Epekto ng Patuloy na Pagusbong ng mga Makabagong Salita
na Ginagamit ng mga Kabataan
Ano-ano na nga ba ang mga
salitang patuloy na dumaragdag sa atin? Marami tayong mga salitang naririnig na tila bago sa ating pandinig, habang tumatagal ang panahon mas nadadagdagan pa ito at patuloy na dumarami. Sino nga ba ang karaniwang nariringgan natin nito? Ano ang mga epekto nito? Sa ating bansa mapapansin ang patuloy na pagusbong ng ating makabagong salita na patuloy rin ginagamit ng mga kabataan sa panahon ngayon. Maraming mga salitang bago sa pandinig ng mga nakatatanda pero kung sa mga kabataan ito ay hindi na bago. Habang nausad ang taon maraming salita ang nadaragdag sa atin ito ay dahil na rin sa iba na ang panahon ng mga kabataan ngayon hindi na tulad noon na puro pormal o malalalim ang mga kahulugan ang mga nagagamit. Karaniwan sa mga kabataan ngayon ay hindi na alam gamitin ang matatalinhagang o ang mga salitang malalalim dahil na sinanay nila ang sariling gamitin na lamang ang makabagong salita. Dahilan sa kagustuhan ng mga kabataan na mapadali ang komunikasyon sa ibang tao kaya pinaiikli nila ang mga salita o “shortcut”. Ang pagnanais na makisabay sa kung ano ang uso at pagkakaroon ng sariling pagkakakilanlan ng grupo ay nagdudulot upang mabuo ang mga salitang pabebe, jejemon, bekimon, mga wikang fliptop, mga ginawang bagong terminolohiya sa mga malalalim na salita, tulad ng “beki” na ang ibig sabihin ay “bakla”, at “mudrabels” na ang ibig sabihin ay “nanay”. Mabilis itong kumalat o matutunan ng iba sapagkat laganap ang iba’t ibang uri ng media sa bansa. Ang isyung ito ang lubhang makakaapekto sa kulturang kinagisnan sa oras na hindi natin gamitin ang sariling wika. Sa pagsilang ng makabagong wika hindi na napagtutuunan ng pansin ang wikang Pilipino halimbawa na lamang ang mga wika sa mga literaturang Ibong Adarna kung susuriin marahil wala pa sa kalhati ng mga salitang naroon ang alam natin ang ibig sabihin. Ito ay dahil nasakop na ang ating isipan ng makamodernong salita. Ang isyung ito magdudulot ng kalituhan sa ating pagkakakilanlan sa oras na ibaon natin ang wikang kinagisnan. Kung patuloy itong uusbong at gagamitin ng mga kabataan patuloy na rin makakalimutan ang mga nakagisnang salita. Hindi maganda ang epekto nito dahil ang wika ang sumisimbolo sa ating kinagisnan.