maaaring isa ka sa limampu’t pito

ni Severino Hermoso

maaaring estudyante ka sa ateneo o lasalle o up o ust

o kaya manedyer sa bangko o kilalang kainan
maaaring artista o musikero
o kaya serbidor sa mga bar na sosyal
o nagmamay ari ng malaking bahay sa ayala alabang
maaari ding tagaluto ka sa malaking hotel
o simpleng tagapagbenta sa isang turo turo
nagtitinda ng samalamig at manggang may bagoong sa kanto
o mahilig sa starbucks o seattle’s best
o ikaw na adik sa facebook at twitter
nagkakandarapa sa latest ipod, psp o wii
o di na makapaghintay na mapasakamay ang iphone o blackberry
maaaring may magara kang sportscar
o kaya maraming body guard sa iyong harapan
modelo ka ng kilalang mga brand
sapatos pabango kotse pulitiko o damit
at ang suot mo’y mahal pa sa nalilimos ng mga batang paslit
kahit sino ka pa
ano mang yaman mayroon o salat ka
hindi ka maliligtas
kapag umatake na naman sila
dahil wala kang ginawa para matigil
ang ganitong pangmamasaker
maaaring ikaw ang isa
doon sa pitumpu’t pitong bumulagta
humandusay na saklot ng pangamba
humalik kay kamatayang di pa ibig makasama
kung saan ang sariling dugo ang umagos sa katawan at sa lupa
na pinangyarihan ng krimeng tatatak na sa kasaysayan ng mga aba
at hanggang ngayon di pa nananagot ang mga may sala