANIYA]

VOICE OVER
SA PATULOY NA PAGLALAKBAY NI HESUS AY MADARAPA SIYANG MULI SA IKATLONG
PAGKAKATAON.

[MADARAPA MULI SI HESUS DAHIL SA SAKIT, PAGOD, AT NGALAY NA KANIYANG NARARAMDAMAN]

SIMON SIRENEO
HARING MAKAPANGYARIHAN, MALAPIT KA NA SA IYONG PATUTUNGUHAN… MALAPIT
NA TAYO SA IYONG KALBARYO.

X. ANG PAGPAKO KAY HESUS SA KRUS

VOICE OVER
NANG MAKARATING NA SILA SA GOLGOTA, DOON AY INIHIGA NG MGA CENTURION
SI HESUS SA KANIYANG KRUS AT ITINALI ANG KANIYANG MGA KAMAY AT PAA SA
BAWAT KANTO NG KRUS. [ITATALI NG MGA CENTURION ANG MGA KAMAY AT PAA NI HESUS SA BAWAT KANTO
NG KRUS, GAYON DIN PARA KINA HESTAS AT DIMAS]

VOICE OVER
PAGKATALI AY DAHAN=DAHANG IPAPAKO ANG KANIYANG MGA KAMAY AT PAA. LABIS
NA SAKIT AT KAHIRAPANG PISIKAL ANG NATAMO NI HESUS. [IPAPAKO SA KRUS SI HESUS,
MAGING SINA HESTAS AT DIMAS]

CENTURION
ANO’NG SABI MO SA KANILA? GIGIBAIN MO ANG TEMPLO AT ITATAYO NG TATLONG
ARAW? [MAGTATAWANAN ANG MGA TAONG NAKAPALIGID]

[ITATAYO ANG KRUS KUNG SAAN NAKAPAKO SINA HESUS, HESTAS, AT DIMAS]

CENTURION
BAKIT HINDI MO GIBAIN ANG KRUS AT TUNAWIN ANG MGA PAKO? IPAKITA MONG
MAKAPANGYARIHAN KA, HESUS NG NAZARETH! [MAGSISIMULANG UMINOM NG ALAK ANG MGA
CENTURION HABANG NAKAPAKO SINA HESUS, HESTAS, AT DIMAS SA KRUS]

[PATULOY NA MAGTATAWANAN ANG MGA TAONG NAKAPALIGID]

ANAS
SIYA RAW ANG MESIYAS! ANG HARI NG ISRAEL? AT ANAK NI DAVID NA HIGIT PA
RAW KAY SOLOMON!

KAYPAS
NASAAN ANG KAHAMBUGAN MO? INILIGTAS MO ANG IBA, NGUNIT HINDI MO
MAILIGTAS ANG ‘YONG SARILI!

HESUS
AMA KO, PATAWARIN MO SILA! HINDI NILA ALAM ANG KANILANG GINAGAWA!

[LALAPIT SINA MARIA, JUAN, AT MAGDALENA SA PAANAN NI HESUS AT SILA AY TITINGALA SA KANIYA]

MARIA
HESUS, AKING ANAK! NARIRITO ANG ‘YONG INANG UMIIBIG SA’YO…

10
 Senakulo
MAGDALENA
BANAL NA HESUS! NARITO RIN AKO, ANG MAKASALANANG SUMASAMBA SA’YO…
[LULUHOD SI MAGDALENA AT PILIT AABUTIN ANG NAKAPAKONG PAA NI HESUS PARA HALIKAN]

[PAGBABATUHIN NG MGA TAO SINA HESUS, HESTAS AT DIMAS]

HESTAS
ISA KANG BALIW, DIMAS!

[TITIGNAN NI HESUS SI HESTAS]

DIMAS
HESTAS, TIGNAN MO ANG KANIYANG MAAMONG MUKHA. [MATATAWA SI HESTAS KAY HESUS]
SIYA’Y ANAK NG DIYOS! … KAIBIGANG HESUS… HUWAG MO AKONG KALILIMUTAN
PAG-AKYAT MO SA’YONG KAHARIAN… [TITIGNAN NI HESUS SI DIMAS]

HESUS
SINASABI KO SA’YO… NGAYONG ARAW NA ITO AY MAKAKAPILING KITA SA AKING
PARAISO…

VOICE OVER
HINDI NA MAKAPAGHINTAY ANG MGA TAO NA MALAGUTAN NG HININGA ANG MGA
NAKAPAKO SUBALIT MAPAPANSIN NILA ANG BIGLANG PAGDILIM NG KAPALIGIRAN
AT PAGKULIMLIM ANG KALANGITAN.

[TITIGNAN MULI NINA MARIA, JUAN, AT MAGDALENA SI HESUS]

HESUS
BABAE, MASDAN MO ANG ‘YONG ANAK. ANAK, MASDAN MO ANG ‘YONG INA.

MARIA
ANAK KO, ANO ‘YONG IBIG SABIHIN?

HESUS
HAYAAN MONG SI JUAN ANG MAGING ANAK MO NGAYON. IKAW, JUAN. SI MARIA
NGAYON ANG IYONG INA.

JUAN
OO, PANGINOON, AKING IPINAPANGAKO.

MARIA
MAMAHALIN KO SIYANG PARANG TUNAY KONG ANAK. [YAYAKAPIN NI MARIA SI JUAN]

[TITINGALA SI HESUS SA KALANGITAN]

HESUS
DIYOS KO! DIYOS KO! BAKIT MO AKO PINABAYAAN?

MGA TAO
NARINIG NIYO BA ‘YON? | TINATAWAG NIYA SI ELIAS! | KALAPASTANGAN! |
TIGNAN NA LANG NATIN KUNG MASASAGIP SIYA!

HESUS
AKO’Y NAUUHAW!

[AABUTAN NG CENTURION SI HESUS NG ESPONGHANG NILUBLOB SA KANILANG ALAK AT HIHIGOP SI HESUS]

XI. ANG PAGKAMATAY NI HESUS

VOICE OVER
TULUYANG NAGDILIM ANG KAPALIGIRAN AT NAGSIMULANG LUMINDOL. NAGKAGULO
ANG MGA TAO AT ANG ILAN AY LUMISAN. NANATILI ANG MGA CENTURION AT SINA
MARIA, JUAN, AT MAGDALENA SA MAY PAANAN NI HESUS.

11
 Senakulo
HESUS
AMA KO! SA IYONG KAMAY, INIHAHABILIN KO ANG AKING KALULUWA… [LALAGUTAN SI
HESUS NG HININGA]

CENTURION
ANO’NG NANGYAYARI? BAKIT NGAYON PA LUMINDOL?

KAWAL
PATAY NA BA ANG NAZARENO? LUMILINDOL NA! SIGURADUHIN NIYONG PATAY NA
‘YAN!

[KUKUHA NG SIBAT ANG CENTURION AT TUTUSUKIN NITO ANG KANANG TAGILIRAN NI HESUS; TATAMAAN SIYA SA MATA
NG MALA-PULBOS NA TUYONG DUGO NI HESUS AT SISIGAW SIYA SA SAKIT]

VOICE OVER
TULUYAN NANG NAMATAY SI HESUS SUBALIT HUMIHINGA PA SINA HESTAS AT
DIMAS KAYA SILA AY PAGHAHAMPASIN NG MGA CENTURION SA TUHOD UPANG
MALAGUTAN NA NG HININGA.

VOICE OVER
SA MGA ORAS NA ITO, ATING PAGNILAYAN ANG PAGHIHIRAP AT KAMATAYAN NG
PANGINOONG HESUKRISTO. MULA SA ATING PAGNINILAY, NAPAGTATANTO NATIN
ANG MAPANGWASAK NA KAPANGYARIHAN NG KASALANAN AT ANG NAPAKALAKING PAG-
IBIG NI HESUS PARA SA MAKASALANANG SANGKATAUHAN. INIALAY NIYA ANG
KANYANG BUHAY NANG MAY LUBOS NA KALAYAAN AT PAGKABUKAS-PALAD UPANG ANG
TAO AY MALIGTAS SA KASIRAAN NG KASALANAN. ITO ANG KANYANG PATUNAY NG
DAKILANG PAG-IBIG.

VOICE OVER
MANALANGIN TAYO… … (†) TUNGHAYAN MO AKONG NANINIKLUHOD SA IYONG HARAPAN,
HESUS NA BUTIHIN AT KATAMIS-TAMISAN. AKO AY DUMADALANGIN AT NAKIKI-
USAP NANG MAY MAALAB NA KALOOBAN UPANG LOOBIN MONG SA AKING PUSO AY
TUNAY KONG MADAMANG NAKATITIK ANG PANANAMPALATAYA, PAG-ASA, PAG-IBIG,
AT ANG WAGAS NA PAGSISISI SA AKING MGA KASALANAN. MAPAGTANTO KO NAWA
ANG MATATAG NA PASYANG MAGBAGONG BUHAY HABANG NABABAGBAG ANG AKING
LOOB AT NALULUNGKOT AKO SA PAG-IISIP AT PAGSASALOOB NG IYONG LIMANG
SUGAT HABANG AKING BINIBIGKAS ANG PANGUNGUSAP NA IYONG INILAGAY SA
BIBIG NI DAVID NA PROPETA MO PARA KANYANG MAIHAYAG TUNGKOL SA IYO.
HESUS NA BUTIHIN: “MGA KAMAY KO AT PAA’Y PAWANG BINUTASAN ANG BUTO NG
KATAWAN KO, SA MASID AY MABIBILANG.” AMEN. (†)

EASTER SUNDAY SCENE (4:00 – 5:00)

XII. ANG PASKO NG MULING PAGKABUHAY

VOICE OVER
SA PAGBUBUKANG-LIWAYWAY SA ARAW NG LINGGO, NAGTUNGO SINA MAGDALENA,
MARIA NA INA NI SANTIAGO, AT SALOME SA LIBINGAN DALA ANG PABANGONG
IPAPAHID SA KATAWAN NI HESUS.

MAGDALENA
ANO’NG IBIG SABIHIN NITO? [SUSUGURIN NINA MAGDALENA AT MGA KASAMA NITO ANG LOOB NG
PINAGLIBINGAN NI HESUS] BAKIT NAKAALIS ANG BATONG NAKATAKIP SA LIBINGAN NI
HESUS?

[PATULOY SILA SA KANILANG PAGTATAKA HANGGANG SA MAGPAKITA ANG MGA ANGHEL SA KANILA SA LOOB NG
LIBINGAN]

MGA ANGHEL
BAKIT NINYO HINAHANAP ANG BUHAY SA GITNA NG MGA PATAY? | WALA SIYA
RITO SAPAGKAT SIYA AY MULING NABUHAY! | SINABI NIYA SA INYO NOON SA
GALIELA NA ANG ANAK NG TAO AY IBIBIGAY SA KAMAY NG MGA MAKASALANAN. |
SIYA AY IPAPAKO SA KRUS AT MULING MABUBUHAY SA IKATLONG ARAW. | NAROON
NA SIYA SA GALILEA. HUMAYO KAYO AT SABIHIN SA KANIYANG MGA ALAGAD!

12
 Senakulo
[LUMISAN ANG MGA ANGHEL AT NAGMAMADALING UMALIS SINA MAGDALENA, MARIA NA INA NI SANTIAGO, AT
SALOME]

VOICE OVER
DAHIL SA MABUTING BALITA SA KANILA, NAGMADALING PUMUNTA SINA
MAGDALENA, MARIA NA INA NI SANTIAGO, AT SALOME SA KINAROROONAN NG MGA
ALAGAD.

[LALAPIT SI MAGDALENA KAY SIMON PEDRO]

MAGDALENA
PEDRO! MAKINIG KA… MAKINIG KAYO! GUMULONG ANG BATO! PUMASOK KAMI… AT
ANG KATAWAN NG PANGINOON, WALA NA ROON! [MAGSISIMULANG MAGTAKA SINA SIMON PEDRO AT
IBA PANG MGA ALAGAD]

MARIA NA INA NI SANTIAGO

TOTOO! NAGPAKITA SA AMIN ANG MGA ANGHEL NA NAGNININGNING, PARANG ARAW!

SALOME
SINABI NILA SA AMIN NA BAKIT DAW NAMIN HINAHANAP ANG BUHAY SA GITNA NG
MGA PATAY! … TOTOO ITO! TIGNAN NIYO PA ANG LIBINGAN!

MAGDALENA
PEDRO… MANIWALA KA SA AMIN! NASA GALILEA NA RAW SI HESUS!

[KAAGAD NA MAGTUTUNGO SILANG LAHAT SA GALILEA AT DOON AY MAAABUTAN NILA SI HESUS]

HESUS
SUMAINYO ANG KAPAYAPAAN! [LAHAT SILA AY MAGUGULAT AT SI SIMON PEDRO AY LALAPIT AY HESUS]
BAKIT KAYO MALUNGKOT? BAKIT KAYO NAG-AALINLANGAN? … TIGNAN NINYO ANG
MGA KAMAY AT PAA KO… [IPAPAKITA NI HESUS ANG KANIYANG MGA KAMAY AT PAA SA MGA TAO] HAWAKAN
NIYO… ANG ESPIRITU AY WALANG LAMAN AT BUTO NGUNIT AKO AY MERON… HETO
ANG SINABI KO SA INYO NOON. ANG MESIYAS AY DAPAT MAGDUSA AT MABUBUHAY
SA IKATLONG ARAW… KAYO ANG MGA SAKSI KO. [MAGSISILUHOD ANG MGA TAO SA HARAP NI
HESUS] SUSUGUIN KO SA INYO ANG IPINANGAKO NG AKING AMA. MAGHINTAY KAYO
ROON HANGGANG SA LUKUBAN KAYO NG KAPANGYARIHAN… GAWIN NIYONG ALAGAD KO
ANG LAHAT NG BANSA. BAUTISMUHAN NIYO ANG SILA SA NGALAN NG AMA, NG
ANAK, AT NG ESPIRITU SANTO… AKO AY SUMASAINYO HANGGANG SA KATAPUSAN NG
SANLIBUTAN. AMEN.

LIST OF CHARACTERS IN SCRIPT ORDER

VOICE OVERS (2)

HESUS

ALAGAD (SIMON PEDRO, ANDRES, SANTIAGO NA KAPATID NI PEDRO, JUAN,

FELIPE, BARTOLOME, MATEO, TOMAS, SANTIAGO NA ANAK NI ALFEO, SIMON NA
MAKABAYAN, HUDAS NA KAPATID NI SANTIAGO, HUDAS ISKARIOTE)
KAWAL (6)

MARIA

JUAN

MAGDALENA

PARING ANAS

PARING KAYPAS

GOBERNADOR PONTIO PILATO

13
 Senakulo
HARING HERODES

MGA TAO

MGA SAKSI (5)

PARISEO (3)

BATA (3)

SIMON SIRENEO

VERONICA

HESTAS

DIMAS

CENTURION (3)

MARIA NA INA NI SANTIAGO

SALOME

MGA ANGHEL

SCRIPT REFERENCES:

http://iamzorro.blogspot.com/2009/01/passion-of-christ-tagalog-summary.html
file:///C:/Users/admin/Downloads/document.pdf
http://www.abychurches.co.uk/content/pages/documents/1492268659.pdf
https://dlscrib.com/downloadFile/58be241ee12e89d10aadd375
https://www.imdb.com/title/tt0335345/plotsummary
https://spirituality.knoji.com/senakulo-traditional-dramatization-of-the-passion-of-jesus-christ/
https://www.youtube.com/watch?v=19r__4wBQ98&t=1809s
https://www.youtube.com/watch?v=O_iYoypmiJo
http://www.wordandlife.org/wp-content/uploads/2015/03/BIYERNES.pdf
https://www.gotquestions.org/Tagalog/Pariseo-Saduseo.html
https://www.bible.com/tl/bible/399/MAT.27.RTPV05
https://www.churchofjesuschrist.org/study/scriptures/gs/ask?lang=tgl
https://www.bible.com/tl/bible/399/LUK.13.RTPV05
https://tl.wikipedia.org/wiki/Hesus#Hul%C3%ADng_hapunan
https://www.bible.com/tl/bible/399/MRK.16.RTPV05
https://en.wikipedia.org/wiki/Mary_Magdalene#Witness_to_Jesus's_crucifixion_and_burial
https://www.youtube.com/channel/UCc1HLhyMfljD82Vq5diYUsQ
https://tl.wikipedia.org/wiki/San_Jose
https://tl.wikipedia.org/wiki/Hesus
https://en.wikipedia.org/wiki/Anno_Domini
https://www.biblegateway.com/passage/?search=Juan+20&version=MBBTAG

14