Тодор Скаловски (21 јануари 1909, Тетово – 1 јули 2004,
Скопје) беше истакнат македонски композитор, хорски и симфониски диригент. Автор е на голем број вокални, вокално-инструментални и сценски композиции, а покрај творештвото и диригирањето се занимавал со педагошка работа и организација на музичкиот живот во современа Македонија.
Музичко образование завршил во Белград во 1930 година, а
диригентството го усовршувал на конзерваториумот „Моцартеум“ во Салцбург. Од 1936 година почнал да работи како наставник по музика и диригент на повеќе хорови во Скопје, Белград и Битола. Скаловски бил долгогодишен соработник на Ловро Матачиќ. Основач е, прв шеф-диригент и директор на Македонската филхармонија во 1944, на Македонската опера и балет во 1947, како и прв заменик главен уредник на Македонското радио. Како организатор на музичкиот живот, Скаловски е основач на неколку меѓународни музички фестивали во Македонија, какви што се „Охридско лето“ и биеналниот меѓународен хорски фестивал во Тетово – ТЕХО. Еден е од првите членови на Сојузот на музичките уметници и Сојузот на композиторите на Македонија, а од 1975 година е член на Македонската Академија на Науките и Уметностите (МАНУ).
Тодор Скаловски е познат по креативната употреба на македонските
фолклорни мотиви, традицијата и црковнословенската музика во неговите композиции. Со употребата на хармонија, тонални и модални системи и лиризмот, тој е дел од генерацијата творци како Стефан Гајдов, Живко Фирфов, Трајко Прокопиев, Глигор Смокварски, Панче Пешев, Петре Богданов- Кочко, кои со своите дела го создадоа македонскиот национален музички стил. Скаловски е и меѓу првите македонски диригенти што настапиле надвор од Македонија, во Полска, Чешка, Австрија, Италија, Финска, Бугарија, Унгарија.
Негови најпознати дела се: „Македонско оро“, „Македонска хумореска“,
„Величанија Кирилу и Методију“, „Песна за Гоце“, „Рапсодија 2“, „Шарпланинска приспивна“, „Свита Балтепе“, „Ораториум Земја“, „Камен“, „Денес над Македонија“ (музички аранжман на мелодијата на државната химна на Република Македонија) и уште многу други оркестарски, вокални, хорски, солистички и камерни дела.
Добитник е на бројни награди, признанија, одликувања, благодарници,
повелби, плакети и статуети како што се: највисока награда на Република Македонија за животно дело, „11. Октомври“ (1966); највисока награда за музичко творештво на некогашна СФРЈ, „АВНОЈ“ (1981); награда за животно дело „Трајко Прокопиев“ од Сојузот на композиторите на Македонија, (1992); златна плакета „Македонска филхармонија, 55 години“ (1999) и др