NOTE

All the characters and events mentioned in the story are

imaginary. Any insinuation or resemblance to any
person, dead or alive or the resemblance of this story to
any other story is purely coincidental.
Ishq ek haseen khwaab hai.
Wo hum hain jo ishq ko ek bura sapna bana dete hain.
 Chapter 1 : Wo Din Bhi
Kya Din The

Befikar ho kar din ki shuruat karna, maa ke haathon se khana,

kandhe par bag aur gale mein water bottle taang kar jaise taise
school pahuchna, saari fikar chhod kar ground ki taraf bat aur
ball le kar bhagna. Kabhi cricket, kabhi luka chhuppi, toh
kabhi barf paani.
Mera bachpan bhi bilkul sab ki tarah guzra. Iss bachpan ko
hi asli zindagi ka naam dena chahiye. Kyuki jab bachpan
khatm ho jata hai, fir aap ki ladai shuru hoti hai. Ladai –
zindagi se, aap ke apno se, society se, aap ke dosto se, aur
shayad khud se bhi. Iss stage par aa kar aap zindagi jeete nahi,
survive karte ho.
School ke liye subah subah uthna meri zindagi ka sab se
mushkil kaam tha.
‘ Uth jaa, agar jaldi se tayyar ho gaya toh aaj tiffin mein
maggie dungi, warna le jana wahi sukhi sabzi aur roti.’
Ye hain meri mummy. Humesha mujhe uthaane ke liye aise
offers diya karti thi. Meri mummy ke alawa mere ghar mein
papa aur ek badi behen bhi thi. Abhi wo Varanasi se B.A. kar
rahi hain. Papa Station Superintendent hain aur mummy
house keeper. Main shuru se padhne mein utna khaas nahi
tha, par 10th aate aate main sambhal gaya tha. 11th aate hi
padhai ka pressure badhta gaya aur ab mera ghar se nikalna
bas tuition ke liye hota tha. Mind fresh karne ke liye sab ki
tarah maine bhi 2018 mein PUBG install kiya. Aqsar raat
mein main apne dosto ke saath wahin time spend karta.
Waise, myself Aarav.
Chapter 2 : Kuchh Aise The
Mere Dost
Standard 12th mein aate aate mere kuchh dost bahar chale
gaye aur kayi naye dost bhi bane. Rishi, Parv, Harish,
Priyank, Anand, Samarth, ye sab mere classmates the. School
mein main inn ke saath hi saari masti karta aur saari baatein
inn se share karta tha. Anup, Zaeem, Lavanya bhi mere dost
the par wo dusri section mein the. Zaeem, Parv aur Rishi se
main saari baatein share karta tha, unhein harr ek baat batata.
Mere dost kam the, kyuki agar aap apne group mein dhua
daaru aur idhar udhar ki cheezon se door rehte ho, toh log aap
ko kam prefer karte hain. Log aap ke saath comfortable feel
nahi karte. Aur mujhe toh bachpan se sikhaya gaya tha ki
kuchh bhi karna par ye mat karna. Isliye main inn sab se door
rehta tha.
Saare kaam khatm hone ke baad main raat mein apne dosto
ke saath PUBG khelta tha. Main PUBG khelta tha Ankit,
Abhinav, Suket, Karn aur Shobhit ke saath. Ye saare mere
saath Ranchi mein nahi, balki Aurangabad mein rehte the.
Abhinav aur Suket mere cousins the. Ankit, Karn aur Shobhit
mere best friends. Ankit bilkul mere bhai jaisa tha. Door hone
ke bawjood bhi hum ek dusre ko achhi tarah samajh jaate the.
Hum sab aqsar saath mein khelte aur baat karte karte kab
subah hone lagti thi, pata hi nahi chalta.
Humare school mein 12th ke mid term exams start ho chuke
the. Main pehla exam de kar aya tha aur satisfied tha apne
paper se aur ab mera next paper 14th September ko hona tha.
Chapter 3 : Pehli Mulaqat
Mulaqat lavz sab ki zindagi mein kuchh na kuchh maayne
rakhta hai. Yahan meri mulaqat ka bhi ek alag maayna hai.
Ye mulaqat bhi aisi thi, jise mulaqat keh hi nahi sakte.

12th September, 2019

Main aur Ankit raat mein 11 baje PUBG khel rahe the. Bas
hum dono ke hone ki wajah se humara uss din mann nahi lag
rha tha.
‘Ruk, main apni ek friend ko invite karta hun.’ Ankit ne kaha.
Kuchh seconds ke baad hi humare team mein ek ladki aayi.
Unka username 'palakkashyap' tha. Aisa pehli baar hua tha
jab main kisi ladki ke saath PUBG khel raha tha. Jab aap apni
life mein hadd se zyada single hote ho toh kisi ladki ko dekhte
hi aap apne hi mann mein khayali pulao banane lag jaate ho.
Aap ke mann mein aise aise khayal aane lagte hain jo shayad
iss waqt toh mumkin hi na ho.
Match start hote hi Ankit ne Palak se baat karni shuru kar di.
Palak aur Ankit bachpan ke bohot achhe dost the. Wo dono
Aurangabad mein ek hi school mein the. Bachpan ke dost
hone ki wajah se unn dono ki dosti kaafi gehri thi.
Khelte khelte Ankit ne Palak ka mazak udaate huye kaha
'Pata hai Aarav? Palak ne aaj tak khud se khana nahi sikha!’
'Chup! Tab main bachchi thi aur wo bohot puraani baat hai.’
Palak ne gussa dikhate huye kaha.
Jitna khubsoorat unka naam tha, usse kayi zyada khubsoorat
unki awaaz thi. Main unki awaaz sun kar bas muskurata gaya.
Mujhe unki awaaz itni pasand aayi ki pata nahi maine uss
aadhe ghante mein hi kya kya soch liya.
Mulaqat, ye maayna rakhta hai ye lavz meri zindagi mein.
Meri mulaqat, unki awaaz se, uss awaaz mein unki shararaton
se, gusse mein kahe gaye harr ek alfaz se. Meri mulaqat,
Palak ki awaaz se.
Match khatm hua, main offline ho gaya. Mujhe aane wale
paper ki tayyari bhi karni thi.
Chapter 4 : Shuruat
Ek ghante padhne ke baad maine socha ek baar phone check
kar lu. Maine phone uthaya aur whatsapp check kiya. Ankit
ne mujhe text kiya tha 'Bhai jaldi, apni ek badhiya si photo
de.’
‘Kyu kya hua? Photo kyu chahiye?’ Maine reply kiya.
‘Tu photo de. Baaki baatein baad mein.’ Usne text kiya.
Maine recent ki ek photo Ankit ko bhej di. Usne photo dekha
aur seen kar ke chhod diya. Mujhe uss waqt bohot ajeeb laga.
Main waapas se apne kaam mein lag gaya. Kareeb 10 minute
baad ek baar fir Ankit ka message aya 'Bhai Palak ne teri
photo maangi thi.’
Mujhe uss par vishwas hi nahi hua. Ek toh meri qismat pehle
se hi itni kharab. Upar se koi ladki saamne se aa kar meri
photo maange, ye toh shayad sapne mein hi mumkin tha.
Maine sab se pehle uss se screenshot maanga. Ankit ne mujhe
saare messages dikhaye.
Palak ne sach mein Ankit se mere photos ke baare mein baat
ki thi. Ankit ne jab Palak ko photo bheja toh Palak ne reply
kiya 'Nice.’
Main confuse ho gaya. Pata nahi unhe photo pasand aayi thi
ya nahi. Main unhe achha laga tha ya nahi. Par unhone meri
photos maangi thi, yahi mere liye bohot badi baat thi.
Mere jaise ladko ki yahi baat ajeeb hoti hai. Koi ladki humse
naam bhi puchh le, toh hum ye tak soch lete hain ki shaadi ke
baad humare kitne bachche honge. Haha, ye baat ajeeb zaroor
hai, par aap uss waqt khud ko rok hi nahi paate ye sab baatein
sochne se.
Agle din jab maine PUBG khola toh maine dekha ki Ankit
bhi online tha. Maine use jaldi se add kiya.
'Palak ko invite kar na.’ Maine excited ho kar kaha.
'Ye sab baad mein karna, padh le jaa ke.’ Ankit ne mazak
udaate huye kaha.
Uss waqt toh Palak nahi aayi, isliye main raat ka intezaar
karne laga.
Chapter 5 : Baat Aage Badhi
Raat hote hi main fir se PUBG par online aya. 'Palak kyu nahi
aa rahi?’ Maine Ankit se puchha.
‘Ruk bulata hoon' Ankit ne kaha.
'Aa rahi hai, ruk jaa 5 minute' Ankit ne thodi der baad kaha.
Theek 10 minute baad wo aayi. ‘Hello’ Palak ne aate hi kaha.
'Hi Palak' Maine fatak se reply diya.
‘Aarav tere hi intezaar mein tha.’ Ankit ne haste huye kaha.
'Achha! Kyu?’ Palak ne Ankit se puchha.
'Achha wo gaana aap ne gaya tha?’ Palak ne mujh se puchha.
‘Kaun sa gaana? Main kab se gaana gaane laga?’ Maine
hichkichate huye kaha.
'Itne bhi bhole mat bano aap! Sab bataya hai mujhe Ankit ne
aur recording bhi bheji thi aap ki.’ Palak ne mujhse kaha.
'Palak tum ne bataya nahi, photo kaisi thi jo tum ne maangi
thi.’ Ankit ne chidhaate huye kaha.
‘Are chup reh pagal.’ Palak ne haste huye kaha.
Hum teeno ne uss din kaafi baatein ki. Khelne se zyada uss
din humnein baatein ki.
Kuchh log aise hote hain jin se agar aap baat karo toh aap ko
lagta hi nahi ki pehli baar baat kar rahe ho. Jaise kitne saalon
se jaante ho aap uss shaqs ko. Palak bhi bilkul waisi hi thi.
Zara sa bhi waqt nahi laga aur unhone mujhse kaafi achhi
jaan pehchan bana li. Maine PUBG par unki profile picture
dekhi. Aviator glasses mein Palak hadd se zyada cute lag rahi
thi. Maine toh photo dekh kar hi andaza laga liya tha ki yahan
mera kuchh nahi hone wala. Ye kitni khubsoorat, aur main
kahan...
Do teen din guzre par harr waqt mera dhyan Palak par hi
rehta. Mere maths ke paper mein bhi main unke baare mein
hi sochta raha. Mujhe khud mein bohot ajeeb lagne laga ki jis
ladki ko maine aaj tak dekha tak nahi hai, uske baare mein
main itna zyada kyun soch raha hoon. Unke baare mein soch
kar mujhe khushi bhi milti aur ye bhi feel hota ki ye aakhir
kar kya raha hoon main.
Maine ye baat Ankit ko batayi. Usne bhi mera mazaak udaate
huye kaha 'Tu toh usey jaanta tak nahi.’
3-4 din beetne ke baad mujhe ye ehsaas ho gaya tha ki ye koi
normal attraction nahi hai. Jo bhi hai, real hai.
Maine iss hi dauraan ek poem likhi. Ek pyaari si kavita jiska
title maine rakha “May be She is you”. Maine use likha aur
personal chat mein Palak ko bhej diya. Uss waqt wo online
nahi thi. Mujhe anxiety hone lagi. Main sochne laga ki pata
nahi ye padh kar wo khush hongi ya nahi. Kahin wo mujh se
baat karna band na kar de. Ye sochte sochte main padhne
chala gaya.
Ek ghante baad maine phone check kiya toh dekha Palak ne
mujhe reply kiya tha.
‘Ohhhh myyy Goddd! Mere liye likha aap ne. I am gonna
cry.’ Palak ka ye message sab kuchh keh raha tha. Bohot
chhota sa kaam kiya tha maine, lekin unka iss tarah se react
karna mujhe aur zyada unn ke paas lata gaya. Haan pata hai,
ek chhote se message ka kya kya matlab nikal raha hoon, par
aisa ehsaas mujhe pehli baar hua tha.
‘Aap ke liye nahi tha.’ Maine mazaak mein kaha.
‘What? Toh 3 baje raat tak aap aur kiske saath PUBG khelte
ho?’ Palak ne reply kiya.
'Hai ek ladki. Unka naam bhi Palak hai.’ Maine fir se mazak
kiya.
'Mere liye hi tha. Bas baat khatm.’ Palak ne reply kiya.
'PUBG?’ Maine puchha.
'Haan aaiye.’ Palak ne reply kiya.
Chapter 6 : Pyaar Ka Izhaar
Palak se baaton ka silsila aage badha. Wo jitna mujhse baat
karti, main utna kareeb jaane laga. Harr shaqs ki zindagi mein
aisa hota hai. Ye ehsaas poore zindagi ka sab se khubsoorat
ehsaas hota hai, wo shuruat ki baatein, wo haseen si
muskurahat jo aap ke chehre par aa jaati hai. Aur wo bhi uss
shaqs ke ek message milne par hi.
Mujhe ye baat puchhne mein kuchh din lage aur kaise bhi
himmat juta kar maine unse puchh hi liya 'Aap committed ho
ya single?’
'Mera boyfriend hai.’ Unka reply aya.
Maine ye reply bilkul bhi expect nahi kiya tha. Bohot bura
laga mujhe ye sunn kar. Fir bhi mujhe bharosa nahi hua.
Mujhe laga Palak mujhse mazak kar rahi hain. Maine bachi
huyi ummeed le kar unhe text kiya 'Photo dikhaiye zara apne
boyfriend ki.’
Kuchh seconds mein hi unhone photo bhej di. Black jacket
mein ek ladka aur wahi tha unka boyfriend.
Main bohot niraash ho gaya. Maine photo dekhi aur fir mujhe
kuchh reply karne ka mann nahi hua. Kuchh seconds baad hi
Palak ka message aya 'Kya hua aap ko?’
'Toh sach mein aap ka ek boyfriend hai.’ Maine udaas ho kar
kaha.
‘Mujhe laga Ankit ne aap ko bataya hoga. Isliye maine aap
ko photo bhej di. Mujhe agar pata hota ki aap ko ye sun kar
achha nahi lagega toh main aap ko kabhi nahi batati.’ Palak
ne reply kiya.
Mujhe apne saare khwaab galat saabit hote huye nazar aa
rahe the. Ab main kaise batata unhe ki main unke baare mein
kya kya soch raha tha. Maine socha yahi waqt hai, jab Palak
ko mujhe sab kuchh bata deni chahiye. Warna baad mein
bachegi toh sirf guilt.
'Palak mujhe pata hai jo main keh raha hoon wo galat hai,
kyuki aap ka ek boyfriend hai. Par main kya karu, main harr
waqt aap ke baare mein soch raha hoon. Bohot waqt se,
infact jab se maine aap se baat karni shuru ki hai, tab se main
aap se ye kehna chahta tha ki I Love You. Aap aisi shaqs ho
jis se aaj tak na main mila hoon, aur naa hi aaj tak kabhi
dekha hai, par fir bhi aap mujhe bohot pasand ho.’ Aur fir
maine send kar diya.
'Aap sach mein pasand karte ho mujhe?’ Palak ka reply aya.
Main type kar hi raha tha ki fir se unke messages aane lage.
‘Aap ne aaj tak mujhe dekha bhi nahi hai, kaise pasand aa
gayi main aap ko?’
'Main janta hoon aap ke mann mein same feelings nahi hain.
Aur main kabhi kisi feeling ki expectation bhi nahi
rakhunga.’ Maine reply kiya.
Palak ne meri baaton ko jis tarah samjha aur jis tarah unhone
mujhe sambhalne ki koshish ki, mujhe unse aur bhi zyada
lagav hone laga. Unhone mujhe bohot samjhaya aur mujhe
aaram karne ko kaha. Kahin na kahin unke mann mein ye
baat thi ki ye ek temporary attraction hai, jo ki kuchh din
mein khatm ho jayega.
Chapter 7 : Unki Fikar
Palak aur meri baat cheet itni badh gayi jitna maine kabhi
socha bhi nahi tha. Hum raat 4 baje tak ek dusre se baatein
karte. Main harr waqt unhe apni feelings batata aur wo
humesha emotional ho jaati. Inn sab baaton ke alawa bhi wo
meri harr baat ka dhyan rakhti thi. Meri tuitions ki timing,
mere papers, PUBG, meri pasand naa pasand, sab kuchh.
Main unse baat karte karte so jata aur wo humesha mere
online aane ka wait karti thi. Wo harr waqt mujh se bas ek
sawal karti 'Koi kisi ko bina dekhe kaise pyaar kar sakta hai?
Aur wo bhi itna zyada.’
Main humesha ek hi jawab deta 'Aap ho hi aisi.’
Kanak ko aqsar ye baat chubti thi ki main unse beintehaan
mohabbat karta hoon aur wo iss baare mein kuchh bhi nahi
kar sakti. Unhone ek din mujhse kaha 'Main agar aap se ek
hafte baat na karu, toh aap sab bhool jaoge. Ye bas ek tarah
ka attraction hai. Please, ek hafte hum baat nahi karenge.’
Mere paas bohot kuchh tha kehne ko, par maine reply mein
khaamoshi bhej di.
3 din beete. Mujhe harr waqt unki kami mehsoos hoti. 3 din
aise beete maano 3 saal. Mujhe aaj bhi yaad hai kaise maine
wo 3 din guzaare the. Mujh se raha nahi gaya. Maine message
kiya 'Nahi ho raha mujh se Palak. Please baat kar lo mujhse.’
Uss din Palak ne mujhe sab se khubsoorat reply kiya.
‘Aap aise ladke ho jise harr ladki chaahegi. Aap se zyada
pyaar aaj tak mujhe kisi ne nahi kiya. Yahan tak ki mere ghar
walon ne bhi nahi.’
Uss raat unhone khud ko bohot kosa. Main unse itna pyaar
kar raha tha, aur unke paas majboori ke alawa kuchh bhi nahi
tha.
Maine bhi unki feelings ko samjha. Par maine unse bas ek
cheez maangi, ki wo iss ek tarfa mohabbat mein kabhi mera
saath nahi chhodengi.
‘Aap kabhi bhulogi nahi na mujhe?’ Maine puchha.
'Aap koi bhulne wali cheez thodi ho.’ Unhone pyara sa reply
diya.
Chapter 8 : Palak Ka Break
Up
Humari achhi baat chal hi rahi thi ki achanak se Palak ne
online ana band kar diya. 2-3 din beet gaye par wo nahi aayi.
Main harr raat unka intezaar karta aur aakhir mein neend aa
jaati toh so jata. Ek din Ankit ne mujhe bataya ki Palak aur
unke boyfriend mein kuchh nok jhok huyi aur isliye un dono
ne breakup kar liya. Aur iss liye Palak online nahi aa rahi.
Maine kisi ko dikhaya nahi, par andar hi andar mujhe itni
khushi ho rahi thi jaise main saatve aasmaan par tha. Jaise
meri harr dua qubool kar li gayi thi. Par mere mann mein ye
bhi sawal tha ki Palak ab waapas kab ayengi. Aur jab ayengi
tab wo pehle ki tarah rahengi ya nahi. Uss hi raat Palak online
aayi. Maine unhe bataya ki mujhe sab pata chala. Maine unhe
samjhane ki koshish ki, ki ye sab toh hota rehta hai. Par Palak
pehle se samjhi huyi thi. Unke behaviour mein bilkul badlaav
nahi aya tha. Wo bilkul pehle ki tarah khush thi, jaise unhe
koi farak hi na pada ho.
Chapter 9 : Tadpana Unki
Niyat Mein Tha
Jaise jaise samay beet raha tha, hum dono ke beech jo bhi tha,
wo aur bhi zyada khubsoorat hota jaa raha tha. Pure din mein
Palak ke saath jo kuchh bhi hota, wo aa kar mujhe bataati thi.
Unhe mere gaane kaafi zyada pasand the. Wo aqsar aa kar
mujhe bataati ki wo school mein wo saare gaane din bhar
gungunaate rehti jinki bhi recording main unhe send karta
tha.
Kanak ye baat bohot achhe se jaanti thi ki mujh se unn ki
dooriyan bardaasht nahi hoti thi. Iss wajah se wo mujhe aur
zyada tadpaati thi. Aur jab jab wo aisa karti, mera pyaar unke
liye aur bhi zyada badhta jata. Maine kayi baar koshish ki
unse unki photos maangne ki, par humesha wo kuchh na
kuchh keh kar taal deti. Main jab bhi unse milne ki baat karta,
wo uss baat ko bhi nakaar deti.
Ankit, Abhinav aur Suket ko maine ek kaam de rakha tha.
Jab bhi Palak instagram par koi photo upload karti, wo mujhe
send karte. Durga Puja ka waqt tha aur Palak ne instagram
par 2-3 photos upload ki thi. Suket ne mujhe screenshots
bheji. Aaj tak Palak se maine puchha nahi, par mujhe aisa
lagta hai ki unka favorite colour black hai. Wo uss black
lehenge mein koi noor ki pari lag rahi thi. Unki ek ek tasveer
mujhe aur bhi zyada bechain kar deta unn se milne ke liye.
Main roz unki taareef karta aur wo sun sun kar pareshan ho
jaati. Wo itni zyada khubsoorat thi ki unki khubsoorati ko
zaahir karna lavzon mein mumkin hi nahi tha. Main humesha
zaahir karne mein naakaam ho jata, aur unhe lagta ki main
mazaak kar raha hoon. Main aaj bhi zaahir nahi kar pata, par
wo hadd se zyada khubsoorat hain.
Chapter 10 : Kuchh Waade
'Main humesha aap ko aise hi pyaar karunga Palak. Aap
meri family ki tarah important ho. Mujhe aaj tak kisi bhi
feeling ne itna khush nahi kiya. Aap ke baare mein sochna
humesha mujhe hadd se zyada khushi deta hai.’ Maine Palak
ko text kiya.
'Itna pyaar kyu? Aakhir kyu? Main toh aap ko kuchh promise
bhi nahi kar sakti. Aap ko bohot achhi achhi ladkiyan
milengi. Aap kyu mere pichhe pade ho?’ Palak ne reply kiya.
Mere paas aaj bhi hazaar wajah hai Palak ko pyaar karne ko.
Aakhir wo hain hi aisi.
26th October, 2019
Samay aa gaya tha Aurangabad jaane ka. Main wahin se
hoon. Aurangabad mein mera pura pariwar rehta hai. 27th ko
main Aurangabad pahucha.
'Bohot paas hain hum. Ek mulaqat toh mil hi sakti hai.’
Maine Palak ko text kiya.
'Main nahi milti kisi se.’ Palak ne reply kiya.
Mujhe bohot ajeeb laga. Mere mann mein kayi khayal aane
lage. Mujhe laga shayad unhe mujhse milne mein koi interest
nahi hai.
4 November ko mujhe waapas Ranchi ke liye nikalna tha.
Maine Palak se kayi baar milne ko bola par harr baar unhone
inkaar kar diya.
2 November ko Ankit ne Palak ko call kiya.
'Bohot busy hai tu? Ek baar milne mein kya problem hai? Aaj
shaam ko ayenge hum dono. Ghar ke bahar rehna.’ Ankit ne
gusse mein kaha.
‘Kinder joy lete aana! Pagal!’ Palak ne reply kiya.
Ye sun kar meri saans mein saans aayi. Uss feeling ko
imagine karo, jab aap kisi se itni mohabbat karte ho aur itni
koshishon ke baad agar wo insaan raazi ho jaaye aap se milne
ke liye. Aap usey pehli baar dekhne wale ho, apni aankhon
ke saamne, aap ke behadd kareeb hone wala hai wo shaqs.
Chapter 11 : Pehli Mulaqat?
2nd November, 2019
Main itna khush tha bas iss khayal se ki pehli baar main Palak
ko dekhne wala hoon, apni nazron ke saamne. Maine bhi
socha ki yeh pehli mulaqat hai toh mujhe unke saamne achha
dikhna hoga. Main parlour gaya aur wahan facial aur hair
dress karwaya. Ghar aa kar maine Ankit ko kuchh shirts
dikhayi aur kaha ki wo select kare, ki main kya pehen kar unn
se milne jaunga. Ankit ne meri help ki shirt pasand karne
mein. Shaam hote hi main aur Ankit nikal gaye Palak ke ghar
ki taraf. Main unn se pehli baar milne wala tha toh maine
socha unke liye kuchh le kar jaaun. Raaste mein maine unke
liye chocolates aur ek rose le liya. Inn sab ke alawa mere
pocket mein ek letter bhi tha, jo ki bohot pyaar se maine Palak
ke liye likha tha. Jaise jaise unka ghar nazdeek aa raha tha,
meri dhadkan tez hoti jaa rahi thi.
'Main theek toh lag raha hoon na? Unse milte waqt main kya
kahunga? Palak ko ye chocolates pasand hain na?’ Maine
nervous ho kar Ankit se puchhna shuru kiya.
'Tu toh aise darr raha hai jaise shaadi karne jaa raha hai.’
Ankit ne mazak udaate huye kaha.
Main aur Ankit aage badhte gaye. Wahan se kuchh door ek
ladki khadi thi. Sky blue top aur black jeans mein ek ladki
humari taraf aa rahi thi.
‘Wo dekh, Palak.’ Ankit ne uss ladki ke taraf ishara kiya.
Maine unki pehli jhalak ko apni aankhon mein abhi tak sajaa
kar rakha hai. Khule baalon mein mujhe wo aur bhi zyada
achhi lag rahi thi. Main jitna unhe dekhta, utna zyada unse
mohabbat karne ka dil karta.
‘Hi.’ Palak ne muskuraate huye mujh se kaha.
Maine unki aankhon mein dekhte huye unki taraf chocolate
badhaya. Main bohot nervous tha aur mujhe kuchh bhi
samajh nahi aa raha tha. Tab hi ek ladka hum teeno ke paas
aa kar khada hua aur usne Palak ki taraf dekhte huye kaha
'Kya kar rahi ho yahan?’
Wo Palak ke bade bhai the.
‘Dosto se mil bhi nahi sakti kya ab?’ Palak ne irritate hote
huye kaha.
‘Ghar ke paas jaa kar milo.’ Palak ke bhai ne gusse mein
kaha.
Wo shayad bhadke huye the kyuki unhone mujhe Palak ko
chocolate dete huye dekha tha. Aur bhadke bhi kyu naa,
aakhir wo behen hain unki. Uske baad hum teeno Palak ke
ghar ki taraf gaye. Wahan khade ho kar humnein bohot saari
baatein ki.
Iss dauraan maine dekha ki Palak apne khule baalon ko
baandhne wali thi. Wo aisa karne hi jaa rahi thi ki maine unhe
rokne ki koshish ki. Par mere kuchh kehne se pehle hi unhone
apne baalon ko khula chhod diya. Humesha se Palak ne meri
baaton ko bina kahe hi samajh liya hai. Unse behtar mujhe
koi nahi samajh sakta. Meri aankhon mein dekh kar wo mera
haal bata sakti thi, ye toh fir bhi ek chhoti se baat thi.
‘Palak ki baaton par kabhi vishwas mat karna.’ Maine Ankit
se kaha.
'Aisa kyu?’ Palak ne mujhse puchha.
'Aap toh kehti thi ki aap bohot buri dikhti ho, par aap toh
hadd se zyada khubsoorat ho.’ Maine haste huye Palak se
kaha.
'Haha, aap bohot cute ho.’ Palak ne mujhe dekhte huye kaha.
Humne uss 30 minute ki mulaqat mein bohot saari baatein ki.
Mujhe laga hi nahi ki main Palak se pehli baar mil raha hoon.
Palak ke saath maine photos click karwaye. Palak ke saath
uss din ki photos meri pehli aur aakhri photos hain.
Shaam se raat hone lagi aur fir main aur Aniket wahan se
apne ghar ki taraf jaane lage.
‘Bye, aisa laga jaise kitne saalon se aap ko jaanti hoon.’
Palak ne jaane se pehle kaha.
Maine bhi unhe Bye kaha aur fir hum apne ghar aa gaye.
Chapter 12 : Jaane Ka Waqt
4th November, 2019
Ab waqt tha Ranchi waapas aane ka. Jab tak main Palak ke
saath ek hi sheher mein tha, main unhe aur bhi zyada nazdeek
mehsoos kar raha tha. Ek alag sa sukoon tha unke kareeb
hone ka. Par ab samay aa gaya tha door jaane ka.
Aisa sab ke saath hota hai. Jisko aap itna azeez maante ho,
uss se door jaane ki feeling sab se buri hoti hai. Bhale hi wo
apka pyaar ho, apka cousin ho, aapka pet ho, ya fir koi bhi
jise aap apne dil ke kaafi kareeb rakhte ho.
‘Bilkul achha nahi lag raha Palak. Aap se door jaane ka
bilkul bhi mann nahi kar raha. Mujhe lagta hai meri tabiyat
kharab ho jayegi ye soch soch kar.’ Maine Palak ko text kiya.
‘Are! Aisa kya ho gaya? Bilkul theek hoge aap. Ankit aur
baaki dosto se mil lijiye jaa kar. Itna mat sochiye. Main toh
humesha rahungi. Dekhiye, abhi bhi hoon.’ Palak ne pyaar se
samjhaya.
Train mein bhi mujhe bilkul neend nahi aayi. A/C ki wajah
se mujhe thand bhi lag rahi thi. Main razaai mein ghus kar
leta hua tha tab hi phone par ek message aya.
‘Train par ho aap? So gaye itni jaldi?’
Wo message Palak ka tha.
‘Yaar Palak, mujhe neend nahi aa rahi. Bilkul achha nahi
lag raha. Ye sab se buri feeling hai mere liye aaj tak ki.’
Maine udaas ho kar reply kiya.
'Achha main hoon na, mujhse baat kariye. Aur udaas kyu
hona hai? Ranchi aur Aurangabad ke beech doori hi kitni
hai.’ Palak ne samjhate huye kaha.
Humne kareeb 2 ghante tak baat ki. Unse baat karte karte
main itna relax feel karne laga ki baat karte huye hi so gaya.
Subah uth kar dekha toh unke messages aaye huye the 'Dekho
toh koi inhe! Inhe neend nahi aa rahi thi aur mujhse pehle hi
so gaye. Ab aap so hi gaye ho toh main purane messages
padh leti hoon. So gaye akele akele, huh!!’
Ye padh kar mujhe itni khushi huyi, ki so jaane ke baad bhi
Palak meri itni fikar karti hain.
Chapter 13 : Gehraayian
Aurangabad se aane ke baad meri aur Palak ki bonding aur
bhi zyada gehri hoti gayi. Aisa kabhi lagta hi nahi ki wo
mujhe ignore karne ki koshish kar rahi ho. Wo humesha
mujhse baat kar ke khush ho jaati aur main bhi unhe apni
feelings bata kar unhe achha feel karata. Hum dono ek dusre
se saari baatein share karte. Aaj humnein kya kya kiya, kya
kya khaya, kis kis se baatein ki, kahan kahan gaye, sab kuchh.
Raatein chhoti padd jaati par humari baatein khatm hone ka
naam hi nahi leti. 4 baje tak unse baatein karna aur 7 baje uth
kar school ke liye tayyar hona ab routine sa ho gaya tha mere
liye.
26th November, 2019
Humein kuchh kaam se Aurangabad fir se jana tha. Iss dafaa
main bas 2 din ke liye jaa raha tha Aurangabad. 27 th
November ko main Aurangabad pahucha aur Ankit, Shobhit
aur Karn se meri mulaqat huyi.
Chapter 14 : Surprise
Kuchh kaam hone ki wajah se iss dafaa main Palak se milne
nahi jaa sakta tha. Maine socha unhe khush kaise kiya jaaye.
Maine ek badhiya sa chocolate Palak ke liye liya aur le kar
Ankit ko de diya. Maine unke liye ek pyara sa letter likha jis
mein maine apne mann ki saari baat likh daali aur wo letter
bhi maine Ankit ko de diya. Mujhe uss din Ranchi ke liye
waapas nikalna tha. Maine Ankit ko keh diya ki jab wo
school jaaye toh ye sab Palak ko de de.
'Kal aap school jaogi na?’ Maine Palak ko text kiya.
‘Nahi, kal chhutti! Yaaaaaaay.’ Unka reply aya.
‘Ankit ne toh bataya ki kal school hai.’ Maine unse puchha.
‘Haan par main nahi jaa rahi.’ Palak ne reply kiya.
‘Kyu? Kal bhar chali jao na aap, please. Uske baad kabhi
mat jana, par please kal chali jao.’ Maine request ki.
‘Kal meri saari friends absent rehne waali hain aur mujhe
bhi bilkul mann nahi hai jaane ka. Waise aap kyu itna force
kar rahe ho school jaane ke liye?’ Palak ne mujh se puchha.
‘Main kal school jaunga. Toh mujhe school mein lagta
rahega na ki aap bhi school mein ho aur main bhi school
mein hoon, toh mujhe akela akela feel nahi hoga. Please bas
ek request maan lo.’ Maine kaise bhi unhe convince karne ki
koshish ki.
'Bade ajeeb hain aap. Theek hai, lekin bas kal ke liye! Palak
ne reply kiya.
Ye message dekhte hi mujhe thoda sukoon mila warna Palak
ko surprise dene ka sara plan bekar chala jata.
Agle din school se aate hi maine sab se pehle apna phone
check kiya. Palak ke ek bhi message nahi the. Maine Ankit
ko call kiya aur us se puchha toh usne bataya ki uss ne mera
kaam kar diya hai.
Maine jaise hi call cut kiya, Palak ke messages aane shuru
huye.
'Ohh myyyy goddddd! That letter! Main kaise batau aap kitne
achhe ho. Pure din school mein main bore hoti rahi aur
aakhir mein jab Ankit ne aa kar mujhe sab kuchh diya toh
mujhe laga ki school aana bekar nahi gaya. Maine 10 se
zyada baar uss letter ko padha aur apni friend ko bhi bataya.
Aap bohot achha likhte ho, aur chocolate kyu bheja aap ne!
Ab aap jab waapas aaoge toh saath mein khayenge use. Aur
kis liye bhej rahe the mujhe school, ab samajh aya.’
Kanak ko itna khush dekh kar mujhe bhi kaafi khushi huyi.
'Aap wo harr cheez karte ho, jo mere liye koi bhi nahi karta.’
Palak ne fir se text kiya.
'Main humesha karunga, aap ke liye kuchh bhi.’ Maine pyaar
se reply kiya.
Humari uss din bohot baatein huyi. Hum dono jitni baatein
karte, utne hi kareeb aate jaate. Palak ne humesha mere
feelings ki respect ki aur humesha saath diya mera jab bhi
mujhe unki zaroorat thi.
Chapter 15 : Ek Sawal
Palak aur mere beech jo bhi tha, wo bohot zyada gehra tha.
Par mere mann mein humesha kuchh sawal aate. Kya humara
rishta humesha aisa hi rahega? Kya Palak meri zindagi mein
kabhi nahi ayengi? Kya main unhe bas ek tarfa pyaar karte
reh jaunga? Aakhir kab tak ye sab chalne wala tha? Kya unhe
koi pasand aa gaya toh wo mujhe chhod kar chali jayengi?
‘Palak aap kabhi mere baare mein sochti ho? Matlab aap ko
aisa nahi lagta ki aap ko koshish karni chahiye mujh par trust
karne ki. Main baaki ladko jaisa nahi hoon. Aap ek baar try
kar ke toh dekho.’ Maine unhe samjhate huye kaha.
'Maine bohot koshish ki, par mujhse nahi ho raha. Aur ye
baat maine aap ko pehle hi kahi thi ki aap mujhse kuchh
ummeed mat rakhna.’ Palak ne reply kiya.
Mujhe bohot bura lag raha tha. Ye baat unhone pehle bhi kahi
thi par iss waqt mera ye sun'ne ka bilkul bhi mann nahi tha.
Maine unko reply nahi kiya aur offline ho gaya.
Agle din Palak ne mujhe message kiya 'Bohot busy lag rhe
hain aap toh. Kya baat hai?’
'Kuchh nahi.’ Maine reply kiya.
'Itna weird kyun?’ Palak ne puchha.
'Main aap ko itni importance deta hoon, itna pyaar karta
hoon. Harr kisi ke saath main aisa behave nahi karta. Par
aap try hi nahi karti mere liye kuchh bhi feel karne ko.’ Maine
udaas ho kar message kiya.
'Shukriya, aap ne mujhe itna importance diya. Jo ki aap sab
ko nahi dete. Iss ehsaan ke liye shukriya.’ Palak ne mujhe
reply kiya.
Aaaaah! Ye sab se bura hota hai jab aap kuchh aur kehna
chahte ho, aur saamne wala samajh baith'ta hai kuchh aur.
Uss din Palak ko bhi maine unki importance batane ko ye
baat kahi thi, par shayad unhone kuchh aur samajh liya.
Kaash, kaash ye cheez maine unse naa kahi hoti. Uss waqt
hum dono ek dusre se koi bhi baat bina soche samjhe keh dete
the. Par mujhe khayal rakhna chahiye tha apni baaton ka.
Chapter 16 : Sab Kuchh
Bikharne Laga
Agle hi din maine Palak ko message kiya 'Kahan hain aap?
Na PUBG, Na koi message?’
Uss din unka reply nahi aya. Maine uss raat unka intezaar
kiya par wo online nahi aayi. Agle din maine fir se unhe
message kiya 'Kya hua aap ko? Theek toh hain aap?’
Maine message bhej kar fir se unka intezaar kiya. Intezaar
mein 2 raatein guzar chuki thi. Agle din main fir se online
aya.
'Hmmm' Palak ne mujhe reply kiya tha.
'Kya hua Palak aap ko? Aap baat kyu nahi kar rahi mujhse?
Mujhe pata hai maine uss din kuchh zyada bol diya. Sorry,
main aap se kuchh bhi nahi maangunga. Aap jaisi bhi ho
meri zindagi mein, waisi hi pasand ho mujhe.’ Maine
apologise kiya.
Ek hafte tak main unke reply ka wait karta raha. Achanak
humari kahani mein full stop lag chuka tha. Iske baad bhi
kayi baar maine unhe messages send ki, par agle ek hafte wo
online hi nahi aayi.
25th December, 2019
'Ye dekh, Palak ne insta par story lagayi thi.’ Suket ne mujhe
Palak ki 2-3 photos bhej kar ye baat kahi.
Unn photos mein Palak bohot hi zyada cute lag rahi thi. Aur
wo grey hoodie unki cuteness par chaar chaand laga raha tha.
Par unki iss story se ye bhi saabit ho chuka tha ki Palak ki
naraazgi mujhse hi hai, isliye wo online nahi aa rahi.
Mujhse raha nahi gaya. Maine Suket ko saari baatein batayi.
Usne meri baat samjhi aur usne Palak se baat karne ki koshish
ki. Unhe samjhane ki bhi koshish ki.
'Unhe keh do ki mere bina rehne ki aadat daal lein.’ Palak ne
Suket ko reply kiya.
Uss din ke baad bhi kayi baar maine Palak se contact karne
ki koshish ki par ya toh wo mere messages ka reply hi nahi
karti ya fir online hi nahi aati. Mujhe harr raat unki yaad aati.
Mujhe wo puraani Palak yaad aane lagi. Main thoda sa bhi
down feel karta, toh wo puri raat mere saath rehti thi. Par ab
unhone meri koi baat nahi suni. Unhone mujhe samajhne se
inkaar kar diya. Main Ankit, Abhinav aur Suket ke saamne,
ya kabhi kabhi akele mein bohot buri tarah roya karta tha.
Aisa shaqs jisne meri zindagi ki harr kamiyon ko bhar diya
tha, jo mujhse bina pyaar kiye harr pal mujhe pyaar mehsoos
karata tha, jo mujhe khud se zyada samajhta tha, ab wo puri
tarah badal chuka tha.
Meri galti kitni badi thi aur uss galti ki kya sazaa honi chahiye
thi, ye mujhe bhi nahi pata. Par jo bhi ho raha tha, wo mujhe
harr roz ek nayi maut de raha tha.
School mein bhi mera mann bilkul nahi lagta. Padhayi likhai
se dhyan bilkul uth chuka tha. Main harr waqt Palak ke baare
mein sochta, aur unhe text karta, jise wo aqsar ignore kar diya
karti thi. Uss dauraan mujhe kayi khayal aise aayein, jo
shayad nahi aane chahiye the.
Chapter 17 : Ek Mauka
10th February, 2020
12th February ki raat ko mujhe Aurangabad ke liye nikalna
tha. Actually, mujhe apni badi behen ki shaadi mein jana tha.
10th February ki raat ko maine Ankit ko call kiya aur use
bataya ki maine socha hai ki jab main Aurangabad aaunga
toh Palak ko Valentine's day par kuchh gift karunga. Iss baar
mere mann mein bohot kuchh tha kehne ko. Isliye maine
unke liye ek letter likha jis mein maine apni saari feelings
utaar di aur hazaar baar unse maafi maangi. Ankit, Suket,
Abhinav aur maine conference call par sab kuchh decide kar
liya ki Palak ko kya dena chahiye gift mein.
13th February, 2020
Main subah subah Aurangabad pahucha. Abhinav, Suket,
Ankit, Karn, Shobhit aur main, hum sab ek jagah mile aur fir
hum sab Palak ke liye gift lene gaye. Dost ya fir cousins aap
ki zindagi mein humesha aap ka saath dete hain, aur aqsar
hum naye logo se milte waqt inhe bhool jaate hain. Par mere
dost itne azeez the ki main jab jab unke paas apni pareshani
le kar jaata, wo hazaar solutions ke saath tayyar rehte the.
Hum sab ne decide kiya ki Palak ko kuchh aisa denge jo wo
ghar le jaa sake. Hum Archies mein gaye aur wahan
dhundhna shuru kiya. Hum sab ne poori dukaan chhan maari
par waisa kuchh nahi dikha humein wahan. Palak ke liye gift
lena bohot mushkil tha humare liye. Hum unhe kuchh zyada
bada bhi nahi de sakte the, aur kuchh aisa bhi dena tha jise
dekh kar unhe khushi mile.
Humne bohot dhundha, par niraasha ke alawa humein kuchh
bhi nahi mila. Shaam hone ke kaaran, humein ghar lautna
pada. Ghar laut kar mera mann nahi maan raha tha. Mujhe
lag raha tha ki agar maine abhi kuchh nahi kiya toh baat aur
bigad jayegi. Mujhe unke liye apne pyaar ko saabit karna tha,
ki mera pyaar aaj bhi utna hi hai, jitna kuchh mahino pehle
tha.
Ankit, Shobhit aur maine fir se scooty nikaali aur hum teeno
fir se nikle gift lene. Hum fir se Archies mein gaye, par iss
baar ghar se bohot door. Bin license aur helmet ke itni door
jana shayad mumkin nahi hota, agar Ankit itna daring na
hota. Humne Palak ke liye artificial gold rose liya aur uske
saath ek chhota sa teddy aur kuchh chocolates. Maine uss
packet mein apna letter dala aur hum nikle Palak ki ghar ki
taraf. Unke ghar ke paas aate hi maine Ankit se kaha 'Main
aage nahi jaunga. Shayad unhe achha na lage mujhe dekh
kar.’
‘Tu hi nahi rahega toh gift kis kaam ka?’ Shobhit ne
samjhaya.
'Nahi main nahi aa raha aage. Tum dono aao use ye sab de
kar, main aage intezaar karta hoon.’ Maine unn dono se
kaha.
Ankit aur Shobhit ne Palak ko call kar ke ghar ke bahar
bulaya aur iss dauraan main unn dono ke aane ka intezaar
karta raha. Meri dhadkan bohot tez ho gayi. Mujhe bohot darr
lag raha tha Palak ke reaction ke baare mein soch kar. Aakhir
kaise react karengi wo.
Kuchh hi der baad Ankit aur Shobhit scooty le kar mere paas
aaye. Maine unhe dekha aur nervous ho gaya.
'De diya gift? Kya kaha Palak ne?’ Maine nervous ho kar
puchha.
'Haan de diya.’ Ankit ne kaha.
‘Kya reaction tha Palak ka? Khush huyi wo?’ Maine Ankit
se puchha.
'Yaar humne use tera gift diya. Wo dekh kar bhadak gayi. Fir
bhi Ankit ne use ye lene ko bola, par wo uss gift ko road ke
kinaare rakh kar apne ghar chali gayi. Mujhe bohot bura
laga yaar.’ Shobhit ne udaas ho kar kaha.
Uss waqt mere dil ke sau tukde ho gaye the. Main iss cheez
ke liye bilkul bhi tayyar nahi tha. Jaise Palak ne sidha mere
dil par khajar maara tha. Jis gift ke pichhe itne emotions ka
haath tha, itni koshisho ka haath tha, aaj wo gift road ke kisi
kinaare par pada hua tha. Ghar aa kar mujhe bilkul achha nahi
lag raha tha isliye uss raat main jaldi hi so gaya.

'Jab aap ko ye baat maaloom hai ki mujhe bilkul bhi nahi

pasand ye sab, toh aap ne gift kyu bheja mujhe?’ Agle din
Palak ne mujhe message kiya.
'Aap ne sach mein wo gift nahi liya?’ Maine Palak se puchha.
‘Aap ka iss tarah se gift bhejna mujhe kitna disturb kar raha
hai, pata hai aap ko?’ Palak ne kaha.
Iss baat se main bohot zyada hurt hua tha. Par fir bhi maine
socha ki Palak se maafi maang lu, jis wajah se wo mujhse
baat nahi kar rahi. Maine uss raat unhe samjhane ki koshish
ki, par wo offline ho gayi. Main apni baat likhta gaya par
unhe padhne wala koi nahi tha. Main puri raat intezaar karta
raha unke online aane ka, par wo nahi aayi.
Pagalon ki tarah main unki inbox khol kar baitha rahta. Main
bheje huye messages seen hone ka wait karta, par kabhi unka
reply nahi ata.
'Palak please baat kar lijiye mujhse, main nahi reh paa raha
aapke bina.’
'Palak main aapke bina pata nahi kya karunga. Paer padh
raha hoon ek baar meri baat samajhne ki koshish kijiye.’
‘Palak mujhe bohot yaad aati hai aapki.’
Iss tarah kayi baar maine unke saamne girgirate huye bheek
maangi. Par unhone ek baar bhi mujhe maaf karna sahi nahi
samjha.
Chapter 18 : Palak Ka
Birthday
1st March, 2020
Palak ka birthday 2nd March ko hai. Mujhe ye baat unhone
bohot pehle batayi thi aur mujhe yaad thi. Mujhe yakeen tha
wo mere messages ka reply nahi karengi, fir bhi maine socha
unhe khush karne ka. Maine unke liye khud se ek gaana likha
aur uski khud se recording ki. Maine unke liye ek collage bhi
banaya, jis mein maine unki poses mein photo click karke
sabko ikaththa kiya. Theek 12 baje maine unhe ye sab send
kiya aur unhe wish kiya 'Happy Birthday Palak.’
Ye likhte hi main unki reply ka wait karne laga. Thodi hi sahi
par mujhe ummeed thi wo zaroor mujhe reply karengi.
Aadhe ghante baad unhone mere messages ka reply kiya.
‘Aap best ho, no matter what! Iss tarah se aaj tak mujhe kisi
ne wish nahi kiya, one of the best wishes.’ Palak ne reply kiya.
Main apni baat kehne hi wala tha ki wo offline ho gayi. Ye
unki feelings thi ya formality, par jo bhi ho, unhone mujhe
reply kiya tha. Unki ek ek reply mujhe saans lene mein
madad karti. Maine decide kiya ki aaj ke din unhe pareshan
na karu, aur isliye main bhi offline ho gaya.
Chapter 19 : Jab Ishq Sar
Chadh Jaaye
Main harr raat tadapta uss puraani Palak ki bas ek jhalak
dekhne ko. Main humesha unhe apni kavitaayein, videos aur
gaane bhejta, unhe ye mehsoos karane ke liye ki main unhe
bohot miss karta hoon.
Mere bohot zyada pareshan karne par wo bas ek baat kehti
'Main badal gayi hoon. Jitni jaldi samajh jaiye, utna achha
hoga.’
Unse baat nahi hoti thi toh main apni asal zindagi bhi theek
se nahi jee pata. Aqsar main apne dosto par chilla padta, aur
meri sochne ki taaqat khatm ho jaati. Main raaton mein akele
bohot rota.
4th May, 2020
Main apni motorcycle par tha. Road kaafi busy tha aur mere
aage ek aur bike thi. Saamne bike wale ne achanak se brakes
lagayi aur main apni speed par control nahi kar paya aur mera
accident ho gaya. Main apni bike se kareeb 4 metre door jaa
gira. Mere pairo mein aur sar par kaafi chot aayi thi. Main jab
ghar pahucha toh papa mujhe hospital le kar gaye. Wahan
maine dressing karwayi aur fir waapas ghar aya. Ankit ko
pata chala toh usne mujhe jaldi se call kiya. Bohot din ho
gaye the humein baat kiye huye.
'Kaise gir gaya? Dhyan kidhar tha?’ Ankit ne puchha.
‘Palak se baat huyi thi teri?’ Maine Ankit se puchha.
‘Hosh mein hai? Maine puchha kuchh!’ Ankit ne gusse mein
kaha.
Humari baat lagbhag aadhe ghante chali. Usse baat karke
mujhe thoda achha feel hua. Ankit humesha se janta hai, ki
mujhe kaise khush karna hai.
Uss raat maine Palak ko message kiya, 'Yaar aap ko bilkul
nazar nahi aa raha kitna pareshan hoon main? Kitna request
kar raha hoon.’
‘'Mujhse baat kar ke aur zyada pareshan ho jaoge aap.’
Palak ne irritate ho kar kaha.
'Mujh se baat kar lo Palak. Bohot zyada down feel kar raha
hoon aaj.’ Maine Palak se kaha.
‘Aap se dosto ki tarah baat ho tab na. Aap toh pyaar
mohabbat wali bakwas karte ho.’ Palak ne gusse mein kaha.
Bohot zyada dard mein tha main uss din. Lekin mere paas koi
aur rasta bhi nahi tha unki dosti ko apnaane ke alawa. Maine
khushi khushi unki baat maani.
'Main aaj ke baad kabhi pyaar vyaar wali baatein nahi
karunga. Main apne aap ko badal lunga Palak. Aap jo bhi
kahein wahi hoga.’ Maine Palak se kaha.
'Hmmm.' Unhone reply kiya.
Chapter 20 : Palak Ki Dosti
Main harr roz unhe kuchh na kuchh message kar deta. Kabhi
memes, kabhi good night, toh kabhi kuchh aur. Aur wo bhi
kabhi kabhi reply kar deti. Main apni baat pure dil se kehta
par unke replies aane mein kaafi waqt lag jaate the. Aur jab
replies aate, toh wo bhi one word.
Mujhe nahi pata dosti kise kehte hain, aur unki dosti kis tarah
ki hoti hai. Par maine apni zindagi mein jitni dosti dekhi hai,
aaj tak aisi nahi dekhi thi. Jahan dosti bhi one sided ho, aur
efforts bas ek taraf se aayein.
Bohot sochne ke baad maine Palak ko ek din message kiya
'Aap ne kaha aap mujhe dost maanti ho, par yahan toh dosti
bhi bas mujhe nibhaani padd rahi hai. Main aap ko disturb
karne laga hoon toh aap befikar ho kar keh dijiye, kyuki
mujhe aisa lagta hai ki mere messages aapko tang karne lage
hain.’
‘Mujhe kisi se baat karne ka mann nahi hai.’ Palak ne reply
kiya.
'Yaar aap please aisa mat karo. Mujhe bohot mann hai aap
ke saath rehne ka.’ Maine request ki.
‘Mat kijiye mujhse baat.’ Palak ne reply kiya.
‘Mujhe aap ke saath rehna hai.’ Maine apni self respect ko
niche rakha aur send kar diya.
Note To The Reader
Agar aap kisi se pyaar karte ho toh uss insaan ko waqt do.
Aisa zaroori nahi ki aap ki aur saamne wale ki feelings ek
jaisi ho. Aap apni zindagi ka kitna waqt uss insaan ko dete
ho, ye bhi matter karta hai. Apka waqt dena bas uss hadd tak
sahi hai jab tak aap apni zindagi ko barbaad hone se rok paa
rahe ho. Palak ko maine humesha waqt diya par unko waqt
dena kabhi bhi mere liye barbaadi ka kaaran nahi bana. Apni
mohabbat mein enjoy karna chahiye, uss se khushi leni
chahiye. Jab aap ko uss mohabbat se dard milne lage, toh wo
mohabbat nahi reh jaati, fir wo aap ke liye bojh ho jaata hai.
Kisi insaan se mohabbat karna aap ki galti nahi hai par unn
se kuchh expect karna aap ki galti hai. Kisi insaan mein
khushiyaan dhundhna aap ki galti hai. Koi bhi insaan aap ki
mohabbat ka mohtaaz nahi ho sakta. Khubsoorti ishq mein
dhundhni chahiye, insaan mein nahi.
Kisi ke liye aap beshaq zaroori ho sakte ho, par harr waqt
nahi. Jaise logo ka aana hum accept karte hain, uss hi tarah
humein logo ka jana bhi accept karna chahiye.
Palak se ishq karna aaj bhi meri marzi nahi hai. Main aaj bhi
unhe apne dil se nikaalne mein naakam hun. Par ye meri
marzi hai, ki uss mohabbat mein main khush rahu, ya harr
waqt hurt hota rahu. Waqt lagta hai, par hum humesha
kamyaab hote hain kisi ko bhulne mein. Uss shaqs ko bhulne
ke baad unki yaadein humare liye ek bura sapna hoga ya fir
ek haseen khwaab, wo aap ke aaj par depend karta hai. Main
bhi shayad unhe ek din bhul jaun par tab tak main apni
mohabbat mein khushi dekhna chahta hoon. Aisi mohabbat
jo kabhi khatm ho toh koi afsos na rahe, bass rahe toh
yaadein, aur aisi yaadein jo humesha mere chehre par ek
muskurahat le aayein.

Kabhi kisi ko bhulaya nahi jaa sakta, log yaadon mein rehte
hain. Waqt harr zakhm bhar deta hai.