*KOHHRAN CHHUAHSANHO THU TUIPUI ṬHENKHAT*

_July 22_

*TAKSA TLANNA*

_*Rom 8:22-23*_

Zanin ah hian zirlai hlawm thar "Kohhran chhuahsanho thu tuipui ṭhenkhat" tih hlawma a hmasa ber
*"Taksa Tlanna"* tih kan zir ho dawn a ni.

Taksa tlanna thu hi Hun hnuhnung thu leh Chhandamna thu nena inzawm tlat a ni a, he thu kalsual
puitute chuan lei taksa ngeia Lei thar luaha kumsâng lalrama lut turin an inzirtir ṭhin.

*1. Tlanna tih thu awmzia:*

Tlanna tih hi sapṭawng chuan Atonement tih a ni a, a awmzia chu 'Vawikhata thawh zawh' emaw 'Thil
pakhatah' emaw tihna a ni. Leiba, Hrêng a tang, dahkham thil khul chhuak, mi ruk bo tlanna sum pek leh
eitur puk dahkham thil hlu lak let nana tlan chhuah leh te, hrenbeh na laka chhanchhuah na ti te pawh
in a sawi theih awme.

Thuthlung Hlui ah tlanna hi chi hrang hrang kan hmu, Exodus 30 ah Israel fate hri laka humhim an nih na
atana an nunna tlanna sum Lapa hnena pek tur thu te, Leveticus 25 ah ram inlei sak emaw in hman tirte
Jubillee kuma tlan let lehna te leh Numbers 3 ah Israel fatir tlanna chungchangte kan hmu.

Heng lo pawh Exodus 13 ah ran leh mihring fatir, chhul keu hmasa tlan na te, Pathian in *Tlanna Ni* a
ruat sak hun a lo thlena an sual thawina atana halral inthawina maichama an hlan thu Leveticus 16 ah
kan hmu bawk. Thuthlung Hlui hunah chuan hei hi ni pawimawh tak ani.

Thuthlung Thar hun ah erawh chuan Krista thihna in tlanna buatsaih sak kan ni a, tlanna kawng dang
reng reng a awmlo. Hei hi Bible bu pumpui Thupui pawimawh ber ani.
*2. Zirtîrna pênhlehten taksa tlanna an zirtîr dan:*

Mizorama zirtîrna pênhlehte hian taksa tlanna thu hi an tuipui viau hlawm a. An zirtîr dân bulpui ber chu
thi lova nung chunga kum sâng lalram luh a ni.

An ngaih dânah chuan kohhrante hi rinna thuthlung buaipui tâwk kan ni a, thi lova a nung chunga kum
sâng lalram lût tura ruat bîk tlêm tế awmin lei taksa tihdanglama thihna tem lova kum sâng lalrama lût
tûr angin an in ngaia, he hun hi an nghakhlel ve em em ani. Mi ṭhenkhat, a hring a hrana Pathian tawk
tura inngai pawh an awm bawk.

Heng zinga pahnih chauh hi han sawi ta ila. Lalpa Kohhran Thar inti, Khuangtuaha leh Châna pâwlte
(tuna Ziona pawlte nita) thupui ber chu 'lei ro luahna leh taksa tlanna' a ni. Pathianin Israel te chu a
kalsan tawh a, anmahniho hi Israel thar an inti a. Pathianin a nung chungin 'nun hlun ramah' a hruai
dâwn niin an ngai thîn. 'Lei thar Lalpa lungawi kum, zîng êng mawi zâm ruai, Israel-te ram hlun damna
thlifim lênnaah chuan kan la lêng ang,' tiin nghâkhlel takin an thlîr a ni.

Chhunkhama pâwlte pawhin thlarau chhandamna a awm lo va, taksa tlanna chauh awmin an zirtîr a. Thi
tawh lo tûrah

inngaiin an pâwla mite thi an awm pawhin, "A thih tawh te chuan kan pâwl a ni tawh lo," tiin vui pawh
an vui duh lo thîn.

Hetiang anga taksa tlanna ring pawl, mahse thlarau chhandamna awm tura ngai tho si pawh Mizoram
ah engemaw zat an la awm bawka, kan sawi vek senglo ang. Heng ho hian ringtu zawng zawng huapın
an

sawi meuh lo, mi tlêm tế thlan bîk, Israel thar emaw, Israel thlah emaw, Mizo zînga mi tlêm tế emaw bîk
tân taksa tlanna hi awm tûrin an ngai a. A then chuan mi 1,44,000 chiah ni tûrin an ngai.

Helai thu a mi 144000 chungchang hi han umzui deuh hret ila.

  He lai a 144000 te mi thenkhatin Thlarau lam lsrael an tih hi a ni chiah lo in a lang. Bible in min kawh
hmuh chu Juda hnam atanga thlan chhuah niin, heng thlan chhuahte hi Tribulation period lai a mi an ni
a, A biktak a Pathianin tuma tihnat theih loh tur a a chhinchhiah tlat annih avangin lsua ringtu , piangthar
anni ngei ang. An chalah chhinchhiahna maktak an la pu zui a, chu chhinchiahna chu   Beramno leh Pa
hming an pu theuh bawk.

Thupuan bu hian rawng anbawl dan tur chiang takin min hrilh lem lo, mahse comentary siam tute chuan
tribulation huna ringtu kohhranho rawngbawltute lakbo an nih hnuah, an rawngbawlna chhunzawm tura
Pathian ruatte an nih hi an pawm.

Chuvangin tribulation periodah pawh hian Antichrist thiltihtheihna pawhin a dal theih loh khawpin heng
mi 144000 te hian rawng anbawl dawn a ni. An rawngbawlna avang hian mi sang tamtakin   Chanchin Tha
an hriain an pawm anga, thlamuanna tak tak leh chhandamna pe theitu an zawn lsua Krista hi a ni tih an
hre tawh dawn a ni.

       Heng mite awm dan hi a danglam bik hle nghe nghe. Hmeichhe laka intibawlhhlawh lo, nula
thianghlim ang anni dawn a ni. An kaa dawt thu sawi chhuak ngai reng reng lo sawiselbo an ni dawn a ni.
(Thup.14:1-5)

        Mi then khatin Kohhran hi lsrael thar kanni an ti a, heng mite hi kohhran a belte pawh an awm,
mahse, Bible chiktak a en chuan Israel leh kohhran hi a thliar fel thlap si. Chuvangin heng mite hi Juda
hnam 12 atang ngei a rawn chhuak tur an ni e. Heng mite hi Pathianin a tan a ruatlawkte ngei anni bawk.

        Heng pawlchhuak ho hian Tribulation huna chhandamna awm leh dan tur sawi hian an awih duh lo
viau. Tharau Thianghlim seng chhoh a nih tawh chuan engtinnge mi an pianthar theih ang?  An ti fo mai.
Mahse, Thuthlung Hlui lamah a hnathawh ang chiah khan he hunah pawh hian Thlarau Thianghlim hian
hna a thawk dawn a ni.

*3. Taksa tlanna Bible leh Kohhran Thurin ah:*

_*Rom 8:23 Chu chang a ni lo, keini ngei pawh, Thlarau hmahruai neitute hian, fa kan nihna (kan taksa
tlanna chu) nghakin, keini meuh pawh kan rilruin kan rum bawk si.*_ tih kan hmu a, helai chang hi Bible
ah _Taksa tlanna_ tih ngialngan taka inziahna kan hmuh chhun a ni awme.

Helai ah hian taksa tlanna chu _'fa nihna'_ sawi fiahna ṭawngkam atana hman ani. Paula hian engkim
siam thar a nihna hmun lei thar leh van thar ah chuan taksa leh thlarau neiin, nimahsela van taksa pu a
nih tur thu a sawi ani.

I Kor 15 te, Phillippi 3:21 te kan en chuan kan thawh leh hun chuan 'taksa ngeiin kan tho leh dawn' tih
kan hmu a; mahse van taksa, tihdanglam taksa tisa leh ruh pawh nei, ei a in thei bawk, Lal Isua tholeh
taksa ang khan thuam kan ni dawn ani.

Tirhkohte Thuvawn (Apostol creed) ah *'Taksa thawhlehna ka ringa'* tih te, Kohhran Thurin- X ah *'Ni
hnuhnungah chuan mitthite chu kaihthawhin an awm anga.....'* tih thu tarlan a ni. Hei bakah pawh
Nicea Thuvawn ah *'Mitthi thawhlehna leh khawvel lo awm leh tura nunna chu ka thlir'* tih kan hmu
bawk.

Kan rama Kohhran chhuahsan hoten thi lova kum sâng lalram ban tlang tur anga an insawi hi Bible
zirtirna a ni lova, 1 Kor 15:50 ah tisa leh thisen in Pathian ram a luah loh tur kan hmu a ni.

Hetiang zirtirna diklo hian Tirhkoh Paula hun lai aṭang tawhin kohhran ho zingah bu a khuar nasa hle
tawh tih helai bible chang pahnih lek aṭang pawh hian kan hre thei ani.

2 Timothy 2:18 chung mite chuan, “Thawhlehna chu tunah pawh a ni tawh daih,” tiin thutak kawng chu
an kal kawisan a, mi thenkhatte rinna an tibo thin a.

1 Kor 15:12 Tin, Krista thu, mitthi zing ata kaihthawhin a awm tih an hrilh si chuan, engtizia nge in zinga
thenkhatin, “Mitthi thawhlehna reng reng a awm lo,” in tih ni?
Hetiang zirtirna dolet tur hian Paula hian theihtawp a chhuah ṭhin a. Lehkha pawh kohhran leh mimal
hnenah a thawn chhuak hnem em em ani.

Tunlai kan rama zirtirna diklo vawrh darhtute pawh hian, mi ṭhenkhat rinna tibovin, thutak kawng chu an
hawisan a, thlarauvin Krista ah chuan kan tho leh tawh alawm, hei lo hi thawhlehna hran beisei tur a
awm tawh chuang lo tiin mi tam tak an hruai bo mek ani.

Nimahsela, Isuan hetiang hian thawhlehna thu a sawi.... _"Chutih hunah chuan mitthi ten Pathian fapa
aw an hria ang a, a hria apiang an nung ang" (Johana 5:25)._ Tin, hetiang hian a sawi zui a, _"Heng hi
mak ti suh u, a hun a thleng dawn ta; chutih hunah chuan thlana awm zawng zawngin a aw an hria anga,
an chhuak vek ang; thil ṭha ti tute chu thiam changin an tho leh anga, thil sual titute chu thiam loh
changin an tho leh ang" (Johana 5:28-29)._

Lal Isuan thawhlehna thu a sawi aṭang hian ringtuten thlarau kan chan hi sual ata nunnaa kan luhnaṭ,
kan thawhlehna a ni; tin, nikin ni a amah Lal Isua a lo kal leh hunah ringtute thawhlehna a awm leh dawn
tih chiang takin min hriattir a, chumi hunah chuan kan thiltih ang zela rorel sak in kan awm dawn bawk
ani.

Ringtu kan nih hi sual aṭanga kan thawhlehna (nunna a kan luhna) a ni a, chu chu Thupuan 20:6 a
'Thawhlehna hmasa' ti a kan hmuh kha a ni. Chuta telte chungah chuan thihna in thu reng a nei tawh
lovanga, nikin ni ah Lal Isuan chatuana a hnena chawl turin kan taksa thlana awm tawh nen min kaitho
leh vek dawn ani.

Taksa tlanna chungchang ah hian chhut dan hrang hrang a lo awm tawh ṭhina, thlir dan dang pawh a lo
la chhuak leh in a rinawm, hetiang hun a lo thlen pawha Kohhran hoten kan hriat reng tur chu thil sawt
lovah inti buai lovin kan tlanna min siam sak tu Lal Isua min thawh sak na a lungawi mai hi a ṭha in a him
ber ani.

*Sawi ho tur:*

*1. Taksa tlanna awmzia nia kan hriat sawi ho ni se.*

*2. Lal Isua min tlanna hian eng chen nge a huam?*