ISUA KRISTA MIZIA SAWI FIAH TUMNA

Isua chu Pathian a ni em? Eng ang chen nge Pathian a nih ve?

Ebion-hote chhan dan (Ebionism) : Pathian chu thlarau a ni a tisa tuarnaah a lut ve thei lo. Isua erawh
chuan a dam lai khan tisa tuarna tak tak a chang ve si a; chuvangin Pathian tak chu a ni ve thei lo, mihring
a ni, mi tha bik pawh a ni, mahse Pathain zawng a ni ve lo ve.

Docetist-ho chhan dan (Docetism) : Pathian chu thlarau a ni a, a tak takin tisaah a chang lo va, a tak
takin a tuar ve lo. Isua pathianna kha a tak tak, a mihrinna erawh chu a tak ni lo ‘anga lang’chauh a ni.
Mihring angin a pianga, mihring angin a tuar, mihring angin a thi. Tisa channa (incarnation) kha a tak tak a
ni lo.

Nostic-ho chhan dan (Gnosticism) : Tisa thil zawng zawng hi sual lam chan a ni a, Khawvel leh mihring
taksa pawh hi pathian dotu sual chan a ni. Mihring chhungah hian thlarau nung a awm a chu chu Pathian
them a ni. Chu mihring them chu mihring chhungah hian salah a tang a, chhuah chakin a awm reng a ni.
Chhanchhuak turin Pathian chuan Ama Thu (Logos) khawvelah a rawn tir a, chu chu mihring Isuan baptisma
a chan khan a lo dawng a; mahse khenbeha a awm khan a chhuak bo leh daih. Pathian Krista chu an
khengbet lo, khenbeh a awm kha mihring Isua a ni. Phuma awm pawh kha mihring Isua taksa a ni a,
Pathian Isua erawh chu lei thlana lut ve rual a ni lo. Chutah tak chuan chhandama awm turin hriatna
(Gnostisis) a pawimawh a ni. Krista hriatna changtu chuan he khawvel hi a thlawh khuma, a thlarau leh
Krista an inpawl a, an infina, zelenna ropui tak changin chhandamnaah a lut a ni.

Monarkhian-ho chhan dan (Monarchianism) : Pathian chu pakhat (Monarch) a ni a. Isua chu
mihring a ni. Pathian khawngaihna leh thu (Logos) a dawng nasa bik a, a dam lai khan a dawng nasa tial tial
a, a thih meuh chuan Pathian nen inpimkhatnaah a lut a Pathian a ni. Pathian fapa khawvela lo kal ni lovin
mihring pangngai a ni. A thih hnuah vanah Pathian nen infin, Pathianna chang a ni zawk.

Modalist-ho chhan dan (Modalistic Monarchianism/Modallism/Sabellianism) : Thuthlung hluiah

Jehova a ni a, Chanchin thaah Krista, Pentikos a chinah Thlarau thianghlim.

Aria-ho ngaih dan (Arianism) : Pathian chu pakhat chauh a awm, Thu, Kriata chu siam a ni a,
hrin a ni lo. Krista chu pathian zia leh nihna changtu a ni lo. Hnhnuaia awm awm loh lai nei. Thil siam
(Logos) chu Nazaret Isuaah a lo chang. Pathian zepui (sunstance) changtu ni lo mah se, Pathian tia vuah
theih chu a ni ve a, thil siam zinga chungnung ber a ni.

Khing khi Krista pathian nung takzet a ni ve lo, tih tantute zirtirna a ni. Heng hi tun thlengin
an la awm a, thurin kawngpui zawh ve lote an ni.

PATHIAN TAKZET LEH MIHRING TAKZET

Apollinaria sawi dan (Apollinarianism) : Isua Pathian ngei a ni tih a sawi uar a , a uar lutukna lamah a
mihrinna a sawi derthawng. Isua a Pathianna leh mihrinna lo awm kawp khan a infin tak tak thei lo va, a
mihrinna rilru aiah Pathian Logos (Thu) a lo lut a. Isua chuan mihring taksa a pu a, a rilru atan Pathian thu
(logos) chauh a pai. mihring rilru, sual theihna a neihin a nei lo reng reng. A mihrinna chu taksa chauh a
chhung lam erawh chu Pathian hlang a ni.

Nestorian sawi dan (Nestorianism) : Mari chu Isua krista paitu a ni ngei mai Pathian erawh chu
mihring pum chhunga thla 9 lai han pai chi a ni lo va, Mari chu mihring paitu a ni a, a sang berah Krista paitu
a ni. Mari chu mihring a ni a mi tumahin Pathian Nu ti suh se. A zirtirna hi phuah belhin Isuaah Krista pahnih,
fapa pahnih - van lam mi leh lei lam mi a awm tiin an sawi belh a. Chu chu Nestoria sawi bak ni mahse
Nestorian zirtirna tiin a kal ta a ni.
Eutuka sawi dan (Eutychianism) : A ni hian Nestoria zirtirna a dodal a a duhthawhna lutukah a kal
filawr ta mah mah a ni. Isua hi Pathian a ni a, mihringa a lo chan hma khan a mihrinna leh Pathianna chu a
hrangin a awm ve ve a, mahse mihring a lo nih atang khan a infin a, a mihrinna chu Pathiannain a hip zo ta
a ni. Mize pakhat chauh kan hmu tawh, Pathian zia chauh chu. Chuvangin Isua Krista kha Pathian a ni a,
a mihrinna zia chu a awm tawh lo.

KOHHRAN THURIN KALKAWNG

Kum AD 451 Chalcedon Inkhawmpui Lianah Isua Krista Mizia chu mihringte sawi fiah zawh sen
ni lo mah se, Kohhran thurin kalkawng tihfiah a tul an ti si a, hetiang hian an puang ta a ni. (A thu ngai ni lovin
a saw fiahna)
1. Isua Krista chu Pathian famkim a ni. Engkima Pathian nihna famkim chang a ni, chutiang chuan
biak tur a ni.

2. Isua Krista chu mihring famkim a ni. Mihring ‘ang’ ni lovin, mihring tak a lo ni a, a piang a, a seilian
a, a tuar a, thlemna a tawk a. “Keimahni anga kawng tinrang a, thlemna tawk tawh, sual erawh chu
sual lo” a ni (Heb. 4:15)

3. Isua krista chu Pathian lo chenna mihring tha tak a ni lo va, mihring tha tak Pathiana chang ta a ni
hek lo; Pathian ngei chu mihringah a lo chang a, amahah chuan Pathian famkim leh mihring famkim
pumkhatah a awm a ni.

4. Isua Krista nihna ropui tak hi kan bia a ni lo va amah kan bia a ni.

PATHIAN PAKHATA MI NUNG PATHUM (Tinity)

He thurin hi thuruk inthupa a ni ber. Khawvel mihring zingah sawi fiah thiam tu mah an awm lo.
Trinity hi hriatthiam avanga rin chi a ni lo va, Isua Krista thupuan a nih avangin hrethiam turin kan pawm
hmasa a ni. Sawi fiah tum an tam tawh, Kohhran chanchin kal zelah sawi fiah tum loh lai a awm lo. Mahse
fiah famkim chu a la awm hauh lo. Chatuan Pathian mize thuk ropui chu mihring tawngkam leh rilru hian a
sawi fiah phak lo a ni mai. Nang leh keiin kan hrilhfiah phak Pathian chu lei leh van Pathian a ni lo vang.
Biblea a lan dan :
1. Pathian pakhat chauh a awm. (Duet 3:35; 6:4; Isa 44:6; 45:5, Mk. 12:29; Joh 7:3; IKor 8:4;
Eph.4:6; ITim. 1:17; Jud 25)

2. Pa chu Pathian a ni. (Joh. 8:54; 17:1; IKor 8:6; Eph 4:6)

3. Fapa chu Pathian a ni. (Joh. 1:1, 14; Phil. 2:5; Kol 1:16, 17; Heb 1:1-3)

4. Thlarau chu Pathian a ni. ( Joh 14:25, 26; 15:26,27; 16:5; Rom 8:4, 5; II Kor 3:16; 13:14)

5. Pa leh Fapa leh Thlarau chu mihrang theuh an ni. ( Joh. 5:36; 6:38; 8:42; 12:49; Gal 4:4;
IJoh 4:9; Joh 14:16,25; Heb 9:14)

6. Mahnia mize nei hrang theuh an ni. (Mat 28:16-29; Mk 1:9-11; IIKor 13:14; Tirh 20:28;
Lk 1:35, 67; 2:25, 38 hei bakah hian a chunga Bible chang tar lan atang pawh khian a lang)

7. Pa leh Fapa leh Thlarau chu pakhat a ni. (Joh 17:21, 22; IKor 2:11, 12; Mk 13:11; Joh 5:35ff;
IIKor 13:3)
Rahbi pathum : Trinity hi rahbi rahbi pathum angin an sawi thin.

Rahbi pakahtna : Pathian Pakhat chauh a awm tih hi Judate sakhua a ni. Kristian hmasate kha
Juda mi an ni. Jentail Kristian an lo awm pawhin an rinpui ve mai. Pathian pakhat chauh a awm tih rin hi
Kristian thurin bulpui ber a ni.

Rahbi pahnihna : Rahbi pahnihna chu Isua chu Pathiana pawm a ni. Hmeichhe hrin mihring
pangngai chiaha nung, mihring thih a thi kha an hmu a, a thawhleh hnuin khawvela a thil tih zawng zawng an
chhui a, mihring takzet a ni tih an hriat rualin Pathian a ni ngei mai tih an pawm.

Rahbi pathumna : Thuthlung hlui hunah kha chuan Thlarau chu Pathian chakna thahrui, a
thawh dan sawina kawng khat angin an pawm a, Pentikos hnuah erawh chuan Minung hranpa, Pathian ngei
chu niin an pawm ta.

Tichuan Pathian pakhat, Pa chu Pathian a ni a, Fapa chu Pathian a ni a, Thlarau chu Pathian a ni tih
pawm a ni ta a, mahse Ththlung Tharah sawi fiahna a lang hman lo. Trinity kan tih chuan Thurin sawina a ni
a; mahse a hrilhfiahna chu a ni lo.

Ringtu nunah hetiang hian a chiang zui - Pathian pakhat chuah rin leh biak hi basan theih loh thu dik
a ni. Isua Krista Pathian chauhin a tih theih chhandamna chu chiang takin a lo thleng a; tin, Thlarau Thianghlim
chuan ringtu nunah Pathian leh a hnathawh chu a lar chhuak ta a ni.

Hetiang hian hrual mum a lo ni ta a ni.

Pathianah chuan mi nung pathum, Pa leh Fapa leh Thlarau Thianghlim an awm a. An
pathum hian Pathian pakhat an ni a, nihna thuhmun, thiltihtheihna leh ropuinaa intluk an lo ni ta
a ni. (Thutin No. 3)

He thurin hian a tum ber chu chatuana Pathian awm dan sawi fiah a ni lo va, Chanchin Thaa Pathian
inpuan dan hi mihring ten an pawm thiamna tura kaihruaina siam a ni. Trinitu hi Isua Krista hmanga Pathian
inpuannain a ken a ni a, ringtu chuan a pawm tur a ni. Chuvangin Trinity thurin pawm lo chuan rinna nunah
tlakchham lian tak a nei. A pawm lo tak tak phei chu Kristaian pawh an ni thei dawn em ni le?

(Hei hi tunlai Nilai leh Beihrual Thupui kan zirlai nen a inrem em mai a, Kristian Thurin
Zirna tih Rev. lalsawma ziak atang a kaihtawi a, lak chhuah a ni.)