Ang Kasaysayan ay sinasabing nagmula sa salitang “Saysay” na ang ibig
sabihin ay kahalagahan, kahulugan at lalim. Ito ay isang konsepto na nagbibigay kulay sa ating pag-aaral ng nakaraang pangyayari’t-kaganapan. Ang saysay ng isang pangyayari ay nakabatay sa pananaw at pagtingin ng mambabasa’t-mag-aaral. Ang mga pangyayari ay nakadalasan ay nailalahad sa “pananaw” o dili kaya’y punto de bistang dayuhan kung kaya’t iba ang mga detalye sa inaasahan. Isang kaganapang Pilipino mula sa Pilipino at paliwanag na likas sa Pilipino at dahil taal sa kanyang sariling pang-unawa ay kanyang naiintindihan ito. Ang punto de bistang dayuhan o kilala sa tawag na Pangkaming pananaw ay isang halimbawa ng pagsasalarawan ng mga kaganapang pandayuhan sa pagpapaliwanag ng mga pangyayari sa Pilipinas. Ang halimbawa nito ay ang pagsasabi na nadiskubre tayo ng mga Kastila partikular na dito ay si Ferdinand Magellan (sa Ingles, Fernao Magalhaes sa orihinal na Portuges o sa Kastila ay si Fernando Magallanes patunay na maging ang pangalan ay nababago ayon sa punto de bista) na waring walang tao’t-kabihasnan sa Pilipinas. Ito ay dulot na rin sa pananaw na Pangkami na sinasabi na ang kabihasnan ay wala sa Pilipinas at hatid lamang ng mga dayuhang kanluranin. Isa pang klasikong paliwanag ay ang pananaw na tayo ay kabilang sa lugar na tinawag ng mga dayuhan na Far East dahil tayo ay nasa dulong silangan ng mga kanluraning bansa at kalakip na konsepto na Middle East na kadalasan ginagamit pa ng mga kapwa nating Filipinong manggagawa upang patungkulan ang lugar na tinatawag dapat na “West Asia.” Ang mga pagbanggit ng mga lugar na ito bilang ekstensiyon ng kanilang teritoryo mula sa kanluran ang dahilan upang tawagin ito sa ganitong pamamaraan at minarapat na tawag din ng mga bansang nasakop ng mga kanluraning bansa kahit na ito ay di angkop sa kanilang heograpiya na dapat ay pumapatungkol ang sinasabing lugar na ito sa Dagat Pasipiko sa punto de bista o “Pantayong Pananaw.” Ang Pantayong Pananaw sa madaling salita ay ang perspektibo hango sa Pilipino mula sa kanyang sariling kamalayan, kabihasnan, karanasan at kalinangan. Ang pagpapaliwanag ayon sa nasabing pananaw ay ang pagtatama ng mga kamaliang hatid ng mga punto de bistang dayuhan upang maging angkop at makabuluhan ang pagkakaalam, pagkakaintindi at pagtingin natin sa ating kasaysayan. Ang Pantayong Pananaw ay maaaring ipaliwanag sa pagtutuon ng paggamit ng sariling wika upang maipaliwag ng mas makatotohanan ang mga pangyayari’t-kaganapan na mahirap maunawaan o maiintindihan sa kulturang dayuhan. Isang halimbawa nito ay ang diumanong pagligo ng dalawang oras o mahigit pa ng isang Pilipino bawat araw sa harap ng panganib na maaaring makain ito ng mga buwaya nito noon sa mga ilog at sapa noong panahong ng kastila ayon sa isang kilalang abogadong kastila na si Antonio Morga, na isang juez lego o assesor na kasapi ng Real Audiencia. Ito ay negatibong pag-uugali ng mga Pilipino ayon sa nasabing abogadong kastila ngunit para sa atin at kaakibat na angkop na kabihasnan na dapat maligo ang mga Pilipino bawat araw dulot na rin ng alinsangan ng panahon at di naman angkop sa buhay Español dahil sa kanila ay malamig at nagnaniniyebe. Isa pang pananaw na naging panunuya ng mga Español ay ang pagsusuot natin ng mga salat na damit noong panahong nananakop sila. Samantalang, ang mga Español ay nakasuot sa yaring metal na panlabas na paghahanda sa pakikidigma sa mga nasasakupan.Sa ating pagbabalik-tanaw sa kasaysayan ngayon ay marapat nating husgahan sa ngayon kung sino ngayon sa dalawang panig ang tama at makabuluhan sa kanilang punto de bista’t-pananaw. Ayon din sa mga naunang mang-uulat at manunulat na kastila ay walang matatawag na kabihasnan ang mga Pilipino dahil mismo ang ating unang panulat ay hango lamang sa kanila, ang Doctrina Christiana noong ika-16 na siglo ngunit ito ay patutunayang mali sa mga susunod na pahayag sa ibaba. Ang Kasaysayan ay may batayang pinagmulan din katulad ng lahat ng bagay na may kadahilanan sa pagiging makabuluhan nito. Ang mga pinagmulan na ito ay maaaring Primaryang Batis o Sekundaryang Batis Pangkasaysayan. Ang primaryang batis pangkasaysayan ay ang mga sinauna at orihinal na dokumentong pangkasaysayan o mula sa ulat ng isang taong naroon sa pook pinangyarihan na maaari ay pasalita o pasulat. Ang sekundarya ay ang mga impormasyon na nakalagay na sa mga pangunahing teksbuk na kalakip na ang hinuha, palagay, opinyon at pag-aanalisa ng may-akda. Ang primaryang batis sa isang banda ay isang taal, payak, dalisay, at walang pagkiling na paglalahad ng mga kaganapang pangkasaysayan.
Kabihasnang Pilipino
Ang pagsasalarawan ng Pilipino sa kasaysayan ay tunay na masalimuot sapagkat
ito ay nakabatay sa mahabang kasaysayan ng ating mga mamamayan sa kanyang karelasyon maging mga kolonyalista o dili kaya ay mga mangangalakal bago dumating ang mga dayuhan. Ang kasaysayan bago dumating ang mga Kastila ay malinaw na mabibigyan ng paliwanag batay sa mga patunay o ebidensiyang kasaysayan na may materyal na lapit na maaaring makapaliwanag ng ganitong ng kalagayan, uri ng pamumuhay, at antas panlipunan ng mga sinaunang pilipino . Isang napakagandang halimbawa nito ang mga Pilipino ay masugid na nangangalakal sa kanyang mga kapwa taga-Timog Silangang Asya sa ebidensiya ng Laguna Copperplate Inscription ng 980 A.D. Ito ay napakahalaga sa ating kasaysayan dahil ito ang patunay ng kauna-unahang dokumentong nakasulat ng ating mga ninuno na natagpuan sa lunduyan ng Ilog Lumban ng taong 1970's ng dalawang mag-asawang naghahanap ng "yaman ni Yamashita". Ito ay naglalaman ng pagpapatawad ng utang ng isang maginoo o dugong maharlika na Pilipino ng isang Javanese na hari sa kanyang pagkakautang ng mahigit 900 na gramo na ginto. Ito ay di-lamang isang dokumentong pagpapatawad ng utang ngunit isang pagsasalarawan din ng pagiging maluwag ng ating antas panlipunan (social class) dahil na rin sa panandaliang pagkakautang ng Maginoong ito ay siya ay naging alipin panandalian ng Hari at sa pagpapatawad niya ng utang ay naging malaya siya at bumalik siya sa dati niyang estado bilang Maharlika. Ito ay malinaw na ebidensiyang pangkasaysayan na nasa luklukan ng National Museum na ang ating antas panlipunan ay napakaluwag at di katulad ng kanluranin na stratipikado at sarado sa kanilang absolutong monarkiya at piyudal na sistema. Ang nasabi ring dokumento ay nagsasaad ng karaniwang pakikipagtalastasan ng isang Pilipino sa isang Javanese na sa ngayon ay maaaring isagawa kung marunong ang mga ito ng internasyonal na wika na katulad ng Ingles. Ngunit ang suliraning ito ay di makikita diumano kay Antoon Postma (tagapagsalin ng LCI ng mahigit isang dekada) noon dahil nagkakaintindihan ang mga ito at ang patunay nito ay ang nasabing dokumento ng pagpapatawad na walang kinailangan na tagapagsalin. Ito ay isang ebidensiya na ating dapat pahalagahan sa pag-aaral ng kultura't tradisyon ng Pilipinas sapagkat ito ay naglalahad kung gaano tayo ka-dinamiko sa pangangalakal at pagpapakita ng lalim ng interaksiyon ng mga Pilipino at mga taga TSA sa larangan ng "rehiyonalismo" noong mga bansang malapit sa kipot ng Malacca. Ang dokumento rin ito ay nagpapatunay ng sistema ng kaayusan ng mga taga- Timog Silangang Asya na nagkakaintindihan kahit na Hari ng taga Java-Indonesia ay nakakausap ng walang namamagitan o intrepeter sa kanilang wika na sa kasalukuyang ay imposible ng isagawa para sa karaniwang mamamayan ng bawat bansa kung walang konkretong tagapamagitan sa larangan ng wika. Ito rin ay isang ebidensiya ng malawak at malalim na relasyon ng mga taga Timog Silangang Asya sa kanyang pangangalakal at diplomatikong relasyon sa rehiyon na ito kung kaya't tuluyang nagkakaintindihan sa iisang wika, monetaryong batayan (fiscal standard) o maaari rin barter, at maluwag na pag-uusap na walang pagkiling (bias) sa antas panlipunan (hal. hari sa maginoo). Ang binabanggit din sa nasabing dokumento ay pagkakaroon ng nagkautang ng mga tagalakad o tagapamagitan ngunit sa aspeto ng "pagpapalakas ng kanyang interes" na waring pagpapatibay ng sistemang padrino at palakasan din ng mga maginoo ng Puliran, Bulakan at Tondo. Ang paggamit ng padrino at palakasan sa ating kasaysayan ay waring institusyon na sa aking palagay lalo na kung titingnan natin sa kontemporaryong panahon sapagkat ito magpasa-hanggang ngayon ay ginagamit ito di lamang ng mga malalaking pulitiko ngunit gayundin ng mga karaniwang mamamayang para mapanatili ang kanilang interes at makuha ang ninanais. Ang isa rin matibay na ebidensiya ay ang materyal na kultura na makikita sa mga museo natin mula sa makikintab na mga banga mula sa Dinastiyang Sung at Ming sa Tsina ganoon din ng mga magagarang jade na kuwintas, singsing, at pulseras. Ang mga ito ay nakasulat sa mga sinaunang mapa na ginawa nilang paglalakbay ng mga misyonerong Budista na si Chou Ju kua na nagsulat ng Chu Fan Chih at si Wang Ta Yuan na nagsulat ng Tao I Chi Lueh. Sila ay nagpahayag na ang Pilipinas bago man ito makilala sa ganong pangalan ay tambakan na ng mga produkto ng Silangan ganundin ng kanluran dahil sa kalapitan nito sa Kipot ng Malacca at karagatan ng Timog Silangang Asya. Ganoon din ng kontrobersiyal na ginintuang buddha na bago pa man ang 12 siglo ay iniregalo daw ng prinsesa ng Thailand sa atin. Sa madaling salita, ang malawak na tradisyon ng pangangalakal sa Pilipinas ay nagpahayag ng positibong "cultural diversity" sa mga Pilipino kung kaya't ang mga pag-uugnayang ito ay di lamang nagdulot palitan ng produkto ngunit gayundin ng palitan ng wika at kamalayan at amalgamasyon ng mga mamamayan ng ibang bansa sa ating lipunan. Ang historikal na kinalalagyan ng Pilipinas ay tuluyang iba sa kanluraning pamamaraan at pamumuhay sapagkat ang ating pamunuan ay hindi isang hari o walang absolutong kapangyarihan kung kaya't ang kanyang nasasakupan ay di gaanong kalawak at ang sakop niyang kapangyarihan ay di rin makikita na nag-iisang gumagampan sapagkat ito ay konsolidasyon ng kapangyarihan sa barangay : babaylan, catalonan, konseho ng matatanda at umalohokan. Minsan ang kapangyarihan ng babaylan o katalonan na isang paring babae ay mas malakas pa sa pulitikal na pinunong barangay, ang datu lalo na sa usaping espiritwal, panrelihiyon sapagkat malaking bahagi ng pamumuhay ng ating mga ninuno ay nakabatay sa rituwalistikong uri na kung saan ang pulitika ay isang bahagi lamang at naipapaliwanag lamang ng mas mabuti sa mga kritikal na panahon katulad ng mga dilubyo ng kalikasan sa mga sayaw, sigaw at ungol ng isang paring babae. Kung kaya't ito ang dahilan kung bakit ang ating lipunan ay maluwag ang ating stratipikasyon, antas panlipunan ay napaka"mobile" samantalang ang sa kanila ay may malawak na kapangyarihan na halos abot langit sa pamamaraan ng kanyang pamumuno sa kanyang kaharian sapagkat siya ay itinalaga ng diyos sa luklukang yaon kung kaya't ang kanyang mga alipin naman ay may napakababang lugar sa lipunan na hindi na maaaring galawin o magbago ayon sa tadhanang kinasadlakan niya. Ang dahilan ng pagpapababa ng antas panlipunan ayon kay Morga sa kanyang natagpuan sa Pilipinas ay maaaring pagkatalo sa digmaan, di pagbayad sa pagkakautang at ang pagpapakasal sa dati ng alipin at ang pagkakaroon ng mga alipin na mga magulang. Ang barangay ay ang pangunahing at payak na sistemang pampulitika noong panahon bago dumating ang mga kastila ang kapangyarihan ng datu ay di nagmumula sa sakop nitong lupa ayon kay Corpuz sapagkat di siya nagmamay-ari nito ngunit ito ay komyunal na pag-aari ng mga kabilang sa barangay na yaon. Ang mga nagnanais magsaka sa lupa ng isang barangay ay kinakailangan munang magpaalam sa datu at kapag nakakuha ng magandang ani ay maaari siyang magbigay sa abot ng kanyang makakaya sa datu. Ang pulu-pulutong na mga barangay na iyon na kanilang natagpuan ay hindi rin katulad ng mga binabanggit ng mga sinaunang manunulat na mga kastila na mga maliliit na kaharian (kingdoms o princedoms) sapagkat katulad ng nabanggit sa itaas ay ang paraan ng pamumuno ay di-absoluto kungdi konsolidasyon lamang sa paraan ng pamumuno at pamumuhay ng mga barangay ngunit pagdating sa lawak at sakop na teritoryo, may katatagpuang mga malalaki meron din mga maliliit na barangay. Katulad ng nabanggit na suprabarangay complex ni O.D. Corpuz sa kanyang Roots of the Filipino Nation na mula Valenzuela hanggang Angono, Rizal ang abot ng kapangyarihan ng datu (may nakapaloob na mahigit kumulang 200 pamilya) ngunit ang sa iba ay mayroon lamang 20 pamilya ang mga nakapaloob. Ang mga ito ay kalimitang makikita sa mga tabi ng ilog at tabing dagat sapagkat malapit sa kanilang kabuhayan na pangingisda at pagsasaka sa matatabang lupa tabi ng mga ilog. Ngunit sa aking palagay ang usapin dito ay hindi nagmumula sa pisikal na teritoryo ngunit sa anyo at lalim ng kapangyarihan meron ang ating mga datu. Ang pangunahing suliranin dito ay ang kanilang paglalapat ng perspektibong kanluranin upang ipaliwanag ang kanilang nakita, isinulat at ipinahayag sa madlang Espanya at maging dito na rin sa Pilipinas. Hindi muna nilang inalam ng mabuti sa pagkakaroon nila ng mga ladino na tagapagsalin ng mga prayle ng wika at sa katagalan ng kulturang Pilipino kung ano ang kahulugan ng mga ito para tuluyang maging makatotohanan at makabuluhan ang kanilang mga ulat. Ngunit narito sila upang pagtibayin at palakasin ang punto de bista na sila bilang mga Kastila na "nagmamay-ari " ng kalahati ng Mundo ay may mataas na antas na kalinangan, kabihasnan at kamalayan at ilalapat nila ito sa mga "barbaro, salat sa kaalaman, mga nakahubad na katutubo." Ang paglalapat ng kanilang kabihasnan at kaalaman sa "barbarong arkipelagong" ito ayon sa mga kolonyalista ang tunay na mag-aahon sa kanila at mapabilang sa sibilisasyon kanluranin. Ang paglalapat ng mga kaalaman na nakadatal na sa uri ng pamumuhay nating mga Pilipino katulad ng pagsuot ng salat sa init ng tropikong klima at hindi na mabibigat na mga metal na kasangkapang pandigma sapagkat mas mahalaga para sa ating mandirigma ang opensa at mobilidad sa pakikidigma at hindi sa pigil na paraan ng pakikidigma dahil sa angking bigat ng mga metal na nakabalot sa katawan ng mga Kastila na napakainit sa tirik na tanghaling araw. Ang katuwang na pilosopiya na pagiging malinis at mahilig sa paliligo. Ang paraan ng pagtitipon ng tubig sa matataas na talampas para sa panahon ng init at tagbagtik o do-ok na makikita sa baitang na baitang na tanimang lupa sa hilagang luzon na tinatawag na Payew ng mga Ifugao. Ang pagsasakronika ng nasabing palapalapag na taniman ay sinasabing 800 B.C. at 800 A.D. Ito ay masusing pinaghandaan ng mga Pilipino na tunay na naging "bihasa" sa kanilang utilitaryang pamumuhay mula pangangalakal, pagsasaka at pagtatanim sa pagbubuo ng kanilang matatawag na sariling "kabihasnan."