Pangalan:

Baitang: Pangkat: Petsa:

Paghahambing: Sa Likod ng Maskara ng Pagkukumpara

Nagagamit ang paghahambing sa pagbuo ng alinman sa bugtong, sawikain o kasabihan
(eupemistikong pahayag) (F8WG-Ia-c-17)

Alamin Natin!
Magandang umaga! Sana ay nakasunod ka pa rin nang maayos sa ating mga
aralin. Ngayon tunghayan mo ang ikaapat na modyul para sa unang markahan.

Gawing gabay ang mga sumusunod na layunin para sa lubusang pagkatuto:

1. Natutukoy ang dalawang-uri ng paghahambing.
2. Nakabubuo ng mga pangungusap alinsunod sa konsepto ng paghahambing.
3. Nagagamit ang paghahambing sa pagbuo ng alinman sa bugtong, sawikain
o kasabihan.

Subukin Natin!
Simulan mo rito. Huwag kang mag-alala sa bahaging ito. Sinusukat lamang dito
ang iyong dati ng kaalaman tungkol sa paksa. Suriin ang mga pangungusap sa
ibaba at salungguhitan ang mga salitang nagpapahayag ng paghahambing.

1. Magkasintankad si Keevin at Art.

2. Matalino si Shane ngunit di-hamak na maganda si Ruth.
3. Magkasinghaba ang lapis natin.
4. Ang nilalakad ko ay mas malayo kaysa sa iyo.
5. Higit na maamo ang aming aso kaysa sa aming kapitbahay.

Iwasto ang iyong sagot. Hingin ang susing sagot mula sa iyong guro.

Aralin Natin!
Naging madali ba sa iyo ang unang gawain? Alin sa mga ito ang hindi mo
nasagot nang tama? Huwag kang mag-alala mas mauunawaan mo ang aralin sa
mga susunod pang gawain. Suriin ang ibinigay na mga pangugusap sa ibaba.

1. Magkasintapang si itay at ang pulis.

2. Di-hamak na malapad ang palayan ng Carmen kaysa Kapalong.

1. Sino-sino/Ano-ano ang mga inihahambing sa bawat pangugusap?

2. Magkapareho ba ang katangian ng mga pinaghambing sa unang pangungusap? Sa
pangalawa?
3. Mayroon bang pagkakaiba sa paraan ng paghahambing sa dalawang pangungusap?
Paano nagkakaiba ang mga ito?
 Kapuri-puri ang iyong mga sagot! Napakahusay ng iyong obserbasyon. Makikita
nga sa unang pangungusap na si itay at ang pulis ay may parehong katangian.
Samantala, sa ikalawang pangungusap naman ay mas nakahihigit ang bayan ng
Carmen kaysa Kapalong kung lapad ng palayan ang pag-uusapan.

Ang mga pangungusap sa itaas ay mga halimbawa ng paghahambing. Ang

paghahambing ay ang pagkukumpara ng dalawang bagay na maaring may magkapareho
o magkaibang katangian.

Ito ay may dalawang uri – ang paghahambing na magkatulad at di magkatulad.

Ang paghahambing na magkatulad ay ginagamit sa paghahambing ng dalawang

bagay na pantay ang katangian. Samantala ang paghahambing na di-magkatulad
naman ay ginagamit sa paghahambing ng dalawang bagay na may magkaibang
katangian.

Pansinin sa kahon ang iba’t ibang kataga o salitang ginagamit sa paghahambing.

Mga Kataga/Salitang Ginagamit sa Paghahambing

Magkatulad sing, kasing, makasim,sim
gaya, tulad,kapwa, pareho
Di-Magkatulad Pasahol di-gaano, di-lubha, di-gasino
Palamang Higit, labis, at di-hamak

Huwag kang malito! Ang paghahambing na di-magkatulad ay may dalawang uri.

Ang pasahol ay ginagamit kung ang bagay na hinahambing ay may mas mababang
katangian kaysa sa pinaghambingan. Ang palamang naman ay ginagamit kung mas
nakahihigit ang katangian ng bagay na hinahambing sa pinaghambingan.

Suriin ang dalawang pangungusap.

1. Di-lubhang mainit sa Japan kaysa sa Pilipinas.

2. Higit na mabango ang sampaguita kaysa sa rosas.

Alin sa dalawang pangungusap ang naglalarawan sa pahambing na pasahol? Sa

pahambing na palamang?

Magaling! Naunawaan mo agad ang dalawang uri ng paghahambing na di-

magkatulad. Tama ka, ang unang pangungusap ay isang halimbawa ng paghahambing
na pasahol sapagkat ang Japan ay may mas mababang katangian kaysa sa Pilipinas
kung init ng lugar ang pag-uusapan. Ang ikalawang pangungusap naman ay
paghahambing na palamang. Ito naman ay dahil mas nakahihigit ang sampaguita kaysa
sa rosas kung bango ang pag-uusapan.

Sanggunian: Miranda, L. L., Tapang, A. D., Guerrero, P. A., & Santos, C. L.

(2017). Punla 8 Mga Panitikang Pambansa at Florante at Laura. Rex Book Store, Inc.
 Gawin Natin!
Sa wakas, nabatid mo na ang mga uri ng paghahambing. Palalimin mo rito ang
iyong kaalaman!

Suriin ang mga sumusunod na pangungusap. Tukuyin kung anong uri ng

paghahambing ang ginamit sa mga ito. Isulat ang TLD kung ito ay paghahambing na
magkatulad. Kung ito ay paghahambing na di-magkatulad, tukuyin kung ito ay
palamang o pasahol. Isulat lamang ang buong salita sa patlang.

______1. Parehong mahigpit ang lungsod ng Tagum at Davao sa pagpapatupad ng batas

kontra COVID-19.
______2. Kapwa tapat ang aking mga kapatid sa kanilang mga trabaho.
______3. Higit na nagbibigay-kita ang saging kaysa mangga sa ating komunidad.
______4. Magkasinghaba ang dalawang ilog.
______5. Sa panahon ngayon, di-gaanong mabenta ang gamit kumpara sa pagkain.

Sanayin Natin!
Punan ng ankop na salita ang bawat pangungusap. Piliin lamang sa kahon ang
iyong sagot. Titik lamang ang isulat sa patlang.

1. Ang baboy ay _______ kaysa sa manok.

2. Ang libro at diksyunaro ay ____________.
3. Ang pisngi ng sanggol ay ______ ng rosas.
4. Ang mga Pilipino ay _________ kaysa sa mga Amerikano.
5. Ang bisikleta at motorsiklo ay ______ behikulo ng transportasyon.

a. magkasingkapal b. labis na mabilog c. simpula

d. parehong e. di-gaanong matangkad f. sintatag

Naging madali lang ba sa iyo ang gawain? Tulad ng inaasahan. Magaling!

Tandaan Natin!
Punan mo ng ankop na salita ang patlang upang mabuo ang paglalahat sa iyong
aralin.

Nagkakaroon ng (1)____________ dahil sa pagkakatulad o pagkakaiba ng katangian

ng dalawang bagay. Ang (2) ______________ ay nagaganap kung ang dalawang bagay na
inihahambing ay may pantay o magkatulad na katangian. Samantala, ang (3)
________________ naman ay nabubuo dahil sa hindi pantay na katangian ng dalawang
bagay na inihahambing. Ang huling nabanggit ay mayroong dalawang uri. Nagkakaroon
ng paghahambing na (4)__________ kung mas nakahihigit ang katangian ng bagay na
inihahambing sa pinaghambingan. Kabaliktaran naman nito ang pahambing na (5)
_________. Ito naman ay nagaganap kung mas mababa ang katangian ng bagay na
inihahambing sa pinaghambingan.

Binabati kita sapagkat hindi ka nahirapan sa bahaging ito. Kapuri-puri!

 Suriin Natin!
Handa ka na bang gamitin ang iyong bagong kaalaman? Kayang-kaya mo ang
gawaing ito. Simulan mo na!

Bumuo ng sariling mga pangungusap upang paghambingin ang mga sumusunod

na bagay. Isaalang-alang ang hinhinging uri ng paghahambing sa bawat bilang.

1. Paghahambing na magkatulad : guro at magulang

_______________________________________________________________________________________

2. Paghahambing ma magkatulad : saging at mangga

_______________________________________________________________________________________

3. Paghahambing na di magkatulad : langgam at bubuyog

_______________________________________________________________________________________

4. Paghahambing na palamang : kalabaw at kambing

_______________________________________________________________________________________

5. Paghahambing na pasahol : telebisyon at kompyuter

_______________________________________________________________________________________

Payabungin Natin!
Napag-aralan mo sa nakaraang modyul ang iba’t ibang uri ng karunungang
bayan. Naalala mo pa ba ang mga ito? Kung nakalimutan mo na, balikan mong
muli. Mahalaga ang kaalaman mo sa mga naunang aralin upang mapagtatagumpayan
mo ang susunod na gawain.

Hinahamon ka sa pangwakas na gawaing ito na gamitin ang konsepto ng

paghahambing sa pagbuo ng isang salawikain o kasabihan. Ang bubuoing
karunungang bayan ay maaring patungkol sa iyong pamilya, pag-aaral o sariling
karanasan. Isulat lamang sa kahon ang iyong sagot.

Binabati kita sapagkat napagtagumpayan mo ang mga gawain!

 Pagnilayan Natin!

Natural na nangyayari ang proseso ng paghahambing sa iyong buhay. Hindi ito

maiiwasan hangga’t may pagkakaiba at pagkakatulad kang nakikita sa iyong paligid.
Marapat lamang na sapat ang iyong kaalaman dito. Tandaan, ang bawat isa ay
mahalaga at may kanya-kanyang espesyal na katangian. Natutunan mo man ang iba’t
ibang uri ng paghahambing ngunit hindi mo kailangang ikumpara ang iyong sarili sa
iba. Ikaw ay mahalaga!

Writer: Eric L. Fernandez

Illustrator: Insert Name Here
Template developer: Neil Edward D. Diaz, PDO II – LRMS, Davao del Norte
Susing Sagot

Subukin Natin
1. Magkasintnangkad
2. di-hamak
3. Magkasinghaba
4. mas malayo
5. higit na maao

Gawin Natin
1. TLD
2. TLD
3. Palamang
4. TLD
5. Pasahol

Sanayin Natin
1. b
2. a
3. c
4. e
5. d

Tandaan Natin
1. paghahambing
2. paghahambing na magkatulad
3. paghahambing na di magkatulad
4. palamang
5. pasahol

Suriin Natin
- Sariling sagot ng mag-aaral

Payabungin Natin
- Sariling sagot ng mag-aaral