PANUNURING PAMPELIKULA I. PAMAGAT 2 Cool 2 Be 4Gotten II. MGA TAUHAN Khalil Ramos bilang Felix Salonga – Siya ay isang matalinong mag-aaral sa ikalawang antas ng paaralan sa lungsod ng Pampanga na laging napapag-isa sa kanyang buhay eskwela. Ethan Salvador bilang Magnus Snyder – Siya ay isang Filipino-America na lumipat sa paaralan kung saan din nag-aaral si Felix at unang naging kaibigan nito simula noong magpatulong siya sa kanyang mga aralin matapos makakuha ng mabababang grado. Jameson Blake bilang Maximillian “Maxim” Snyder – Siya ang nakababatang kapatid ni Magnus Snyder na magiging mitsa ng isang hindi magandang pangyayari sa kabuuang kwento. Ana Capri bilang Demetria Snyder – Siya ang ina nina Magnus at Maxim Snyder. Peewee O’Hara bilang Mrs. Salvacion - Isa siya sa mga guro nina Felix at Magnus. Joel Saracho bilang Mr. Pangan - Isa siya sa mga guro nina Felix at Magnus. Meanne Espinosa bilang Mrs. Echiverri - Isa siya sa mga guro nina Felix at Magnus. Ruby Ruiz bilang Gng. Salonga – Siya ang ina ni Felix Salonga. Bajun Lacap bilang G. Salonga – Siya ang ama ni Felix Salonga. III. BUOD NG PELIKULA Ang kwentong ito ay patungkol sa buhay ng isang matalinong mag-aaral na si Felix Salonga at kung paano niya diniskubre ang kanyang tunay na pagkatao matapos niyang makilala si Magnus Snyder at ang kapatid nitong si Maxim Snyder. Nagsimula ang kanilang pagkakakilala noong lumipat sa pinapasukang paaralan ni Felix ang magkapatid na Snyder at naging kamag-aral niya ang isa sa mga ito na si Magnus. Sa pagdaan ng mga araw ay tila nahihirapan sa leksyon si Magnus dahilan ng mabababang marka na kanyang nakukuha. Buhat nito ay lumapit si Magnus kay Felix upang magpatulong sa kanilang mga aralin na may kapalit palang bayad kahit hindi humihingi si Felix. Lumipas pa ang mga araw at unti-unting nahulog ang loob ni Felix kay Magnus. Nalaman niya ang istorya ng buhay ng magkapatid na Snyder at ang dahilan ni Magnus kung bakit siya nagpapaturo kay Felix sa mga aralin. Nalaman ni Felix na ang dahilang pinanghahawakan ni Magnus ay upang makarating sila sa Amerika tulad ng ipinangako sa kanila ng kanilang ama kapag nakapagtapos silang magkapatid ng pag-aaral. Nakaramdam ng pagdadalawang isip si Felix gayung kung mangyari man ito ay magkakahiwalay silang dalawa na kaniyang kinatatakutan. Ngunit tila gumuho ang mundo ni Magnus ng madinig niya ang pag-uusap ni Felix at ni Demetria na kanyang ina patungkol sa walang katotohanang pangako ng kanilang ama. Nawalan ng gana si Magnus sa pag-aaral at sinimulang iwasan si Felix. Nalaman ni Felix mula naman kay Maxim na plano nitong kitilin ang buhay ng sariling ina dahil ang alam niyang paraan para sila ay kuhanin ng kanilang ama papuntang ibang bansa ay ang pagpanaw ni Demetria habang menor de edad pa ang magkapatid. Sa paglipas pa ng mga araw ay napatalsik sa paaralan ang magkapatid na Snyder at isang araw ay inantay ni Magnus si Felix sa kanyang paglabas sa paaralan upang kahit sandali’y makapagliwaliw sila. Nagpunta sila sa dating tirahan ni Felix na natabunan ng lahar matas ang pagsabog ng Bulkang Pinatubo at doon sila ay nakapag-usap ng masinsinan at nalaman ni Magnus ang mga pinagdaanan at kwento ng buhay ni Felix. Namangha siya na sa kabila ng mga iyon ay nanatiling matatag si Felix. Gabi ng araw na iyon habang nakainom si Magnus at sa bahay sana nina Felix siya manunuluyan sa gabing iyon ay binanggit ni Felix sa kanya ang plano ni Maxim na kitilin ang buhay ng kanilang sariling ina. Napabalikwas si Magnus at umuwi sa kanila upang bantay ang kanyang ina at kapatid. Ngunit tila walang makakapigil sa plano ni Maxim kung kaya’t siya ay nag-aya na magdaos ng selebrasyon ng kaarawan ng kanilang ina upang sa araw na iyon ay isakatuparan niya ang plano. Dumating ang araw ng kaarawan ni Demetria at si Felix lamang ang nakapilit kay Magnus na sumama. Sa kabilang banda, sa araw na iyon din napagdesisyunan ni Felix na umamin kay Magnus ngunit hindi naging maganda ang kinalabasan nito. Nasira ang kanilang pagkakaibigan at tuluyang natupad ni Maxim ang kaniyang plano subalit sa hindi inaasahang pangyayari ay maging si Magnus ay binawian ng buhay. Naiwang mag-isa at miserable si Maxim at punong-puno ng paghihinagpis maging si Felix. IV. BANGHAY NG MGA PANGYAYARI (STORY GRAMMAR) A. Tagpuan Sa isang paaralang pangsekondarya sa lungsod ng Pampanga ang unang tagpuan sa pelikula. Sumunod naman ay sa tahanan ng mga Snyder, sa lugar ng dating tinitirhan ni Felix na natabunan ng lahar matapos ang pagsabog ng Bulkang Pinatubo at maging sa bagong tahanan ni Felix at ng kanyang pamilya. Naging tagpuan din ang isa sa mga dalampasigan sa Subic. B. Protagonista Ang pangunahing tauhan sa kwento ay si Felix Salonga kung saan ay umikot sa kanyang buhay ang bawat kaganapan sa pelikula. C. Antagonista Ang naging kontrabida sa kwentong ito ay si Maxim Snyder na pinagmulan ng mga hindi magagandang nangyari sa buhay ni Felix. D. Suliranin Sa kwentong ito, masasabing ang naging sulirinan at sentro ng mga ‘di magagandang pangyayari sa bawat eksena ay ang kagustuhan nina Magnus at Maxim Snyder na makarating ng Amerika sa puder ng kanilang ama dahil naniniwala silang mayroon silang mas magandang hinaharap sa bansang iyon. Buhat ng pangnanais nilang ito, naniwala sila sa mga paraang nalalaman nila upang maisakatuparan ang mithiin nilang iyon. Isa pang naging suliranin ang pagdiskubre ni Felix sa kanyang sekswalidad kung kayang itinago niya ito kay Magnus upang hindi siya layuan nito. E. Mga Kaugnay na Pangyayari o Mga Pagsubok sa Paglutas ng Suliranin Sa paglutas ng suliraning nabanggit, naniwala si Magnus na ang kanilang pagtatapos sa sekondaryang paaralan ang mag-uudyok sa pagkamit ng kanilang inaasam na makaalis ng bansa kung kaya naman siya ay nagpatulong sa kanyang pag-aaral kay Felix. Kasalungat ng mabuting paraang ito, ang nalalaman ni Maxim na paraan ay ang pagkitil sa buhay ng kanilang sariling ina na humantong sa kanya upang hikayatin ang kanyang mga kaibigan na isakatuparan ito kapalit ng pera. Sa kabilang banda, sa parte naman ni Felix ay tila naging daan si Maxim upang lalo niyang mailabas ang tinatago niyang nararamdaman o lihim sa paraang sensitibo. Ang pagmamahal namang nararamdaman ni Felix para kay Magnus ang nag-udyok sa kanya upang pigilan ang mga paraan ng magkapatid upang hindi na sila makaalis ng bansa at manatili silang magkasama ni Magnus sa pagtupad sa kanilang napag- usapang pangarap matapos nilang mag-usap ng masinsinan. F. Mga ibinunga Sa paglipas ng panahon na magkakasama sina Felix, Manus at Maxim ay tuluyang nakilala ni Felix ang kanyang sarili at gawing matanggap ito na nagtulak sa kanya upang aminin ang katotohanan kay Magnus. Subalit, nasira ang iniingatang pagkakaibigan nina Felix at Magnus matapos tila biglain ni Felix ang pag-amin niya kay Magnus tungkol sa kanyang nararamdaman at tunay na pagkatao sa hindi magandang paraan. Ang mga pangyayaring ito rin ay nagbunga ng kapinsalaan sa kani-kanilang mga buhay. Isinakatuparan ni Maxim ang kanyang planong kitilin ang buhay ng kanilang ina ngunit sa hindi inaasahang pangyayari ay kasabay rin nitong mawawalan ng buhay ang kanyang kapatid na si Magnus kung kaya’t imbis kaginhawaan ang kanyang makamit at pag-iisa at pagbagabag ng konsensya ang kanyang natamo. V. PAKSA O TEMA Ayon kay Petersen Vargas na direktor ng pelikulang 2 Cool 2 Be 4Gotten, ang tema o paksa ng istoryang ito ay umiikot sa pagdiskubre at pagkilala sa sarili ng isang tao at kung ano ang koneksyon nito sa pag-ibig o pagmamahal. VI.MGA ASPEKTONG TEKNIKAL A. Sinematograpiya Ang teknik ng pagkuha sa bawat anggulo kasabay ng paggalaw ng kamera at timpla ng mga ilaw na ginamit sa pelikula ay masasabi kong mahusay at hindi nagbibigay ng pagkahilo para sa mga manonoood. Sakto ang mga pagkuha sa bawat eksena na nagbibigay ng pokus sa mga tauhan o kahit lulan na bumibida sa partikular na eksenang nagaganap kung kaya’t lubhang maiintindihan ng mga manonood ang nangyayari. Subalit, mayroong mga parte na hindi gaanong malinaw ang pagkakakuha sa mga eksena na nakasisira sa pokus at pagkahumaling sa eksenang napapanood. B. Musika Ang mga musikang ginamit sa pelikula ay naghahatid ng kakaibang pakiramdam sa mga manonoood kapag napapakinggan habang naghihintay ng mga susunod na kaganapan sa bawat eksena. Akma rin ang mga ito sa bawat emosyong ipinapakita sa bawat eksena na siyang mas nagpapaganda sa pelikula dahil mas nakakapukaw at nakakadala ito ng damdamin. C. Visual effects Dahil sa paggamit ng produksyon ng mga makatotohanang lugar at kasangkapan ay hindi na naging komplikado ang mga visual effects na inilapat sa pag-eedit ng pelikula upang makabuo ng isang makatotohanang sining. Masasabi kong maayos at naaangkop ang mga ito kung kaya’t hindi ito kapansin-pansin at mas nakapagbigay buhay at diin pa nga sa kalagayan o sitwasyong ipinapakita sa bawat eksena. Hindi nakakalito ang ginawang pagsasaayos at pagdudugtong-dugtong ng mga eksena kung kaya’t hindi naging magulo ang daloy ng istorya. Naging makatotohanan din ang kapanahunan ng pelikula buhat ng biswal na pagsasaayos nito. D. Set Design Ang mga lugar na isinama, kagamitang napili at pagkakaayos ng mga ito ay hindi nasobrahan at akmang-akma lamang sa tema ng istorya at kwento ng bawat eksena. Naging mas makatotohanan ang bawat kaganapan buhat ng detalyadong pagsasaayos ng kanilang mga lulan na nagpapakita ng pagkanatural ng mga ito at tila ba ay sa makalumang panahon talaga kinuhanan ang buong pelikula. Nakakatuwa na parang dinadala ang mga manonood sa kapanahunan ng istorya buhat ng mga nakikitang paligid sa pelikula. VII. TEORYANG PAMPANITIKAN Ang kwento ng pelikulang ito ay may teoryang pampanitikan na realismo. Ito ay sa kadahilanang ang inspirasyon ng akda ng manunulat na si Jason Paul Laxamana ay hango rin sa pinagdaanan noon ng direktor ng pelikula na si Petersen Vargas na parte ng LGBTQ Community. Ang pelikulang ito ay isinagawa upang bigyang representasyon ang katotohanang pinagdadaanan at nangyayari sa buhay ng bawat indibidwal na nagsisimula pa lamang diskubrihin ang kanyang tunay na pagkatao lalo na sa aspeto ng sekswalidad. Ipinapakita rin sa pelikula ang nararanasan ng ating bayan na kahirapan at ang mga paraan at mentalidad ng karamihang Pilipino na makakatulong sa kaalwanan ng buhay kung mangingibambansa upang doon magtrabaho. VIII. SIMBOLISMO Sa pelikulang ito, ang karakter ni Khalil Ramos bilang si Felix Salonga ay sumisimbolo sa hirap na pinagdaraanan ng isang tao sa pagtuklas ng sarili sa iba’t-ibang aspeto ng pagkatao, lalo sa binigyang diin ng pelikula na sekswalidad, habang namumulat sa reyalidad. Siya din ay isang simbolo ng pag-ibig. Bukod dito, ang pelikulang ito ay tila may mas malalim pang sinisimbolo sa pamamagitan ng magkapatid na Snyder at ng mga guro sa pelikula, ito ay ang mentalidad ng karamihang Pilipino na higit na aalwan ang buhay kung makakarating sa ibang bansa at doon makikipagsapalaran imbis na paglingkuran ang ating sariling bayan. Sinisimbolo nila ang pagtangkilik sa ibang bansa at kung gaano kataas ang tingin ng iba sa mga dayuhan. Sa kabila nito, sa eksenang nagkaroon ng pag-uusap ang magkaibigang Felix at Magnus sa lugar kung saan natabunan ng lahar ang dating tirahan nina Felix matapos sumabog ang bulkang Pinatubo, naging simbolo muli si Felix ng kakaibang katatagan at pagiging positibo ng mga Pilipino kumpara sa ibang lahi sa pagharap sa mga hamon ng buhay. IX. KABUUANG MENSAHE NG PELIKULA Sa kabuuan, nais iparating ng pelikulang ito na bilang taong nakakakita at nakakaramdam ay dapat nating intindihin ang pinagdadaanan ng iba kahit sa simpleng paraan dahil wala tayong nalalaman kung ano nga ba ang tunay at mga pinagdadaan ng bawat isa. Ngunit sinasabi na bago natin tanggapin at mahalin ang iba ay dapat muna nating kilalanin, tanggapin at mahalin ang ating mga sarili kasabay ng pagdiskubre natin sa ating tunay na pagkatao at nararamdaman. Walang masama sa pagpapakatotoo maliban na lamang kung mayroon maargabyadong tao o hindi kaya naman ay manlilinlang ng iba para lamang magustuhan nila. Bukod sa mga ito, hindi maiiwasan ang mga problema at paghihirap ngunit mas mainam kung maging bukas ang isipan ng bawat isa sa pagharap sa mga ito upang hindi malihis ng landas. Sa pag-abot ng mga pangarap, tama lamang na gawin ang lahat at huwag palampasin ang bawat oportunidad ngunit kung ang magiging paraan ay taliwas sa kabutihan ay siguradong bandang huli ay ito’y ating pagsisisihan buhat ng magiging masamang epekto nito hindi lamang sa iba kundi maging sa ating mga sarili.