ACARA MINGGU QUASIMODOGENITI

MINGGU KELUARGA “SOCIAL DISTANCING WORSHIP”

HKBP SA-RESORT PARSINGKAMAN
Minggu, 19 April 2020
“Ale Tuhan, nunga mauas jala malungun tondinami di asi ni rohaM! Salpuhon
ma hasusaan on sian tongatonganami!”
1. Marende B.E. No. 18:1+6 “Ungkap Bahal Na Ummuli”
1. Ungkap bahal na ummuli, bagas ni Debatangki. Ai tusi do au naeng muli,
ganup jumpang Minggu i. Hulului do disi, bohi ni Debatangki.
6. Pangkulingi au Tuhanhu asa hutangihon Ho. Patandahon tu rohangku na
tau pasangaphon Ho. Sai pabosur tondingki dohot asiasiMi.
2. Votum – Introitus – Tangiang (U: Uluan; K: Keluarga)
U: Marhitehite goar ni Debata Ama, dohot goar ni AnakNa Tuhan Jesus Kristus,
dohot goar ni Tondi Parbadia na manompa langit dohot tano.
K: Amen.
U: Hisapan ma hamu songon posoposo na imbaru tubu i, di susu na denggan na
so mangansi asa lam ganda hamu marhite sian i molo tung nunga didai hamu
basar ni Tuhan i. Puji hamu ma Debata hagogoonta i, olophon hamu ma
Debata ni si Jakop. Haleluya! Martangiang ma hita! Ale Tuhan Debata,
Parasiroha na sumurung! Didok HataM do, ingkon manaon hami jala mate
rap dohot Tuhan Jesus Kristus, asa rap hami dohot Ibana tu hasangapon.
K: Sai parrohai ma hami, asa unduk hami tu lomo ni rohaM jala hot hami di
haporseaon na ture.
U: Asa tongtong mangkirim di haheheon dohot di hasangapon sogot
silehononMu tu angka na porsea di Ho.
U+K: Amen.
3. Marende B.E. No. 557:1 “Dao Dumenggan”
1. Dao dumenggan, asi ni rohaM. Dao ummarga sian ngolungkon. Sai
pujionhu ma Ho Tuhanhu, dao ummarga asi ni rohaM.
4. Tangiang Psalmen 6:2–5 (U: Uluan; K: Keluarga)
U: Rap ma hita martangiang mangido asi ni roha ni Debata di hamamasa ni
hasusaan on. Martangiang ma hita! Ale Jahowa unang uhumi ahu di bagasan
rimasMu, jala unang ajari ahu di bagasan parpiar ni murukMu.
K: Asi ma roham di ahu, ale Jahowa, ai mauas do huhilala; pamalum ahu, ale
Jahowa, ai angka hitir do sude holiholingku.

Mohon maaf apabila ada kesalahan penulisan kata/kalimat - 1 -

U: Rohangku di bagasan pe mansai mallobuk do, sadia leleng on Ho, ale
Jahowa?
Sude Rap Mandok: Sai marpangulahi ma roham, ale Jahowa! Malua ma
hosangku! Urupi ahu ala ni denggan ni basam. Amen!
5. Marende B.E. No. 428:1+3 “Ho Na Loja Ho Na Sorat”
1. Ho na loja ho na sorat, pos roham di Debatam. Di na hansit, di na borat,
dipapita do roham. Unang ganggu be rohamu di pandok ni Debatam.
Pasautonna bagabaga, pos roham di Debatam.
3. Ala nii padao arsakmu hot ma tiop Tuhanmi. Tu na denggan do ditogu
saluhut na masa i. Unang ganggu….d.u.
6. Manjaha Turpuk Epistel (U: Uluan; K: Keluarga)
U: Tajaha ma turpuk Epistel di Minggu sadari on, na tarsurat di 1 Petrus 2:1–5.
Antong, bolongkon hamu ma nasa hajahaton dohot nasa angkal dohot
pangiburuon nang panihaion!
K: Songon posoposo na imbaru tubu, uasan ma hamu di susu na tama, na so
marlaok, asa lam magodang hamu, horhonon ni i, bahen haluaon.
U: Molo tung naung didai hamu habasaron ni Tuhan i.
K: Ai nunga didapothon hamu Ibana, na songon batu na mangolu, na
binolongkon ni jolma, alai na pinillit jala na arga, ia di Debata.
U: Sai olo ma nang hamu paulion, songon angka batu na mangolu, gabe bagas
partondion jala hamalimon na badia.
K: Laho mamboan angka pelean partondion, halomoan ni roha ni Debata,
marhitehite Jesus Kristus.
U: Martua do angka na tumangihon Hata ni Debata jala na umpeopsa.
U+K: Amen!
7. Marende B.E. No. 94:1 “Ale Tondingku Naung”
1. Ale tondingku naung hehe Tuhanmu, nunga ditaban do banuatoru. Las ma
roham ai martua ma ho, :,: rap dohot Jesus mangolu ma ho. :,:
8. Manjaha Turpuk Evangelium/Jamita Na Jompok: Psalmen 42:1–6 (Diparade
hian ma Bibel manang Alkitab, asa paganti sorin manjahasa)
“Didia do Debatam? – Sai Haposi Ma Tongtong Tuhanmu”
Di hamamasa ni parungkilon bolon na digoari Covid19 nuaeng on, gabe
tarsunggul do tu roha sada ende hasoloan ni roha. Nian nunga sian sieteetehon
niboto ende on. Alai tung ampit situtu ma soara ni ende i tu na masa nuaeng on,
lumobi ma nang tu turpuk on. (Molo diboto ende on, boi ma satongkin
diendehon)
Mohon maaf apabila ada kesalahan penulisan kata/kalimat - 2 -
 “Sipata sai sungkunsungkun, rohangku sai lulululu. Didia do Debata?
Didia do Debata? Tung tagamon do na lao mandao Debatangku sian
ahu? Lulululu do rohangki. Didia do Debatangki? Boasa tung
tadingkononmu ahu? Boasa tung pasombuonmu ahu maoto di
sitaononhi? Sipata naeng tinggang, sipata naeng tinggang, sipata naeng
tinggang do ahu. Soada manungkoli ahu. Umbaen maporus ahu tu
joloMi, mangido sian nasa rohangki: Apuli ma rohangku na sai tong sai
marsak i! Papir dohot tondingku, sai pahot pingkiranhi. Nang
haporseaonhu nang godang parsorionhu! Asi rohaM, ale Amang, O
Amang na ulibasa marhitehite Jesus i, Tuhanhi. Amen. Amen. Amen.”
Nda sungkunsungkun jala lulululu do rohanta di Debatanta Siparngolu i? Nda
ragam do sungkunsungkun nuaeng na soluk ro tu pingkiranta? Boha, sai hira na
ditadingkon Tuhan i do nuaeng panghilalaanta di hamamasa ni sitaonon on? Sai
hira na dipasombu do nuaeng pangarujumionta siala ni na masa on? Nda tangis
tarilu do hita siala ni na masa on? Nda sai busisaon do nuaeng roha nang
pingkiranta marningot angka sisolhotta, tondongta, ianakhonta na holang sian
hita? Lumobi ma muse: Ndang malungun nuaeng tondinta naeng manopot
Bagas JoroNa na badia i, laho marparsaoran dohot Tuhanta nang dohot
donganta sahuria dohot donganta sahaporseaon? Nda didok do di ayat 3 i:
Mauas do tondingku di Debata, di Debata na mangolu i, andigan pe tolhas ahu,
asa huida bohi ni Debata?
Garida tahe, maradu tarilu do parPsalmen i ala sai dipandok tu ibana: Didia
do Debatam? Diingot ibana ma muse paboa na udur do ibana na jolo rap dohot
angka natorop manopot Bagas ni Debata, huhut marsoara olopolop dohot
pujipujian rap dohot angka na laho marari raya. Nda songon i do nuaeng
panghilalaanta di tonga ni na masa on? Ala ni sahit masa on, gabe disosoi do
hita asa unang jo marminggu di Bagas Joro ni Tuhanta i! Ue tahe, ampit situtu
ma panghilalaan ni parPsalmen on nuaeng tu hita di ombas on!
Alai nang pe songon i panghilalaan n parPsalmen i, ianggo haporseaonna
ndang muba ndang mose tu Tuhanna! Manontong do ibana marhaposan tu
Debatana, jala sai dipapujipuji ibana do tongtong Tuhanna, jala sai tongtong do
dihatindangkon ibana paboa Debata do hatuaon ni bohina.
Antong ale angka dongan! Sada apulapul na sumurung ma Barita Na Uli on
nuaeng di hita. Manontong ma hita tutu marhaposan holan tu Debata,
manontong ma hita mamuji pasangap goarNa na badia i, huhut ma sai
tahatindangkon paboa Tuhanta do tutu hatuaonta di tonga ni angka parungkilon
na ro manosaknosak parngoluonta.

Mohon maaf apabila ada kesalahan penulisan kata/kalimat - 3 -

 Tung songon dia pe nuaeng panghalungunhonon ni tondinta di parsaoranta
dohot Tuhanta nang dohot donganta sahaporseaon di tonga ni Bagas JoroNa na
badia i, manontong ma hita manghaposi Tuhanta i. Dokdok pe dipaporsanhon
Tuhanta tu hita, sai tahatindangkon ma: Debata do na mangurupi hita. Ndang
loasonNa hita manontong di parungkilonta, asalma sai hot hita marhosan holan
tu goarNa na badia i.
Antong, rap ma hita mandok: Ale Debatangku, Debatangku! Ho do
haposannami dohot hatuaonnami, sai pujionnami do Ho ro di saleleng ni
lelengna. Amen!
9. Marende B.E. No. 228:1+4 “Jesus Haposanhu”
1. Jesus haposanhu, unang au pasombu au di hapunjungan, di na so
mardongan. Ho tongotong donganhu, di pardalananhu. Jesus haposanhu
unang au pasombu.
4. Masa asi roha mida si pardosa. Jesus do manesa dosa sasudena. Na gogo
mudarNa mamintori hita. Angka asi roha masa di pardosa.
10. Tangiang Pangondianon (Tatangiangkon ma tongtong parungkilon na masa
nuaeng di portibi on, asa tumibu disalpuhon Tuhanta hasusaan on sian
tongatonganta)
11. Marende B.E. No. 128:1–2 “Ditanda Debatanta” (Papungu Pelean)
1. Ditanda Debatanta na di Ibana i. Na metmet nang na balga di nasa bangso i.
Ndang mago loasonNa nang sada sian i. :,: Ditogu do sudena tu hasonangan
i. :,:
2. Ditanda do nasida dibaen porsea do dasida di hataNa naung tu nasida ro. I do
hangoluanNa, I do guruNa i. :,: Laos i do sinjatana mangalo dosa i. :,:
3. Ditanda do nasida dibaen mangkirim di na pinarbagahonNa tongtong rohana
i. Sai saut do bahenonNa sude hataNa i. :,: I do sitiopanna ro di ajalna i. :,:
12. Rap Mandok Tangiang Ale Amanami

Sian las ni rohanami sakeluarga, hupasahat hami

peleannami tu Hurianta:
Keluarga : _____________________________________________
Huta/Wijk : _____________________________________________
Godangna : Rp.___________________(______________________
: ____________________________________________)

“Ale Tuhan, sai palua ma bangsoM sian sidangolon on. Amen!”

Mohon maaf apabila ada kesalahan penulisan kata/kalimat - 4 -