PAGSUSURI SA KULTURAL NA ASPEKTO NG MGA TULANG BULAKENYO

BILANG GABAY PAGTUTURO

Ni: Maritess D. de Lara-Guray

Kilala ang lalawigan ng Bulacan sa pagiging makata ng maraming mamamayan nito.

Kaya naman Tinaguriang Tahanan ng mga Makata at Duyan ng Panitikang Tagalog ito. Sa
pamamagitan ng kanilang mga akda, nalalalaman o nakilala ang kanilang kultura. Ilan lamang
iyon sa mga dahilan kung paano mapatutunayang hindi maaaring mapaghiwalay ang panitikan
at kultura sa isa’t isa. Ngunit nakalulungkot nga lamang sapagkat tila unti-unti nang
nakalilimutan ng mga Pilipino lalo na ng mga kabataang Bulakenyo ang mga akdang katulad ng
mga tulang isinulat ng mga makata. Dagdag pa rito, kung hindi man tumatamlay ay nawawalan
din ng interes ang mga kabataan sa pag-aaral ng tula kaya hindi nabibigyang-pansin at -halaga
ang mga akdang pampanitikang nagtataglay ng maraming aral na makatutulong sa pagharap sa
buhay at ang mga kulturang mayroon ang mga Bulakenyo. Itinuturing din na pangunahing
balakid sa pagbasa at pagpapahalaga sa mga tula ang paniniwala ng mga kabataan na mahirap
diumanong maunawaan ang nilalaman ng mga ito. Dahil sa mga nabanggit ay maituturing na
mahalaga ang anumang pagsusuri sa mga akdang isunulat ng mga ordinaryong makatang
Bulakenyo upang masalamin ang kulturang mayroon ang nasabing lalawigan. Maaaring
makapagdulot ito ng pagsigla ng interes sa pagbasa at pagpapahalaga sa mga nakalimutan nang
akdang pampanitikan.

Sa diwa ng mga nabanggit na, mahalaga ang anumang pagtatangkang suriin ang mga
tulang isinulat ng mga taga-Bulacan sa pangkalahatang pagsusumikap na pasiglahin ang pag-
aaral at pagpapahalaga sa katutubong panitikan. Ginamit sa pag-aaral na ito ang paraang
pagsusuring pangnilalaman (content analysis).

Mga Susing Salita: Tula, Bulakan, Tulang Bulakenyo, Tula Bilang Gabay sa Pagtuturo